ಈ ಸೂಕ್ತಕ್ಕೆ ಅಡ್ಮಿನ್‌ನಲ್ಲಿ ಕನ್ನಡ ಅಧ್ಯಯನ ಮಾರ್ಗದರ್ಶಿ (Study Guide) ಇನ್ನೂ ರಚನೆಯಾಗಿಲ್ಲ. ಅಡ್ಮಿನ್‌ನಲ್ಲಿ Generate Study Guides ಮೂಲಕ ಕನ್ನಡ ಭಾಷೆಯನ್ನು ಆಯ್ಕೆಮಾಡಿ ರಚಿಸಬಹುದು.
ವೇ॒ದಿ॒ಷದೇ॑ ಪ್ರಿ॒ಯಧಾ॑ಮಾಯ ಸು॒ದ್ಯುತೇ॑ ಧಾ॒ಸಿಮಿ॑ವ॒ ಪ್ರ ಭ॑ರಾ॒ ಯೋನಿ॑ಮ॒ಗ್ನಯೇ॑ । ವಸ್ತ್ರೇ॑ಣೇವ ವಾಸಯಾ॒ ಮನ್ಮ॑ನಾ॒ ಶುಚಿಂ॑ ಜ್ಯೋ॒ತೀರ॑ಥಂ ಶು॒ಕ್ರವ॑ರ್ಣಂ ತಮೋ॒ಹನಂ॑ ॥
वे॒दि॒षदे॑ प्रि॒यधा॑माय सु॒द्युते॑ धा॒सिमि॑व॒ प्र भ॑रा॒ योनि॑म॒ग्नये॑ । वस्त्रे॑णेव वासया॒ मन्म॑ना॒ शुचिं॑ ज्यो॒तीर॑थं शु॒क्रव॑र्णं तमो॒हनं॑ ॥
ಅ॒ಭಿ ದ್ವಿ॒ಜನ್ಮಾ॑ ತ್ರಿ॒ವೃದನ್ನ॑ಮೃಜ್ಯತೇ ಸಂವತ್ಸ॒ರೇ ವಾ॑ವೃಧೇ ಜ॒ಗ್ಧಮೀ॒ ಪುನಃ॑ । ಅ॒ನ್ಯಸ್ಯಾ॒ಸಾ ಜಿ॒ಹ್ವಯಾ॒ ಜೇನ್ಯೋ॒ ವೃಷಾ॒ ನ್ಯ೧॒॑ನ್ಯೇನ॑ ವ॒ನಿನೋ॑ ಮೃಷ್ಟ ವಾರ॒ಣಃ ॥
अ॒भि द्वि॒जन्मा॑ त्रि॒वृदन्न॑मृज्यते संवत्स॒रे वा॑वृधे ज॒ग्धमी॒ पुनः॑ । अ॒न्यस्या॒सा जि॒ह्वया॒ जेन्यो॒ वृषा॒ न्य१॒॑न्येन॑ व॒निनो॑ मृष्ट वार॒णः ॥
ಕೃ॒ಷ್ಣ॒ಪ್ರುತೌ॑ ವೇವಿ॒ಜೇ ಅ॑ಸ್ಯ ಸ॒ಕ್ಷಿತಾ॑ ಉ॒ಭಾ ತ॑ರೇತೇ ಅ॒ಭಿ ಮಾ॒ತರಾ॒ ಶಿಶುಂ॑ । ಪ್ರಾ॒ಚಾಜಿ॑ಹ್ವಂ ಧ್ವ॒ಸಯಂ॑ತಂ ತೃಷು॒ಚ್ಯುತ॒ಮಾ ಸಾಚ್ಯಂ॒ ಕುಪ॑ಯಂ॒ ವರ್ಧ॑ನಂ ಪಿ॒ತುಃ ॥
कृ॒ष्ण॒प्रुतौ॑ वेवि॒जे अ॑स्य स॒क्षिता॑ उ॒भा त॑रेते अ॒भि मा॒तरा॒ शिशुं॑ । प्रा॒चाजि॑ह्वं ध्व॒सयं॑तं तृषु॒च्युत॒मा साच्यं॒ कुप॑यं॒ वर्ध॑नं पि॒तुः ॥
ಮು॒ಮು॒ಕ್ಷ್ವೋ॒೩॒॑ ಮನ॑ವೇ ಮಾನವಸ್ಯ॒ತೇ ರ॑ಘು॒ದ್ರುವಃ॑ ಕೃ॒ಷ್ಣಸೀ॑ತಾಸ ಊ॒ ಜುವಃ॑ । ಅ॒ಸ॒ಮ॒ನಾ ಅ॑ಜಿ॒ರಾಸೋ॑ ರಘು॒ಷ್ಯದೋ॒ ವಾತ॑ಜೂತಾ॒ ಉಪ॑ ಯುಜ್ಯಂತ ಆ॒ಶವಃ॑ ॥
मु॒मु॒क्ष्वो॒३॒॑ मन॑वे मानवस्य॒ते र॑घु॒द्रुवः॑ कृ॒ष्णसी॑तास ऊ॒ जुवः॑ । अ॒स॒म॒ना अ॑जि॒रासो॑ रघु॒ष्यदो॒ वात॑जूता॒ उप॑ युज्यंत आ॒शवः॑ ॥
