ಅಗ್ನಿಯ ಆವಾಹನೆ ಮತ್ತು ದೈವಿಕ ಸ್ನೇಹ - ಋಗ್ವೇದ ಮಂಡಲ ೧, ಸೂಕ್ತ ೭೫

ಜು॒ಷಸ್ವ॑ ಸ॒ಪ್ರಥ॑ಸ್ತಮಂ॒ ವಚೋ॑ ದೇ॒ವಪ್ಸ॑ರಸ್ತಮಂ । ಹ॒ವ್ಯಾ ಜುಹ್ವಾ॑ನ ಆ॒ಸನಿ॑ ॥

जु॒षस्व॑ स॒प्रथ॑स्तमं॒ वचो॑ दे॒वप्स॑रस्तमं । ह॒व्या जुह्वा॑न आ॒सनि॑ ॥

ಅಥಾ॑ ತೇ ಅಂಗಿರಸ್ತ॒ಮಾಗ್ನೇ॑ ವೇಧಸ್ತಮ ಪ್ರಿ॒ಯಂ । ವೋ॒ಚೇಮ॒ ಬ್ರಹ್ಮ॑ ಸಾನ॒ಸಿ ॥

अथा॑ ते अंगिरस्त॒माग्ने॑ वेधस्तम प्रि॒यं । वो॒चेम॒ ब्रह्म॑ सान॒सि ॥

ಕಸ್ತೇ॑ ಜಾ॒ಮಿರ್ಜನಾ॑ನಾ॒ಮಗ್ನೇ॒ ಕೋ ದಾ॒ಶ್ವ॑ಧ್ವರಃ । ಕೋ ಹ॒ ಕಸ್ಮಿ॑ನ್ನಸಿ ಶ್ರಿ॒ತಃ ॥

कस्ते॑ जा॒मिर्जना॑ना॒मग्ने॒ को दा॒श्व॑ध्वरः । को ह॒ कस्मि॑न्नसि श्रि॒तः ॥

ತ್ವಂ ಜಾ॒ಮಿರ್ಜನಾ॑ನಾ॒ಮಗ್ನೇ॑ ಮಿ॒ತ್ರೋ ಅ॑ಸಿ ಪ್ರಿ॒ಯಃ । ಸಖಾ॒ ಸಖಿ॑ಭ್ಯ॒ ಈಡ್ಯಃ॑ ॥

त्वं जा॒मिर्जना॑ना॒मग्ने॑ मि॒त्रो अ॑सि प्रि॒यः । सखा॒ सखि॑भ्य॒ ईड्यः॑ ॥

ಯಜಾ॑ ನೋ ಮಿ॒ತ್ರಾವರು॑ಣಾ॒ ಯಜಾ॑ ದೇ॒ವಾಁ ಋ॒ತಂ ಬೃ॒ಹತ್ । ಅಗ್ನೇ॒ ಯಕ್ಷಿ॒ ಸ್ವಂ ದಮಂ॑ ॥

यजा॑ नो मि॒त्रावरु॑णा॒ यजा॑ दे॒वाँ ऋ॒तं बृ॒हत् । अग्ने॒ यक्षि॒ स्वं दमं॑ ॥