ಸೋಮ ಸೂಕ್ತ: ದೈವಿಕ ಆನಂದ ಮತ್ತು ಜ್ಞಾನದ ಆವಾಹನೆ

ತ್ವಂ ಸೋ॑ಮ॒ ಪ್ರ ಚಿ॑ಕಿತೋ ಮನೀ॒ಷಾ ತ್ವಂ ರಜಿ॑ಷ್ಠ॒ಮನು॑ ನೇಷಿ॒ ಪಂಥಾಂ॑ । ತವ॒ ಪ್ರಣೀ॑ತೀ ಪಿ॒ತರೋ॑ ನ ಇಂದೋ ದೇ॒ವೇಷು॒ ರತ್ನ॑ಮಭಜಂತ॒ ಧೀರಾಃ॑ ॥

त्वं सो॑म॒ प्र चि॑कितो मनी॒षा त्वं रजि॑ष्ठ॒मनु॑ नेषि॒ पंथां॑ । तव॒ प्रणी॑ती पि॒तरो॑ न इंदो दे॒वेषु॒ रत्न॑मभजंत॒ धीराः॑ ॥

ತ್ವಂ ಸೋ॑ಮ॒ ಕ್ರತು॑ಭಿಃ ಸು॒ಕ್ರತು॑ರ್ಭೂ॒ಸ್ತ್ವಂ ದಕ್ಷೈಃ॑ ಸು॒ದಕ್ಷೋ॑ ವಿ॒ಶ್ವವೇ॑ದಾಃ । ತ್ವಂ ವೃಷಾ॑ ವೃಷ॒ತ್ವೇಭಿ॑ರ್ಮಹಿ॒ತ್ವಾ ದ್ಯು॒ಮ್ನೇಭಿ॑ರ್ದ್ಯು॒ಮ್ನ್ಯ॑ಭವೋ ನೃ॒ಚಕ್ಷಾಃ॑ ॥

त्वं सो॑म॒ क्रतु॑भिः सु॒क्रतु॑र्भू॒स्त्वं दक्षैः॑ सु॒दक्षो॑ वि॒श्ववे॑दाः । त्वं वृषा॑ वृष॒त्वेभि॑र्महि॒त्वा द्यु॒म्नेभि॑र्द्यु॒म्न्य॑भवो नृ॒चक्षाः॑ ॥

ರಾಜ್ಞೋ॒ ನು ತೇ॒ ವರು॑ಣಸ್ಯ ವ್ರ॒ತಾನಿ॑ ಬೃ॒ಹದ್ಗ॑ಭೀ॒ರಂ ತವ॑ ಸೋಮ॒ ಧಾಮ॑ । ಶುಚಿ॒ಷ್ಟ್ವಮ॑ಸಿ ಪ್ರಿ॒ಯೋ ನ ಮಿ॒ತ್ರೋ ದ॒ಕ್ಷಾಯ್ಯೋ॑ ಅರ್ಯ॒ಮೇವಾ॑ಸಿ ಸೋಮ ॥

राज्ञो॒ नु ते॒ वरु॑णस्य व्र॒तानि॑ बृ॒हद्ग॑भी॒रं तव॑ सोम॒ धाम॑ । शुचि॒ष्ट्वम॑सि प्रि॒यो न मि॒त्रो द॒क्षाय्यो॑ अर्य॒मेवा॑सि सोम ॥

ಯಾ ತೇ॒ ಧಾಮಾ॑ನಿ ದಿ॒ವಿ ಯಾ ಪೃ॑ಥಿ॒ವ್ಯಾಂ ಯಾ ಪರ್ವ॑ತೇ॒ಷ್ವೋಷ॑ಧೀಷ್ವ॒ಪ್ಸು । ತೇಭಿ॑ರ್ನೋ॒ ವಿಶ್ವೈಃ॑ ಸು॒ಮನಾ॒ ಅಹೇ॑ಳ॒ನ್ರಾಜ॑ನ್ತ್ಸೋಮ॒ ಪ್ರತಿ॑ ಹ॒ವ್ಯಾ ಗೃ॑ಭಾಯ ॥

या ते॒ धामा॑नि दि॒वि या पृ॑थि॒व्यां या पर्व॑ते॒ष्वोष॑धीष्व॒प्सु । तेभि॑र्नो॒ विश्वैः॑ सु॒मना॒ अहे॑ळ॒न्राज॑न्त्सोम॒ प्रति॑ ह॒व्या गृ॑भाय ॥

