ಅಗ್ನಿಯ ದಿವ್ಯ ಜನ್ಮ ಮತ್ತು ಋಷಿಗಳ ಪ್ರಾರ್ಥನೆ

ಉಪ॒ ಪ್ರ ಜಿ॑ನ್ವನ್ನುಶ॒ತೀರು॒ಶಂತಂ॒ ಪತಿಂ॒ ನ ನಿತ್ಯಂ॒ ಜನ॑ಯಃ॒ ಸನೀ॑ಳಾಃ । ಸ್ವಸಾ॑ರಃ॒ ಶ್ಯಾವೀ॒ಮರು॑ಷೀಮಜುಷ್ರಂಚಿ॒ತ್ರಮು॒ಚ್ಛಂತೀ॑ಮು॒ಷಸಂ॒ ನ ಗಾವಃ॑ ॥

उप॒ प्र जि॑न्वन्नुश॒तीरु॒शंतं॒ पतिं॒ न नित्यं॒ जन॑यः॒ सनी॑ळाः । स्वसा॑रः॒ श्यावी॒मरु॑षीमजुष्रंचि॒त्रमु॒च्छंती॑मु॒षसं॒ न गावः॑ ॥

ವೀ॒ಳು ಚಿ॑ದ್ದೃ॒ಳ್ಹಾ ಪಿ॒ತರೋ॑ ನ ಉ॒ಕ್ಥೈರದ್ರಿಂ॑ ರುಜ॒ನ್ನಂಗಿ॑ರಸೋ॒ ರವೇ॑ಣ । ಚ॒ಕ್ರುರ್ದಿ॒ವೋ ಬೃ॑ಹ॒ತೋ ಗಾ॒ತುಮ॒ಸ್ಮೇ ಅಹಃ॒ ಸ್ವ॑ರ್ವಿವಿದುಃ ಕೇ॒ತುಮು॒ಸ್ರಾಃ ॥

वी॒ळु चि॑द्दृ॒ळ्हा पि॒तरो॑ न उ॒क्थैरद्रिं॑ रुज॒न्नंगि॑रसो॒ रवे॑ण । च॒क्रुर्दि॒वो बृ॑ह॒तो गा॒तुम॒स्मे अहः॒ स्व॑र्विविदुः के॒तुमु॒स्राः ॥

ದಧ॑ನ್ನೃ॒ತಂ ಧ॒ನಯ॑ನ್ನಸ್ಯ ಧೀ॒ತಿಮಾದಿದ॒ರ್ಯೋ ದಿ॑ಧಿ॒ಷ್ವೋ॒೩॒॑ ವಿಭೃ॑ತ್ರಾಃ । ಅತೃ॑ಷ್ಯಂತೀರ॒ಪಸೋ॑ ಯಂ॒ತ್ಯಚ್ಛಾ॑ ದೇ॒ವಾಂಜನ್ಮ॒ ಪ್ರಯ॑ಸಾ ವ॒ರ್ಧಯಂ॑ತೀಃ ॥

दध॑न्नृ॒तं ध॒नय॑न्नस्य धी॒तिमादिद॒र्यो दि॑धि॒ष्वो॒३॒॑ विभृ॑त्राः । अतृ॑ष्यंतीर॒पसो॑ यं॒त्यच्छा॑ दे॒वांजन्म॒ प्रय॑सा व॒र्धयं॑तीः ॥

ಮಥೀ॒ದ್ಯದೀಂ॒ ವಿಭೃ॑ತೋ ಮಾತ॒ರಿಶ್ವಾ॑ ಗೃ॒ಹೇಗೃ॑ಹೇ ಶ್ಯೇ॒ತೋ ಜೇನ್ಯೋ॒ ಭೂತ್ । ಆದೀಂ॒ ರಾಜ್ಞೇ॒ ನ ಸಹೀ॑ಯಸೇ॒ ಸಚಾ॒ ಸನ್ನಾ ದೂ॒ತ್ಯಂ೧॒॑ ಭೃಗ॑ವಾಣೋ ವಿವಾಯ ॥