ಆದ॑ಸ್ಯ॒ ತೇ ಧ್ವ॒ಸಯಂ॑ತೋ॒ ವೃಥೇ॑ರತೇ ಕೃ॒ಷ್ಣಮಭ್ವಂ॒ ಮಹಿ॒ ವರ್ಪಃ॒ ಕರಿ॑ಕ್ರತಃ । ಯತ್ಸೀಂ॑ ಮ॒ಹೀಮ॒ವನಿಂ॒ ಪ್ರಾಭಿ ಮರ್ಮೃ॑ಶದಭಿಶ್ವ॒ಸನ್ತ್ಸ್ತ॒ನಯ॒ನ್ನೇತಿ॒ ನಾನ॑ದತ್ ॥
आद॑स्य॒ ते ध्व॒सयं॑तो॒ वृथे॑रते कृ॒ष्णमभ्वं॒ महि॒ वर्पः॒ करि॑क्रतः । यत्सीं॑ म॒हीम॒वनिं॒ प्राभि मर्मृ॑शदभिश्व॒सन्त्स्त॒नय॒न्नेति॒ नान॑दत् ॥
ಭೂಷ॒ನ್ನ ಯೋಽಧಿ॑ ಬ॒ಭ್ರೂಷು॒ ನಮ್ನ॑ತೇ॒ ವೃಷೇ॑ವ॒ ಪತ್ನೀ॑ರ॒ಭ್ಯೇ॑ತಿ॒ ರೋರು॑ವತ್ । ಓ॒ಜಾ॒ಯಮಾ॑ನಸ್ತ॒ನ್ವ॑ಶ್ಚ ಶುಂಭತೇ ಭೀ॒ಮೋ ನ ಶೃಂಗಾ॑ ದವಿಧಾವ ದು॒ರ್ಗೃಭಿಃ॑ ॥
भूष॒न्न योऽधि॑ ब॒भ्रूषु॒ नम्न॑ते॒ वृषे॑व॒ पत्नी॑र॒भ्ये॑ति॒ रोरु॑वत् । ओ॒जा॒यमा॑नस्त॒न्व॑श्च शुंभते भी॒मो न शृंगा॑ दविधाव दु॒र्गृभिः॑ ॥
ಸ ಸಂ॒ಸ್ತಿರೋ॑ ವಿ॒ಷ್ಟಿರಃ॒ ಸಂ ಗೃ॑ಭಾಯತಿ ಜಾ॒ನನ್ನೇ॒ವ ಜಾ॑ನ॒ತೀರ್ನಿತ್ಯ॒ ಆ ಶ॑ಯೇ । ಪುನ॑ರ್ವರ್ಧಂತೇ॒ ಅಪಿ॑ ಯಂತಿ ದೇ॒ವ್ಯ॑ಮ॒ನ್ಯದ್ವರ್ಪಃ॑ ಪಿ॒ತ್ರೋಃ ಕೃ॑ಣ್ವತೇ॒ ಸಚಾ॑ ॥
स सं॒स्तिरो॑ वि॒ष्टिरः॒ सं गृ॑भायति जा॒नन्ने॒व जा॑न॒तीर्नित्य॒ आ श॑ये । पुन॑र्वर्धंते॒ अपि॑ यंति दे॒व्य॑म॒न्यद्वर्पः॑ पि॒त्रोः कृ॑ण्वते॒ सचा॑ ॥
ತಮ॒ಗ್ರುವಃ॑ ಕೇ॒ಶಿನೀಃ॒ ಸಂ ಹಿ ರೇ॑ಭಿ॒ರ ಊ॒ರ್ಧ್ವಾಸ್ತ॑ಸ್ಥುರ್ಮ॒ಮ್ರುಷೀಃ॒ ಪ್ರಾಯವೇ॒ ಪುನಃ॑ । ತಾಸಾಂ॑ ಜ॒ರಾಂ ಪ್ರ॑ಮುಂ॒ಚನ್ನೇ॑ತಿ॒ ನಾನ॑ದ॒ದಸುಂ॒ ಪರಂ॑ ಜ॒ನಯ॑ಞ್ಜೀ॒ವಮಸ್ತೃ॑ತಂ ॥
तम॒ग्रुवः॑ के॒शिनीः॒ सं हि रे॑भि॒र ऊ॒र्ध्वास्त॑स्थुर्म॒म्रुषीः॒ प्रायवे॒ पुनः॑ । तासां॑ ज॒रां प्र॑मुं॒चन्ने॑ति॒ नान॑द॒दसुं॒ परं॑ ज॒नय॑ञ्जी॒वमस्तृ॑तं ॥
ಅ॒ಧೀ॒ವಾ॒ಸಂ ಪರಿ॑ ಮಾ॒ತೂ ರಿ॒ಹನ್ನಹ॑ ತುವಿ॒ಗ್ರೇಭಿಃ॒ ಸತ್ವ॑ಭಿರ್ಯಾತಿ॒ ವಿ ಜ್ರಯಃ॑ । ವಯೋ॒ ದಧ॑ತ್ಪ॒ದ್ವತೇ॒ ರೇರಿ॑ಹ॒ತ್ಸದಾನು॒ ಶ್ಯೇನೀ॑ ಸಚತೇ ವರ್ತ॒ನೀರಹ॑ ॥