ತ್ವಂ ಸೋ॑ಮಾಸಿ॒ ಸತ್ಪ॑ತಿ॒ಸ್ತ್ವಂ ರಾಜೋ॒ತ ವೃ॑ತ್ರ॒ಹಾ । ತ್ವಂ ಭ॒ದ್ರೋ ಅ॑ಸಿ॒ ಕ್ರತುಃ॑ ॥

त्वं सो॑मासि॒ सत्प॑ति॒स्त्वं राजो॒त वृ॑त्र॒हा । त्वं भ॒द्रो अ॑सि॒ क्रतुः॑ ॥

ತ್ವಂ ಚ॑ ಸೋಮ ನೋ॒ ವಶೋ॑ ಜೀ॒ವಾತುಂ॒ ನ ಮ॑ರಾಮಹೇ । ಪ್ರಿ॒ಯಸ್ತೋ॑ತ್ರೋ॒ ವನ॒ಸ್ಪತಿಃ॑ ॥

त्वं च॑ सोम नो॒ वशो॑ जी॒वातुं॒ न म॑रामहे । प्रि॒यस्तो॑त्रो॒ वन॒स्पतिः॑ ॥

ತ್ವಂ ಸೋ॑ಮ ಮ॒ಹೇ ಭಗಂ॒ ತ್ವಂ ಯೂನ॑ ಋತಾಯ॒ತೇ । ದಕ್ಷಂ॑ ದಧಾಸಿ ಜೀ॒ವಸೇ॑ ॥

त्वं सो॑म म॒हे भगं॒ त्वं यून॑ ऋताय॒ते । दक्षं॑ दधासि जी॒वसे॑ ॥

ತ್ವಂ ನಃ॑ ಸೋಮ ವಿ॒ಶ್ವತೋ॒ ರಕ್ಷಾ॑ ರಾಜನ್ನಘಾಯ॒ತಃ । ನ ರಿ॑ಷ್ಯೇ॒ತ್ತ್ವಾವ॑ತಃ॒ ಸಖಾ॑ ॥

त्वं नः॑ सोम वि॒श्वतो॒ रक्षा॑ राजन्नघाय॒तः । न रि॑ष्ये॒त्त्वाव॑तः॒ सखा॑ ॥

ಸೋಮ॒ ಯಾಸ್ತೇ॑ ಮಯೋ॒ಭುವ॑ ಊ॒ತಯಃ॒ ಸಂತಿ॑ ದಾ॒ಶುಷೇ॑ । ತಾಭಿ॑ರ್ನೋಽವಿ॒ತಾ ಭ॑ವ ॥

सोम॒ यास्ते॑ मयो॒भुव॑ ऊ॒तयः॒ संति॑ दा॒शुषे॑ । ताभि॑र्नोऽवि॒ता भ॑व ॥

ಇ॒ಮಂ ಯ॒ಜ್ಞಮಿ॒ದಂ ವಚೋ॑ ಜುಜುಷಾ॒ಣ ಉ॒ಪಾಗ॑ಹಿ । ಸೋಮ॒ ತ್ವಂ ನೋ॑ ವೃ॒ಧೇ ಭ॑ವ ॥

इ॒मं य॒ज्ञमि॒दं वचो॑ जुजुषा॒ण उ॒पाग॑हि । सोम॒ त्वं नो॑ वृ॒धे भ॑व ॥

ಸೋಮ॑ ಗೀ॒ರ್ಭಿಷ್ಟ್ವಾ॑ ವ॒ಯಂ ವ॒ರ್ಧಯಾ॑ಮೋ ವಚೋ॒ವಿದಃ॑ । ಸು॒ಮೃ॒ಳೀ॒ಕೋ ನ॒ ಆ ವಿ॑ಶ ॥

सोम॑ गी॒र्भिष्ट्वा॑ व॒यं व॒र्धया॑मो वचो॒विदः॑ । सु॒मृ॒ळी॒को न॒ आ वि॑श ॥

ಗ॒ಯ॒ಸ್ಫಾನೋ॑ ಅಮೀವ॒ಹಾ ವ॑ಸು॒ವಿತ್ಪು॑ಷ್ಟಿ॒ವರ್ಧ॑ನಃ । ಸು॒ಮಿ॒ತ್ರಃ ಸೋ॑ಮ ನೋ ಭವ ॥

ग॒य॒स्फानो॑ अमीव॒हा व॑सु॒वित्पु॑ष्टि॒वर्ध॑नः । सु॒मि॒त्रः सो॑म नो भव ॥

