ಸೂಕ್ತ 176

ಮತ್ಸಿ॑ ನೋ॒ ವಸ್ಯ॑ಇಷ್ಟಯ॒ ಇಂದ್ರ॑ಮಿಂದೋ॒ ವೃಷಾ ವಿ॑ಶ । ಋ॒ಘಾ॒ಯಮಾ॑ಣ ಇನ್ವಸಿ॒ ಶತ್ರು॒ಮಂತಿ॒ ನ ವಿಂ॑ದಸಿ ॥

मत्सि॑ नो॒ वस्य॑इष्टय॒ इंद्र॑मिंदो॒ वृषा वि॑श । ऋ॒घा॒यमा॑ण इन्वसि॒ शत्रु॒मंति॒ न विं॑दसि ॥

ತಸ್ಮಿ॒ನ್ನಾ ವೇ॑ಶಯಾ॒ ಗಿರೋ॒ ಯ ಏಕ॑ಶ್ಚರ್ಷಣೀ॒ನಾಂ । ಅನು॑ ಸ್ವ॒ಧಾ ಯಮು॒ಪ್ಯತೇ॒ ಯವಂ॒ ನ ಚರ್ಕೃ॑ಷ॒ದ್ವೃಷಾ॑ ॥

तस्मि॒न्ना वे॑शया॒ गिरो॒ य एक॑श्चर्षणी॒नां । अनु॑ स्व॒धा यमु॒प्यते॒ यवं॒ न चर्कृ॑ष॒द्वृषा॑ ॥

ಯಸ್ಯ॒ ವಿಶ್ವಾ॑ನಿ॒ ಹಸ್ತ॑ಯೋಃ॒ ಪಂಚ॑ ಕ್ಷಿತೀ॒ನಾಂ ವಸು॑ । ಸ್ಪಾ॒ಶಯ॑ಸ್ವ॒ ಯೋ ಅ॑ಸ್ಮ॒ಧ್ರುಗ್ದಿ॒ವ್ಯೇವಾ॒ಶನಿ॑ರ್ಜಹಿ ॥

यस्य॒ विश्वा॑नि॒ हस्त॑योः॒ पंच॑ क्षिती॒नां वसु॑ । स्पा॒शय॑स्व॒ यो अ॑स्म॒ध्रुग्दि॒व्येवा॒शनि॑र्जहि ॥

ಅಸು॑ನ್ವಂತಂ ಸಮಂ ಜಹಿ ದೂ॒ಣಾಶಂ॒ ಯೋ ನ ತೇ॒ ಮಯಃ॑ । ಅ॒ಸ್ಮಭ್ಯ॑ಮಸ್ಯ॒ ವೇದ॑ನಂ ದ॒ದ್ಧಿ ಸೂ॒ರಿಶ್ಚಿ॑ದೋಹತೇ ॥

असु॑न्वंतं समं जहि दू॒णाशं॒ यो न ते॒ मयः॑ । अ॒स्मभ्य॑मस्य॒ वेद॑नं द॒द्धि सू॒रिश्चि॑दोहते ॥

ಆವೋ॒ ಯಸ್ಯ॑ ದ್ವಿ॒ಬರ್ಹ॑ಸೋ॒ಽರ್ಕೇಷು॑ ಸಾನು॒ಷಗಸ॑ತ್ । ಆ॒ಜಾವಿಂದ್ರ॑ಸ್ಯೇಂದೋ॒ ಪ್ರಾವೋ॒ ವಾಜೇ॑ಷು ವಾ॒ಜಿನಂ॑ ॥

आवो॒ यस्य॑ द्वि॒बर्ह॑सो॒ऽर्केषु॑ सानु॒षगस॑त् । आ॒जाविंद्र॑स्येंदो॒ प्रावो॒ वाजे॑षु वा॒जिनं॑ ॥

ಯಥಾ॒ ಪೂರ್ವೇ॑ಭ್ಯೋ ಜರಿ॒ತೃಭ್ಯ॑ ಇಂದ್ರ॒ ಮಯ॑ ಇ॒ವಾಪೋ॒ ನ ತೃಷ್ಯ॑ತೇ ಬ॒ಭೂಥ॑ । ತಾಮನು॑ ತ್ವಾ ನಿ॒ವಿದಂ॑ ಜೋಹವೀಮಿ ವಿ॒ದ್ಯಾಮೇ॒ಷಂ ವೃ॒ಜನಂ॑ ಜೀ॒ರದಾ॑ನುಂ ॥

यथा॒ पूर्वे॑भ्यो जरि॒तृभ्य॑ इंद्र॒ मय॑ इ॒वापो॒ न तृष्य॑ते ब॒भूथ॑ । तामनु॑ त्वा नि॒विदं॑ जोहवीमि वि॒द्यामे॒षं वृ॒जनं॑ जी॒रदा॑नुं ॥