ಸೂಕ್ತ 165

ಕಯಾ॑ ಶು॒ಭಾ ಸವ॑ಯಸಃ॒ ಸನೀ॑ಳಾಃ ಸಮಾ॒ನ್ಯಾ ಮ॒ರುತಃ॒ ಸಂ ಮಿ॑ಮಿಕ್ಷುಃ । ಕಯಾ॑ ಮ॒ತೀ ಕುತ॒ ಏತಾ॑ಸ ಏ॒ತೇಽರ್ಚಂ॑ತಿ॒ ಶುಷ್ಮಂ॒ ವೃಷ॑ಣೋ ವಸೂ॒ಯಾ ॥

कया॑ शु॒भा सव॑यसः॒ सनी॑ळाः समा॒न्या म॒रुतः॒ सं मि॑मिक्षुः । कया॑ म॒ती कुत॒ एता॑स ए॒तेऽर्चं॑ति॒ शुष्मं॒ वृष॑णो वसू॒या ॥

ಕಸ್ಯ॒ ಬ್ರಹ್ಮಾ॑ಣಿ ಜುಜುಷು॒ರ್ಯುವಾ॑ನಃ॒ ಕೋ ಅ॑ಧ್ವ॒ರೇ ಮ॒ರುತ॒ ಆ ವ॑ವರ್ತ । ಶ್ಯೇ॒ನಾಁ ಇ॑ವ॒ ಧ್ರಜ॑ತೋ ಅಂ॒ತರಿ॑ಕ್ಷೇ॒ ಕೇನ॑ ಮ॒ಹಾ ಮನ॑ಸಾ ರೀರಮಾಮ ॥

कस्य॒ ब्रह्मा॑णि जुजुषु॒र्युवा॑नः॒ को अ॑ध्व॒रे म॒रुत॒ आ व॑वर्त । श्ये॒नाँ इ॑व॒ ध्रज॑तो अं॒तरि॑क्षे॒ केन॑ म॒हा मन॑सा रीरमाम ॥

ಕುತ॒ಸ್ತ್ವಮಿಂ॑ದ್ರ॒ ಮಾಹಿ॑ನಃ॒ ಸನ್ನೇಕೋ॑ ಯಾಸಿ ಸತ್ಪತೇ॒ ಕಿಂ ತ॑ ಇ॒ತ್ಥಾ । ಸಂ ಪೃ॑ಚ್ಛಸೇ ಸಮರಾ॒ಣಃ ಶು॑ಭಾ॒ನೈರ್ವೋ॒ಚೇಸ್ತನ್ನೋ॑ ಹರಿವೋ॒ ಯತ್ತೇ॑ ಅ॒ಸ್ಮೇ ॥

कुत॒स्त्वमिं॑द्र॒ माहि॑नः॒ सन्नेको॑ यासि सत्पते॒ किं त॑ इ॒त्था । सं पृ॑च्छसे समरा॒णः शु॑भा॒नैर्वो॒चेस्तन्नो॑ हरिवो॒ यत्ते॑ अ॒स्मे ॥

ಬ್ರಹ್ಮಾ॑ಣಿ ಮೇ ಮ॒ತಯಃ॒ ಶಂ ಸು॒ತಾಸಃ॒ ಶುಷ್ಮ॑ ಇಯರ್ತಿ॒ ಪ್ರಭೃ॑ತೋ ಮೇ॒ ಅದ್ರಿಃ॑ । ಆ ಶಾ॑ಸತೇ॒ ಪ್ರತಿ॑ ಹರ್ಯಂತ್ಯು॒ಕ್ಥೇಮಾ ಹರೀ॑ ವಹತ॒ಸ್ತಾ ನೋ॒ ಅಚ್ಛ॑ ॥

