Sūkta 15

इंद्र॒ सोमं॒ पिब॑ ऋ॒तुना त्वा॑ विशं॒त्विंद॑वः । म॒त्स॒रास॒स्तदो॑कसः ॥

índra sómam píba ṛtúnā́ tvā viśantvíndavaḥ ǀ matsarā́sastádokasaḥ ǁ

मरु॑तः॒ पिब॑त ऋ॒तुना॑ पो॒त्राद्य॒ज्ञं पु॑नीतन । यू॒यं हि ष्ठा सु॑दानवः ॥

márutaḥ píbata ṛtúnā potrā́dyajñám punītana ǀ yūyám hí ṣṭhā́ sudānavaḥ ǁ

अ॒भि य॒ज्ञं गृ॑णीहि नो॒ ग्नावो॒ नेष्टः॒ पिब॑ ऋ॒तुना॑ । त्वं हि र॑त्न॒धा असि॑ ॥

abhí yajñám gṛṇīhi no gnā́vo néṣṭaḥ píba ṛtúnā ǀ tvám hí ratnadhā́ ási ǁ

अग्ने॑ दे॒वाँ इ॒हा व॑ह सा॒दया॒ योनि॑षु त्रि॒षु । परि॑ भूष॒ पिब॑ ऋ॒तुना॑ ॥

ágne devā́m̐ ihā́ vaha sādáyā yóniṣu triṣú ǀ pári bhūṣa píba ṛtúnā ǁ

ब्राह्म॑णादिंद्र॒ राध॑सः॒ पिबा॒ सोम॑मृ॒तूँरनु॑ । तवेद्धि स॒ख्यमस्तृ॑तं ॥

brā́hmaṇādindra rā́dhasaḥ píbā sómamṛtū́m̐ránu ǀ távéddhí sakhyámástṛtam ǁ

यु॒वं दक्षं॑ धृतव्रत॒ मित्रा॑वरुण दू॒ळभं॑ । ऋ॒तुना॑ य॒ज्ञमा॑शाथे ॥

yuvám dákṣam dhṛtavrata mítrāvaruṇa dūḷábham ǀ ṛtúnā yajñámāśāthe ǁ

द्र॒वि॒णो॒दा द्रवि॑णसो॒ ग्राव॑हस्तासो अध्व॒रे । य॒ज्ञेषु॑ दे॒वमी॑ळते ॥

draviṇodā́ dráviṇaso grā́vahastāso adhvaré ǀ yajñéṣu devámīḷate ǁ

द्र॒वि॒णो॒दा द॑दातु नो॒ वसू॑नि॒ यानि॑ शृण्वि॒रे । दे॒वेषु॒ ता व॑नामहे ॥

draviṇodā́ dadātu no vásūni yā́ni śṛṇviré ǀ devéṣu tā́ vanāmahe ǁ

द्र॒वि॒णो॒दाः पि॑पीषति जु॒होत॒ प्र च॑ तिष्ठत । ने॒ष्ट्रादृ॒तुभि॑रिष्यत ॥

draviṇodā́ḥ pipīṣati juhóta prá ca tiṣṭhata ǀ neṣṭrā́dṛtúbhiriṣyata ǁ

यत्त्वा॑ तु॒रीय॑मृ॒तुभि॒र्द्रवि॑णोदो॒ यजा॑महे । अध॑ स्मा नो द॒दिर्भ॑व ॥

yáttvā turī́yamṛtúbhirdráviṇodo yájāmahe ǀ ádha smā no dadírbhava ǁ

अश्वि॑ना॒ पिब॑तं॒ मधु॒ दीद्य॑ग्नी शुचिव्रता । ऋ॒तुना॑ यज्ञवाहसा ॥

áśvinā píbatam mádhu dī́dyagnī śucivratā ǀ ṛtúnā yajñavāhasā ǁ

गार्ह॑पत्येन संत्य ऋ॒तुना॑ यज्ञ॒नीर॑सि । दे॒वान्दे॑वय॒ते य॑ज ॥

gā́rhapatyena santya ṛtúnā yajñanī́rasi ǀ devā́ndevayaté yaja ǁ