ಇಂದ್ರನ ಆಹ್ವಾನ ಮತ್ತು ಸೋಮಪಾನ - ಸ್ತುತಿ ಮತ್ತು ಕೃಪೆ

ಆ ತ್ವಾ॑ ವಹಂತು॒ ಹರ॑ಯೋ॒ ವೃಷ॑ಣಂ॒ ಸೋಮ॑ಪೀತಯೇ । ಇಂದ್ರ॑ ತ್ವಾ॒ ಸೂರ॑ಚಕ್ಷಸಃ ॥

आ त्वा॑ वहंतु॒ हर॑यो॒ वृष॑णं॒ सोम॑पीतये । इंद्र॑ त्वा॒ सूर॑चक्षसः ॥

ಇ॒ಮಾ ಧಾ॒ನಾ ಘೃ॑ತ॒ಸ್ನುವೋ॒ ಹರೀ॑ ಇ॒ಹೋಪ॑ ವಕ್ಷತಃ । ಇಂದ್ರಂ॑ ಸು॒ಖತ॑ಮೇ॒ ರಥೇ॑ ॥

इ॒मा धा॒ना घृ॑त॒स्नुवो॒ हरी॑ इ॒होप॑ वक्षतः । इंद्रं॑ सु॒खत॑मे॒ रथे॑ ॥

ಇಂದ್ರಂ॑ ಪ್ರಾ॒ತರ್ಹ॑ವಾಮಹ॒ ಇಂದ್ರಂ॑ ಪ್ರಯ॒ತ್ಯ॑ಧ್ವ॒ರೇ । ಇಂದ್ರಂ॒ ಸೋಮ॑ಸ್ಯ ಪೀ॒ತಯೇ॑ ॥

इंद्रं॑ प्रा॒तर्ह॑वामह॒ इंद्रं॑ प्रय॒त्य॑ध्व॒रे । इंद्रं॒ सोम॑स्य पी॒तये॑ ॥

ಉಪ॑ ನಃ ಸು॒ತಮಾ ಗ॑ಹಿ॒ ಹರಿ॑ಭಿರಿಂದ್ರ ಕೇ॒ಶಿಭಿಃ॑ । ಸು॒ತೇ ಹಿ ತ್ವಾ॒ ಹವಾ॑ಮಹೇ ॥

उप॑ नः सु॒तमा ग॑हि॒ हरि॑भिरिंद्र के॒शिभिः॑ । सु॒ते हि त्वा॒ हवा॑महे ॥

ಸೇಮಂ ನಃ॒ ಸ್ತೋಮ॒ಮಾ ಗ॒ಹ್ಯುಪೇ॒ದಂ ಸವ॑ನಂ ಸು॒ತಂ । ಗೌ॒ರೋ ನ ತೃ॑ಷಿ॒ತಃ ಪಿ॑ಬ ॥

सेमं नः॒ स्तोम॒मा ग॒ह्युपे॒दं सव॑नं सु॒तं । गौ॒रो न तृ॑षि॒तः पि॑ब ॥

ಇ॒ಮೇ ಸೋಮಾ॑ಸ॒ ಇಂದ॑ವಃ ಸು॒ತಾಸೋ॒ ಅಧಿ॑ ಬ॒ರ್ಹಿಷಿ॑ । ತಾಁ ಇಂ॑ದ್ರ॒ ಸಹ॑ಸೇ ಪಿಬ ॥

इ॒मे सोमा॑स॒ इंद॑वः सु॒तासो॒ अधि॑ ब॒र्हिषि॑ । ताँ इं॑द्र॒ सह॑से पिब ॥

ಅ॒ಯಂ ತೇ॒ ಸ್ತೋಮೋ॑ ಅಗ್ರಿ॒ಯೋ ಹೃ॑ದಿ॒ಸ್ಪೃಗ॑ಸ್ತು॒ ಶಂತ॑ಮಃ । ಅಥಾ॒ ಸೋಮಂ॑ ಸು॒ತಂ ಪಿ॑ಬ ॥

अ॒यं ते॒ स्तोमो॑ अग्रि॒यो हृ॑दि॒स्पृग॑स्तु॒ शंत॑मः । अथा॒ सोमं॑ सु॒तं पि॑ब ॥

ವಿಶ್ವ॒ಮಿತ್ಸವ॑ನಂ ಸು॒ತಮಿಂದ್ರೋ॒ ಮದಾ॑ಯ ಗಚ್ಛತಿ । ವೃ॒ತ್ರ॒ಹಾ ಸೋಮ॑ಪೀತಯೇ ॥

विश्व॒मित्सव॑नं सु॒तमिंद्रो॒ मदा॑य गच्छति । वृ॒त्र॒हा सोम॑पीतये ॥

ಸೇಮಂ ನಃ॒ ಕಾಮ॒ಮಾ ಪೃ॑ಣ॒ ಗೋಭಿ॒ರಶ್ವೈಃ॑ ಶತಕ್ರತೋ । ಸ್ತವಾ॑ಮ ತ್ವಾ ಸ್ವಾ॒ಧ್ಯಃ॑ ॥

सेमं नः॒ काम॒मा पृ॑ण॒ गोभि॒रश्वैः॑ शतक्रतो । स्तवा॑म त्वा स्वा॒ध्यः॑ ॥