ಅಗ್ನಿಯ ದೈವೀ ಸ್ವರೂಪ ಮತ್ತು ರಕ್ಷಣೆ - ಋಗ್ವೇದ ೧.೭೩

ರ॒ಯಿರ್ನ ಯಃ ಪಿ॑ತೃವಿ॒ತ್ತೋ ವ॑ಯೋ॒ಧಾಃ ಸು॒ಪ್ರಣೀ॑ತಿಶ್ಚಿಕಿ॒ತುಷೋ॒ ನ ಶಾಸುಃ॑ । ಸ್ಯೋ॒ನ॒ಶೀರತಿ॑ಥಿ॒ರ್ನ ಪ್ರೀ॑ಣಾ॒ನೋ ಹೋತೇ॑ವ॒ ಸದ್ಮ॑ ವಿಧ॒ತೋ ವಿ ತಾ॑ರೀತ್ ॥

र॒यिर्न यः पि॑तृवि॒त्तो व॑यो॒धाः सु॒प्रणी॑तिश्चिकि॒तुषो॒ न शासुः॑ । स्यो॒न॒शीरति॑थि॒र्न प्री॑णा॒नो होते॑व॒ सद्म॑ विध॒तो वि ता॑रीत् ॥

ದೇ॒ವೋ ನ ಯಃ ಸ॑ವಿ॒ತಾ ಸ॒ತ್ಯಮ॑ನ್ಮಾ॒ ಕ್ರತ್ವಾ॑ ನಿ॒ಪಾತಿ॑ ವೃ॒ಜನಾ॑ನಿ॒ ವಿಶ್ವಾ॑ । ಪು॒ರು॒ಪ್ರ॒ಶ॒ಸ್ತೋ ಅ॒ಮತಿ॒ರ್ನ ಸ॒ತ್ಯ ಆ॒ತ್ಮೇವ॒ ಶೇವೋ॑ ದಿಧಿ॒ಷಾಯ್ಯೋ॑ ಭೂತ್ ॥

दे॒वो न यः स॑वि॒ता स॒त्यम॑न्मा॒ क्रत्वा॑ नि॒पाति॑ वृ॒जना॑नि॒ विश्वा॑ । पु॒रु॒प्र॒श॒स्तो अ॒मति॒र्न स॒त्य आ॒त्मेव॒ शेवो॑ दिधि॒षाय्यो॑ भूत् ॥

ದೇ॒ವೋ ನ ಯಃ ಪೃ॑ಥಿ॒ವೀಂ ವಿ॒ಶ್ವಧಾ॑ಯಾ ಉಪ॒ಕ್ಷೇತಿ॑ ಹಿ॒ತಮಿ॑ತ್ರೋ॒ ನ ರಾಜಾ॑ । ಪು॒ರಃ॒ಸದಃ॑ ಶರ್ಮ॒ಸದೋ॒ ನ ವೀ॒ರಾ ಅ॑ನವ॒ದ್ಯಾ ಪತಿ॑ಜುಷ್ಟೇವ॒ ನಾರೀ॑ ॥

दे॒वो न यः पृ॑थि॒वीं वि॒श्वधा॑या उप॒क्षेति॑ हि॒तमि॑त्रो॒ न राजा॑ । पु॒रः॒सदः॑ शर्म॒सदो॒ न वी॒रा अ॑नव॒द्या पति॑जुष्टेव॒ नारी॑ ॥

ತಂ ತ್ವಾ॒ ನರೋ॒ ದಮ॒ ಆ ನಿತ್ಯ॑ಮಿ॒ದ್ಧಮಗ್ನೇ॒ ಸಚಂ॑ತ ಕ್ಷಿ॒ತಿಷು॑ ಧ್ರು॒ವಾಸು॑ । ಅಧಿ॑ ದ್ಯು॒ಮ್ನಂ ನಿ ದ॑ಧು॒ರ್ಭೂರ್ಯ॑ಸ್ಮಿ॒ನ್ಭವಾ॑ ವಿ॒ಶ್ವಾಯು॑ರ್ಧ॒ರುಣೋ॑ ರಯೀ॒ಣಾಂ ॥

तं त्वा॒ नरो॒ दम॒ आ नित्य॑मि॒द्धमग्ने॒ सचं॑त क्षि॒तिषु॑ ध्रु॒वासु॑ । अधि॑ द्यु॒म्नं नि द॑धु॒र्भूर्य॑स्मि॒न्भवा॑ वि॒श्वायु॑र्ध॒रुणो॑ रयी॒णां ॥

ವಿ ಪೃಕ್ಷೋ॑ ಅಗ್ನೇ ಮ॒ಘವಾ॑ನೋ ಅಶ್ಯು॒ರ್ವಿ ಸೂ॒ರಯೋ॒ ದದ॑ತೋ॒ ವಿಶ್ವ॒ಮಾಯುಃ॑ । ಸ॒ನೇಮ॒ ವಾಜಂ॑ ಸಮಿ॒ಥೇಷ್ವ॒ರ್ಯೋ ಭಾ॒ಗಂ ದೇ॒ವೇಷು॒ ಶ್ರವ॑ಸೇ॒ ದಧಾ॑ನಾಃ ॥