ಸೋಮ॑ ರಾರಂ॒ಧಿ ನೋ॑ ಹೃ॒ದಿ ಗಾವೋ॒ ನ ಯವ॑ಸೇ॒ಷ್ವಾ । ಮರ್ಯ॑ ಇವ॒ ಸ್ವ ಓ॒ಕ್ಯೇ॑ ॥

सोम॑ रारं॒धि नो॑ हृ॒दि गावो॒ न यव॑से॒ष्वा । मर्य॑ इव॒ स्व ओ॒क्ये॑ ॥

ಯಃ ಸೋ॑ಮ ಸ॒ಖ್ಯೇ ತವ॑ ರಾ॒ರಣ॑ದ್ದೇವ॒ ಮರ್ತ್ಯಃ॑ । ತಂ ದಕ್ಷಃ॑ ಸಚತೇ ಕ॒ವಿಃ ॥

यः सो॑म स॒ख्ये तव॑ रा॒रण॑द्देव॒ मर्त्यः॑ । तं दक्षः॑ सचते क॒विः ॥

ಉ॒ರು॒ಷ್ಯಾ ಣೋ॑ ಅ॒ಭಿಶ॑ಸ್ತೇಃ॒ ಸೋಮ॒ ನಿ ಪಾ॒ಹ್ಯಂಹ॑ಸಃ । ಸಖಾ॑ ಸು॒ಶೇವ॑ ಏಧಿ ನಃ ॥

उ॒रु॒ष्या णो॑ अ॒भिश॑स्तेः॒ सोम॒ नि पा॒ह्यंह॑सः । सखा॑ सु॒शेव॑ एधि नः ॥

ಆ ಪ್ಯಾ॑ಯಸ್ವ॒ ಸಮೇ॑ತು ತೇ ವಿ॒ಶ್ವತಃ॑ ಸೋಮ॒ ವೃಷ್ಣ್ಯಂ॑ । ಭವಾ॒ ವಾಜ॑ಸ್ಯ ಸಂಗ॒ಥೇ ॥

आ प्या॑यस्व॒ समे॑तु ते वि॒श्वतः॑ सोम॒ वृष्ण्यं॑ । भवा॒ वाज॑स्य संग॒थे ॥

ಆ ಪ್ಯಾ॑ಯಸ್ವ ಮದಿಂತಮ॒ ಸೋಮ॒ ವಿಶ್ವೇ॑ಭಿರಂ॒ಶುಭಿಃ॑ । ಭವಾ॑ ನಃ ಸು॒ಶ್ರವ॑ಸ್ತಮಃ॒ ಸಖಾ॑ ವೃ॒ಧೇ ॥

आ प्या॑यस्व मदिंतम॒ सोम॒ विश्वे॑भिरं॒शुभिः॑ । भवा॑ नः सु॒श्रव॑स्तमः॒ सखा॑ वृ॒धे ॥

ಸಂ ತೇ॒ ಪಯಾಂ॑ಸಿ॒ ಸಮು॑ ಯಂತು॒ ವಾಜಾಃ॒ ಸಂ ವೃಷ್ಣ್ಯಾ॑ನ್ಯಭಿಮಾತಿ॒ಷಾಹಃ॑ । ಆ॒ಪ್ಯಾಯ॑ಮಾನೋ ಅ॒ಮೃತಾ॑ಯ ಸೋಮ ದಿ॒ವಿ ಶ್ರವಾಂ॑ಸ್ಯುತ್ತ॒ಮಾನಿ॑ ಧಿಷ್ವ ॥

सं ते॒ पयां॑सि॒ समु॑ यंतु॒ वाजाः॒ सं वृष्ण्या॑न्यभिमाति॒षाहः॑ । आ॒प्याय॑मानो अ॒मृता॑य सोम दि॒वि श्रवां॑स्युत्त॒मानि॑ धिष्व ॥

ಯಾ ತೇ॒ ಧಾಮಾ॑ನಿ ಹ॒ವಿಷಾ॒ ಯಜಂ॑ತಿ॒ ತಾ ತೇ॒ ವಿಶ್ವಾ॑ ಪರಿ॒ಭೂರ॑ಸ್ತು ಯ॒ಜ್ಞಂ । ಗ॒ಯ॒ಸ್ಫಾನಃ॑ ಪ್ರ॒ತರ॑ಣಃ ಸು॒ವೀರೋಽವೀ॑ರಹಾ॒ ಪ್ರ ಚ॑ರಾ ಸೋಮ॒ ದುರ್ಯಾ॑ನ್ ॥

