का रा॑ध॒द्धोत्रा॑श्विना वां॒ को वां॒ जोष॑ उ॒भयोः॑ । क॒था वि॑धा॒त्यप्र॑चेताः ॥
kā́ rādhaddhótrāśvinā vām kó vām jóṣa ubháyoḥ ǀ kathā́ vidhātyápracetāḥ ǁ
Sūkta 120
वि॒द्वांसा॒विद्दुरः॑ पृच्छे॒दवि॑द्वानि॒त्थाप॑रो अचे॒ताः । नू चि॒न्नु मर्ते॒ अक्रौ॑ ॥
vidvā́ṃsāvíddúraḥ pṛcchedávidvānitthā́paro acetā́ḥ ǀ nū́ cinnú márte ákrau ǁ
ता वि॒द्वांसा॑ हवामहे वां॒ ता नो॑ वि॒द्वांसा॒ मन्म॑ वोचेतम॒द्य । प्रार्च॒द्दय॑मानो यु॒वाकुः॑ ॥
tā́ vidvā́ṃsā havāmahe vām tā́ no vidvā́ṃsā mánma vocetamadyá ǀ prā́rcaddáyamāno yuvā́kuḥ ǁ
वि पृ॑च्छामि पा॒क्या॒३॒॑ न दे॒वान्वष॑ट्कृतस्याद्भु॒तस्य॑ दस्रा । पा॒तं च॒ सह्य॑सो यु॒वं च॒ रभ्य॑सो नः ॥
ví pṛcchāmi pākyā́ ná devā́nváṣaṭkṛtasyādbhutásya dasrā ǀ pātám ca sáhyaso yuvám ca rábhyaso naḥ ǁ
प्र या घोषे॒ भृग॑वाणे॒ न शोभे॒ यया॑ वा॒चा यज॑ति पज्रि॒यो वां॑ । प्रैष॒युर्न वि॒द्वान् ॥
prá yā́ ghóṣe bhṛ́gavāṇe ná śóbhe yáyā vācā́ yájati pajriyó vām ǀ práiṣayúrná vidvā́n ǁ
श्रु॒तं गा॑य॒त्रं तक॑वानस्या॒हं चि॒द्धि रि॒रेभा॑श्विना वां । आक्षी शु॑भस्पती॒ दन् ॥
śrutám gāyatrám tákavānasyāhám ciddhí rirébhāśvinā vām ǀ ā́kṣī́ śubhaspatī dán ǁ
यु॒वं ह्यास्तं॑ म॒हो रन्यु॒वं वा॒ यन्नि॒रत॑तंसतं । ता नो॑ वसू सुगो॒पा स्या॑तं पा॒तं नो॒ वृका॑दघा॒योः ॥
yuvám hyā́stam mahó rányuvám vā yánnirátataṃsatam ǀ tā́ no vasū sugopā́ syātam pātám no vṛ́kādaghāyóḥ ǁ
मा कस्मै॑ धातम॒भ्य॑मि॒त्रिणे॑ नो॒ माकुत्रा॑ नो गृ॒हेभ्यो॑ धे॒नवो॑ गुः । स्त॒ना॒भुजो॒ अशि॑श्वीः ॥
mā́ kásmai dhātamabhyámitríṇe no mā́kútrā no gṛhébhyo dhenávo guḥ ǀ stanābhújo áśiśvīḥ ǁ
दु॒ही॒यन्मि॒त्रधि॑तये यु॒वाकु॑ रा॒ये च॑ नो मिमी॒तं वाज॑वत्यै । इ॒षे च॑ नो मिमीतं धेनु॒मत्यै॑ ॥
duhīyánmitrádhitaye yuvā́ku rāyé ca no mimītám vā́javatyai ǀ iṣé ca no mimītam dhenumátyai ǁ
अ॒श्विनो॑रसनं॒ रथ॑मन॒श्वं वा॒जिनी॑वतोः । तेना॒हं भूरि॑ चाकन ॥
aśvínorasanam ráthamanaśvám vājínīvatoḥ ǀ ténāhám bhū́ri cākana ǁ
अ॒यं स॑मह मा तनू॒ह्याते॒ जनाँ॒ अनु॑ । सो॒म॒पेयं॑ सु॒खो रथः॑ ॥
ayám samaha mā tanūhyā́te jánām̐ ánu ǀ somapéyam sukhó ráthaḥ ǁ
अध॒ स्वप्न॑स्य॒ निर्वि॒देऽभुं॑जतश्च रे॒वतः॑ । उ॒भा ता बस्रि॑ नश्यतः ॥
ádha svápnasya nírvidé’bhuñjataśca revátaḥ ǀ ubhā́ tā́ básri naśyataḥ ǁ