ಸೂಕ್ತ 142

ಸಮಿ॑ದ್ಧೋ ಅಗ್ನ॒ ಆ ವ॑ಹ ದೇ॒ವಾಁ ಅ॒ದ್ಯ ಯ॒ತಸ್ರು॑ಚೇ । ತಂತುಂ॑ ತನುಷ್ವ ಪೂ॒ರ್ವ್ಯಂ ಸು॒ತಸೋ॑ಮಾಯ ದಾ॒ಶುಷೇ॑ ॥

समि॑द्धो अग्न॒ आ व॑ह दे॒वाँ अ॒द्य य॒तस्रु॑चे । तंतुं॑ तनुष्व पू॒र्व्यं सु॒तसो॑माय दा॒शुषे॑ ॥

ಘೃ॒ತವಂ॑ತ॒ಮುಪ॑ ಮಾಸಿ॒ ಮಧು॑ಮಂತಂ ತನೂನಪಾತ್ । ಯ॒ಜ್ಞಂ ವಿಪ್ರ॑ಸ್ಯ॒ ಮಾವ॑ತಃ ಶಶಮಾ॒ನಸ್ಯ॑ ದಾ॒ಶುಷಃ॑ ॥

घृ॒तवं॑त॒मुप॑ मासि॒ मधु॑मंतं तनूनपात् । य॒ज्ञं विप्र॑स्य॒ माव॑तः शशमा॒नस्य॑ दा॒शुषः॑ ॥

ಶುಚಿಃ॑ ಪಾವ॒ಕೋ ಅದ್ಭು॑ತೋ॒ ಮಧ್ವಾ॑ ಯ॒ಜ್ಞಂ ಮಿ॑ಮಿಕ್ಷತಿ । ನರಾ॒ಶಂಸ॒ಸ್ತ್ರಿರಾ ದಿ॒ವೋ ದೇ॒ವೋ ದೇ॒ವೇಷು॑ ಯ॒ಜ್ಞಿಯಃ॑ ॥

शुचिः॑ पाव॒को अद्भु॑तो॒ मध्वा॑ य॒ज्ञं मि॑मिक्षति । नरा॒शंस॒स्त्रिरा दि॒वो दे॒वो दे॒वेषु॑ य॒ज्ञियः॑ ॥

ಈ॒ಳಿ॒ತೋ ಅ॑ಗ್ನ॒ ಆ ವ॒ಹೇಂದ್ರಂ॑ ಚಿ॒ತ್ರಮಿ॒ಹ ಪ್ರಿ॒ಯಂ । ಇ॒ಯಂ ಹಿ ತ್ವಾ॑ ಮ॒ತಿರ್ಮಮಾಚ್ಛಾ॑ ಸುಜಿಹ್ವ ವ॒ಚ್ಯತೇ॑ ॥

ई॒ळि॒तो अ॑ग्न॒ आ व॒हेंद्रं॑ चि॒त्रमि॒ह प्रि॒यं । इ॒यं हि त्वा॑ म॒तिर्ममाच्छा॑ सुजिह्व व॒च्यते॑ ॥

ಸ್ತೃ॒ಣಾ॒ನಾಸೋ॑ ಯ॒ತಸ್ರು॑ಚೋ ಬ॒ರ್ಹಿರ್ಯ॒ಜ್ಞೇ ಸ್ವ॑ಧ್ವ॒ರೇ । ವೃಂ॒ಜೇ ದೇ॒ವವ್ಯ॑ಚಸ್ತಮ॒ಮಿಂದ್ರಾ॑ಯ॒ ಶರ್ಮ॑ ಸ॒ಪ್ರಥಃ॑ ॥

स्तृ॒णा॒नासो॑ य॒तस्रु॑चो ब॒र्हिर्य॒ज्ञे स्व॑ध्व॒रे । वृं॒जे दे॒वव्य॑चस्तम॒मिंद्रा॑य॒ शर्म॑ स॒प्रथः॑ ॥

ವಿ ಶ್ರ॑ಯಂತಾಮೃತಾ॒ವೃಧಃ॑ ಪ್ರ॒ಯೈ ದೇ॒ವೇಭ್ಯೋ॑ ಮ॒ಹೀಃ । ಪಾ॒ವ॒ಕಾಸಃ॑ ಪುರು॒ಸ್ಪೃಹೋ॒ ದ್ವಾರೋ॑ ದೇ॒ವೀರ॑ಸ॒ಶ್ಚತಃ॑ ॥

वि श्र॑यंतामृता॒वृधः॑ प्र॒यै दे॒वेभ्यो॑ म॒हीः । पा॒व॒कासः॑ पुरु॒स्पृहो॒ द्वारो॑ दे॒वीर॑स॒श्चतः॑ ॥

ಆ ಭಂದ॑ಮಾನೇ॒ ಉಪಾ॑ಕೇ॒ ನಕ್ತೋ॒ಷಾಸಾ॑ ಸು॒ಪೇಶ॑ಸಾ । ಯ॒ಹ್ವೀ ಋ॒ತಸ್ಯ॑ ಮಾ॒ತರಾ॒ ಸೀದ॑ತಾಂ ಬ॒ರ್ಹಿರಾ ಸು॒ಮತ್ ॥

