ಈ ಸೂಕ್ತಕ್ಕೆ ಅಡ್ಮಿನ್‌ನಲ್ಲಿ ಕನ್ನಡ ಅಧ್ಯಯನ ಮಾರ್ಗದರ್ಶಿ (Study Guide) ಇನ್ನೂ ರಚನೆಯಾಗಿಲ್ಲ. ಅಡ್ಮಿನ್‌ನಲ್ಲಿ Generate Study Guides ಮೂಲಕ ಕನ್ನಡ ಭಾಷೆಯನ್ನು ಆಯ್ಕೆಮಾಡಿ ರಚಿಸಬಹುದು.
ಬಳಿ॒ತ್ಥಾ ತದ್ವಪು॑ಷೇ ಧಾಯಿ ದರ್ಶ॒ತಂ ದೇ॒ವಸ್ಯ॒ ಭರ್ಗಃ॒ ಸಹ॑ಸೋ॒ ಯತೋ॒ ಜನಿ॑ । ಯದೀ॒ಮುಪ॒ ಹ್ವರ॑ತೇ॒ ಸಾಧ॑ತೇ ಮ॒ತಿರ್ಋ॒ತಸ್ಯ॒ ಧೇನಾ॑ ಅನಯಂತ ಸ॒ಸ್ರುತಃ॑ ॥
बळि॒त्था तद्वपु॑षे धायि दर्श॒तं दे॒वस्य॒ भर्गः॒ सह॑सो॒ यतो॒ जनि॑ । यदी॒मुप॒ ह्वर॑ते॒ साध॑ते म॒तिर्ऋ॒तस्य॒ धेना॑ अनयंत स॒स्रुतः॑ ॥
ಪೃ॒ಕ್ಷೋ ವಪುಃ॑ ಪಿತು॒ಮಾನ್ನಿತ್ಯ॒ ಆ ಶ॑ಯೇ ದ್ವಿ॒ತೀಯ॒ಮಾ ಸ॒ಪ್ತಶಿ॑ವಾಸು ಮಾ॒ತೃಷು॑ । ತೃ॒ತೀಯ॑ಮಸ್ಯ ವೃಷ॒ಭಸ್ಯ॑ ದೋ॒ಹಸೇ॒ ದಶ॑ಪ್ರಮತಿಂ ಜನಯಂತ॒ ಯೋಷ॑ಣಃ ॥
पृ॒क्षो वपुः॑ पितु॒मान्नित्य॒ आ श॑ये द्वि॒तीय॒मा स॒प्तशि॑वासु मा॒तृषु॑ । तृ॒तीय॑मस्य वृष॒भस्य॑ दो॒हसे॒ दश॑प्रमतिं जनयंत॒ योष॑णः ॥
ನಿರ್ಯದೀಂ॑ ಬು॒ಧ್ನಾನ್ಮ॑ಹಿ॒ಷಸ್ಯ॒ ವರ್ಪ॑ಸ ಈಶಾ॒ನಾಸಃ॒ ಶವ॑ಸಾ॒ ಕ್ರಂತ॑ ಸೂ॒ರಯಃ॑ । ಯದೀ॒ಮನು॑ ಪ್ರ॒ದಿವೋ॒ ಮಧ್ವ॑ ಆಧ॒ವೇ ಗುಹಾ॒ ಸಂತಂ॑ ಮಾತ॒ರಿಶ್ವಾ॑ ಮಥಾ॒ಯತಿ॑ ॥
निर्यदीं॑ बु॒ध्नान्म॑हि॒षस्य॒ वर्प॑स ईशा॒नासः॒ शव॑सा॒ क्रंत॑ सू॒रयः॑ । यदी॒मनु॑ प्र॒दिवो॒ मध्व॑ आध॒वे गुहा॒ संतं॑ मात॒रिश्वा॑ मथा॒यति॑ ॥
ಪ್ರ ಯತ್ಪಿ॒ತುಃ ಪ॑ರ॒ಮಾನ್ನೀ॒ಯತೇ॒ ಪರ್ಯಾ ಪೃ॒ಕ್ಷುಧೋ॑ ವೀ॒ರುಧೋ॒ ದಂಸು॑ ರೋಹತಿ । ಉ॒ಭಾ ಯದ॑ಸ್ಯ ಜ॒ನುಷಂ॒ ಯದಿನ್ವ॑ತ॒ ಆದಿದ್ಯವಿ॑ಷ್ಠೋ ಅಭವದ್ಘೃ॒ಣಾ ಶುಚಿಃ॑ ॥
प्र यत्पि॒तुः प॑र॒मान्नी॒यते॒ पर्या पृ॒क्षुधो॑ वी॒रुधो॒ दंसु॑ रोहति । उ॒भा यद॑स्य ज॒नुषं॒ यदिन्व॑त॒ आदिद्यवि॑ष्ठो अभवद्घृ॒णा शुचिः॑ ॥
