ಈ ಸೂಕ್ತಕ್ಕೆ ಅಡ್ಮಿನ್‌ನಲ್ಲಿ ಕನ್ನಡ ಅಧ್ಯಯನ ಮಾರ್ಗದರ್ಶಿ (Study Guide) ಇನ್ನೂ ರಚನೆಯಾಗಿಲ್ಲ. ಅಡ್ಮಿನ್‌ನಲ್ಲಿ Generate Study Guides ಮೂಲಕ ಕನ್ನಡ ಭಾಷೆಯನ್ನು ಆಯ್ಕೆಮಾಡಿ ರಚಿಸಬಹುದು.
ಅ॒ಸ್ಯ ವಾ॒ಮಸ್ಯ॑ ಪಲಿ॒ತಸ್ಯ॒ ಹೋತು॒ಸ್ತಸ್ಯ॒ ಭ್ರಾತಾ॑ ಮಧ್ಯ॒ಮೋ ಅ॒ಸ್ತ್ಯಶ್ನಃ॑ । ತೃ॒ತೀಯೋ॒ ಭ್ರಾತಾ॑ ಘೃ॒ತಪೃ॑ಷ್ಠೋ ಅ॒ಸ್ಯಾತ್ರಾ॑ಪಶ್ಯಂ ವಿ॒ಶ್ಪತಿಂ॑ ಸ॒ಪ್ತಪು॑ತ್ರಂ ॥
अ॒स्य वा॒मस्य॑ पलि॒तस्य॒ होतु॒स्तस्य॒ भ्राता॑ मध्य॒मो अ॒स्त्यश्नः॑ । तृ॒तीयो॒ भ्राता॑ घृ॒तपृ॑ष्ठो अ॒स्यात्रा॑पश्यं वि॒श्पतिं॑ स॒प्तपु॑त्रं ॥
ಸ॒ಪ್ತ ಯುಂ॑ಜಂತಿ॒ ರಥ॒ಮೇಕ॑ಚಕ್ರ॒ಮೇಕೋ॒ ಅಶ್ವೋ॑ ವಹತಿ ಸ॒ಪ್ತನಾ॑ಮಾ । ತ್ರಿ॒ನಾಭಿ॑ ಚ॒ಕ್ರಮ॒ಜರ॑ಮನ॒ರ್ವಂ ಯತ್ರೇ॒ಮಾ ವಿಶ್ವಾ॒ ಭುವ॒ನಾಧಿ॑ ತ॒ಸ್ಥುಃ ॥
स॒प्त युं॑जंति॒ रथ॒मेक॑चक्र॒मेको॒ अश्वो॑ वहति स॒प्तना॑मा । त्रि॒नाभि॑ च॒क्रम॒जर॑मन॒र्वं यत्रे॒मा विश्वा॒ भुव॒नाधि॑ त॒स्थुः ॥
ಇ॒ಮಂ ರಥ॒ಮಧಿ॒ ಯೇ ಸ॒ಪ್ತ ತ॒ಸ್ಥುಃ ಸ॒ಪ್ತಚ॑ಕ್ರಂ ಸ॒ಪ್ತ ವ॑ಹಂ॒ತ್ಯಶ್ವಾಃ॑ । ಸ॒ಪ್ತ ಸ್ವಸಾ॑ರೋ ಅ॒ಭಿ ಸಂ ನ॑ವಂತೇ॒ ಯತ್ರ॒ ಗವಾಂ॒ ನಿಹಿ॑ತಾ ಸ॒ಪ್ತ ನಾಮ॑ ॥
इ॒मं रथ॒मधि॒ ये स॒प्त त॒स्थुः स॒प्तच॑क्रं स॒प्त व॑हं॒त्यश्वाः॑ । स॒प्त स्वसा॑रो अ॒भि सं न॑वंते॒ यत्र॒ गवां॒ निहि॑ता स॒प्त नाम॑ ॥
ಕೋ ದ॑ದರ್ಶ ಪ್ರಥ॒ಮಂ ಜಾಯ॑ಮಾನಮಸ್ಥ॒ನ್ವಂತಂ॒ ಯದ॑ನ॒ಸ್ಥಾ ಬಿಭ॑ರ್ತಿ । ಭೂಮ್ಯಾ॒ ಅಸು॒ರಸೃ॑ಗಾ॒ತ್ಮಾ ಕ್ವ॑ ಸ್ವಿ॒ತ್ಕೋ ವಿ॒ದ್ವಾಂಸ॒ಮುಪ॑ ಗಾ॒ತ್ಪ್ರಷ್ಟು॑ಮೇ॒ತತ್ ॥
को द॑दर्श प्रथ॒मं जाय॑मानमस्थ॒न्वंतं॒ यद॑न॒स्था बिभ॑र्ति । भूम्या॒ असु॒रसृ॑गा॒त्मा क्व॑ स्वि॒त्को वि॒द्वांस॒मुप॑ गा॒त्प्रष्टु॑मे॒तत् ॥
ಪಾಕಃ॑ ಪೃಚ್ಛಾಮಿ॒ ಮನ॒ಸಾವಿ॑ಜಾನನ್ದೇ॒ವಾನಾ॑ಮೇ॒ನಾ ನಿಹಿ॑ತಾ ಪ॒ದಾನಿ॑ । ವ॒ತ್ಸೇ ಬ॒ಷ್ಕಯೇಽಧಿ॑ ಸ॒ಪ್ತ ತಂತೂ॒ನ್ವಿ ತ॑ತ್ನಿರೇ ಕ॒ವಯ॒ ಓತ॒ವಾ ಉ॑ ॥
पाकः॑ पृच्छामि॒ मन॒सावि॑जानन्दे॒वाना॑मे॒ना निहि॑ता प॒दानि॑ । व॒त्से ब॒ष्कयेऽधि॑ स॒प्त तंतू॒न्वि त॑त्निरे क॒वय॒ ओत॒वा उ॑ ॥
ಅಚಿ॑ಕಿತ್ವಾಞ್ಚಿಕಿ॒ತುಷ॑ಶ್ಚಿ॒ದತ್ರ॑ ಕ॒ವೀನ್ಪೃ॑ಚ್ಛಾಮಿ ವಿ॒ದ್ಮನೇ॒ ನ ವಿ॒ದ್ವಾನ್ । ವಿ ಯಸ್ತ॒ಸ್ತಂಭ॒ ಷಳಿ॒ಮಾ ರಜಾಂ॑ಸ್ಯ॒ಜಸ್ಯ॑ ರೂ॒ಪೇ ಕಿಮಪಿ॑ ಸ್ವಿ॒ದೇಕಂ॑ ॥
अचि॑कित्वाञ्चिकि॒तुष॑श्चि॒दत्र॑ क॒वीन्पृ॑च्छामि वि॒द्मने॒ न वि॒द्वान् । वि यस्त॒स्तंभ॒ षळि॒मा रजां॑स्य॒जस्य॑ रू॒पे किमपि॑ स्वि॒देकं॑ ॥
