Sūkta 11

इंद्रं॒ विश्वा॑ अवीवृधन्त्समु॒द्रव्य॑चसं॒ गिरः॑ । र॒थीत॑मं र॒थीनां॒ वाजा॑नां॒ सत्प॑तिं॒ पतिं॑ ॥

índram víśvā avīvṛdhantsamudrávyacasam gíraḥ ǀ rathī́tamam rathī́nām vā́jānām sátpatim pátim ǁ

स॒ख्ये त॑ इंद्र वा॒जिनो॒ मा भे॑म शवसस्पते । त्वाम॒भि प्र णो॑नुमो॒ जेता॑र॒मप॑राजितं ॥

sakhyé ta indra vājíno mā́ bhema śavasaspate ǀ tvā́mabhí prá ṇonumo jétāramáparājitam ǁ

पू॒र्वीरिंद्र॑स्य रा॒तयो॒ न वि द॑स्यंत्यू॒तयः॑ । यदी॒ वाज॑स्य॒ गोम॑तः स्तो॒तृभ्यो॒ मंह॑ते म॒घं ॥

pūrvī́ríndrasya rātáyo ná ví dasyantyūtáyaḥ ǀ yádī vā́jasya gómataḥ stotṛ́bhyo máṃhate maghám ǁ

पु॒रां भिं॒दुर्युवा॑ क॒विरमि॑तौजा अजायत । इंद्रो॒ विश्व॑स्य॒ कर्म॑णो ध॒र्ता व॒ज्री पु॑रुष्टु॒तः ॥

purā́m bhindúryúvā kavírámitaujā ajāyata ǀ índro víśvasya kármaṇo dhartā́ vajrī́ puruṣṭutáḥ ǁ

त्वं व॒लस्य॒ गोम॒तोऽपा॑वरद्रिवो॒ बिलं॑ । त्वां दे॒वा अबि॑भ्युषस्तु॒ज्यमा॑नास आविषुः ॥

tvám valásya gómató’pāvaradrivo bílam ǀ tvā́m devā́ ábibhyuṣastujyámānāsa āviṣuḥ ǁ

तवा॒हं शू॑र रा॒तिभिः॒ प्रत्या॑यं॒ सिंधु॑मा॒वद॑न् । उपा॑तिष्ठंत गिर्वणो वि॒दुष्टे॒ तस्य॑ का॒रवः॑ ॥

távāhám śūra rātíbhiḥ prátyāyam síndhumāvádan ǀ úpātiṣṭhanta girvaṇo vidúṣṭe tásya kārávaḥ ǁ

मा॒याभि॑रिंद्र मा॒यिनं॒ त्वं शुष्ण॒मवा॑तिरः । वि॒दुष्टे॒ तस्य॒ मेधि॑रा॒स्तेषां॒ श्रवां॒स्युत्ति॑र ॥

māyā́bhirindra māyínam tvám śúṣṇamávātiraḥ ǀ vidúṣṭe tásya médhirāstéṣām śrávāṃsyúttira ǁ

इंद्र॒मीशा॑न॒मोज॑सा॒भि स्तोमा॑ अनूषत । स॒हस्रं॒ यस्य॑ रा॒तय॑ उ॒त वा॒ संति॒ भूय॑सीः ॥

índramī́śānamójasābhí stómā anūṣata ǀ sahásram yásya rātáya utá vā sánti bhū́yasīḥ ǁ