ಆದಿನ್ಮಾ॒ತೄರಾವಿ॑ಶ॒ದ್ಯಾಸ್ವಾ ಶುಚಿ॒ರಹಿಂ॑ಸ್ಯಮಾನ ಉರ್ವಿ॒ಯಾ ವಿ ವಾ॑ವೃಧೇ । ಅನು॒ ಯತ್ಪೂರ್ವಾ॒ ಅರು॑ಹತ್ಸನಾ॒ಜುವೋ॒ ನಿ ನವ್ಯ॑ಸೀ॒ಷ್ವವ॑ರಾಸು ಧಾವತೇ ॥
आदिन्मा॒तॄरावि॑श॒द्यास्वा शुचि॒रहिं॑स्यमान उर्वि॒या वि वा॑वृधे । अनु॒ यत्पूर्वा॒ अरु॑हत्सना॒जुवो॒ नि नव्य॑सी॒ष्वव॑रासु धावते ॥
ಆದಿದ್ಧೋತಾ॑ರಂ ವೃಣತೇ॒ ದಿವಿ॑ಷ್ಟಿಷು॒ ಭಗ॑ಮಿವ ಪಪೃಚಾ॒ನಾಸ॑ ಋಂಜತೇ । ದೇ॒ವಾನ್ಯತ್ಕ್ರತ್ವಾ॑ ಮ॒ಜ್ಮನಾ॑ ಪುರುಷ್ಟು॒ತೋ ಮರ್ತಂ॒ ಶಂಸಂ॑ ವಿ॒ಶ್ವಧಾ॒ ವೇತಿ॒ ಧಾಯ॑ಸೇ ॥
आदिद्धोता॑रं वृणते॒ दिवि॑ष्टिषु॒ भग॑मिव पपृचा॒नास॑ ऋंजते । दे॒वान्यत्क्रत्वा॑ म॒ज्मना॑ पुरुष्टु॒तो मर्तं॒ शंसं॑ वि॒श्वधा॒ वेति॒ धाय॑से ॥
ವಿ ಯದಸ್ಥಾ॑ದ್ಯಜ॒ತೋ ವಾತ॑ಚೋದಿತೋ ಹ್ವಾ॒ರೋ ನ ವಕ್ವಾ॑ ಜ॒ರಣಾ॒ ಅನಾ॑ಕೃತಃ । ತಸ್ಯ॒ ಪತ್ಮ॑ನ್ದ॒ಕ್ಷುಷಃ॑ ಕೃ॒ಷ್ಣಜಂ॑ಹಸಃ॒ ಶುಚಿ॑ಜನ್ಮನೋ॒ ರಜ॒ ಆ ವ್ಯ॑ಧ್ವನಃ ॥
वि यदस्था॑द्यज॒तो वात॑चोदितो ह्वा॒रो न वक्वा॑ ज॒रणा॒ अना॑कृतः । तस्य॒ पत्म॑न्द॒क्षुषः॑ कृ॒ष्णजं॑हसः॒ शुचि॑जन्मनो॒ रज॒ आ व्य॑ध्वनः ॥
ರಥೋ॒ ನ ಯಾ॒ತಃ ಶಿಕ್ವ॑ಭಿಃ ಕೃ॒ತೋ ದ್ಯಾಮಂಗೇ॑ಭಿರರು॒ಷೇಭಿ॑ರೀಯತೇ । ಆದ॑ಸ್ಯ॒ ತೇ ಕೃ॒ಷ್ಣಾಸೋ॑ ದಕ್ಷಿ ಸೂ॒ರಯಃ॒ ಶೂರ॑ಸ್ಯೇವ ತ್ವೇ॒ಷಥಾ॑ದೀಷತೇ॒ ವಯಃ॑ ॥
रथो॒ न या॒तः शिक्व॑भिः कृ॒तो द्यामंगे॑भिररु॒षेभि॑रीयते । आद॑स्य॒ ते कृ॒ष्णासो॑ दक्षि सू॒रयः॒ शूर॑स्येव त्वे॒षथा॑दीषते॒ वयः॑ ॥
ತ್ವಯಾ॒ ಹ್ಯ॑ಗ್ನೇ॒ ವರು॑ಣೋ ಧೃ॒ತವ್ರ॑ತೋ ಮಿ॒ತ್ರಃ ಶಾ॑ಶ॒ದ್ರೇ ಅ॑ರ್ಯ॒ಮಾ ಸು॒ದಾನ॑ವಃ । ಯತ್ಸೀ॒ಮನು॒ ಕ್ರತು॑ನಾ ವಿ॒ಶ್ವಥಾ॑ ವಿ॒ಭುರ॒ರಾನ್ನ ನೇ॒ಮಿಃ ಪ॑ರಿ॒ಭೂರಜಾ॑ಯಥಾಃ ॥