ಇ॒ಹ ಬ್ರ॑ವೀತು॒ ಯ ಈ॑ಮಂ॒ಗ ವೇದಾ॒ಸ್ಯ ವಾ॒ಮಸ್ಯ॒ ನಿಹಿ॑ತಂ ಪ॒ದಂ ವೇಃ । ಶೀ॒ರ್ಷ್ಣಃ ಕ್ಷೀ॒ರಂ ದು॑ಹ್ರತೇ॒ ಗಾವೋ॑ ಅಸ್ಯ ವ॒ವ್ರಿಂ ವಸಾ॑ನಾ ಉದ॒ಕಂ ಪ॒ದಾಪುಃ॑ ॥
इ॒ह ब्र॑वीतु॒ य ई॑मं॒ग वेदा॒स्य वा॒मस्य॒ निहि॑तं प॒दं वेः । शी॒र्ष्णः क्षी॒रं दु॑ह्रते॒ गावो॑ अस्य व॒व्रिं वसा॑ना उद॒कं प॒दापुः॑ ॥
ಮಾ॒ತಾ ಪಿ॒ತರ॑ಮೃ॒ತ ಆ ಬ॑ಭಾಜ ಧೀ॒ತ್ಯಗ್ರೇ॒ ಮನ॑ಸಾ॒ ಸಂ ಹಿ ಜ॒ಗ್ಮೇ । ಸಾ ಬೀ॑ಭ॒ತ್ಸುರ್ಗರ್ಭ॑ರಸಾ॒ ನಿವಿ॑ದ್ಧಾ॒ ನಮ॑ಸ್ವಂತ॒ ಇದು॑ಪವಾ॒ಕಮೀ॑ಯುಃ ॥
मा॒ता पि॒तर॑मृ॒त आ ब॑भाज धी॒त्यग्रे॒ मन॑सा॒ सं हि ज॒ग्मे । सा बी॑भ॒त्सुर्गर्भ॑रसा॒ निवि॑द्धा॒ नम॑स्वंत॒ इदु॑पवा॒कमी॑युः ॥
ಯು॒ಕ್ತಾ ಮಾ॒ತಾಸೀ॑ದ್ಧು॒ರಿ ದಕ್ಷಿ॑ಣಾಯಾ॒ ಅತಿ॑ಷ್ಠ॒ದ್ಗರ್ಭೋ॑ ವೃಜ॒ನೀಷ್ವಂ॒ತಃ । ಅಮೀ॑ಮೇದ್ವ॒ತ್ಸೋ ಅನು॒ ಗಾಮ॑ಪಶ್ಯದ್ವಿಶ್ವರೂ॒ಪ್ಯಂ॑ ತ್ರಿ॒ಷು ಯೋಜ॑ನೇಷು ॥
यु॒क्ता मा॒तासी॑द्धु॒रि दक्षि॑णाया॒ अति॑ष्ठ॒द्गर्भो॑ वृज॒नीष्वं॒तः । अमी॑मेद्व॒त्सो अनु॒ गाम॑पश्यद्विश्वरू॒प्यं॑ त्रि॒षु योज॑नेषु ॥
ತಿ॒ಸ್ರೋ ಮಾ॒ತೄಸ್ತ್ರೀನ್ಪಿ॒ತೄನ್ಬಿಭ್ರ॒ದೇಕ॑ ಊ॒ರ್ಧ್ವಸ್ತ॑ಸ್ಥೌ॒ ನೇಮವ॑ ಗ್ಲಾಪಯಂತಿ । ಮಂ॒ತ್ರಯಂ॑ತೇ ದಿ॒ವೋ ಅ॒ಮುಷ್ಯ॑ ಪೃ॒ಷ್ಠೇ ವಿ॑ಶ್ವ॒ವಿದಂ॒ ವಾಚ॒ಮವಿ॑ಶ್ವಮಿನ್ವಾಂ ॥
ति॒स्रो मा॒तॄस्त्रीन्पि॒तॄन्बिभ्र॒देक॑ ऊ॒र्ध्वस्त॑स्थौ॒ नेमव॑ ग्लापयंति । मं॒त्रयं॑ते दि॒वो अ॒मुष्य॑ पृ॒ष्ठे वि॑श्व॒विदं॒ वाच॒मवि॑श्वमिन्वां ॥
ದ್ವಾದ॑ಶಾರಂ ನ॒ಹಿ ತಜ್ಜರಾ॑ಯ॒ ವರ್ವ॑ರ್ತಿ ಚ॒ಕ್ರಂ ಪರಿ॒ ದ್ಯಾಮೃ॒ತಸ್ಯ॑ । ಆ ಪು॒ತ್ರಾ ಅ॑ಗ್ನೇ ಮಿಥು॒ನಾಸೋ॒ ಅತ್ರ॑ ಸ॒ಪ್ತ ಶ॒ತಾನಿ॑ ವಿಂಶ॒ತಿಶ್ಚ॑ ತಸ್ಥುಃ ॥
द्वाद॑शारं न॒हि तज्जरा॑य॒ वर्व॑र्ति च॒क्रं परि॒ द्यामृ॒तस्य॑ । आ पु॒त्रा अ॑ग्ने मिथु॒नासो॒ अत्र॑ स॒प्त श॒तानि॑ विंश॒तिश्च॑ तस्थुः ॥
ಪಂಚ॑ಪಾದಂ ಪಿ॒ತರಂ॒ ದ್ವಾದ॑ಶಾಕೃತಿಂ ದಿ॒ವ ಆ॑ಹುಃ॒ ಪರೇ॒ ಅರ್ಧೇ॑ ಪುರೀ॒ಷಿಣಂ॑ । ಅಥೇ॒ಮೇ ಅ॒ನ್ಯ ಉಪ॑ರೇ ವಿಚಕ್ಷ॒ಣಂ ಸ॒ಪ್ತಚ॑ಕ್ರೇ॒ ಷಳ॑ರ ಆಹು॒ರರ್ಪಿ॑ತಂ ॥
पंच॑पादं पि॒तरं॒ द्वाद॑शाकृतिं दि॒व आ॑हुः॒ परे॒ अर्धे॑ पुरी॒षिणं॑ । अथे॒मे अ॒न्य उप॑रे विचक्ष॒णं स॒प्तच॑क्रे॒ षळ॑र आहु॒रर्पि॑तं ॥
ಪಂಚಾ॑ರೇ ಚ॒ಕ್ರೇ ಪ॑ರಿ॒ವರ್ತ॑ಮಾನೇ॒ ತಸ್ಮಿ॒ನ್ನಾ ತ॑ಸ್ಥು॒ರ್ಭುವ॑ನಾನಿ॒ ವಿಶ್ವಾ॑ । ತಸ್ಯ॒ ನಾಕ್ಷ॑ಸ್ತಪ್ಯತೇ॒ ಭೂರಿ॑ಭಾರಃ ಸ॒ನಾದೇ॒ವ ನ ಶೀ॑ರ್ಯತೇ॒ ಸನಾ॑ಭಿಃ ॥
