Sūkta 16

आ त्वा॑ वहंतु॒ हर॑यो॒ वृष॑णं॒ सोम॑पीतये । इंद्र॑ त्वा॒ सूर॑चक्षसः ॥

ā́ tvā vahantu hárayo vṛ́ṣaṇam sómapītaye ǀ índra tvā sū́racakṣasaḥ ǁ

इ॒मा धा॒ना घृ॑त॒स्नुवो॒ हरी॑ इ॒होप॑ वक्षतः । इंद्रं॑ सु॒खत॑मे॒ रथे॑ ॥

imā́ dhānā́ ghṛtasnúvo hárī ihópa vakṣataḥ ǀ índram sukhátame ráthe ǁ

इंद्रं॑ प्रा॒तर्ह॑वामह॒ इंद्रं॑ प्रय॒त्य॑ध्व॒रे । इंद्रं॒ सोम॑स्य पी॒तये॑ ॥

índram prātárhavāmaha índram prayatyádhvaré ǀ índram sómasya pītáye ǁ

उप॑ नः सु॒तमा ग॑हि॒ हरि॑भिरिंद्र के॒शिभिः॑ । सु॒ते हि त्वा॒ हवा॑महे ॥

úpa naḥ sutámā́ gahi háribhirindra keśíbhiḥ ǀ suté hí tvā hávāmahe ǁ

सेमं नः॒ स्तोम॒मा ग॒ह्युपे॒दं सव॑नं सु॒तं । गौ॒रो न तृ॑षि॒तः पि॑ब ॥

sémám naḥ stómamā́ gahyúpedám sávanam sutám ǀ gauró ná tṛṣitáḥ piba ǁ

इ॒मे सोमा॑स॒ इंद॑वः सु॒तासो॒ अधि॑ ब॒र्हिषि॑ । ताँ इं॑द्र॒ सह॑से पिब ॥

imé sómāsa índavaḥ sutā́so ádhi barhíṣi ǀ tā́m̐ indra sáhase piba ǁ

अ॒यं ते॒ स्तोमो॑ अग्रि॒यो हृ॑दि॒स्पृग॑स्तु॒ शंत॑मः । अथा॒ सोमं॑ सु॒तं पि॑ब ॥

ayám te stómo agriyó hṛdispṛ́gastu śáṃtamaḥ ǀ áthā sómam sutám piba ǁ

विश्व॒मित्सव॑नं सु॒तमिंद्रो॒ मदा॑य गच्छति । वृ॒त्र॒हा सोम॑पीतये ॥

víśvamítsávanam sutámíndro mádāya gacchati ǀ vṛtrahā́ sómapītaye ǁ

सेमं नः॒ काम॒मा पृ॑ण॒ गोभि॒रश्वैः॑ शतक्रतो । स्तवा॑म त्वा स्वा॒ध्यः॑ ॥

sémám naḥ kā́mamā́ pṛṇa góbhiráśvaiḥ śatakrato ǀ stávāma tvā svādhyáḥ ǁ