ಇಂದ್ರನ ಶೌರ್ಯ ಹಾಗೂ ದೈವಿಕ ಅನುಗ್ರಹದ ಸ್ತುತಿ

ಇಂದ್ರಂ॒ ವಿಶ್ವಾ॑ ಅವೀವೃಧನ್ತ್ಸಮು॒ದ್ರವ್ಯ॑ಚಸಂ॒ ಗಿರಃ॑ । ರ॒ಥೀತ॑ಮಂ ರ॒ಥೀನಾಂ॒ ವಾಜಾ॑ನಾಂ॒ ಸತ್ಪ॑ತಿಂ॒ ಪತಿಂ॑ ॥

इंद्रं॒ विश्वा॑ अवीवृधन्त्समु॒द्रव्य॑चसं॒ गिरः॑ । र॒थीत॑मं र॒थीनां॒ वाजा॑नां॒ सत्प॑तिं॒ पतिं॑ ॥

ಸ॒ಖ್ಯೇ ತ॑ ಇಂದ್ರ ವಾ॒ಜಿನೋ॒ ಮಾ ಭೇ॑ಮ ಶವಸಸ್ಪತೇ । ತ್ವಾಮ॒ಭಿ ಪ್ರ ಣೋ॑ನುಮೋ॒ ಜೇತಾ॑ರ॒ಮಪ॑ರಾಜಿತಂ ॥

स॒ख्ये त॑ इंद्र वा॒जिनो॒ मा भे॑म शवसस्पते । त्वाम॒भि प्र णो॑नुमो॒ जेता॑र॒मप॑राजितं ॥

ಪೂ॒ರ್ವೀರಿಂದ್ರ॑ಸ್ಯ ರಾ॒ತಯೋ॒ ನ ವಿ ದ॑ಸ್ಯಂತ್ಯೂ॒ತಯಃ॑ । ಯದೀ॒ ವಾಜ॑ಸ್ಯ॒ ಗೋಮ॑ತಃ ಸ್ತೋ॒ತೃಭ್ಯೋ॒ ಮಂಹ॑ತೇ ಮ॒ಘಂ ॥

पू॒र्वीरिंद्र॑स्य रा॒तयो॒ न वि द॑स्यंत्यू॒तयः॑ । यदी॒ वाज॑स्य॒ गोम॑तः स्तो॒तृभ्यो॒ मंह॑ते म॒घं ॥

ಪು॒ರಾಂ ಭಿಂ॒ದುರ್ಯುವಾ॑ ಕ॒ವಿರಮಿ॑ತೌಜಾ ಅಜಾಯತ । ಇಂದ್ರೋ॒ ವಿಶ್ವ॑ಸ್ಯ॒ ಕರ್ಮ॑ಣೋ ಧ॒ರ್ತಾ ವ॒ಜ್ರೀ ಪು॑ರುಷ್ಟು॒ತಃ ॥

पु॒रां भिं॒दुर्युवा॑ क॒विरमि॑तौजा अजायत । इंद्रो॒ विश्व॑स्य॒ कर्म॑णो ध॒र्ता व॒ज्री पु॑रुष्टु॒तः ॥

ತ್ವಂ ವ॒ಲಸ್ಯ॒ ಗೋಮ॒ತೋಽಪಾ॑ವರದ್ರಿವೋ॒ ಬಿಲಂ॑ । ತ್ವಾಂ ದೇ॒ವಾ ಅಬಿ॑ಭ್ಯುಷಸ್ತು॒ಜ್ಯಮಾ॑ನಾಸ ಆವಿಷುಃ ॥

त्वं व॒लस्य॒ गोम॒तोऽपा॑वरद्रिवो॒ बिलं॑ । त्वां दे॒वा अबि॑भ्युषस्तु॒ज्यमा॑नास आविषुः ॥

ತವಾ॒ಹಂ ಶೂ॑ರ ರಾ॒ತಿಭಿಃ॒ ಪ್ರತ್ಯಾ॑ಯಂ॒ ಸಿಂಧು॑ಮಾ॒ವದ॑ನ್ । ಉಪಾ॑ತಿಷ್ಠಂತ ಗಿರ್ವಣೋ ವಿ॒ದುಷ್ಟೇ॒ ತಸ್ಯ॑ ಕಾ॒ರವಃ॑ ॥

तवा॒हं शू॑र रा॒तिभिः॒ प्रत्या॑यं॒ सिंधु॑मा॒वद॑न् । उपा॑तिष्ठंत गिर्वणो वि॒दुष्टे॒ तस्य॑ का॒रवः॑ ॥

ಮಾ॒ಯಾಭಿ॑ರಿಂದ್ರ ಮಾ॒ಯಿನಂ॒ ತ್ವಂ ಶುಷ್ಣ॒ಮವಾ॑ತಿರಃ । ವಿ॒ದುಷ್ಟೇ॒ ತಸ್ಯ॒ ಮೇಧಿ॑ರಾ॒ಸ್ತೇಷಾಂ॒ ಶ್ರವಾಂ॒ಸ್ಯುತ್ತಿ॑ರ ॥

मा॒याभि॑रिंद्र मा॒यिनं॒ त्वं शुष्ण॒मवा॑तिरः । वि॒दुष्टे॒ तस्य॒ मेधि॑रा॒स्तेषां॒ श्रवां॒स्युत्ति॑र ॥

ಇಂದ್ರ॒ಮೀಶಾ॑ನ॒ಮೋಜ॑ಸಾ॒ಭಿ ಸ್ತೋಮಾ॑ ಅನೂಷತ । ಸ॒ಹಸ್ರಂ॒ ಯಸ್ಯ॑ ರಾ॒ತಯ॑ ಉ॒ತ ವಾ॒ ಸಂತಿ॒ ಭೂಯ॑ಸೀಃ ॥

इंद्र॒मीशा॑न॒मोज॑सा॒भि स्तोमा॑ अनूषत । स॒हस्रं॒ यस्य॑ रा॒तय॑ उ॒त वा॒ संति॒ भूय॑सीः ॥