ब्रह्मा॑णि मे म॒तयः॒ शं सु॒तासः॒ शुष्म॑ इयर्ति॒ प्रभृ॑तो मे॒ अद्रिः॑ । आ शा॑सते॒ प्रति॑ हर्यंत्यु॒क्थेमा हरी॑ वहत॒स्ता नो॒ अच्छ॑ ॥

ಅತೋ॑ ವ॒ಯಮಂ॑ತ॒ಮೇಭಿ॑ರ್ಯುಜಾ॒ನಾಃ ಸ್ವಕ್ಷ॑ತ್ರೇಭಿಸ್ತ॒ನ್ವಃ೧॒॑ ಶುಂಭ॑ಮಾನಾಃ । ಮಹೋ॑ಭಿ॒ರೇತಾಁ॒ ಉಪ॑ ಯುಜ್ಮಹೇ॒ ನ್ವಿಂದ್ರ॑ ಸ್ವ॒ಧಾಮನು॒ ಹಿ ನೋ॑ ಬ॒ಭೂಥ॑ ॥

अतो॑ व॒यमं॑त॒मेभि॑र्युजा॒नाः स्वक्ष॑त्रेभिस्त॒न्वः१॒॑ शुंभ॑मानाः । महो॑भि॒रेताँ॒ उप॑ युज्महे॒ न्विंद्र॑ स्व॒धामनु॒ हि नो॑ ब॒भूथ॑ ॥

ಕ್ವ೧॒॑ ಸ್ಯಾ ವೋ॑ ಮರುತಃ ಸ್ವ॒ಧಾಸೀ॒ದ್ಯನ್ಮಾಮೇಕಂ॑ ಸ॒ಮಧ॑ತ್ತಾಹಿ॒ಹತ್ಯೇ॑ । ಅ॒ಹಂ ಹ್ಯೂ೧॒॑ಗ್ರಸ್ತ॑ವಿ॒ಷಸ್ತುವಿ॑ಷ್ಮಾ॒ನ್ವಿಶ್ವ॑ಸ್ಯ॒ ಶತ್ರೋ॒ರನ॑ಮಂ ವಧ॒ಸ್ನೈಃ ॥

क्व१॒॑ स्या वो॑ मरुतः स्व॒धासी॒द्यन्मामेकं॑ स॒मध॑त्ताहि॒हत्ये॑ । अ॒हं ह्यू१॒॑ग्रस्त॑वि॒षस्तुवि॑ष्मा॒न्विश्व॑स्य॒ शत्रो॒रन॑मं वध॒स्नैः ॥

ಭೂರಿ॑ ಚಕರ್ಥ॒ ಯುಜ್ಯೇ॑ಭಿರ॒ಸ್ಮೇ ಸ॑ಮಾ॒ನೇಭಿ॑ರ್ವೃಷಭ॒ ಪೌಂಸ್ಯೇ॑ಭಿಃ । ಭೂರೀ॑ಣಿ॒ ಹಿ ಕೃ॒ಣವಾ॑ಮಾ ಶವಿ॒ಷ್ಠೇಂದ್ರ॒ ಕ್ರತ್ವಾ॑ ಮರುತೋ॒ ಯದ್ವಶಾ॑ಮ ॥

भूरि॑ चकर्थ॒ युज्ये॑भिर॒स्मे स॑मा॒नेभि॑र्वृषभ॒ पौंस्ये॑भिः । भूरी॑णि॒ हि कृ॒णवा॑मा शवि॒ष्ठेंद्र॒ क्रत्वा॑ मरुतो॒ यद्वशा॑म ॥

ವಧೀಂ॑ ವೃ॒ತ್ರಂ ಮ॑ರುತ ಇಂದ್ರಿ॒ಯೇಣ॒ ಸ್ವೇನ॒ ಭಾಮೇ॑ನ ತವಿ॒ಷೋ ಬ॑ಭೂ॒ವಾನ್ । ಅ॒ಹಮೇ॒ತಾ ಮನ॑ವೇ ವಿ॒ಶ್ವಶ್ಚಂ॑ದ್ರಾಃ ಸು॒ಗಾ ಅ॒ಪಶ್ಚ॑ಕರ॒ ವಜ್ರ॑ಬಾಹುಃ ॥

