Sūkta 74

यः स्नीहि॑तीषु पू॒र्व्यः सं॑जग्मा॒नासु॑ कृ॒ष्टिषु॑ । अर॑क्षद्दा॒शुषे॒ गयं॑ ॥

yáḥ snī́hitīṣu pūrvyáḥ saṃjagmānā́su kṛṣṭíṣu ǀ árakṣaddāśúṣe gáyam ǁ

उ॒त ब्रु॑वंतु जं॒तव॒ उद॒ग्निर्वृ॑त्र॒हाज॑नि । ध॒नं॒ज॒यो रणे॑रणे ॥

utá bruvantu jantáva údagnírvṛtrahā́jani ǀ dhanaṃjayó ráṇeraṇe ǁ

यस्य॑ दू॒तो असि॒ क्षये॒ वेषि॑ ह॒व्यानि॑ वी॒तये॑ । द॒स्मत्कृ॒णोष्य॑ध्व॒रं ॥

yásya dūtó ási kṣáye véṣi havyā́ni vītáye ǀ dasmátkṛṇóṣyadhvarám ǁ

तमित्सु॑ह॒व्यमं॑गिरः सुदे॒वं स॑हसो यहो । जना॑ आहुः सुब॒र्हिषं॑ ॥

támítsuhavyámaṅgiraḥ sudevám sahaso yaho ǀ jánā āhuḥ subarhíṣam ǁ

आ च॒ वहा॑सि॒ ताँ इ॒ह दे॒वाँ उप॒ प्रश॑स्तये । ह॒व्या सु॑श्चंद्र वी॒तये॑ ॥

ā́ ca váhāsi tā́m̐ ihá devā́m̐ úpa práśastaye ǀ havyā́ suścandra vītáye ǁ

न योरु॑प॒ब्दिरश्व्यः॑ शृ॒ण्वे रथ॑स्य॒ कच्च॒न । यद॑ग्ने॒ यासि॑ दू॒त्यं॑ ॥

ná yórupabdíráśvyaḥ śṛṇvé ráthasya káccaná ǀ yádagne yā́si dūtyám ǁ

त्वोतो॑ वा॒ज्यह्र॑यो॒ऽभि पूर्व॑स्मा॒दप॑रः । प्र दा॒श्वाँ अ॑ग्ने अस्थात् ॥

tvóto vājyáhrayo’bhí pū́rvasmādáparaḥ ǀ prá dāśvā́m̐ agne asthāt ǁ

उ॒त द्यु॒मत्सु॒वीर्यं॑ बृ॒हद॑ग्ने विवाससि । दे॒वेभ्यो॑ देव दा॒शुषे॑ ॥

utá dyumátsuvī́ryam bṛhádagne vivāsasi ǀ devébhyo deva dāśúṣe ǁ