पंचा॑रे च॒क्रे प॑रि॒वर्त॑माने॒ तस्मि॒न्ना त॑स्थु॒र्भुव॑नानि॒ विश्वा॑ । तस्य॒ नाक्ष॑स्तप्यते॒ भूरि॑भारः स॒नादे॒व न शी॑र्यते॒ सना॑भिः ॥
ಸನೇ॑ಮಿ ಚ॒ಕ್ರಮ॒ಜರಂ॒ ವಿ ವಾ॑ವೃತ ಉತ್ತಾ॒ನಾಯಾಂ॒ ದಶ॑ ಯು॒ಕ್ತಾ ವ॑ಹಂತಿ । ಸೂರ್ಯ॑ಸ್ಯ॒ ಚಕ್ಷೂ॒ ರಜ॑ಸೈ॒ತ್ಯಾವೃ॑ತಂ॒ ತಸ್ಮಿ॒ನ್ನಾರ್ಪಿ॑ತಾ॒ ಭುವ॑ನಾನಿ॒ ವಿಶ್ವಾ॑ ॥
सने॑मि च॒क्रम॒जरं॒ वि वा॑वृत उत्ता॒नायां॒ दश॑ यु॒क्ता व॑हंति । सूर्य॑स्य॒ चक्षू॒ रज॑सै॒त्यावृ॑तं॒ तस्मि॒न्नार्पि॑ता॒ भुव॑नानि॒ विश्वा॑ ॥
ಸಾ॒ಕಂ॒ಜಾನಾಂ॑ ಸ॒ಪ್ತಥ॑ಮಾಹುರೇಕ॒ಜಂ ಷಳಿದ್ಯ॒ಮಾ ಋಷ॑ಯೋ ದೇವ॒ಜಾ ಇತಿ॑ । ತೇಷಾ॑ಮಿ॒ಷ್ಟಾನಿ॒ ವಿಹಿ॑ತಾನಿ ಧಾಮ॒ಶಃ ಸ್ಥಾ॒ತ್ರೇ ರೇ॑ಜಂತೇ॒ ವಿಕೃ॑ತಾನಿ ರೂಪ॒ಶಃ ॥
सा॒कं॒जानां॑ स॒प्तथ॑माहुरेक॒जं षळिद्य॒मा ऋष॑यो देव॒जा इति॑ । तेषा॑मि॒ष्टानि॒ विहि॑तानि धाम॒शः स्था॒त्रे रे॑जंते॒ विकृ॑तानि रूप॒शः ॥
ಸ್ತ್ರಿಯಃ॑ ಸ॒ತೀಸ್ತಾಁ ಉ॑ ಮೇ ಪುಂ॒ಸ ಆ॑ಹುಃ॒ ಪಶ್ಯ॑ದಕ್ಷ॒ಣ್ವಾನ್ನ ವಿ ಚೇ॑ತದಂ॒ಧಃ । ಕ॒ವಿರ್ಯಃ ಪು॒ತ್ರಃ ಸ ಈ॒ಮಾ ಚಿ॑ಕೇತ॒ ಯಸ್ತಾ ವಿ॑ಜಾ॒ನಾತ್ಸ ಪಿ॒ತುಷ್ಪಿ॒ತಾಸ॑ತ್ ॥
स्त्रियः॑ स॒तीस्ताँ उ॑ मे पुं॒स आ॑हुः॒ पश्य॑दक्ष॒ण्वान्न वि चे॑तदं॒धः । क॒विर्यः पु॒त्रः स ई॒मा चि॑केत॒ यस्ता वि॑जा॒नात्स पि॒तुष्पि॒तास॑त् ॥
ಅ॒ವಃ ಪರೇ॑ಣ ಪ॒ರ ಏ॒ನಾವ॑ರೇಣ ಪ॒ದಾ ವ॒ತ್ಸಂ ಬಿಭ್ರ॑ತೀ॒ ಗೌರುದ॑ಸ್ಥಾತ್ । ಸಾ ಕ॒ದ್ರೀಚೀ॒ ಕಂ ಸ್ವಿ॒ದರ್ಧಂ॒ ಪರಾ॑ಗಾ॒ತ್ಕ್ವ॑ ಸ್ವಿತ್ಸೂತೇ ನ॒ಹಿ ಯೂ॒ಥೇ ಅಂ॒ತಃ ॥
अ॒वः परे॑ण प॒र ए॒नाव॑रेण प॒दा व॒त्सं बिभ्र॑ती॒ गौरुद॑स्थात् । सा क॒द्रीची॒ कं स्वि॒दर्धं॒ परा॑गा॒त्क्व॑ स्वित्सूते न॒हि यू॒थे अं॒तः ॥
ಅ॒ವಃ ಪರೇ॑ಣ ಪಿ॒ತರಂ॒ ಯೋ ಅ॑ಸ್ಯಾನು॒ವೇದ॑ ಪ॒ರ ಏ॒ನಾವ॑ರೇಣ । ಕ॒ವೀ॒ಯಮಾ॑ನಃ॒ ಕ ಇ॒ಹ ಪ್ರ ವೋ॑ಚದ್ದೇ॒ವಂ ಮನಃ॒ ಕುತೋ॒ ಅಧಿ॒ ಪ್ರಜಾ॑ತಂ ॥
अ॒वः परे॑ण पि॒तरं॒ यो अ॑स्यानु॒वेद॑ प॒र ए॒नाव॑रेण । क॒वी॒यमा॑नः॒ क इ॒ह प्र वो॑चद्दे॒वं मनः॒ कुतो॒ अधि॒ प्रजा॑तं ॥
ಯೇ ಅ॒ರ್ವಾಂಚ॒ಸ್ತಾಁ ಉ॒ ಪರಾ॑ಚ ಆಹು॒ರ್ಯೇ ಪರಾಂ॑ಚ॒ಸ್ತಾಁ ಉ॑ ಅ॒ರ್ವಾಚ॑ ಆಹುಃ । ಇಂದ್ರ॑ಶ್ಚ॒ ಯಾ ಚ॒ಕ್ರಥುಃ॑ ಸೋಮ॒ ತಾನಿ॑ ಧು॒ರಾ ನ ಯು॒ಕ್ತಾ ರಜ॑ಸೋ ವಹಂತಿ ॥
ये अ॒र्वांच॒स्ताँ उ॒ परा॑च आहु॒र्ये परां॑च॒स्ताँ उ॑ अ॒र्वाच॑ आहुः । इंद्र॑श्च॒ या च॒क्रथुः॑ सोम॒ तानि॑ धु॒रा न यु॒क्ता रज॑सो वहंति ॥