वधीं॑ वृ॒त्रं म॑रुत इंद्रि॒येण॒ स्वेन॒ भामे॑न तवि॒षो ब॑भू॒वान् । अ॒हमे॒ता मन॑वे वि॒श्वश्चं॑द्राः सु॒गा अ॒पश्च॑कर॒ वज्र॑बाहुः ॥

ಅನು॑ತ್ತ॒ಮಾ ತೇ॑ ಮಘವ॒ನ್ನಕಿ॒ರ್ನು ನ ತ್ವಾವಾಁ॑ ಅಸ್ತಿ ದೇ॒ವತಾ॒ ವಿದಾ॑ನಃ । ನ ಜಾಯ॑ಮಾನೋ॒ ನಶ॑ತೇ॒ ನ ಜಾ॒ತೋ ಯಾನಿ॑ ಕರಿ॒ಷ್ಯಾ ಕೃ॑ಣು॒ಹಿ ಪ್ರ॑ವೃದ್ಧ ॥

अनु॑त्त॒मा ते॑ मघव॒न्नकि॒र्नु न त्वावाँ॑ अस्ति दे॒वता॒ विदा॑नः । न जाय॑मानो॒ नश॑ते॒ न जा॒तो यानि॑ करि॒ष्या कृ॑णु॒हि प्र॑वृद्ध ॥

ಏಕ॑ಸ್ಯ ಚಿನ್ಮೇ ವಿ॒ಭ್ವ೧॒॑ಸ್ತ್ವೋಜೋ॒ ಯಾ ನು ದ॑ಧೃ॒ಷ್ವಾನ್ಕೃ॒ಣವೈ॑ ಮನೀ॒ಷಾ । ಅ॒ಹಂ ಹ್ಯೂ೧॒॑ಗ್ರೋ ಮ॑ರುತೋ॒ ವಿದಾ॑ನೋ॒ ಯಾನಿ॒ ಚ್ಯವ॒ಮಿಂದ್ರ॒ ಇದೀ॑ಶ ಏಷಾಂ ॥

एक॑स्य चिन्मे वि॒भ्व१॒॑स्त्वोजो॒ या नु द॑धृ॒ष्वान्कृ॒णवै॑ मनी॒षा । अ॒हं ह्यू१॒॑ग्रो म॑रुतो॒ विदा॑नो॒ यानि॒ च्यव॒मिंद्र॒ इदी॑श एषां ॥

ಅಮಂ॑ದನ್ಮಾ ಮರುತಃ॒ ಸ್ತೋಮೋ॒ ಅತ್ರ॒ ಯನ್ಮೇ॑ ನರಃ॒ ಶ್ರುತ್ಯಂ॒ ಬ್ರಹ್ಮ॑ ಚ॒ಕ್ರ । ಇಂದ್ರಾ॑ಯ॒ ವೃಷ್ಣೇ॒ ಸುಮ॑ಖಾಯ॒ ಮಹ್ಯಂ॒ ಸಖ್ಯೇ॒ ಸಖಾ॑ಯಸ್ತ॒ನ್ವೇ॑ ತ॒ನೂಭಿಃ॑ ॥

अमं॑दन्मा मरुतः॒ स्तोमो॒ अत्र॒ यन्मे॑ नरः॒ श्रुत्यं॒ ब्रह्म॑ च॒क्र । इंद्रा॑य॒ वृष्णे॒ सुम॑खाय॒ मह्यं॒ सख्ये॒ सखा॑यस्त॒न्वे॑ त॒नूभिः॑ ॥

