Sūkta 14

ऐभि॑रग्ने॒ दुवो॒ गिरो॒ विश्वे॑भिः॒ सोम॑पीतये । दे॒वेभि॑र्याहि॒ यक्षि॑ च ॥

áibhiragne dúvo gíro víśvebhiḥ sómapītaye ǀ devébhiryāhi yákṣi ca ǁ

आ त्वा॒ कण्वा॑ अहूषत गृ॒णंति॑ विप्र ते॒ धियः॑ । दे॒वेभि॑रग्न॒ आ ग॑हि ॥

ā́ tvā káṇvā ahūṣata gṛṇánti vipra te dhíyaḥ ǀ devébhiragna ā́ gahi ǁ

इं॒द्र॒वा॒यू बृह॒स्पतिं॑ मि॒त्राग्निं पू॒षणं॒ भगं॑ । आ॒दि॒त्यान्मारु॑तं ग॒णं ॥

indravāyū́ bṛ́haspátim mitrā́gním pūṣáṇam bhágam ǀ ādityā́nmā́rutam gaṇám ǁ

प्र वो॑ भ्रियंत॒ इंद॑वो मत्स॒रा मा॑दयि॒ष्णवः॑ । द्र॒प्सा मध्व॑श्चमू॒षदः॑ ॥

prá vo bhriyanta índavo matsarā́ mādayiṣṇávaḥ ǀ drapsā́ mádhvaścamūṣádaḥ ǁ

ईळ॑ते॒ त्वाम॑व॒स्यवः॒ कण्वा॑सो वृ॒क्तब॑र्हिषः । ह॒विष्मं॑तो अरं॒कृतः॑ ॥

ī́ḷate tvā́mavasyávaḥ káṇvāso vṛktábarhiṣaḥ ǀ havíṣmanto araṃkṛ́taḥ ǁ

घृ॒तपृ॑ष्ठा मनो॒युजो॒ ये त्वा॒ वहं॑ति॒ वह्न॑यः । आ दे॒वान्त्सोम॑पीतये ॥

ghṛtápṛṣṭhā manoyújo yé tvā váhanti váhnayaḥ ǀ ā́ devā́ntsómapītaye ǁ

तान्यज॑त्राँ ऋता॒वृधोऽग्ने॒ पत्नी॑वतस्कृधि । मध्वः॑ सुजिह्व पायय ॥

tā́nyájatrām̐ ṛtāvṛ́dhó’gne pátnīvataskṛdhi ǀ mádhvaḥ sujihva pāyaya ǁ

ये यज॑त्रा॒ य ईड्या॒स्ते ते॑ पिबंतु जि॒ह्वया॑ । मधो॑रग्ने॒ वष॑ट्कृति ॥

yé yájatrā yá ī́ḍyāsté te pibantu jihváyā ǀ mádhoragne váṣaṭkṛti ǁ

आकीं॒ सूर्य॑स्य रोच॒नाद्विश्चा॑न्दे॒वाँ उ॑ष॒र्बुधः॑ । विप्रो॒ होते॒ह व॑क्षति ॥

ā́kīm sū́ryasya rocanā́dvíśvāndevā́m̐ uṣarbúdhaḥ ǀ vípro hótehá vakṣati ǁ

विश्वे॑भिः सो॒म्यं मध्वग्न॒ इंद्रे॑ण वा॒युना॑ । पिबा॑ मि॒त्रस्य॒ धाम॑भिः ॥

víśvebhiḥ somyám mádhvágna índreṇa vāyúnā ǀ píbā mitrásya dhā́mabhiḥ ǁ

त्वं होता॒ मनु॑र्हि॒तोऽग्ने॑ य॒ज्ञेषु॑ सीदसि । सेमं नो॑ अध्व॒रं य॑ज ॥

tvám hótā mánurhitó’gne yajñéṣu sīdasi ǀ sémám no adhvarám yaja ǁ

यु॒क्ष्वा ह्यरु॑षी॒ रथे॑ ह॒रितो॑ देव रो॒हितः॑ । ताभि॑र्दे॒वाँ इ॒हा व॑ह ॥

yukṣvā́ hyáruṣī ráthe haríto deva rohítaḥ ǀ tā́bhirdevā́m̐ ihā́ vaha ǁ