अ॒धी॒वा॒सं परि॑ मा॒तू रि॒हन्नह॑ तुवि॒ग्रेभिः॒ सत्व॑भिर्याति॒ वि ज्रयः॑ । वयो॒ दध॑त्प॒द्वते॒ रेरि॑ह॒त्सदानु॒ श्येनी॑ सचते वर्त॒नीरह॑ ॥
ಅ॒ಸ್ಮಾಕ॑ಮಗ್ನೇ ಮ॒ಘವ॑ತ್ಸು ದೀದಿ॒ಹ್ಯಧ॒ ಶ್ವಸೀ॑ವಾನ್ವೃಷ॒ಭೋ ದಮೂ॑ನಾಃ । ಅ॒ವಾಸ್ಯಾ॒ ಶಿಶು॑ಮತೀರದೀದೇ॒ರ್ವರ್ಮೇ॑ವ ಯು॒ತ್ಸು ಪ॑ರಿ॒ಜರ್ಭು॑ರಾಣಃ ॥
अ॒स्माक॑मग्ने म॒घव॑त्सु दीदि॒ह्यध॒ श्वसी॑वान्वृष॒भो दमू॑नाः । अ॒वास्या॒ शिशु॑मतीरदीदे॒र्वर्मे॑व यु॒त्सु प॑रि॒जर्भु॑राणः ॥
ಇ॒ದಮ॑ಗ್ನೇ॒ ಸುಧಿ॑ತಂ॒ ದುರ್ಧಿ॑ತಾ॒ದಧಿ॑ ಪ್ರಿ॒ಯಾದು॑ ಚಿ॒ನ್ಮನ್ಮ॑ನಃ॒ ಪ್ರೇಯೋ॑ ಅಸ್ತು ತೇ । ಯತ್ತೇ॑ ಶು॒ಕ್ರಂ ತ॒ನ್ವೋ॒೩॒॑ ರೋಚ॑ತೇ॒ ಶುಚಿ॒ ತೇನಾ॒ಸ್ಮಭ್ಯಂ॑ ವನಸೇ॒ ರತ್ನ॒ಮಾ ತ್ವಂ ॥
इ॒दम॑ग्ने॒ सुधि॑तं॒ दुर्धि॑ता॒दधि॑ प्रि॒यादु॑ चि॒न्मन्म॑नः॒ प्रेयो॑ अस्तु ते । यत्ते॑ शु॒क्रं त॒न्वो॒३॒॑ रोच॑ते॒ शुचि॒ तेना॒स्मभ्यं॑ वनसे॒ रत्न॒मा त्वं ॥
ರಥಾ॑ಯ॒ ನಾವ॑ಮು॒ತ ನೋ॑ ಗೃ॒ಹಾಯ॒ ನಿತ್ಯಾ॑ರಿತ್ರಾಂ ಪ॒ದ್ವತೀಂ॑ ರಾಸ್ಯಗ್ನೇ । ಅ॒ಸ್ಮಾಕಂ॑ ವೀ॒ರಾಁ ಉ॒ತ ನೋ॑ ಮ॒ಘೋನೋ॒ ಜನಾಂ॑ಶ್ಚ॒ ಯಾ ಪಾ॒ರಯಾ॒ಚ್ಛರ್ಮ॒ ಯಾ ಚ॑ ॥
रथा॑य॒ नाव॑मु॒त नो॑ गृ॒हाय॒ नित्या॑रित्रां प॒द्वतीं॑ रास्यग्ने । अ॒स्माकं॑ वी॒राँ उ॒त नो॑ म॒घोनो॒ जनां॑श्च॒ या पा॒रया॒च्छर्म॒ या च॑ ॥
ಅ॒ಭೀ ನೋ॑ ಅಗ್ನ ಉ॒ಕ್ಥಮಿಜ್ಜು॑ಗುರ್ಯಾ॒ ದ್ಯಾವಾ॒ಕ್ಷಾಮಾ॒ ಸಿಂಧ॑ವಶ್ಚ॒ ಸ್ವಗೂ॑ರ್ತಾಃ । ಗವ್ಯಂ॒ ಯವ್ಯಂ॒ ಯಂತೋ॑ ದೀ॒ರ್ಘಾಹೇಷಂ॒ ವರ॑ಮರು॒ಣ್ಯೋ॑ ವರಂತ ॥
अ॒भी नो॑ अग्न उ॒क्थमिज्जु॑गुर्या॒ द्यावा॒क्षामा॒ सिंध॑वश्च॒ स्वगू॑र्ताः । गव्यं॒ यव्यं॒ यंतो॑ दी॒र्घाहेषं॒ वर॑मरु॒ण्यो॑ वरंत ॥