ದ್ವಾ ಸು॑ಪ॒ರ್ಣಾ ಸ॒ಯುಜಾ॒ ಸಖಾ॑ಯಾ ಸಮಾ॒ನಂ ವೃ॒ಕ್ಷಂ ಪರಿ॑ ಷಸ್ವಜಾತೇ । ತಯೋ॑ರ॒ನ್ಯಃ ಪಿಪ್ಪ॑ಲಂ ಸ್ವಾ॒ದ್ವತ್ತ್ಯನ॑ಶ್ನನ್ನ॒ನ್ಯೋ ಅ॒ಭಿ ಚಾ॑ಕಶೀತಿ ॥
द्वा सु॑प॒र्णा स॒युजा॒ सखा॑या समा॒नं वृ॒क्षं परि॑ षस्वजाते । तयो॑र॒न्यः पिप्प॑लं स्वा॒द्वत्त्यन॑श्नन्न॒न्यो अ॒भि चा॑कशीति ॥
ಯತ್ರಾ॑ ಸುಪ॒ರ್ಣಾ ಅ॒ಮೃತ॑ಸ್ಯ ಭಾ॒ಗಮನಿ॑ಮೇಷಂ ವಿ॒ದಥಾ॑ಭಿ॒ಸ್ವರಂ॑ತಿ । ಇ॒ನೋ ವಿಶ್ವ॑ಸ್ಯ॒ ಭುವ॑ನಸ್ಯ ಗೋ॒ಪಾಃ ಸ ಮಾ॒ ಧೀರಃ॒ ಪಾಕ॒ಮತ್ರಾ ವಿ॑ವೇಶ ॥
यत्रा॑ सुप॒र्णा अ॒मृत॑स्य भा॒गमनि॑मेषं वि॒दथा॑भि॒स्वरं॑ति । इ॒नो विश्व॑स्य॒ भुव॑नस्य गो॒पाः स मा॒ धीरः॒ पाक॒मत्रा वि॑वेश ॥
ಯಸ್ಮಿ॑ನ್ವೃ॒ಕ್ಷೇ ಮ॒ಧ್ವದಃ॑ ಸುಪ॒ರ್ಣಾ ನಿ॑ವಿ॒ಶಂತೇ॒ ಸುವ॑ತೇ॒ ಚಾಧಿ॒ ವಿಶ್ವೇ॑ । ತಸ್ಯೇದಾ॑ಹುಃ॒ ಪಿಪ್ಪ॑ಲಂ ಸ್ವಾ॒ದ್ವಗ್ರೇ॒ ತನ್ನೋನ್ನ॑ಶ॒ದ್ಯಃ ಪಿ॒ತರಂ॒ ನ ವೇದ॑ ॥
यस्मि॑न्वृ॒क्षे म॒ध्वदः॑ सुप॒र्णा नि॑वि॒शंते॒ सुव॑ते॒ चाधि॒ विश्वे॑ । तस्येदा॑हुः॒ पिप्प॑लं स्वा॒द्वग्रे॒ तन्नोन्न॑श॒द्यः पि॒तरं॒ न वेद॑ ॥
ಯದ್ಗಾ॑ಯ॒ತ್ರೇ ಅಧಿ॑ ಗಾಯ॒ತ್ರಮಾಹಿ॑ತಂ॒ ತ್ರೈಷ್ಟು॑ಭಾದ್ವಾ॒ ತ್ರೈಷ್ಟು॑ಭಂ ನಿ॒ರತ॑ಕ್ಷತ । ಯದ್ವಾ॒ ಜಗ॒ಜ್ಜಗ॒ತ್ಯಾಹಿ॑ತಂ ಪ॒ದಂ ಯ ಇತ್ತದ್ವಿ॒ದುಸ್ತೇ ಅ॑ಮೃತ॒ತ್ವಮಾ॑ನಶುಃ ॥
यद्गा॑य॒त्रे अधि॑ गाय॒त्रमाहि॑तं॒ त्रैष्टु॑भाद्वा॒ त्रैष्टु॑भं नि॒रत॑क्षत । यद्वा॒ जग॒ज्जग॒त्याहि॑तं प॒दं य इत्तद्वि॒दुस्ते अ॑मृत॒त्वमा॑नशुः ॥
ಗಾ॒ಯ॒ತ್ರೇಣ॒ ಪ್ರತಿ॑ ಮಿಮೀತೇ ಅ॒ರ್ಕಮ॒ರ್ಕೇಣ॒ ಸಾಮ॒ ತ್ರೈಷ್ಟು॑ಭೇನ ವಾ॒ಕಂ । ವಾ॒ಕೇನ॑ ವಾ॒ಕಂ ದ್ವಿ॒ಪದಾ॒ ಚತು॑ಷ್ಪದಾ॒ಕ್ಷರೇ॑ಣ ಮಿಮತೇ ಸ॒ಪ್ತ ವಾಣೀಃ॑ ॥
गा॒य॒त्रेण॒ प्रति॑ मिमीते अ॒र्कम॒र्केण॒ साम॒ त्रैष्टु॑भेन वा॒कं । वा॒केन॑ वा॒कं द्वि॒पदा॒ चतु॑ष्पदा॒क्षरे॑ण मिमते स॒प्त वाणीः॑ ॥
ಜಗ॑ತಾ॒ ಸಿಂಧುಂ॑ ದಿ॒ವ್ಯ॑ಸ್ತಭಾಯದ್ರಥಂತ॒ರೇ ಸೂರ್ಯಂ॒ ಪರ್ಯ॑ಪಶ್ಯತ್ । ಗಾ॒ಯ॒ತ್ರಸ್ಯ॑ ಸ॒ಮಿಧ॑ಸ್ತಿ॒ಸ್ರ ಆ॑ಹು॒ಸ್ತತೋ॑ ಮ॒ಹ್ನಾ ಪ್ರ ರಿ॑ರಿಚೇ ಮಹಿ॒ತ್ವಾ ॥
जग॑ता॒ सिंधुं॑ दि॒व्य॑स्तभायद्रथंत॒रे सूर्यं॒ पर्य॑पश्यत् । गा॒य॒त्रस्य॑ स॒मिध॑स्ति॒स्र आ॑हु॒स्ततो॑ म॒ह्ना प्र रि॑रिचे महि॒त्वा ॥
ಉಪ॑ ಹ್ವಯೇ ಸು॒ದುಘಾಂ॑ ಧೇ॒ನುಮೇ॒ತಾಂ ಸು॒ಹಸ್ತೋ॑ ಗೋ॒ಧುಗು॒ತ ದೋ॑ಹದೇನಾಂ । ಶ್ರೇಷ್ಠಂ॑ ಸ॒ವಂ ಸ॑ವಿ॒ತಾ ಸಾ॑ವಿಷನ್ನೋ॒ಽಭೀ॑ದ್ಧೋ ಘ॒ರ್ಮಸ್ತದು॒ ಷು ಪ್ರ ವೋ॑ಚಂ ॥
