ಈ ಸೂಕ್ತಕ್ಕೆ ಅಡ್ಮಿನ್‌ನಲ್ಲಿ ಕನ್ನಡ ಅಧ್ಯಯನ ಮಾರ್ಗದರ್ಶಿ (Study Guide) ಇನ್ನೂ ರಚನೆಯಾಗಿಲ್ಲ. ಅಡ್ಮಿನ್‌ನಲ್ಲಿ Generate Study Guides ಮೂಲಕ ಕನ್ನಡ ಭಾಷೆಯನ್ನು ಆಯ್ಕೆಮಾಡಿ ರಚಿಸಬಹುದು.
ಯದಕ್ರಂ॑ದಃ ಪ್ರಥ॒ಮಂ ಜಾಯ॑ಮಾನ ಉ॒ದ್ಯನ್ತ್ಸ॑ಮು॒ದ್ರಾದು॒ತ ವಾ॒ ಪುರೀ॑ಷಾತ್ । ಶ್ಯೇ॒ನಸ್ಯ॑ ಪ॒ಕ್ಷಾ ಹ॑ರಿ॒ಣಸ್ಯ॑ ಬಾ॒ಹೂ ಉ॑ಪ॒ಸ್ತುತ್ಯಂ॒ ಮಹಿ॑ ಜಾ॒ತಂ ತೇ॑ ಅರ್ವನ್ ॥
यदक्रं॑दः प्रथ॒मं जाय॑मान उ॒द्यन्त्स॑मु॒द्रादु॒त वा॒ पुरी॑षात् । श्ये॒नस्य॑ प॒क्षा ह॑रि॒णस्य॑ बा॒हू उ॑प॒स्तुत्यं॒ महि॑ जा॒तं ते॑ अर्वन् ॥
ಯ॒ಮೇನ॑ ದ॒ತ್ತಂ ತ್ರಿ॒ತ ಏ॑ನಮಾಯುನ॒ಗಿಂದ್ರ॑ ಏಣಂ ಪ್ರಥ॒ಮೋ ಅಧ್ಯ॑ತಿಷ್ಠತ್ । ಗಂ॒ಧ॒ರ್ವೋ ಅ॑ಸ್ಯ ರಶ॒ನಾಮ॑ಗೃಭ್ಣಾ॒ತ್ಸೂರಾ॒ದಶ್ವಂ॑ ವಸವೋ॒ ನಿರ॑ತಷ್ಟ ॥
य॒मेन॑ द॒त्तं त्रि॒त ए॑नमायुन॒गिंद्र॑ एणं प्रथ॒मो अध्य॑तिष्ठत् । गं॒ध॒र्वो अ॑स्य रश॒नाम॑गृभ्णा॒त्सूरा॒दश्वं॑ वसवो॒ निर॑तष्ट ॥
ಅಸಿ॑ ಯ॒ಮೋ ಅಸ್ಯಾ॑ದಿ॒ತ್ಯೋ ಅ॑ರ್ವ॒ನ್ನಸಿ॑ ತ್ರಿ॒ತೋ ಗುಹ್ಯೇ॑ನ ವ್ರ॒ತೇನ॑ । ಅಸಿ॒ ಸೋಮೇ॑ನ ಸ॒ಮಯಾ॒ ವಿಪೃ॑ಕ್ತ ಆ॒ಹುಸ್ತೇ॒ ತ್ರೀಣಿ॑ ದಿ॒ವಿ ಬಂಧ॑ನಾನಿ ॥
असि॑ य॒मो अस्या॑दि॒त्यो अ॑र्व॒न्नसि॑ त्रि॒तो गुह्ये॑न व्र॒तेन॑ । असि॒ सोमे॑न स॒मया॒ विपृ॑क्त आ॒हुस्ते॒ त्रीणि॑ दि॒वि बंध॑नानि ॥
ತ್ರೀಣಿ॑ ತ ಆಹುರ್ದಿ॒ವಿ ಬಂಧ॑ನಾನಿ॒ ತ್ರೀಣ್ಯ॒ಪ್ಸು ತ್ರೀಣ್ಯಂ॒ತಃ ಸ॑ಮು॒ದ್ರೇ । ಉ॒ತೇವ॑ ಮೇ॒ ವರು॑ಣಶ್ಛಂತ್ಸ್ಯರ್ವ॒ನ್ಯತ್ರಾ॑ ತ ಆ॒ಹುಃ ಪ॑ರ॒ಮಂ ಜ॒ನಿತ್ರಂ॑ ॥
त्रीणि॑ त आहुर्दि॒वि बंध॑नानि॒ त्रीण्य॒प्सु त्रीण्यं॒तः स॑मु॒द्रे । उ॒तेव॑ मे॒ वरु॑णश्छंत्स्यर्व॒न्यत्रा॑ त आ॒हुः प॑र॒मं ज॒नित्रं॑ ॥