त्वया॒ ह्य॑ग्ने॒ वरु॑णो धृ॒तव्र॑तो मि॒त्रः शा॑श॒द्रे अ॑र्य॒मा सु॒दान॑वः । यत्सी॒मनु॒ क्रतु॑ना वि॒श्वथा॑ वि॒भुर॒रान्न ने॒मिः प॑रि॒भूरजा॑यथाः ॥
ತ್ವಮ॑ಗ್ನೇ ಶಶಮಾ॒ನಾಯ॑ ಸುನ್ವ॒ತೇ ರತ್ನಂ॑ ಯವಿಷ್ಠ ದೇ॒ವತಾ॑ತಿಮಿನ್ವಸಿ । ತಂ ತ್ವಾ॒ ನು ನವ್ಯಂ॑ ಸಹಸೋ ಯುವನ್ವ॒ಯಂ ಭಗಂ॒ ನ ಕಾ॒ರೇ ಮ॑ಹಿರತ್ನ ಧೀಮಹಿ ॥
त्वम॑ग्ने शशमा॒नाय॑ सुन्व॒ते रत्नं॑ यविष्ठ दे॒वता॑तिमिन्वसि । तं त्वा॒ नु नव्यं॑ सहसो युवन्व॒यं भगं॒ न का॒रे म॑हिरत्न धीमहि ॥
ಅ॒ಸ್ಮೇ ರ॒ಯಿಂ ನ ಸ್ವರ್ಥಂ॒ ದಮೂ॑ನಸಂ॒ ಭಗಂ॒ ದಕ್ಷಂ॒ ನ ಪ॑ಪೃಚಾಸಿ ಧರ್ಣ॒ಸಿಂ । ರ॒ಶ್ಮೀಁರಿ॑ವ॒ ಯೋ ಯಮ॑ತಿ॒ ಜನ್ಮ॑ನೀ ಉ॒ಭೇ ದೇ॒ವಾನಾಂ॒ ಶಂಸ॑ಮೃ॒ತ ಆ ಚ॑ ಸು॒ಕ್ರತುಃ॑ ॥
अ॒स्मे र॒यिं न स्वर्थं॒ दमू॑नसं॒ भगं॒ दक्षं॒ न प॑पृचासि धर्ण॒सिं । र॒श्मीँरि॑व॒ यो यम॑ति॒ जन्म॑नी उ॒भे दे॒वानां॒ शंस॑मृ॒त आ च॑ सु॒क्रतुः॑ ॥
ಉ॒ತ ನಃ॑ ಸು॒ದ್ಯೋತ್ಮಾ॑ ಜೀ॒ರಾಶ್ವೋ॒ ಹೋತಾ॑ ಮಂ॒ದ್ರಃ ಶೃ॑ಣವಚ್ಚಂ॒ದ್ರರ॑ಥಃ । ಸ ನೋ॑ ನೇಷ॒ನ್ನೇಷ॑ತಮೈ॒ರಮೂ॑ರೋ॒ಽಗ್ನಿರ್ವಾ॒ಮಂ ಸು॑ವಿ॒ತಂ ವಸ್ಯೋ॒ ಅಚ್ಛ॑ ॥
उ॒त नः॑ सु॒द्योत्मा॑ जी॒राश्वो॒ होता॑ मं॒द्रः शृ॑णवच्चं॒द्रर॑थः । स नो॑ नेष॒न्नेष॑तमै॒रमू॑रो॒ऽग्निर्वा॒मं सु॑वि॒तं वस्यो॒ अच्छ॑ ॥
ಅಸ್ತಾ॑ವ್ಯ॒ಗ್ನಿಃ ಶಿಮೀ॑ವದ್ಭಿರ॒ರ್ಕೈಃ ಸಾಮ್ರಾ॑ಜ್ಯಾಯ ಪ್ರತ॒ರಂ ದಧಾ॑ನಃ । ಅ॒ಮೀ ಚ॒ ಯೇ ಮ॒ಘವಾ॑ನೋ ವ॒ಯಂ ಚ॒ ಮಿಹಂ॒ ನ ಸೂರೋ॒ ಅತಿ॒ ನಿಷ್ಟ॑ತನ್ಯುಃ ॥
अस्ता॑व्य॒ग्निः शिमी॑वद्भिर॒र्कैः साम्रा॑ज्याय प्रत॒रं दधा॑नः । अ॒मी च॒ ये म॒घवा॑नो व॒यं च॒ मिहं॒ न सूरो॒ अति॒ निष्ट॑तन्युः ॥