उप॑ ह्वये सु॒दुघां॑ धे॒नुमे॒तां सु॒हस्तो॑ गो॒धुगु॒त दो॑हदेनां । श्रेष्ठं॑ स॒वं स॑वि॒ता सा॑विषन्नो॒ऽभी॑द्धो घ॒र्मस्तदु॒ षु प्र वो॑चं ॥
ಹಿಂ॒ಕೃ॒ಣ್ವ॒ತೀ ವ॑ಸು॒ಪತ್ನೀ॒ ವಸೂ॑ನಾಂ ವ॒ತ್ಸಮಿ॒ಚ್ಛಂತೀ॒ ಮನ॑ಸಾ॒ಭ್ಯಾಗಾ॑ತ್ । ದು॒ಹಾಮ॒ಶ್ವಿಭ್ಯಾಂ॒ ಪಯೋ॑ ಅ॒ಘ್ನ್ಯೇಯಂ ಸಾ ವ॑ರ್ಧತಾಂ ಮಹ॒ತೇ ಸೌಭ॑ಗಾಯ ॥
हिं॒कृ॒ण्व॒ती व॑सु॒पत्नी॒ वसू॑नां व॒त्समि॒च्छंती॒ मन॑सा॒भ्यागा॑त् । दु॒हाम॒श्विभ्यां॒ पयो॑ अ॒घ्न्येयं सा व॑र्धतां मह॒ते सौभ॑गाय ॥
ಗೌರ॑ಮೀಮೇ॒ದನು॑ ವ॒ತ್ಸಂ ಮಿ॒ಷಂತಂ॑ ಮೂ॒ರ್ಧಾನಂ॒ ಹಿಙ್ಙ॑ಕೃಣೋ॒ನ್ಮಾತ॒ವಾ ಉ॑ । ಸೃಕ್ವಾ॑ಣಂ ಘ॒ರ್ಮಮ॒ಭಿ ವಾ॑ವಶಾ॒ನಾ ಮಿಮಾ॑ತಿ ಮಾ॒ಯುಂ ಪಯ॑ತೇ॒ ಪಯೋ॑ಭಿಃ ॥
गौर॑मीमे॒दनु॑ व॒त्सं मि॒षंतं॑ मू॒र्धानं॒ हिङ्ङ॑कृणो॒न्मात॒वा उ॑ । सृक्वा॑णं घ॒र्मम॒भि वा॑वशा॒ना मिमा॑ति मा॒युं पय॑ते॒ पयो॑भिः ॥
ಅ॒ಯಂ ಸ ಶಿಂ॑ಕ್ತೇ॒ ಯೇನ॒ ಗೌರ॒ಭೀವೃ॑ತಾ॒ ಮಿಮಾ॑ತಿ ಮಾ॒ಯುಂ ಧ್ವ॒ಸನಾ॒ವಧಿ॑ ಶ್ರಿ॒ತಾ । ಸಾ ಚಿ॒ತ್ತಿಭಿ॒ರ್ನಿ ಹಿ ಚ॒ಕಾರ॒ ಮರ್ತ್ಯಂ॑ ವಿ॒ದ್ಯುದ್ಭವಂ॑ತೀ॒ ಪ್ರತಿ॑ ವ॒ವ್ರಿಮೌ॑ಹತ ॥
अ॒यं स शिं॑क्ते॒ येन॒ गौर॒भीवृ॑ता॒ मिमा॑ति मा॒युं ध्व॒सना॒वधि॑ श्रि॒ता । सा चि॒त्तिभि॒र्नि हि च॒कार॒ मर्त्यं॑ वि॒द्युद्भवं॑ती॒ प्रति॑ व॒व्रिमौ॑हत ॥
ಅ॒ನಚ್ಛ॑ಯೇ ತು॒ರಗಾ॑ತು ಜೀ॒ವಮೇಜ॑ದ್ಧ್ರು॒ವಂ ಮಧ್ಯ॒ ಆ ಪ॒ಸ್ತ್ಯಾ॑ನಾಂ । ಜೀ॒ವೋ ಮೃ॒ತಸ್ಯ॑ ಚರತಿ ಸ್ವ॒ಧಾಭಿ॒ರಮ॑ರ್ತ್ಯೋ॒ ಮರ್ತ್ಯೇ॑ನಾ॒ ಸಯೋ॑ನಿಃ ॥
अ॒नच्छ॑ये तु॒रगा॑तु जी॒वमेज॑द्ध्रु॒वं मध्य॒ आ प॒स्त्या॑नां । जी॒वो मृ॒तस्य॑ चरति स्व॒धाभि॒रम॑र्त्यो॒ मर्त्ये॑ना॒ सयो॑निः ॥
ಅಪ॑ಶ್ಯಂ ಗೋ॒ಪಾಮನಿ॑ಪದ್ಯಮಾನ॒ಮಾ ಚ॒ ಪರಾ॑ ಚ ಪ॒ಥಿಭಿ॒ಶ್ಚರಂ॑ತಂ । ಸ ಸ॒ಧ್ರೀಚೀಃ॒ ಸ ವಿಷೂ॑ಚೀ॒ರ್ವಸಾ॑ನ॒ ಆ ವ॑ರೀವರ್ತಿ॒ ಭುವ॑ನೇಷ್ವಂ॒ತಃ ॥
अप॑श्यं गो॒पामनि॑पद्यमान॒मा च॒ परा॑ च प॒थिभि॒श्चरं॑तं । स स॒ध्रीचीः॒ स विषू॑ची॒र्वसा॑न॒ आ व॑रीवर्ति॒ भुव॑नेष्वं॒तः ॥
ಯ ಈಂ॑ ಚ॒ಕಾರ॒ ನ ಸೋ ಅ॒ಸ್ಯ ವೇ॑ದ॒ ಯ ಈಂ॑ ದ॒ದರ್ಶ॒ ಹಿರು॒ಗಿನ್ನು ತಸ್ಮಾ॑ತ್ । ಸ ಮಾ॒ತುರ್ಯೋನಾ॒ ಪರಿ॑ವೀತೋ ಅಂ॒ತರ್ಬ॑ಹುಪ್ರ॒ಜಾ ನಿರ್ಋ॑ತಿ॒ಮಾ ವಿ॑ವೇಶ ॥
य ईं॑ च॒कार॒ न सो अ॒स्य वे॑द॒ य ईं॑ द॒दर्श॒ हिरु॒गिन्नु तस्मा॑त् । स मा॒तुर्योना॒ परि॑वीतो अं॒तर्ब॑हुप्र॒जा निर्ऋ॑ति॒मा वि॑वेश ॥
