ಅಗ್ನಿ: ದೈವಿಕ ಸಂದೇಶವಾಹಕ ಮತ್ತು ಜ್ಞಾನದ ಮೂಲ

ಅ॒ಗ್ನಿಂ ದೂ॒ತಂ ವೃ॑ಣೀಮಹೇ॒ ಹೋತಾ॑ರಂ ವಿ॒ಶ್ವವೇ॑ದಸಂ । ಅ॒ಸ್ಯ ಯ॒ಜ್ಞಸ್ಯ॑ ಸು॒ಕ್ರತುಂ॑ ॥

अ॒ग्निं दू॒तं वृ॑णीमहे॒ होता॑रं वि॒श्ववे॑दसं । अ॒स्य य॒ज्ञस्य॑ सु॒क्रतुं॑ ॥

ಅ॒ಗ್ನಿಮ॑ಗ್ನಿಂ॒ ಹವೀ॑ಮಭಿಃ॒ ಸದಾ॑ ಹವಂತ ವಿ॒ಶ್ಪತಿಂ॑ । ಹ॒ವ್ಯ॒ವಾಹಂ॑ ಪುರುಪ್ರಿ॒ಯಂ ॥

अ॒ग्निम॑ग्निं॒ हवी॑मभिः॒ सदा॑ हवंत वि॒श्पतिं॑ । ह॒व्य॒वाहं॑ पुरुप्रि॒यं ॥

ಅಗ್ನೇ॑ ದೇ॒ವಾಁ ಇ॒ಹಾ ವ॑ಹ ಜಜ್ಞಾ॒ನೋ ವೃ॒ಕ್ತಬ॑ರ್ಹಿಷೇ । ಅಸಿ॒ ಹೋತಾ॑ ನ॒ ಈಡ್ಯಃ॑ ॥

अग्ने॑ दे॒वाँ इ॒हा व॑ह जज्ञा॒नो वृ॒क्तब॑र्हिषे । असि॒ होता॑ न॒ ईड्यः॑ ॥

ತಾಁ ಉ॑ಶ॒ತೋ ವಿ ಬೋ॑ಧಯ॒ ಯದ॑ಗ್ನೇ॒ ಯಾಸಿ॑ ದೂ॒ತ್ಯಂ॑ । ದೇ॒ವೈರಾ ಸ॑ತ್ಸಿ ಬ॒ರ್ಹಿಷಿ॑ ॥

ताँ उ॑श॒तो वि बो॑धय॒ यद॑ग्ने॒ यासि॑ दू॒त्यं॑ । दे॒वैरा स॑त्सि ब॒र्हिषि॑ ॥

ಘೃತಾ॑ಹವನ ದೀದಿವಃ॒ ಪ್ರತಿ॑ ಷ್ಮ॒ ರಿಷ॑ತೋ ದಹ । ಅಗ್ನೇ॒ ತ್ವಂ ರ॑ಕ್ಷ॒ಸ್ವಿನಃ॑ ॥

घृता॑हवन दीदिवः॒ प्रति॑ ष्म॒ रिष॑तो दह । अग्ने॒ त्वं र॑क्ष॒स्विनः॑ ॥

ಅ॒ಗ್ನಿನಾ॒ಗ್ನಿಃ ಸಮಿ॑ಧ್ಯತೇ ಕ॒ವಿರ್ಗೃ॒ಹಪ॑ತಿ॒ರ್ಯುವಾ॑ । ಹ॒ವ್ಯ॒ವಾಡ್ ಜು॒ಹ್ವಾ॑ಸ್ಯಃ ॥

अ॒ग्निना॒ग्निः समि॑ध्यते क॒विर्गृ॒हप॑ति॒र्युवा॑ । ह॒व्य॒वाड् जु॒ह्वा॑स्यः ॥

ಕ॒ವಿಮ॒ಗ್ನಿಮುಪ॑ ಸ್ತುಹಿ ಸ॒ತ್ಯಧ॑ರ್ಮಾಣಮಧ್ವ॒ರೇ । ದೇ॒ವಮ॑ಮೀವ॒ಚಾತ॑ನಂ ॥

क॒विम॒ग्निमुप॑ स्तुहि स॒त्यध॑र्माणमध्व॒रे । दे॒वम॑मीव॒चात॑नं ॥

ಯಸ್ತ್ವಾಮ॑ಗ್ನೇ ಹ॒ವಿಷ್ಪ॑ತಿರ್ದೂ॒ತಂ ದೇ॑ವ ಸಪ॒ರ್ಯತಿ॑ । ತಸ್ಯ॑ ಸ್ಮ ಪ್ರಾವಿ॒ತಾ ಭ॑ವ ॥

यस्त्वाम॑ग्ने ह॒विष्प॑तिर्दू॒तं दे॑व सप॒र्यति॑ । तस्य॑ स्म प्रावि॒ता भ॑व ॥

ಯೋ ಅ॒ಗ್ನಿಂ ದೇ॒ವವೀ॑ತಯೇ ಹ॒ವಿಷ್ಮಾಁ॑ ಆ॒ವಿವಾ॑ಸತಿ । ತಸ್ಮೈ॑ ಪಾವಕ ಮೃಳಯ ॥

यो अ॒ग्निं दे॒ववी॑तये ह॒विष्माँ॑ आ॒विवा॑सति । तस्मै॑ पावक मृळय ॥

ಸ ನಃ॑ ಪಾವಕ ದೀದಿ॒ವೋಽಗ್ನೇ॑ ದೇ॒ವಾಁ ಇ॒ಹಾ ವ॑ಹ । ಉಪ॑ ಯ॒ಜ್ಞಂ ಹ॒ವಿಶ್ಚ॑ ನಃ ॥

स नः॑ पावक दीदि॒वोऽग्ने॑ दे॒वाँ इ॒हा व॑ह । उप॑ य॒ज्ञं ह॒विश्च॑ नः ॥

ಸ ನಃ॒ ಸ್ತವಾ॑ನ॒ ಆ ಭ॑ರ ಗಾಯ॒ತ್ರೇಣ॒ ನವೀ॑ಯಸಾ । ರ॒ಯಿಂ ವೀ॒ರವ॑ತೀ॒ಮಿಷಂ॑ ॥

स नः॒ स्तवा॑न॒ आ भ॑र गाय॒त्रेण॒ नवी॑यसा । र॒यिं वी॒रव॑ती॒मिषं॑ ॥

ಅಗ್ನೇ॑ ಶು॒ಕ್ರೇಣ॑ ಶೋ॒ಚಿಷಾ॒ ವಿಶ್ವಾ॑ಭಿರ್ದೇ॒ವಹೂ॑ತಿಭಿಃ । ಇ॒ಮಂ ಸ್ತೋಮಂ॑ ಜುಷಸ್ವ ನಃ ॥

अग्ने॑ शु॒क्रेण॑ शो॒चिषा॒ विश्वा॑भिर्दे॒वहू॑तिभिः । इ॒मं स्तोमं॑ जुषस्व नः ॥