आ भंद॑माने॒ उपा॑के॒ नक्तो॒षासा॑ सु॒पेश॑सा । य॒ह्वी ऋ॒तस्य॑ मा॒तरा॒ सीद॑तां ब॒र्हिरा सु॒मत् ॥

ಮಂ॒ದ್ರಜಿ॑ಹ್ವಾ ಜುಗು॒ರ್ವಣೀ॒ ಹೋತಾ॑ರಾ॒ ದೈವ್ಯಾ॑ ಕ॒ವೀ । ಯ॒ಜ್ಞಂ ನೋ॑ ಯಕ್ಷತಾಮಿ॒ಮಂ ಸಿ॒ಧ್ರಮ॒ದ್ಯ ದಿ॑ವಿ॒ಸ್ಪೃಶಂ॑ ॥

मं॒द्रजि॑ह्वा जुगु॒र्वणी॒ होता॑रा॒ दैव्या॑ क॒वी । य॒ज्ञं नो॑ यक्षतामि॒मं सि॒ध्रम॒द्य दि॑वि॒स्पृशं॑ ॥

ಶುಚಿ॑ರ್ದೇ॒ವೇಷ್ವರ್ಪಿ॑ತಾ॒ ಹೋತ್ರಾ॑ ಮ॒ರುತ್ಸು॒ ಭಾರ॑ತೀ । ಇಳಾ॒ ಸರ॑ಸ್ವತೀ ಮ॒ಹೀ ಬ॒ರ್ಹಿಃ ಸೀ॑ದಂತು ಯ॒ಜ್ಞಿಯಾಃ॑ ॥

शुचि॑र्दे॒वेष्वर्पि॑ता॒ होत्रा॑ म॒रुत्सु॒ भार॑ती । इळा॒ सर॑स्वती म॒ही ब॒र्हिः सी॑दंतु य॒ज्ञियाः॑ ॥

ತನ್ನ॑ಸ್ತು॒ರೀಪ॒ಮದ್ಭು॑ತಂ ಪು॒ರು ವಾರಂ॑ ಪು॒ರು ತ್ಮನಾ॑ । ತ್ವಷ್ಟಾ॒ ಪೋಷಾ॑ಯ॒ ವಿ ಷ್ಯ॑ತು ರಾ॒ಯೇ ನಾಭಾ॑ ನೋ ಅಸ್ಮ॒ಯುಃ ॥

तन्न॑स्तु॒रीप॒मद्भु॑तं पु॒रु वारं॑ पु॒रु त्मना॑ । त्वष्टा॒ पोषा॑य॒ वि ष्य॑तु रा॒ये नाभा॑ नो अस्म॒युः ॥

ಅ॒ವ॒ಸೃ॒ಜನ್ನುಪ॒ ತ್ಮನಾ॑ ದೇ॒ವಾನ್ಯ॑ಕ್ಷಿ ವನಸ್ಪತೇ । ಅ॒ಗ್ನಿರ್ಹ॒ವ್ಯಾ ಸು॑ಷೂದತಿ ದೇ॒ವೋ ದೇ॒ವೇಷು॒ ಮೇಧಿ॑ರಃ ॥

अ॒व॒सृ॒जन्नुप॒ त्मना॑ दे॒वान्य॑क्षि वनस्पते । अ॒ग्निर्ह॒व्या सु॑षूदति दे॒वो दे॒वेषु॒ मेधि॑रः ॥

ಪೂ॒ಷ॒ಣ್ವತೇ॑ ಮ॒ರುತ್ವ॑ತೇ ವಿ॒ಶ್ವದೇ॑ವಾಯ ವಾ॒ಯವೇ॑ । ಸ್ವಾಹಾ॑ ಗಾಯ॒ತ್ರವೇ॑ಪಸೇ ಹ॒ವ್ಯಮಿಂದ್ರಾ॑ಯ ಕರ್ತನ ॥

पू॒ष॒ण्वते॑ म॒रुत्व॑ते वि॒श्वदे॑वाय वा॒यवे॑ । स्वाहा॑ गाय॒त्रवे॑पसे ह॒व्यमिंद्रा॑य कर्तन ॥

ಸ್ವಾಹಾ॑ಕೃತಾ॒ನ್ಯಾ ಗ॒ಹ್ಯುಪ॑ ಹ॒ವ್ಯಾನಿ॑ ವೀ॒ತಯೇ॑ । ಇಂದ್ರಾ ಗ॑ಹಿ ಶ್ರು॒ಧೀ ಹವಂ॒ ತ್ವಾಂ ಹ॑ವಂತೇ ಅಧ್ವ॒ರೇ ॥

स्वाहा॑कृता॒न्या ग॒ह्युप॑ ह॒व्यानि॑ वी॒तये॑ । इंद्रा ग॑हि श्रु॒धी हवं॒ त्वां ह॑वंते अध्व॒रे ॥