ಇಂದ್ರನ ಸ್ತುತಿ ಮತ್ತು ದೈವಿಕ ಶಕ್ತಿಯ ಆವಾಹನೆ

ಗಾಯಂ॑ತಿ ತ್ವಾ ಗಾಯ॒ತ್ರಿಣೋಽರ್ಚಂ॑ತ್ಯ॒ರ್ಕಮ॒ರ್ಕಿಣಃ॑ । ಬ್ರ॒ಹ್ಮಾಣ॑ಸ್ತ್ವಾ ಶತಕ್ರತ॒ ಉದ್ವಂ॒ಶಮಿ॑ವ ಯೇಮಿರೇ ॥

गायं॑ति त्वा गाय॒त्रिणोऽर्चं॑त्य॒र्कम॒र्किणः॑ । ब्र॒ह्माण॑स्त्वा शतक्रत॒ उद्वं॒शमि॑व येमिरे ॥

ಯತ್ಸಾನೋಃ॒ ಸಾನು॒ಮಾರು॑ಹ॒ದ್ಭೂರ್ಯಸ್ಪ॑ಷ್ಟ॒ ಕರ್ತ್ವಂ॑ । ತದಿಂದ್ರೋ॒ ಅರ್ಥಂ॑ ಚೇತತಿ ಯೂ॒ಥೇನ॑ ವೃ॒ಷ್ಣಿರೇ॑ಜತಿ ॥

यत्सानोः॒ सानु॒मारु॑ह॒द्भूर्यस्प॑ष्ट॒ कर्त्वं॑ । तदिंद्रो॒ अर्थं॑ चेतति यू॒थेन॑ वृ॒ष्णिरे॑जति ॥

ಯು॒ಕ್ಷ್ವಾ ಹಿ ಕೇ॒ಶಿನಾ॒ ಹರೀ॒ ವೃಷ॑ಣಾ ಕಕ್ಷ್ಯ॒ಪ್ರಾ । ಅಥಾ॑ ನ ಇಂದ್ರ ಸೋಮಪಾ ಗಿ॒ರಾಮುಪ॑ಶ್ರುತಿಂ ಚರ ॥

यु॒क्ष्वा हि के॒शिना॒ हरी॒ वृष॑णा कक्ष्य॒प्रा । अथा॑ न इंद्र सोमपा गि॒रामुप॑श्रुतिं चर ॥

ಏಹಿ॒ ಸ್ತೋಮಾಁ॑ ಅ॒ಭಿ ಸ್ವ॑ರಾ॒ಭಿ ಗೃ॑ಣೀ॒ಹ್ಯಾ ರು॑ವ । ಬ್ರಹ್ಮ॑ ಚ ನೋ ವಸೋ॒ ಸಚೇಂದ್ರ॑ ಯ॒ಜ್ಞಂ ಚ॑ ವರ್ಧಯ ॥

एहि॒ स्तोमाँ॑ अ॒भि स्व॑रा॒भि गृ॑णी॒ह्या रु॑व । ब्रह्म॑ च नो वसो॒ सचेंद्र॑ य॒ज्ञं च॑ वर्धय ॥

ಉ॒ಕ್ಥಮಿಂದ್ರಾ॑ಯ॒ ಶಂಸ್ಯಂ॒ ವರ್ಧ॑ನಂ ಪುರುನಿ॒ಷ್ಷಿಧೇ॑ । ಶ॒ಕ್ರೋ ಯಥಾ॑ ಸು॒ತೇಷು॑ ಣೋ ರಾ॒ರಣ॑ತ್ಸ॒ಖ್ಯೇಷು॑ ಚ ॥

उ॒क्थमिंद्रा॑य॒ शंस्यं॒ वर्ध॑नं पुरुनि॒ष्षिधे॑ । श॒क्रो यथा॑ सु॒तेषु॑ णो रा॒रण॑त्स॒ख्येषु॑ च ॥

ತಮಿತ್ಸ॑ಖಿ॒ತ್ವ ಈ॑ಮಹೇ॒ ತಂ ರಾ॒ಯೇ ತಂ ಸು॒ವೀರ್ಯೇ॑ । ಸ ಶ॒ಕ್ರ ಉ॒ತ ನಃ॑ ಶಕ॒ದಿಂದ್ರೋ॒ ವಸು॒ ದಯ॑ಮಾನಃ ॥

तमित्स॑खि॒त्व ई॑महे॒ तं रा॒ये तं सु॒वीर्ये॑ । स श॒क्र उ॒त नः॑ शक॒दिंद्रो॒ वसु॒ दय॑मानः ॥

