Sūkta 10

गायं॑ति त्वा गाय॒त्रिणोऽर्चं॑त्य॒र्कम॒र्किणः॑ । ब्र॒ह्माण॑स्त्वा शतक्रत॒ उद्वं॒शमि॑व येमिरे ॥

gā́yanti tvā gāyatríṇó’rcantyarkámarkíṇaḥ ǀ brahmā́ṇastvā śatakrata údvaṃśámiva yemire ǁ

यत्सानोः॒ सानु॒मारु॑ह॒द्भूर्यस्प॑ष्ट॒ कर्त्वं॑ । तदिंद्रो॒ अर्थं॑ चेतति यू॒थेन॑ वृ॒ष्णिरे॑जति ॥

yátsā́noḥ sā́numā́ruhadbhū́ryáspaṣṭa kártvam ǀ tádíndro ártham cetati yūthéna vṛṣṇírejati ǁ

यु॒क्ष्वा हि के॒शिना॒ हरी॒ वृष॑णा कक्ष्य॒प्रा । अथा॑ न इंद्र सोमपा गि॒रामुप॑श्रुतिं चर ॥

yukṣvā́ hí keśínā hárī vṛ́ṣaṇā kakṣyaprā́ ǀ áthā na indra somapā girā́múpaśrutim cara ǁ

एहि॒ स्तोमाँ॑ अ॒भि स्व॑रा॒भि गृ॑णी॒ह्या रु॑व । ब्रह्म॑ च नो वसो॒ सचेंद्र॑ य॒ज्ञं च॑ वर्धय ॥

éhi stómām̐ abhí svarābhí gṛṇīhyā́ ruva ǀ bráhma ca no vaso sácéndra yajñám ca vardhaya ǁ

उ॒क्थमिंद्रा॑य॒ शंस्यं॒ वर्ध॑नं पुरुनि॒ष्षिधे॑ । श॒क्रो यथा॑ सु॒तेषु॑ णो रा॒रण॑त्स॒ख्येषु॑ च ॥

ukthámíndrāya śáṃsyam várdhanam puruniṣṣídhe ǀ śakró yáthā sutéṣu ṇo rāráṇatsakhyéṣu ca ǁ

तमित्स॑खि॒त्व ई॑महे॒ तं रा॒ये तं सु॒वीर्ये॑ । स श॒क्र उ॒त नः॑ शक॒दिंद्रो॒ वसु॒ दय॑मानः ॥

támítsakhitvá īmahe tám rāyé tám suvī́rye ǀ sá śakrá utá naḥ śakadíndro vásu dáyamānaḥ ǁ

सु॒वि॒वृतं॑ सुनि॒रज॒मिंद्र॒ त्वादा॑त॒मिद्यशः॑ । गवा॒मप॑ व्र॒जं वृ॑धि कृणु॒ष्व राधो॑ अद्रिवः ॥

suvivṛ́tam sunirájamíndra tvā́dātamídyáśaḥ ǀ gávāmápa vrajám vṛdhi kṛṇuṣvá rā́dho adrivaḥ ǁ

न॒हि त्वा॒ रोद॑सी उ॒भे ऋ॑घा॒यमा॑ण॒मिन्व॑तः । जेषः॒ स्व॑र्वतीर॒पः सं गा अ॒स्मभ्यं॑ धूनुहि ॥

nahí tvā ródasī ubhé ṛghāyámāṇamínvataḥ ǀ jéṣaḥ svárvatīrapáḥ sám gā́ asmábhyam dhūnuhi ǁ

आश्रु॑त्कर्ण श्रु॒धी हवं॒ नू चि॑द्दधिष्व मे॒ गिरः॑ । इंद्र॒ स्तोम॑मि॒मं मम॑ कृ॒ष्वा यु॒जश्चि॒दंत॑रं ॥

ā́śrutkarṇa śrudhī́ hávam nū́ ciddadhiṣva me gíraḥ ǀ índra stómamimám máma kṛṣvā́ yujáścidántaram ǁ

वि॒द्मा हि त्वा॒ वृषं॑तमं॒ वाजे॑षु हवन॒श्रुतं॑ । वृषं॑तमस्य हूमह ऊ॒तिं स॑हस्र॒सात॑मां ॥

vidmā́ hí tvā vṛ́ṣantamam vā́jeṣu havanaśrútam ǀ vṛ́ṣantamasya hūmaha ūtím sahasrasā́tamām ǁ

आ तू न॑ इंद्र कौशिक मंदसा॒नः सु॒तं पि॑ब । नव्य॒मायुः॒ प्र सू ति॑र कृ॒धी स॑हस्र॒सामृषिं॑ ॥

ā́ tū́ na indra kauśika mandasānáḥ sutám piba ǀ návyamā́yuḥ prá sū́ tira kṛdhī́ sahasrasā́mṛ́ṣim ǁ

परि॑ त्वा गिर्वणो॒ गिर॑ इ॒मा भ॑वंतु वि॒श्वतः॑ । वृ॒द्धायु॒मनु॒ वृद्ध॑यो॒ जुष्टा॑ भवंतु॒ जुष्ट॑यः ॥

pári tvā girvaṇo gíra imā́ bhavantu viśvátaḥ ǀ vṛddhā́yumánu vṛ́ddhayo júṣṭā bhavantu júṣṭayaḥ ǁ