ಅಗ್ನಿದೇವನ ಮತ್ತು ದೇವತೆಗಳ ಆವಾಹನೆ - ಅಪೂರ್ವ ಸಂಧ್ಯಾ ಪ್ರಾರ್ಥನೆ

ಸುಸ॑ಮಿದ್ಧೋ ನ॒ ಆ ವ॑ಹ ದೇ॒ವಾಁ ಅ॑ಗ್ನೇ ಹ॒ವಿಷ್ಮ॑ತೇ । ಹೋತಃ॑ ಪಾವಕ॒ ಯಕ್ಷಿ॑ ಚ ॥

सुस॑मिद्धो न॒ आ व॑ह दे॒वाँ अ॑ग्ने ह॒विष्म॑ते । होतः॑ पावक॒ यक्षि॑ च ॥

ಮಧು॑ಮಂತಂ ತನೂನಪಾದ್ಯ॒ಜ್ಞಂ ದೇ॒ವೇಷು॑ ನಃ ಕವೇ । ಅ॒ದ್ಯಾ ಕೃ॑ಣುಹಿ ವೀ॒ತಯೇ॑ ॥

मधु॑मंतं तनूनपाद्य॒ज्ञं दे॒वेषु॑ नः कवे । अ॒द्या कृ॑णुहि वी॒तये॑ ॥

ನರಾ॒ಶಂಸ॑ಮಿ॒ಹ ಪ್ರಿ॒ಯಮ॒ಸ್ಮಿನ್ಯ॒ಜ್ಞ ಉಪ॑ ಹ್ವಯೇ । ಮಧು॑ಜಿಹ್ವಂ ಹವಿ॒ಷ್ಕೃತಂ॑ ॥

नरा॒शंस॑मि॒ह प्रि॒यम॒स्मिन्य॒ज्ञ उप॑ ह्वये । मधु॑जिह्वं हवि॒ष्कृतं॑ ॥

ಅಗ್ನೇ॑ ಸು॒ಖತ॑ಮೇ॒ ರಥೇ॑ ದೇ॒ವಾಁ ಈ॑ಳಿ॒ತ ಆ ವ॑ಹ । ಅಸಿ॒ ಹೋತಾ॒ ಮನು॑ರ್ಹಿತಃ ॥

अग्ने॑ सु॒खत॑मे॒ रथे॑ दे॒वाँ ई॑ळि॒त आ व॑ह । असि॒ होता॒ मनु॑र्हितः ॥

ಸ್ತೃ॒ಣೀ॒ತ ಬ॒ರ್ಹಿರಾ॑ನು॒ಷಗ್ಘೃ॒ತಪೃ॑ಷ್ಠಂ ಮನೀಷಿಣಃ । ಯತ್ರಾ॒ಮೃತ॑ಸ್ಯ॒ ಚಕ್ಷ॑ಣಂ ॥

स्तृ॒णी॒त ब॒र्हिरा॑नु॒षग्घृ॒तपृ॑ष्ठं मनीषिणः । यत्रा॒मृत॑स्य॒ चक्ष॑णं ॥

ವಿ ಶ್ರ॑ಯಂತಾಮೃತಾ॒ವೃಧೋ॒ ದ್ವಾರೋ॑ ದೇ॒ವೀರ॑ಸ॒ಶ್ಚತಃ॑ । ಅ॒ದ್ಯಾ ನೂ॒ನಂ ಚ॒ ಯಷ್ಟ॑ವೇ ॥

वि श्र॑यंतामृता॒वृधो॒ द्वारो॑ दे॒वीर॑स॒श्चतः॑ । अ॒द्या नू॒नं च॒ यष्ट॑वे ॥

ನಕ್ತೋ॒ಷಾಸಾ॑ ಸು॒ಪೇಶ॑ಸಾ॒ಸ್ಮಿನ್ಯ॒ಜ್ಞ ಉಪ॑ ಹ್ವಯೇ । ಇ॒ದಂ ನೋ॑ ಬ॒ರ್ಹಿರಾ॒ಸದೇ॑ ॥

नक्तो॒षासा॑ सु॒पेश॑सा॒स्मिन्य॒ज्ञ उप॑ ह्वये । इ॒दं नो॑ ब॒र्हिरा॒सदे॑ ॥

ತಾ ಸು॑ಜಿ॒ಹ್ವಾ ಉಪ॑ ಹ್ವಯೇ॒ ಹೋತಾ॑ರಾ॒ ದೈವ್ಯಾ॑ ಕ॒ವೀ । ಯ॒ಜ್ಞಂ ನೋ॑ ಯಕ್ಷತಾಮಿ॒ಮಂ ॥

ता सु॑जि॒ह्वा उप॑ ह्वये॒ होता॑रा॒ दैव्या॑ क॒वी । य॒ज्ञं नो॑ यक्षतामि॒मं ॥

ಇಳಾ॒ ಸರ॑ಸ್ವತೀ ಮ॒ಹೀ ತಿ॒ಸ್ರೋ ದೇ॒ವೀರ್ಮ॑ಯೋ॒ಭುವಃ॑ । ಬ॒ರ್ಹಿಃ ಸೀ॑ದಂತ್ವ॒ಸ್ರಿಧಃ॑ ॥

इळा॒ सर॑स्वती म॒ही ति॒स्रो दे॒वीर्म॑यो॒भुवः॑ । ब॒र्हिः सी॑दंत्व॒स्रिधः॑ ॥

ಇ॒ಹ ತ್ವಷ್ಟಾ॑ರಮಗ್ರಿ॒ಯಂ ವಿ॒ಶ್ವರೂ॑ಪ॒ಮುಪ॑ ಹ್ವಯೇ । ಅ॒ಸ್ಮಾಕ॑ಮಸ್ತು॒ ಕೇವ॑ಲಃ ॥

इ॒ह त्वष्टा॑रमग्रि॒यं वि॒श्वरू॑प॒मुप॑ ह्वये । अ॒स्माक॑मस्तु॒ केव॑लः ॥

ಅವ॑ ಸೃಜಾ ವನಸ್ಪತೇ॒ ದೇವ॑ ದೇ॒ವೇಭ್ಯೋ॑ ಹ॒ವಿಃ । ಪ್ರ ದಾ॒ತುರ॑ಸ್ತು॒ ಚೇತ॑ನಂ ॥

अव॑ सृजा वनस्पते॒ देव॑ दे॒वेभ्यो॑ ह॒विः । प्र दा॒तुर॑स्तु॒ चेत॑नं ॥

ಸ್ವಾಹಾ॑ ಯ॒ಜ್ಞಂ ಕೃ॑ಣೋತ॒ನೇಂದ್ರಾ॑ಯ॒ ಯಜ್ವ॑ನೋ ಗೃ॒ಹೇ । ತತ್ರ॑ ದೇ॒ವಾಁ ಉಪ॑ ಹ್ವಯೇ ॥

स्वाहा॑ य॒ज्ञं कृ॑णोत॒नेंद्रा॑य॒ यज्व॑नो गृ॒हे । तत्र॑ दे॒वाँ उप॑ ह्वये ॥