Sūkta 12

अ॒ग्निं दू॒तं वृ॑णीमहे॒ होता॑रं वि॒श्ववे॑दसं । अ॒स्य य॒ज्ञस्य॑ सु॒क्रतुं॑ ॥

agním dūtám vṛṇīmahe hótāram viśvávedasam ǀ asyá yajñásya sukrátum ǁ

अ॒ग्निम॑ग्निं॒ हवी॑मभिः॒ सदा॑ हवंत वि॒श्पतिं॑ । ह॒व्य॒वाहं॑ पुरुप्रि॒यं ॥

agnímagnim hávīmabhiḥ sádā havanta viśpátim ǀ havyavā́ham purupriyám ǁ

अग्ने॑ दे॒वाँ इ॒हा व॑ह जज्ञा॒नो वृ॒क्तब॑र्हिषे । असि॒ होता॑ न॒ ईड्यः॑ ॥

ágne devā́m̐ ihā́ vaha jajñānó vṛktábarhiṣe ǀ ási hótā na ī́ḍyaḥ ǁ

ताँ उ॑श॒तो वि बो॑धय॒ यद॑ग्ने॒ यासि॑ दू॒त्यं॑ । दे॒वैरा स॑त्सि ब॒र्हिषि॑ ॥

tā́m̐ uśató ví bodhaya yádagne yā́si dūtyám ǀ deváirā́ satsi barhíṣi ǁ

घृता॑हवन दीदिवः॒ प्रति॑ ष्म॒ रिष॑तो दह । अग्ने॒ त्वं र॑क्ष॒स्विनः॑ ॥

ghṛ́tāhavana dīdivaḥ práti ṣma ríṣato daha ǀ ágne tvám rakṣasvínaḥ ǁ

अ॒ग्निना॒ग्निः समि॑ध्यते क॒विर्गृ॒हप॑ति॒र्युवा॑ । ह॒व्य॒वाड् जु॒ह्वा॑स्यः ॥

agnínāgníḥ sámidhyate kavírgṛhápatiryúvā ǀ havyavā́ḍ juhvā́syaḥ ǁ

क॒विम॒ग्निमुप॑ स्तुहि स॒त्यध॑र्माणमध्व॒रे । दे॒वम॑मीव॒चात॑नं ॥

kavímagnímúpa stuhi satyádharmāṇamadhvaré ǀ devámamīvacā́tanam ǁ

यस्त्वाम॑ग्ने ह॒विष्प॑तिर्दू॒तं दे॑व सप॒र्यति॑ । तस्य॑ स्म प्रावि॒ता भ॑व ॥

yástvā́magne havíṣpatirdūtám deva saparyáti ǀ tásya sma prāvitā́ bhava ǁ

यो अ॒ग्निं दे॒ववी॑तये ह॒विष्माँ॑ आ॒विवा॑सति । तस्मै॑ पावक मृळय ॥

yó agním devávītaye havíṣmām̐ āvívāsati ǀ tásmai pāvaka mṛḷaya ǁ

स नः॑ पावक दीदि॒वोऽग्ने॑ दे॒वाँ इ॒हा व॑ह । उप॑ य॒ज्ञं ह॒विश्च॑ नः ॥

sá naḥ pāvaka dīdivó’gne devā́m̐ ihā́ vaha ǀ úpa yajñám havíśca naḥ ǁ

स नः॒ स्तवा॑न॒ आ भ॑र गाय॒त्रेण॒ नवी॑यसा । र॒यिं वी॒रव॑ती॒मिषं॑ ॥

sá naḥ stávāna ā́ bhara gāyatréṇa návīyasā ǀ rayím vīrávatīmíṣam ǁ

अग्ने॑ शु॒क्रेण॑ शो॒चिषा॒ विश्वा॑भिर्दे॒वहू॑तिभिः । इ॒मं स्तोमं॑ जुषस्व नः ॥

ágne śukréṇa śocíṣā víśvābhirdeváhūtibhiḥ ǀ imám stómam juṣasva naḥ ǁ