ಸೂಕ್ತ 120

ಕಾ ರಾ॑ಧ॒ದ್ಧೋತ್ರಾ॑ಶ್ವಿನಾ ವಾಂ॒ ಕೋ ವಾಂ॒ ಜೋಷ॑ ಉ॒ಭಯೋಃ॑ । ಕ॒ಥಾ ವಿ॑ಧಾ॒ತ್ಯಪ್ರ॑ಚೇತಾಃ ॥

का रा॑ध॒द्धोत्रा॑श्विना वां॒ को वां॒ जोष॑ उ॒भयोः॑ । क॒था वि॑धा॒त्यप्र॑चेताः ॥

ವಿ॒ದ್ವಾಂಸಾ॒ವಿದ್ದುರಃ॑ ಪೃಚ್ಛೇ॒ದವಿ॑ದ್ವಾನಿ॒ತ್ಥಾಪ॑ರೋ ಅಚೇ॒ತಾಃ । ನೂ ಚಿ॒ನ್ನು ಮರ್ತೇ॒ ಅಕ್ರೌ॑ ॥

वि॒द्वांसा॒विद्दुरः॑ पृच्छे॒दवि॑द्वानि॒त्थाप॑रो अचे॒ताः । नू चि॒न्नु मर्ते॒ अक्रौ॑ ॥

ತಾ ವಿ॒ದ್ವಾಂಸಾ॑ ಹವಾಮಹೇ ವಾಂ॒ ತಾ ನೋ॑ ವಿ॒ದ್ವಾಂಸಾ॒ ಮನ್ಮ॑ ವೋಚೇತಮ॒ದ್ಯ । ಪ್ರಾರ್ಚ॒ದ್ದಯ॑ಮಾನೋ ಯು॒ವಾಕುಃ॑ ॥

ता वि॒द्वांसा॑ हवामहे वां॒ ता नो॑ वि॒द्वांसा॒ मन्म॑ वोचेतम॒द्य । प्रार्च॒द्दय॑मानो यु॒वाकुः॑ ॥

ವಿ ಪೃ॑ಚ್ಛಾಮಿ ಪಾ॒ಕ್ಯಾ॒೩॒॑ ನ ದೇ॒ವಾನ್ವಷ॑ಟ್ಕೃತಸ್ಯಾದ್ಭು॒ತಸ್ಯ॑ ದಸ್ರಾ । ಪಾ॒ತಂ ಚ॒ ಸಹ್ಯ॑ಸೋ ಯು॒ವಂ ಚ॒ ರಭ್ಯ॑ಸೋ ನಃ ॥

वि पृ॑च्छामि पा॒क्या॒३॒॑ न दे॒वान्वष॑ट्कृतस्याद्भु॒तस्य॑ दस्रा । पा॒तं च॒ सह्य॑सो यु॒वं च॒ रभ्य॑सो नः ॥

ಪ್ರ ಯಾ ಘೋಷೇ॒ ಭೃಗ॑ವಾಣೇ॒ ನ ಶೋಭೇ॒ ಯಯಾ॑ ವಾ॒ಚಾ ಯಜ॑ತಿ ಪಜ್ರಿ॒ಯೋ ವಾಂ॑ । ಪ್ರೈಷ॒ಯುರ್ನ ವಿ॒ದ್ವಾನ್ ॥

प्र या घोषे॒ भृग॑वाणे॒ न शोभे॒ यया॑ वा॒चा यज॑ति पज्रि॒यो वां॑ । प्रैष॒युर्न वि॒द्वान् ॥

ಶ್ರು॒ತಂ ಗಾ॑ಯ॒ತ್ರಂ ತಕ॑ವಾನಸ್ಯಾ॒ಹಂ ಚಿ॒ದ್ಧಿ ರಿ॒ರೇಭಾ॑ಶ್ವಿನಾ ವಾಂ । ಆಕ್ಷೀ ಶು॑ಭಸ್ಪತೀ॒ ದನ್ ॥