ದ್ಯೌರ್ಮೇ॑ ಪಿ॒ತಾ ಜ॑ನಿ॒ತಾ ನಾಭಿ॒ರತ್ರ॒ ಬಂಧು॑ರ್ಮೇ ಮಾ॒ತಾ ಪೃ॑ಥಿ॒ವೀ ಮ॒ಹೀಯಂ । ಉ॒ತ್ತಾ॒ನಯೋ॑ಶ್ಚ॒ಮ್ವೋ॒೩॒॑ರ್ಯೋನಿ॑ರಂ॒ತರತ್ರಾ॑ ಪಿ॒ತಾ ದು॑ಹಿ॒ತುರ್ಗರ್ಭ॒ಮಾಧಾ॑ತ್ ॥
द्यौर्मे॑ पि॒ता ज॑नि॒ता नाभि॒रत्र॒ बंधु॑र्मे मा॒ता पृ॑थि॒वी म॒हीयं । उ॒त्ता॒नयो॑श्च॒म्वो॒३॒॑र्योनि॑रं॒तरत्रा॑ पि॒ता दु॑हि॒तुर्गर्भ॒माधा॑त् ॥
ಪೃ॒ಚ್ಛಾಮಿ॑ ತ್ವಾ॒ ಪರ॒ಮಂತಂ॑ ಪೃಥಿ॒ವ್ಯಾಃ ಪೃ॒ಚ್ಛಾಮಿ॒ ಯತ್ರ॒ ಭುವ॑ನಸ್ಯ॒ ನಾಭಿಃ॑ । ಪೃ॒ಚ್ಛಾಮಿ॑ ತ್ವಾ॒ ವೃಷ್ಣೋ॒ ಅಶ್ವ॑ಸ್ಯ॒ ರೇತಃ॑ ಪೃ॒ಚ್ಛಾಮಿ॑ ವಾ॒ಚಃ ಪ॑ರ॒ಮಂ ವ್ಯೋ॑ಮ ॥
पृ॒च्छामि॑ त्वा॒ पर॒मंतं॑ पृथि॒व्याः पृ॒च्छामि॒ यत्र॒ भुव॑नस्य॒ नाभिः॑ । पृ॒च्छामि॑ त्वा॒ वृष्णो॒ अश्व॑स्य॒ रेतः॑ पृ॒च्छामि॑ वा॒चः प॑र॒मं व्यो॑म ॥
ಇ॒ಯಂ ವೇದಿಃ॒ ಪರೋ॒ ಅಂತಃ॑ ಪೃಥಿ॒ವ್ಯಾ ಅ॒ಯಂ ಯ॒ಜ್ಞೋ ಭುವ॑ನಸ್ಯ॒ ನಾಭಿಃ॑ । ಅ॒ಯಂ ಸೋಮೋ॒ ವೃಷ್ಣೋ॒ ಅಶ್ವ॑ಸ್ಯ॒ ರೇತೋ॑ ಬ್ರ॒ಹ್ಮಾಯಂ ವಾ॒ಚಃ ಪ॑ರ॒ಮಂ ವ್ಯೋ॑ಮ ॥
इ॒यं वेदिः॒ परो॒ अंतः॑ पृथि॒व्या अ॒यं य॒ज्ञो भुव॑नस्य॒ नाभिः॑ । अ॒यं सोमो॒ वृष्णो॒ अश्व॑स्य॒ रेतो॑ ब्र॒ह्मायं वा॒चः प॑र॒मं व्यो॑म ॥
ಸ॒ಪ್ತಾರ್ಧ॑ಗ॒ರ್ಭಾ ಭುವ॑ನಸ್ಯ॒ ರೇತೋ॒ ವಿಷ್ಣೋ॑ಸ್ತಿಷ್ಠಂತಿ ಪ್ರ॒ದಿಶಾ॒ ವಿಧ॑ರ್ಮಣಿ । ತೇ ಧೀ॒ತಿಭಿ॒ರ್ಮನ॑ಸಾ॒ ತೇ ವಿ॑ಪ॒ಶ್ಚಿತಃ॑ ಪರಿ॒ಭುವಃ॒ ಪರಿ॑ ಭವಂತಿ ವಿ॒ಶ್ವತಃ॑ ॥
स॒प्तार्ध॑ग॒र्भा भुव॑नस्य॒ रेतो॒ विष्णो॑स्तिष्ठंति प्र॒दिशा॒ विध॑र्मणि । ते धी॒तिभि॒र्मन॑सा॒ ते वि॑प॒श्चितः॑ परि॒भुवः॒ परि॑ भवंति वि॒श्वतः॑ ॥
ನ ವಿ ಜಾ॑ನಾಮಿ॒ ಯದಿ॑ವೇ॒ದಮಸ್ಮಿ॑ ನಿ॒ಣ್ಯಃ ಸಂನ॑ದ್ಧೋ॒ ಮನ॑ಸಾ ಚರಾಮಿ । ಯ॒ದಾ ಮಾಗ॑ನ್ಪ್ರಥಮ॒ಜಾ ಋ॒ತಸ್ಯಾದಿದ್ವಾ॒ಚೋ ಅ॑ಶ್ನುವೇ ಭಾ॒ಗಮ॒ಸ್ಯಾಃ ॥
न वि जा॑नामि॒ यदि॑वे॒दमस्मि॑ नि॒ण्यः संन॑द्धो॒ मन॑सा चरामि । य॒दा माग॑न्प्रथम॒जा ऋ॒तस्यादिद्वा॒चो अ॑श्नुवे भा॒गम॒स्याः ॥
ಅಪಾ॒ಙ್ ಪ್ರಾಙೇ॑ತಿ ಸ್ವ॒ಧಯಾ॑ ಗೃಭೀ॒ತೋಽಮ॑ರ್ತ್ಯೋ॒ ಮರ್ತ್ಯೇ॑ನಾ॒ ಸಯೋ॑ನಿಃ । ತಾ ಶಶ್ವಂ॑ತಾ ವಿಷೂ॒ಚೀನಾ॑ ವಿ॒ಯಂತಾ॒ ನ್ಯ೧॒॑ನ್ಯಂ ಚಿ॒ಕ್ಯುರ್ನ ನಿ ಚಿ॑ಕ್ಯುರ॒ನ್ಯಂ ॥
अपा॒ङ् प्राङे॑ति स्व॒धया॑ गृभी॒तोऽम॑र्त्यो॒ मर्त्ये॑ना॒ सयो॑निः । ता शश्वं॑ता विषू॒चीना॑ वि॒यंता॒ न्य१॒॑न्यं चि॒क्युर्न नि चि॑क्युर॒न्यं ॥
