ಅಗ್ನಿಯ ದಿವ್ಯ ಜ್ಞಾನ ಮತ್ತು ಯಜ್ಞದ ಆಹ್ವಾನ - Rigveda 1.76

ಕಾ ತ॒ ಉಪೇ॑ತಿ॒ರ್ಮನ॑ಸೋ॒ ವರಾ॑ಯ॒ ಭುವ॑ದಗ್ನೇ॒ ಶಂತ॑ಮಾ॒ ಕಾ ಮ॑ನೀ॒ಷಾ । ಕೋ ವಾ॑ ಯ॒ಜ್ಞೈಃ ಪರಿ॒ ದಕ್ಷಂ॑ ತ ಆಪ॒ ಕೇನ॑ ವಾ ತೇ॒ ಮನ॑ಸಾ ದಾಶೇಮ ॥

का त॒ उपे॑ति॒र्मन॑सो॒ वरा॑य॒ भुव॑दग्ने॒ शंत॑मा॒ का म॑नी॒षा । को वा॑ य॒ज्ञैः परि॒ दक्षं॑ त आप॒ केन॑ वा ते॒ मन॑सा दाशेम ॥

ಏಹ್ಯ॑ಗ್ನ ಇ॒ಹ ಹೋತಾ॒ ನಿ ಷೀ॒ದಾದ॑ಬ್ಧಃ॒ ಸು ಪು॑ರಏ॒ತಾ ಭ॑ವಾ ನಃ । ಅವ॑ತಾಂ ತ್ವಾ॒ ರೋದ॑ಸೀ ವಿಶ್ವಮಿ॒ನ್ವೇ ಯಜಾ॑ ಮ॒ಹೇ ಸೌ॑ಮನ॒ಸಾಯ॑ ದೇ॒ವಾನ್ ॥

एह्य॑ग्न इ॒ह होता॒ नि षी॒दाद॑ब्धः॒ सु पु॑रए॒ता भ॑वा नः । अव॑तां त्वा॒ रोद॑सी विश्वमि॒न्वे यजा॑ म॒हे सौ॑मन॒साय॑ दे॒वान् ॥

ಪ್ರ ಸು ವಿಶ್ವಾ॑ನ್ರ॒ಕ್ಷಸೋ॒ ಧಕ್ಷ್ಯ॑ಗ್ನೇ॒ ಭವಾ॑ ಯ॒ಜ್ಞಾನಾ॑ಮಭಿಶಸ್ತಿ॒ಪಾವಾ॑ । ಅಥಾ ವ॑ಹ॒ ಸೋಮ॑ಪತಿಂ॒ ಹರಿ॑ಭ್ಯಾಮಾತಿ॒ಥ್ಯಮ॑ಸ್ಮೈ ಚಕೃಮಾ ಸು॒ದಾವ್ನೇ॑ ॥

प्र सु विश्वा॑न्र॒क्षसो॒ धक्ष्य॑ग्ने॒ भवा॑ य॒ज्ञाना॑मभिशस्ति॒पावा॑ । अथा व॑ह॒ सोम॑पतिं॒ हरि॑भ्यामाति॒थ्यम॑स्मै चकृमा सु॒दाव्ने॑ ॥

ಪ್ರ॒ಜಾವ॑ತಾ॒ ವಚ॑ಸಾ॒ ವಹ್ನಿ॑ರಾ॒ಸಾ ಚ॑ ಹು॒ವೇ ನಿ ಚ॑ ಸತ್ಸೀ॒ಹ ದೇ॒ವೈಃ । ವೇಷಿ॑ ಹೋ॒ತ್ರಮು॒ತ ಪೋ॒ತ್ರಂ ಯ॑ಜತ್ರ ಬೋ॒ಧಿ ಪ್ರ॑ಯಂತರ್ಜನಿತ॒ರ್ವಸೂ॑ನಾಂ ॥

प्र॒जाव॑ता॒ वच॑सा॒ वह्नि॑रा॒सा च॑ हु॒वे नि च॑ सत्सी॒ह दे॒वैः । वेषि॑ हो॒त्रमु॒त पो॒त्रं य॑जत्र बो॒धि प्र॑यंतर्जनित॒र्वसू॑नां ॥

ಯಥಾ॒ ವಿಪ್ರ॑ಸ್ಯ॒ ಮನು॑ಷೋ ಹ॒ವಿರ್ಭಿ॑ರ್ದೇ॒ವಾಁ ಅಯ॑ಜಃ ಕ॒ವಿಭಿಃ॑ ಕ॒ವಿಃ ಸನ್ । ಏ॒ವಾ ಹೋ॑ತಃ ಸತ್ಯತರ॒ ತ್ವಮ॒ದ್ಯಾಗ್ನೇ॑ ಮಂ॒ದ್ರಯಾ॑ ಜು॒ಹ್ವಾ॑ ಯಜಸ್ವ ॥

यथा॒ विप्र॑स्य॒ मनु॑षो ह॒विर्भि॑र्दे॒वाँ अय॑जः क॒विभिः॑ क॒विः सन् । ए॒वा हो॑तः सत्यतर॒ त्वम॒द्याग्ने॑ मं॒द्रया॑ जु॒ह्वा॑ यजस्व ॥