श्रु॒तं गा॑य॒त्रं तक॑वानस्या॒हं चि॒द्धि रि॒रेभा॑श्विना वां । आक्षी शु॑भस्पती॒ दन् ॥

ಯು॒ವಂ ಹ್ಯಾಸ್ತಂ॑ ಮ॒ಹೋ ರನ್ಯು॒ವಂ ವಾ॒ ಯನ್ನಿ॒ರತ॑ತಂಸತಂ । ತಾ ನೋ॑ ವಸೂ ಸುಗೋ॒ಪಾ ಸ್ಯಾ॑ತಂ ಪಾ॒ತಂ ನೋ॒ ವೃಕಾ॑ದಘಾ॒ಯೋಃ ॥

यु॒वं ह्यास्तं॑ म॒हो रन्यु॒वं वा॒ यन्नि॒रत॑तंसतं । ता नो॑ वसू सुगो॒पा स्या॑तं पा॒तं नो॒ वृका॑दघा॒योः ॥

ಮಾ ಕಸ್ಮೈ॑ ಧಾತಮ॒ಭ್ಯ॑ಮಿ॒ತ್ರಿಣೇ॑ ನೋ॒ ಮಾಕುತ್ರಾ॑ ನೋ ಗೃ॒ಹೇಭ್ಯೋ॑ ಧೇ॒ನವೋ॑ ಗುಃ । ಸ್ತ॒ನಾ॒ಭುಜೋ॒ ಅಶಿ॑ಶ್ವೀಃ ॥

मा कस्मै॑ धातम॒भ्य॑मि॒त्रिणे॑ नो॒ माकुत्रा॑ नो गृ॒हेभ्यो॑ धे॒नवो॑ गुः । स्त॒ना॒भुजो॒ अशि॑श्वीः ॥

ದು॒ಹೀ॒ಯನ್ಮಿ॒ತ್ರಧಿ॑ತಯೇ ಯು॒ವಾಕು॑ ರಾ॒ಯೇ ಚ॑ ನೋ ಮಿಮೀ॒ತಂ ವಾಜ॑ವತ್ಯೈ । ಇ॒ಷೇ ಚ॑ ನೋ ಮಿಮೀತಂ ಧೇನು॒ಮತ್ಯೈ॑ ॥

दु॒ही॒यन्मि॒त्रधि॑तये यु॒वाकु॑ रा॒ये च॑ नो मिमी॒तं वाज॑वत्यै । इ॒षे च॑ नो मिमीतं धेनु॒मत्यै॑ ॥

ಅ॒ಶ್ವಿನೋ॑ರಸನಂ॒ ರಥ॑ಮನ॒ಶ್ವಂ ವಾ॒ಜಿನೀ॑ವತೋಃ । ತೇನಾ॒ಹಂ ಭೂರಿ॑ ಚಾಕನ ॥

अ॒श्विनो॑रसनं॒ रथ॑मन॒श्वं वा॒जिनी॑वतोः । तेना॒हं भूरि॑ चाकन ॥

ಅ॒ಯಂ ಸ॑ಮಹ ಮಾ ತನೂ॒ಹ್ಯಾತೇ॒ ಜನಾಁ॒ ಅನು॑ । ಸೋ॒ಮ॒ಪೇಯಂ॑ ಸು॒ಖೋ ರಥಃ॑ ॥

अ॒यं स॑मह मा तनू॒ह्याते॒ जनाँ॒ अनु॑ । सो॒म॒पेयं॑ सु॒खो रथः॑ ॥

ಅಧ॒ ಸ್ವಪ್ನ॑ಸ್ಯ॒ ನಿರ್ವಿ॒ದೇಽಭುಂ॑ಜತಶ್ಚ ರೇ॒ವತಃ॑ । ಉ॒ಭಾ ತಾ ಬಸ್ರಿ॑ ನಶ್ಯತಃ ॥

अध॒ स्वप्न॑स्य॒ निर्वि॒देऽभुं॑जतश्च रे॒वतः॑ । उ॒भा ता बस्रि॑ नश्यतः ॥