या ते॒ धामा॑नि ह॒विषा॒ यजं॑ति॒ ता ते॒ विश्वा॑ परि॒भूर॑स्तु य॒ज्ञं । ग॒य॒स्फानः॑ प्र॒तर॑णः सु॒वीरोऽवी॑रहा॒ प्र च॑रा सोम॒ दुर्या॑न् ॥

ಸೋಮೋ॑ ಧೇ॒ನುಂ ಸೋಮೋ॒ ಅರ್ವಂ॑ತಮಾ॒ಶುಂ ಸೋಮೋ॑ ವೀ॒ರಂ ಕ॑ರ್ಮ॒ಣ್ಯಂ॑ ದದಾತಿ । ಸಾ॒ದ॒ನ್ಯಂ॑ ವಿದ॒ಥ್ಯಂ॑ ಸ॒ಭೇಯಂ॑ ಪಿತೃ॒ಶ್ರವ॑ಣಂ॒ ಯೋ ದದಾ॑ಶದಸ್ಮೈ ॥

सोमो॑ धे॒नुं सोमो॒ अर्वं॑तमा॒शुं सोमो॑ वी॒रं क॑र्म॒ण्यं॑ ददाति । सा॒द॒न्यं॑ विद॒थ्यं॑ स॒भेयं॑ पितृ॒श्रव॑णं॒ यो ददा॑शदस्मै ॥

ಅಷಾ॑ಳ್ಹಂ ಯು॒ತ್ಸು ಪೃತ॑ನಾಸು॒ ಪಪ್ರಿಂ॑ ಸ್ವ॒ರ್ಷಾಮ॒ಪ್ಸಾಂ ವೃ॒ಜನ॑ಸ್ಯ ಗೋ॒ಪಾಂ । ಭ॒ರೇ॒ಷು॒ಜಾಂ ಸು॑ಕ್ಷಿ॒ತಿಂ ಸು॒ಶ್ರವ॑ಸಂ॒ ಜಯಂ॑ತಂ॒ ತ್ವಾಮನು॑ ಮದೇಮ ಸೋಮ ॥

अषा॑ळ्हं यु॒त्सु पृत॑नासु॒ पप्रिं॑ स्व॒र्षाम॒प्सां वृ॒जन॑स्य गो॒पां । भ॒रे॒षु॒जां सु॑क्षि॒तिं सु॒श्रव॑सं॒ जयं॑तं॒ त्वामनु॑ मदेम सोम ॥

ತ್ವಮಿ॒ಮಾ ಓಷ॑ಧೀಃ ಸೋಮ॒ ವಿಶ್ವಾ॒ಸ್ತ್ವಮ॒ಪೋ ಅ॑ಜನಯ॒ಸ್ತ್ವಂ ಗಾಃ । ತ್ವಮಾ ತ॑ತಂಥೋ॒ರ್ವಂ೧॒॑ತರಿ॑ಕ್ಷಂ॒ ತ್ವಂ ಜ್ಯೋತಿ॑ಷಾ॒ ವಿ ತಮೋ॑ ವವರ್ಥ ॥

त्वमि॒मा ओष॑धीः सोम॒ विश्वा॒स्त्वम॒पो अ॑जनय॒स्त्वं गाः । त्वमा त॑तंथो॒र्वं१॒॑तरि॑क्षं॒ त्वं ज्योति॑षा॒ वि तमो॑ ववर्थ ॥

ದೇ॒ವೇನ॑ ನೋ॒ ಮನ॑ಸಾ ದೇವ ಸೋಮ ರಾ॒ಯೋ ಭಾ॒ಗಂ ಸ॑ಹಸಾವನ್ನ॒ಭಿ ಯು॑ಧ್ಯ । ಮಾ ತ್ವಾ ತ॑ನ॒ದೀಶಿ॑ಷೇ ವೀ॒ರ್ಯ॑ಸ್ಯೋ॒ಭಯೇ॑ಭ್ಯಃ॒ ಪ್ರ ಚಿ॑ಕಿತ್ಸಾ॒ ಗವಿ॑ಷ್ಟೌ ॥

दे॒वेन॑ नो॒ मन॑सा देव सोम रा॒यो भा॒गं स॑हसावन्न॒भि यु॑ध्य । मा त्वा त॑न॒दीशि॑षे वी॒र्य॑स्यो॒भये॑भ्यः॒ प्र चि॑कित्सा॒ गवि॑ष्टौ ॥