ಇ॒ಮಾ ತೇ॑ ವಾಜಿನ್ನವ॒ಮಾರ್ಜ॑ನಾನೀ॒ಮಾ ಶ॒ಫಾನಾಂ॑ ಸನಿ॒ತುರ್ನಿ॒ಧಾನಾ॑ । ಅತ್ರಾ॑ ತೇ ಭ॒ದ್ರಾ ರ॑ಶ॒ನಾ ಅ॑ಪಶ್ಯಮೃ॒ತಸ್ಯ॒ ಯಾ ಅ॑ಭಿ॒ರಕ್ಷಂ॑ತಿ ಗೋ॒ಪಾಃ ॥
इ॒मा ते॑ वाजिन्नव॒मार्ज॑नानी॒मा श॒फानां॑ सनि॒तुर्नि॒धाना॑ । अत्रा॑ ते भ॒द्रा र॑श॒ना अ॑पश्यमृ॒तस्य॒ या अ॑भि॒रक्षं॑ति गो॒पाः ॥
ಆ॒ತ್ಮಾನಂ॑ ತೇ॒ ಮನ॑ಸಾ॒ರಾದ॑ಜಾನಾಮ॒ವೋ ದಿ॒ವಾ ಪ॒ತಯಂ॑ತಂ ಪತಂ॒ಗಂ । ಶಿರೋ॑ ಅಪಶ್ಯಂ ಪ॒ಥಿಭಿಃ॑ ಸು॒ಗೇಭಿ॑ರರೇ॒ಣುಭಿ॒ರ್ಜೇಹ॑ಮಾನಂ ಪತ॒ತ್ರಿ ॥
आ॒त्मानं॑ ते॒ मन॑सा॒राद॑जानाम॒वो दि॒वा प॒तयं॑तं पतं॒गं । शिरो॑ अपश्यं प॒थिभिः॑ सु॒गेभि॑ररे॒णुभि॒र्जेह॑मानं पत॒त्रि ॥
ಅತ್ರಾ॑ ತೇ ರೂ॒ಪಮು॑ತ್ತ॒ಮಮ॑ಪಶ್ಯಂ॒ ಜಿಗೀ॑ಷಮಾಣಮಿ॒ಷ ಆ ಪ॒ದೇ ಗೋಃ । ಯ॒ದಾ ತೇ॒ ಮರ್ತೋ॒ ಅನು॒ ಭೋಗ॒ಮಾನ॒ಳಾದಿದ್ಗ್ರಸಿ॑ಷ್ಠ॒ ಓಷ॑ಧೀರಜೀಗಃ ॥
अत्रा॑ ते रू॒पमु॑त्त॒मम॑पश्यं॒ जिगी॑षमाणमि॒ष आ प॒दे गोः । य॒दा ते॒ मर्तो॒ अनु॒ भोग॒मान॒ळादिद्ग्रसि॑ष्ठ॒ ओष॑धीरजीगः ॥
ಅನು॑ ತ್ವಾ॒ ರಥೋ॒ ಅನು॒ ಮರ್ಯೋ॑ ಅರ್ವ॒ನ್ನನು॒ ಗಾವೋಽನು॒ ಭಗಃ॑ ಕ॒ನೀನಾಂ॑ । ಅನು॒ ವ್ರಾತಾ॑ಸ॒ಸ್ತವ॑ ಸ॒ಖ್ಯಮೀ॑ಯು॒ರನು॑ ದೇ॒ವಾ ಮ॑ಮಿರೇ ವೀ॒ರ್ಯಂ॑ ತೇ ॥
अनु॑ त्वा॒ रथो॒ अनु॒ मर्यो॑ अर्व॒न्ननु॒ गावोऽनु॒ भगः॑ क॒नीनां॑ । अनु॒ व्राता॑स॒स्तव॑ स॒ख्यमी॑यु॒रनु॑ दे॒वा म॑मिरे वी॒र्यं॑ ते ॥
ಹಿರ॑ಣ್ಯಶೃಂ॒ಗೋಽಯೋ॑ ಅಸ್ಯ॒ ಪಾದಾ॒ ಮನೋ॑ಜವಾ॒ ಅವ॑ರ॒ ಇಂದ್ರ॑ ಆಸೀತ್ । ದೇ॒ವಾ ಇದ॑ಸ್ಯ ಹವಿ॒ರದ್ಯ॑ಮಾಯ॒ನ್ಯೋ ಅರ್ವಂ॑ತಂ ಪ್ರಥ॒ಮೋ ಅ॒ಧ್ಯತಿ॑ಷ್ಠತ್ ॥