ಏ॒ವೇದೇ॒ತೇ ಪ್ರತಿ॑ ಮಾ॒ ರೋಚ॑ಮಾನಾ॒ ಅನೇ॑ದ್ಯಃ॒ ಶ್ರವ॒ ಏಷೋ॒ ದಧಾ॑ನಾಃ । ಸಂ॒ಚಕ್ಷ್ಯಾ॑ ಮರುತಶ್ಚಂ॒ದ್ರವ॑ರ್ಣಾ॒ ಅಚ್ಛಾಂ॑ತ ಮೇ ಛ॒ದಯಾ॑ಥಾ ಚ ನೂ॒ನಂ ॥

ए॒वेदे॒ते प्रति॑ मा॒ रोच॑माना॒ अने॑द्यः॒ श्रव॒ एषो॒ दधा॑नाः । सं॒चक्ष्या॑ मरुतश्चं॒द्रव॑र्णा॒ अच्छां॑त मे छ॒दया॑था च नू॒नं ॥

ಕೋ ನ್ವತ್ರ॑ ಮರುತೋ ಮಾಮಹೇ ವಃ॒ ಪ್ರ ಯಾ॑ತನ॒ ಸಖೀಁ॒ರಚ್ಛಾ॑ ಸಖಾಯಃ । ಮನ್ಮಾ॑ನಿ ಚಿತ್ರಾ ಅಪಿವಾ॒ತಯಂ॑ತ ಏ॒ಷಾಂ ಭೂ॑ತ॒ ನವೇ॑ದಾ ಮ ಋ॒ತಾನಾಂ॑ ॥

को न्वत्र॑ मरुतो मामहे वः॒ प्र या॑तन॒ सखीँ॒रच्छा॑ सखायः । मन्मा॑नि चित्रा अपिवा॒तयं॑त ए॒षां भू॑त॒ नवे॑दा म ऋ॒तानां॑ ॥

ಆ ಯದ್ದು॑ವ॒ಸ್ಯಾದ್ದು॒ವಸೇ॒ ನ ಕಾ॒ರುರ॒ಸ್ಮಾಞ್ಚ॒ಕ್ರೇ ಮಾ॒ನ್ಯಸ್ಯ॑ ಮೇ॒ಧಾ । ಓ ಷು ವ॑ರ್ತ್ತ ಮರುತೋ॒ ವಿಪ್ರ॒ಮಚ್ಛೇ॒ಮಾ ಬ್ರಹ್ಮಾ॑ಣಿ ಜರಿ॒ತಾ ವೋ॑ ಅರ್ಚತ್ ॥

आ यद्दु॑व॒स्याद्दु॒वसे॒ न का॒रुर॒स्माञ्च॒क्रे मा॒न्यस्य॑ मे॒धा । ओ षु व॑र्त्त मरुतो॒ विप्र॒मच्छे॒मा ब्रह्मा॑णि जरि॒ता वो॑ अर्चत् ॥

ಏ॒ಷ ವಃ॒ ಸ್ತೋಮೋ॑ ಮರುತ ಇ॒ಯಂ ಗೀರ್ಮಾಂ॑ದಾ॒ರ್ಯಸ್ಯ॑ ಮಾ॒ನ್ಯಸ್ಯ॑ ಕಾ॒ರೋಃ । ಏಷಾ ಯಾ॑ಸೀಷ್ಟ ತ॒ನ್ವೇ॑ ವ॒ಯಾಂ ವಿ॒ದ್ಯಾಮೇ॒ಷಂ ವೃ॒ಜನಂ॑ ಜೀ॒ರದಾ॑ನುಂ ॥

ए॒ष वः॒ स्तोमो॑ मरुत इ॒यं गीर्मां॑दा॒र्यस्य॑ मा॒न्यस्य॑ का॒रोः । एषा या॑सीष्ट त॒न्वे॑ व॒यां वि॒द्यामे॒षं वृ॒जनं॑ जी॒रदा॑नुं ॥