ಋ॒ಚೋ ಅ॒ಕ್ಷರೇ॑ ಪರ॒ಮೇ ವ್ಯೋ॑ಮ॒ನ್ಯಸ್ಮಿ॑ನ್ದೇ॒ವಾ ಅಧಿ॒ ವಿಶ್ವೇ॑ ನಿಷೇ॒ದುಃ । ಯಸ್ತನ್ನ ವೇದ॒ ಕಿಮೃ॒ಚಾ ಕ॑ರಿಷ್ಯತಿ॒ ಯ ಇತ್ತದ್ವಿ॒ದುಸ್ತ ಇ॒ಮೇ ಸಮಾ॑ಸತೇ ॥
ऋ॒चो अ॒क्षरे॑ पर॒मे व्यो॑म॒न्यस्मि॑न्दे॒वा अधि॒ विश्वे॑ निषे॒दुः । यस्तन्न वेद॒ किमृ॒चा क॑रिष्यति॒ य इत्तद्वि॒दुस्त इ॒मे समा॑सते ॥
ಸೂ॒ಯ॒ವ॒ಸಾದ್ಭಗ॑ವತೀ॒ ಹಿ ಭೂ॒ಯಾ ಅಥೋ॑ ವ॒ಯಂ ಭಗ॑ವಂತಃ ಸ್ಯಾಮ । ಅ॒ದ್ಧಿ ತೃಣ॑ಮಘ್ನ್ಯೇ ವಿಶ್ವ॒ದಾನೀಂ॒ ಪಿಬ॑ ಶು॒ದ್ಧಮು॑ದ॒ಕಮಾ॒ಚರಂ॑ತೀ ॥
सू॒य॒व॒साद्भग॑वती॒ हि भू॒या अथो॑ व॒यं भग॑वंतः स्याम । अ॒द्धि तृण॑मघ्न्ये विश्व॒दानीं॒ पिब॑ शु॒द्धमु॑द॒कमा॒चरं॑ती ॥
ಗೌ॒ರೀರ್ಮಿ॑ಮಾಯ ಸಲಿ॒ಲಾನಿ॒ ತಕ್ಷ॒ತ್ಯೇಕ॑ಪದೀ ದ್ವಿ॒ಪದೀ॒ ಸಾ ಚತು॑ಷ್ಪದೀ । ಅ॒ಷ್ಟಾಪ॑ದೀ॒ ನವ॑ಪದೀ ಬಭೂ॒ವುಷೀ॑ ಸ॒ಹಸ್ರಾ॑ಕ್ಷರಾ ಪರ॒ಮೇ ವ್ಯೋ॑ಮನ್ ॥
गौ॒रीर्मि॑माय सलि॒लानि॒ तक्ष॒त्येक॑पदी द्वि॒पदी॒ सा चतु॑ष्पदी । अ॒ष्टाप॑दी॒ नव॑पदी बभू॒वुषी॑ स॒हस्रा॑क्षरा पर॒मे व्यो॑मन् ॥
ತಸ್ಯಾಃ॑ ಸಮು॒ದ್ರಾ ಅಧಿ॒ ವಿ ಕ್ಷ॑ರಂತಿ॒ ತೇನ॑ ಜೀವಂತಿ ಪ್ರ॒ದಿಶ॒ಶ್ಚತ॑ಸ್ರಃ । ತತಃ॑ ಕ್ಷರತ್ಯ॒ಕ್ಷರಂ॒ ತದ್ವಿಶ್ವ॒ಮುಪ॑ ಜೀವತಿ ॥
तस्याः॑ समु॒द्रा अधि॒ वि क्ष॑रंति॒ तेन॑ जीवंति प्र॒दिश॒श्चत॑स्रः । ततः॑ क्षरत्य॒क्षरं॒ तद्विश्व॒मुप॑ जीवति ॥
ಶ॒ಕ॒ಮಯಂ॑ ಧೂ॒ಮಮಾ॒ರಾದ॑ಪಶ್ಯಂ ವಿಷೂ॒ವತಾ॑ ಪ॒ರ ಏ॒ನಾವ॑ರೇಣ । ಉ॒ಕ್ಷಾಣಂ॒ ಪೃಶ್ನಿ॑ಮಪಚಂತ ವೀ॒ರಾಸ್ತಾನಿ॒ ಧರ್ಮಾ॑ಣಿ ಪ್ರಥ॒ಮಾನ್ಯಾ॑ಸನ್ ॥
श॒क॒मयं॑ धू॒ममा॒राद॑पश्यं विषू॒वता॑ प॒र ए॒नाव॑रेण । उ॒क्षाणं॒ पृश्नि॑मपचंत वी॒रास्तानि॒ धर्मा॑णि प्रथ॒मान्या॑सन् ॥
ತ್ರಯಃ॑ ಕೇ॒ಶಿನ॑ ಋತು॒ಥಾ ವಿ ಚ॑ಕ್ಷತೇ ಸಂವತ್ಸ॒ರೇ ವ॑ಪತ॒ ಏಕ॑ ಏಷಾಂ । ವಿಶ್ವ॒ಮೇಕೋ॑ ಅ॒ಭಿ ಚ॑ಷ್ಟೇ॒ ಶಚೀ॑ಭಿ॒ರ್ಧ್ರಾಜಿ॒ರೇಕ॑ಸ್ಯ ದದೃಶೇ॒ ನ ರೂ॒ಪಂ ॥
त्रयः॑ के॒शिन॑ ऋतु॒था वि च॑क्षते संवत्स॒रे व॑पत॒ एक॑ एषां । विश्व॒मेको॑ अ॒भि च॑ष्टे॒ शची॑भि॒र्ध्राजि॒रेक॑स्य ददृशे॒ न रू॒पं ॥
ಚ॒ತ್ವಾರಿ॒ ವಾಕ್ಪರಿ॑ಮಿತಾ ಪ॒ದಾನಿ॒ ತಾನಿ॑ ವಿದುರ್ಬ್ರಾಹ್ಮ॒ಣಾ ಯೇ ಮ॑ನೀ॒ಷಿಣಃ॑ । ಗುಹಾ॒ ತ್ರೀಣಿ॒ ನಿಹಿ॑ತಾ॒ ನೇಂಗ॑ಯಂತಿ ತು॒ರೀಯಂ॑ ವಾ॒ಚೋ ಮ॑ನು॒ಷ್ಯಾ॑ ವದಂತಿ ॥
च॒त्वारि॒ वाक्परि॑मिता प॒दानि॒ तानि॑ विदुर्ब्राह्म॒णा ये म॑नी॒षिणः॑ । गुहा॒ त्रीणि॒ निहि॑ता॒ नेंग॑यंति तु॒रीयं॑ वा॒चो म॑नु॒ष्या॑ वदंति ॥