हिर॑ण्यशृं॒गोऽयो॑ अस्य॒ पादा॒ मनो॑जवा॒ अव॑र॒ इंद्र॑ आसीत् । दे॒वा इद॑स्य हवि॒रद्य॑माय॒न्यो अर्वं॑तं प्रथ॒मो अ॒ध्यति॑ष्ठत् ॥
ಈ॒ರ್ಮಾಂತಾ॑ಸಃ॒ ಸಿಲಿ॑ಕಮಧ್ಯಮಾಸಃ॒ ಸಂ ಶೂರ॑ಣಾಸೋ ದಿ॒ವ್ಯಾಸೋ॒ ಅತ್ಯಾಃ॑ । ಹಂ॒ಸಾ ಇ॑ವ ಶ್ರೇಣಿ॒ಶೋ ಯ॑ತಂತೇ॒ ಯದಾಕ್ಷಿ॑ಷುರ್ದಿ॒ವ್ಯಮಜ್ಮ॒ಮಶ್ವಾಃ॑ ॥
ई॒र्मांता॑सः॒ सिलि॑कमध्यमासः॒ सं शूर॑णासो दि॒व्यासो॒ अत्याः॑ । हं॒सा इ॑व श्रेणि॒शो य॑तंते॒ यदाक्षि॑षुर्दि॒व्यमज्म॒मश्वाः॑ ॥
ತವ॒ ಶರೀ॑ರಂ ಪತಯಿ॒ಷ್ಣ್ವ॑ರ್ವ॒ನ್ತವ॑ ಚಿ॒ತ್ತಂ ವಾತ॑ ಇವ॒ ಧ್ರಜೀ॑ಮಾನ್ । ತವ॒ ಶೃಂಗಾ॑ಣಿ॒ ವಿಷ್ಠಿ॑ತಾ ಪುರು॒ತ್ರಾರ॑ಣ್ಯೇಷು॒ ಜರ್ಭು॑ರಾಣಾ ಚರಂತಿ ॥
तव॒ शरी॑रं पतयि॒ष्ण्व॑र्व॒न्तव॑ चि॒त्तं वात॑ इव॒ ध्रजी॑मान् । तव॒ शृंगा॑णि॒ विष्ठि॑ता पुरु॒त्रार॑ण्येषु॒ जर्भु॑राणा चरंति ॥
ಉಪ॒ ಪ್ರಾಗಾ॒ಚ್ಛಸ॑ನಂ ವಾ॒ಜ್ಯರ್ವಾ॑ ದೇವ॒ದ್ರೀಚಾ॒ ಮನ॑ಸಾ॒ ದೀಧ್ಯಾ॑ನಃ । ಅ॒ಜಃ ಪು॒ರೋ ನೀ॑ಯತೇ॒ ನಾಭಿ॑ರ॒ಸ್ಯಾನು॑ ಪ॒ಶ್ಚಾತ್ಕ॒ವಯೋ॑ ಯಂತಿ ರೇ॒ಭಾಃ ॥
उप॒ प्रागा॒च्छस॑नं वा॒ज्यर्वा॑ देव॒द्रीचा॒ मन॑सा॒ दीध्या॑नः । अ॒जः पु॒रो नी॑यते॒ नाभि॑र॒स्यानु॑ प॒श्चात्क॒वयो॑ यंति रे॒भाः ॥
ಉಪ॒ ಪ್ರಾಗಾ॑ತ್ಪರ॒ಮಂ ಯತ್ಸ॒ಧಸ್ಥ॒ಮರ್ವಾಁ॒ ಅಚ್ಛಾ॑ ಪಿ॒ತರಂ॑ ಮಾ॒ತರಂ॑ ಚ । ಅ॒ದ್ಯಾ ದೇ॒ವಾಞ್ಜುಷ್ಟ॑ತಮೋ॒ ಹಿ ಗ॒ಮ್ಯಾ ಅಥಾ ಶಾ॑ಸ್ತೇ ದಾ॒ಶುಷೇ॒ ವಾರ್ಯಾ॑ಣಿ ॥
उप॒ प्रागा॑त्पर॒मं यत्स॒धस्थ॒मर्वाँ॒ अच्छा॑ पि॒तरं॑ मा॒तरं॑ च । अ॒द्या दे॒वाञ्जुष्ट॑तमो॒ हि ग॒म्या अथा शा॑स्ते दा॒शुषे॒ वार्या॑णि ॥