Sūkta 90

ऋ॒जु॒नी॒ती नो॒ वरु॑णो मि॒त्रो न॑यतु वि॒द्वान् । अ॒र्य॒मा दे॒वैः स॒जोषाः॑ ॥

ṛjunītī́ no váruṇo mitró nayatu vidvā́n ǀ aryamā́ deváiḥ sajóṣāḥ ǁ

ते हि वस्वो॒ वस॑वाना॒स्ते अप्र॑मूरा॒ महो॑भिः । व्र॒ता र॑क्षंते वि॒श्वाहा॑ ॥

té hí vásvo vásavānāsté ápramūrā máhobhiḥ ǀ vratā́ rakṣante viśvā́hā ǁ

ते अ॒स्मभ्यं॒ शर्म॑ यंसन्न॒मृता॒ मर्त्ये॑भ्यः । बाध॑माना॒ अप॒ द्विषः॑ ॥

té asmábhyam śárma yaṃsannamṛ́tā mártyebhyaḥ ǀ bā́dhamānā ápa dvíṣaḥ ǁ

वि नः॑ प॒थः सु॑वि॒ताय॑ चि॒यंत्विंद्रो॑ म॒रुतः॑ । पू॒षा भगो॒ वंद्या॑सः ॥

ví naḥ patháḥ suvitā́ya ciyántvíndro marútaḥ ǀ pūṣā́ bhágo vándyāsaḥ ǁ

उ॒त नो॒ धियो॒ गोअ॑ग्राः॒ पूष॒न्विष्ण॒वेव॑यावः । कर्ता॑ नः स्वस्ति॒मतः॑ ॥

utá no dhíyo góagrāḥ pū́ṣanvíṣṇavévayāvaḥ ǀ kártā naḥ svastimátaḥ ǁ

मधु॒ वाता॑ ऋताय॒ते मधु॑ क्षरंति॒ सिंध॑वः । माध्वी॑र्नः सं॒त्वोष॑धीः ॥

mádhu vā́tā ṛtāyaté mádhu kṣaranti síndhavaḥ ǀ mā́dhvīrnaḥ santvóṣadhīḥ ǁ

मधु॒ नक्त॑मु॒तोषसो॒ मधु॑म॒त्पार्थि॑वं॒ रजः॑ । मधु॒ द्यौर॑स्तु नः पि॒ता ॥

mádhu náktamutóṣáso mádhumatpā́rthivam rájaḥ ǀ mádhu dyáurastu naḥ pitā́ ǁ

मधु॑मान्नो॒ वन॒स्पति॒र्मधु॑माँ अस्तु॒ सूर्यः॑ । माध्वी॒र्गावो॑ भवंतु नः ॥

mádhumānno vánaspátirmádhumām̐ astu sū́ryaḥ ǀ mā́dhvīrgā́vo bhavantu naḥ ǁ

शं नो॑ मि॒त्रः शं वरु॑णः॒ शं नो॑ भवत्वर्य॒मा । शं न॒ इंद्रो॒ बृह॒स्पतिः॒ शं नो॒ विष्णु॑रुरुक्र॒मः ॥

śám no mitráḥ śám váruṇaḥ śám no bhavatvaryamā́ ǀ śám na índro bṛ́haspátiḥ śám no víṣṇururukramáḥ ǁ