वि पृक्षो॑ अग्ने म॒घवा॑नो अश्यु॒र्वि सू॒रयो॒ दद॑तो॒ विश्व॒मायुः॑ । स॒नेम॒ वाजं॑ समि॒थेष्व॒र्यो भा॒गं दे॒वेषु॒ श्रव॑से॒ दधा॑नाः ॥

ಋ॒ತಸ್ಯ॒ ಹಿ ಧೇ॒ನವೋ॑ ವಾವಶಾ॒ನಾಃ ಸ್ಮದೂ॑ಧ್ನೀಃ ಪೀ॒ಪಯಂ॑ತ॒ ದ್ಯುಭ॑ಕ್ತಾಃ । ಪ॒ರಾ॒ವತಃ॑ ಸುಮ॒ತಿಂ ಭಿಕ್ಷ॑ಮಾಣಾ॒ ವಿ ಸಿಂಧ॑ವಃ ಸ॒ಮಯಾ॑ ಸಸ್ರು॒ರದ್ರಿಂ॑ ॥

ऋ॒तस्य॒ हि धे॒नवो॑ वावशा॒नाः स्मदू॑ध्नीः पी॒पयं॑त॒ द्युभ॑क्ताः । प॒रा॒वतः॑ सुम॒तिं भिक्ष॑माणा॒ वि सिंध॑वः स॒मया॑ सस्रु॒रद्रिं॑ ॥

ತ್ವೇ ಅ॑ಗ್ನೇ ಸುಮ॒ತಿಂ ಭಿಕ್ಷ॑ಮಾಣಾ ದಿ॒ವಿ ಶ್ರವೋ॑ ದಧಿರೇ ಯ॒ಜ್ಞಿಯಾ॑ಸಃ । ನಕ್ತಾ॑ ಚ ಚ॒ಕ್ರುರು॒ಷಸಾ॒ ವಿರೂ॑ಪೇ ಕೃ॒ಷ್ಣಂ ಚ॒ ವರ್ಣ॑ಮರು॒ಣಂ ಚ॒ ಸಂ ಧುಃ॑ ॥

त्वे अ॑ग्ने सुम॒तिं भिक्ष॑माणा दि॒वि श्रवो॑ दधिरे य॒ज्ञिया॑सः । नक्ता॑ च च॒क्रुरु॒षसा॒ विरू॑पे कृ॒ष्णं च॒ वर्ण॑मरु॒णं च॒ सं धुः॑ ॥

ಯಾನ್ರಾ॒ಯೇ ಮರ್ತಾ॒ನ್ತ್ಸುಷೂ॑ದೋ ಅಗ್ನೇ॒ ತೇ ಸ್ಯಾ॑ಮ ಮ॒ಘವಾ॑ನೋ ವ॒ಯಂ ಚ॑ । ಛಾ॒ಯೇವ॒ ವಿಶ್ವಂ॒ ಭುವ॑ನಂ ಸಿಸಕ್ಷ್ಯಾಪಪ್ರಿ॒ವಾನ್ರೋದ॑ಸೀ ಅಂ॒ತರಿ॑ಕ್ಷಂ ॥

यान्रा॒ये मर्ता॒न्त्सुषू॑दो अग्ने॒ ते स्या॑म म॒घवा॑नो व॒यं च॑ । छा॒येव॒ विश्वं॒ भुव॑नं सिसक्ष्यापप्रि॒वान्रोद॑सी अं॒तरि॑क्षं ॥

ಅರ್ವ॑ದ್ಭಿರಗ್ನೇ॒ ಅರ್ವ॑ತೋ॒ ನೃಭಿ॒ರ್ನೄನ್ವೀ॒ರೈರ್ವೀ॒ರಾನ್ವ॑ನುಯಾಮಾ॒ ತ್ವೋತಾಃ॑ । ಈ॒ಶಾ॒ನಾಸಃ॑ ಪಿತೃವಿ॒ತ್ತಸ್ಯ॑ ರಾ॒ಯೋ ವಿ ಸೂ॒ರಯಃ॑ ಶ॒ತಹಿ॑ಮಾ ನೋ ಅಶ್ಯುಃ ॥

अर्व॑द्भिरग्ने॒ अर्व॑तो॒ नृभि॒र्नॄन्वी॒रैर्वी॒रान्व॑नुयामा॒ त्वोताः॑ । ई॒शा॒नासः॑ पितृवि॒त्तस्य॑ रा॒यो वि सू॒रयः॑ श॒तहि॑मा नो अश्युः ॥

ಏ॒ತಾ ತೇ॑ ಅಗ್ನ ಉ॒ಚಥಾ॑ನಿ ವೇಧೋ॒ ಜುಷ್ಟಾ॑ನಿ ಸಂತು॒ ಮನ॑ಸೇ ಹೃ॒ದೇ ಚ॑ । ಶ॒ಕೇಮ॑ ರಾ॒ಯಃ ಸು॒ಧುರೋ॒ ಯಮಂ॒ ತೇಽಧಿ॒ ಶ್ರವೋ॑ ದೇ॒ವಭ॑ಕ್ತಂ॒ ದಧಾ॑ನಾಃ ॥

ए॒ता ते॑ अग्न उ॒चथा॑नि वेधो॒ जुष्टा॑नि संतु॒ मन॑से हृ॒दे च॑ । श॒केम॑ रा॒यः सु॒धुरो॒ यमं॒ तेऽधि॒ श्रवो॑ दे॒वभ॑क्तं॒ दधा॑नाः ॥