Sūkta 13

सुस॑मिद्धो न॒ आ व॑ह दे॒वाँ अ॑ग्ने ह॒विष्म॑ते । होतः॑ पावक॒ यक्षि॑ च ॥

súsamiddho na ā́ vaha devā́m̐ agne havíṣmate ǀ hótaḥ pāvaka yákṣi ca ǁ

मधु॑मंतं तनूनपाद्य॒ज्ञं दे॒वेषु॑ नः कवे । अ॒द्या कृ॑णुहि वी॒तये॑ ॥

mádhumantam tanūnapādyajñám devéṣu naḥ kave ǀ adyā́ kṛṇuhi vītáye ǁ

नरा॒शंस॑मि॒ह प्रि॒यम॒स्मिन्य॒ज्ञ उप॑ ह्वये । मधु॑जिह्वं हवि॒ष्कृतं॑ ॥

nárāśáṃsamihá priyámasmínyajñá úpa hvaye ǀ mádhujihvam haviṣkṛ́tam ǁ

अग्ने॑ सु॒खत॑मे॒ रथे॑ दे॒वाँ ई॑ळि॒त आ व॑ह । असि॒ होता॒ मनु॑र्हितः ॥

ágne sukhátame ráthe devā́m̐ īḷitá ā́ vaha ǀ ási hótā mánurhitaḥ ǁ

स्तृ॒णी॒त ब॒र्हिरा॑नु॒षग्घृ॒तपृ॑ष्ठं मनीषिणः । यत्रा॒मृत॑स्य॒ चक्ष॑णं ॥

stṛṇītá barhírānuṣágghṛtápṛṣṭham manīṣiṇaḥ ǀ yátrāmṛ́tasya cákṣaṇam ǁ

वि श्र॑यंतामृता॒वृधो॒ द्वारो॑ दे॒वीर॑स॒श्चतः॑ । अ॒द्या नू॒नं च॒ यष्ट॑वे ॥

ví śrayantāmṛtāvṛ́dho dvā́ro devī́rasaścátaḥ ǀ adyā́ nūnám ca yáṣṭave ǁ

नक्तो॒षासा॑ सु॒पेश॑सा॒स्मिन्य॒ज्ञ उप॑ ह्वये । इ॒दं नो॑ ब॒र्हिरा॒सदे॑ ॥

náktoṣā́sā supéśasāsmínyajñá úpa hvaye ǀ idám no barhírāsáde ǁ

ता सु॑जि॒ह्वा उप॑ ह्वये॒ होता॑रा॒ दैव्या॑ क॒वी । य॒ज्ञं नो॑ यक्षतामि॒मं ॥

tā́ sujihvā́ úpa hvaye hótārā dáivyā kavī́ ǀ yajñám no yakṣatāmimám ǁ

इळा॒ सर॑स्वती म॒ही ति॒स्रो दे॒वीर्म॑यो॒भुवः॑ । ब॒र्हिः सी॑दंत्व॒स्रिधः॑ ॥

íḷā sárasvatī mahī́ tisró devī́rmayobhúvaḥ ǀ barhíḥ sīdantvasrídhaḥ ǁ

इ॒ह त्वष्टा॑रमग्रि॒यं वि॒श्वरू॑प॒मुप॑ ह्वये । अ॒स्माक॑मस्तु॒ केव॑लः ॥

ihá tváṣṭāramagriyám viśvárūpamúpa hvaye ǀ asmā́kamastu kévalaḥ ǁ

अव॑ सृजा वनस्पते॒ देव॑ दे॒वेभ्यो॑ ह॒विः । प्र दा॒तुर॑स्तु॒ चेत॑नं ॥

áva sṛjā vanaspate déva devébhyo havíḥ ǀ prá dātúrastu cétanam ǁ

स्वाहा॑ य॒ज्ञं कृ॑णोत॒नेंद्रा॑य॒ यज्व॑नो गृ॒हे । तत्र॑ दे॒वाँ उप॑ ह्वये ॥

svā́hā yajñám kṛṇotanéndrāya yájvano gṛhé ǀ tátra devā́m̐ úpa hvaye ǁ