ಸು॒ವಿ॒ವೃತಂ॑ ಸುನಿ॒ರಜ॒ಮಿಂದ್ರ॒ ತ್ವಾದಾ॑ತ॒ಮಿದ್ಯಶಃ॑ । ಗವಾ॒ಮಪ॑ ವ್ರ॒ಜಂ ವೃ॑ಧಿ ಕೃಣು॒ಷ್ವ ರಾಧೋ॑ ಅದ್ರಿವಃ ॥

सु॒वि॒वृतं॑ सुनि॒रज॒मिंद्र॒ त्वादा॑त॒मिद्यशः॑ । गवा॒मप॑ व्र॒जं वृ॑धि कृणु॒ष्व राधो॑ अद्रिवः ॥

ನ॒ಹಿ ತ್ವಾ॒ ರೋದ॑ಸೀ ಉ॒ಭೇ ಋ॑ಘಾ॒ಯಮಾ॑ಣ॒ಮಿನ್ವ॑ತಃ । ಜೇಷಃ॒ ಸ್ವ॑ರ್ವತೀರ॒ಪಃ ಸಂ ಗಾ ಅ॒ಸ್ಮಭ್ಯಂ॑ ಧೂನುಹಿ ॥

न॒हि त्वा॒ रोद॑सी उ॒भे ऋ॑घा॒यमा॑ण॒मिन्व॑तः । जेषः॒ स्व॑र्वतीर॒पः सं गा अ॒स्मभ्यं॑ धूनुहि ॥

ಆಶ್ರು॑ತ್ಕರ್ಣ ಶ್ರು॒ಧೀ ಹವಂ॒ ನೂ ಚಿ॑ದ್ದಧಿಷ್ವ ಮೇ॒ ಗಿರಃ॑ । ಇಂದ್ರ॒ ಸ್ತೋಮ॑ಮಿ॒ಮಂ ಮಮ॑ ಕೃ॒ಷ್ವಾ ಯು॒ಜಶ್ಚಿ॒ದಂತ॑ರಂ ॥

आश्रु॑त्कर्ण श्रु॒धी हवं॒ नू चि॑द्दधिष्व मे॒ गिरः॑ । इंद्र॒ स्तोम॑मि॒मं मम॑ कृ॒ष्वा यु॒जश्चि॒दंत॑रं ॥

ವಿ॒ದ್ಮಾ ಹಿ ತ್ವಾ॒ ವೃಷಂ॑ತಮಂ॒ ವಾಜೇ॑ಷು ಹವನ॒ಶ್ರುತಂ॑ । ವೃಷಂ॑ತಮಸ್ಯ ಹೂಮಹ ಊ॒ತಿಂ ಸ॑ಹಸ್ರ॒ಸಾತ॑ಮಾಂ ॥

वि॒द्मा हि त्वा॒ वृषं॑तमं॒ वाजे॑षु हवन॒श्रुतं॑ । वृषं॑तमस्य हूमह ऊ॒तिं स॑हस्र॒सात॑मां ॥

ಆ ತೂ ನ॑ ಇಂದ್ರ ಕೌಶಿಕ ಮಂದಸಾ॒ನಃ ಸು॒ತಂ ಪಿ॑ಬ । ನವ್ಯ॒ಮಾಯುಃ॒ ಪ್ರ ಸೂ ತಿ॑ರ ಕೃ॒ಧೀ ಸ॑ಹಸ್ರ॒ಸಾಮೃಷಿಂ॑ ॥

आ तू न॑ इंद्र कौशिक मंदसा॒नः सु॒तं पि॑ब । नव्य॒मायुः॒ प्र सू ति॑र कृ॒धी स॑हस्र॒सामृषिं॑ ॥

ಪರಿ॑ ತ್ವಾ ಗಿರ್ವಣೋ॒ ಗಿರ॑ ಇ॒ಮಾ ಭ॑ವಂತು ವಿ॒ಶ್ವತಃ॑ । ವೃ॒ದ್ಧಾಯು॒ಮನು॒ ವೃದ್ಧ॑ಯೋ॒ ಜುಷ್ಟಾ॑ ಭವಂತು॒ ಜುಷ್ಟ॑ಯಃ ॥

परि॑ त्वा गिर्वणो॒ गिर॑ इ॒मा भ॑वंतु वि॒श्वतः॑ । वृ॒द्धायु॒मनु॒ वृद्ध॑यो॒ जुष्टा॑ भवंतु॒ जुष्ट॑यः ॥