ಇಂದ್ರಂ॑ ಮಿ॒ತ್ರಂ ವರು॑ಣಮ॒ಗ್ನಿಮಾ॑ಹು॒ರಥೋ॑ ದಿ॒ವ್ಯಃ ಸ ಸು॑ಪ॒ರ್ಣೋ ಗ॒ರುತ್ಮಾ॑ನ್ । ಏಕಂ॒ ಸದ್ವಿಪ್ರಾ॑ ಬಹು॒ಧಾ ವ॑ದಂತ್ಯ॒ಗ್ನಿಂ ಯ॒ಮಂ ಮಾ॑ತ॒ರಿಶ್ವಾ॑ನಮಾಹುಃ ॥
इंद्रं॑ मि॒त्रं वरु॑णम॒ग्निमा॑हु॒रथो॑ दि॒व्यः स सु॑प॒र्णो ग॒रुत्मा॑न् । एकं॒ सद्विप्रा॑ बहु॒धा व॑दंत्य॒ग्निं य॒मं मा॑त॒रिश्वा॑नमाहुः ॥
ಕೃ॒ಷ್ಣಂ ನಿ॒ಯಾನಂ॒ ಹರ॑ಯಃ ಸುಪ॒ರ್ಣಾ ಅ॒ಪೋ ವಸಾ॑ನಾ॒ ದಿವ॒ಮುತ್ಪ॑ತಂತಿ । ತ ಆವ॑ವೃತ್ರ॒ನ್ತ್ಸದ॑ನಾದೃ॒ತಸ್ಯಾದಿದ್ಘೃ॒ತೇನ॑ ಪೃಥಿ॒ವೀ ವ್ಯು॑ದ್ಯತೇ ॥
कृ॒ष्णं नि॒यानं॒ हर॑यः सुप॒र्णा अ॒पो वसा॑ना॒ दिव॒मुत्प॑तंति । त आव॑वृत्र॒न्त्सद॑नादृ॒तस्यादिद्घृ॒तेन॑ पृथि॒वी व्यु॑द्यते ॥
ದ್ವಾದ॑ಶ ಪ್ರ॒ಧಯ॑ಶ್ಚ॒ಕ್ರಮೇಕಂ॒ ತ್ರೀಣಿ॒ ನಭ್ಯಾ॑ನಿ॒ ಕ ಉ॒ ತಚ್ಚಿ॑ಕೇತ । ತಸ್ಮಿ॑ನ್ತ್ಸಾ॒ಕಂ ತ್ರಿ॑ಶ॒ತಾ ನ ಶಂ॒ಕವೋ॑ಽರ್ಪಿ॒ತಾಃ ಷ॒ಷ್ಟಿರ್ನ ಚ॑ಲಾಚ॒ಲಾಸಃ॑ ॥
द्वाद॑श प्र॒धय॑श्च॒क्रमेकं॒ त्रीणि॒ नभ्या॑नि॒ क उ॒ तच्चि॑केत । तस्मि॑न्त्सा॒कं त्रि॑श॒ता न शं॒कवो॑ऽर्पि॒ताः ष॒ष्टिर्न च॑लाच॒लासः॑ ॥
ಯಸ್ತೇ॒ ಸ್ತನಃ॑ ಶಶ॒ಯೋ ಯೋ ಮ॑ಯೋ॒ಭೂರ್ಯೇನ॒ ವಿಶ್ವಾ॒ ಪುಷ್ಯ॑ಸಿ॒ ವಾರ್ಯಾ॑ಣಿ । ಯೋ ರ॑ತ್ನ॒ಧಾ ವ॑ಸು॒ವಿದ್ಯಃ ಸು॒ದತ್ರಃ॒ ಸರ॑ಸ್ವತಿ॒ ತಮಿ॒ಹ ಧಾತ॑ವೇ ಕಃ ॥
यस्ते॒ स्तनः॑ शश॒यो यो म॑यो॒भूर्येन॒ विश्वा॒ पुष्य॑सि॒ वार्या॑णि । यो र॑त्न॒धा व॑सु॒विद्यः सु॒दत्रः॒ सर॑स्वति॒ तमि॒ह धात॑वे कः ॥
ಯ॒ಜ್ಞೇನ॑ ಯ॒ಜ್ಞಮ॑ಯಜಂತ ದೇ॒ವಾಸ್ತಾನಿ॒ ಧರ್ಮಾ॑ಣಿ ಪ್ರಥ॒ಮಾನ್ಯಾ॑ಸನ್ । ತೇ ಹ॒ ನಾಕಂ॑ ಮಹಿ॒ಮಾನಃ॑ ಸಚಂತ॒ ಯತ್ರ॒ ಪೂರ್ವೇ॑ ಸಾ॒ಧ್ಯಾಃ ಸಂತಿ॑ ದೇ॒ವಾಃ ॥
य॒ज्ञेन॑ य॒ज्ञम॑यजंत दे॒वास्तानि॒ धर्मा॑णि प्रथ॒मान्या॑सन् । ते ह॒ नाकं॑ महि॒मानः॑ सचंत॒ यत्र॒ पूर्वे॑ सा॒ध्याः संति॑ दे॒वाः ॥
ಸ॒ಮಾ॒ನಮೇ॒ತದು॑ದ॒ಕಮುಚ್ಚೈತ್ಯವ॒ ಚಾಹ॑ಭಿಃ । ಭೂಮಿಂ॑ ಪ॒ರ್ಜನ್ಯಾ॒ ಜಿನ್ವಂ॑ತಿ॒ ದಿವಂ॑ ಜಿನ್ವಂತ್ಯ॒ಗ್ನಯಃ॑ ॥
स॒मा॒नमे॒तदु॑द॒कमुच्चैत्यव॒ चाह॑भिः । भूमिं॑ प॒र्जन्या॒ जिन्वं॑ति॒ दिवं॑ जिन्वंत्य॒ग्नयः॑ ॥
ದಿ॒ವ್ಯಂ ಸು॑ಪ॒ರ್ಣಂ ವಾ॑ಯ॒ಸಂ ಬೃ॒ಹಂತ॑ಮ॒ಪಾಂ ಗರ್ಭಂ॑ ದರ್ಶ॒ತಮೋಷ॑ಧೀನಾಂ । ಅ॒ಭೀ॒ಪ॒ತೋ ವೃ॒ಷ್ಟಿಭಿ॑ಸ್ತ॒ರ್ಪಯಂ॑ತಂ॒ ಸರ॑ಸ್ವಂತ॒ಮವ॑ಸೇ ಜೋಹವೀಮಿ ॥
दि॒व्यं सु॑प॒र्णं वा॑य॒सं बृ॒हंत॑म॒पां गर्भं॑ दर्श॒तमोष॑धीनां । अ॒भी॒प॒तो वृ॒ष्टिभि॑स्त॒र्पयं॑तं॒ सर॑स्वंत॒मव॑से जोहवीमि ॥