मथी॒द्यदीं॒ विभृ॑तो मात॒रिश्वा॑ गृ॒हेगृ॑हे श्ये॒तो जेन्यो॒ भूत् । आदीं॒ राज्ञे॒ न सही॑यसे॒ सचा॒ सन्ना दू॒त्यं१॒॑ भृग॑वाणो विवाय ॥

ಮ॒ಹೇ ಯತ್ಪಿ॒ತ್ರ ಈಂ॒ ರಸಂ॑ ದಿ॒ವೇ ಕರವ॑ ತ್ಸರತ್ಪೃಶ॒ನ್ಯ॑ಶ್ಚಿಕಿ॒ತ್ವಾನ್ । ಸೃ॒ಜದಸ್ತಾ॑ ಧೃಷ॒ತಾ ದಿ॒ದ್ಯುಮ॑ಸ್ಮೈ॒ ಸ್ವಾಯಾಂ॑ ದೇ॒ವೋ ದು॑ಹಿ॒ತರಿ॒ ತ್ವಿಷಿಂ॑ ಧಾತ್ ॥

म॒हे यत्पि॒त्र ईं॒ रसं॑ दि॒वे करव॑ त्सरत्पृश॒न्य॑श्चिकि॒त्वान् । सृ॒जदस्ता॑ धृष॒ता दि॒द्युम॑स्मै॒ स्वायां॑ दे॒वो दु॑हि॒तरि॒ त्विषिं॑ धात् ॥

ಸ್ವ ಆ ಯಸ್ತುಭ್ಯಂ॒ ದಮ॒ ಆ ವಿ॒ಭಾತಿ॒ ನಮೋ॑ ವಾ॒ ದಾಶಾ॑ದುಶ॒ತೋ ಅನು॒ ದ್ಯೂನ್ । ವರ್ಧೋ॑ ಅಗ್ನೇ॒ ವಯೋ॑ ಅಸ್ಯ ದ್ವಿ॒ಬರ್ಹಾ॒ ಯಾಸ॑ದ್ರಾ॒ಯಾ ಸ॒ರಥಂ॒ ಯಂ ಜು॒ನಾಸಿ॑ ॥

स्व आ यस्तुभ्यं॒ दम॒ आ वि॒भाति॒ नमो॑ वा॒ दाशा॑दुश॒तो अनु॒ द्यून् । वर्धो॑ अग्ने॒ वयो॑ अस्य द्वि॒बर्हा॒ यास॑द्रा॒या स॒रथं॒ यं जु॒नासि॑ ॥

ಅ॒ಗ್ನಿಂ ವಿಶ್ವಾ॑ ಅ॒ಭಿ ಪೃಕ್ಷಃ॑ ಸಚಂತೇ ಸಮು॒ದ್ರಂ ನ ಸ್ರ॒ವತಃ॑ ಸ॒ಪ್ತ ಯ॒ಹ್ವೀಃ । ನ ಜಾ॒ಮಿಭಿ॒ರ್ವಿ ಚಿ॑ಕಿತೇ॒ ವಯೋ॑ ನೋ ವಿ॒ದಾ ದೇ॒ವೇಷು॒ ಪ್ರಮ॑ತಿಂ ಚಿಕಿ॒ತ್ವಾನ್ ॥

अ॒ग्निं विश्वा॑ अ॒भि पृक्षः॑ सचंते समु॒द्रं न स्र॒वतः॑ स॒प्त य॒ह्वीः । न जा॒मिभि॒र्वि चि॑किते॒ वयो॑ नो वि॒दा दे॒वेषु॒ प्रम॑तिं चिकि॒त्वान् ॥

ಆ ಯದಿ॒ಷೇ ನೃ॒ಪತಿಂ॒ ತೇಜ॒ ಆನ॒ಟ್ಛುಚಿ॒ ರೇತೋ॒ ನಿಷಿ॑ಕ್ತಂ॒ ದ್ಯೌರ॒ಭೀಕೇ॑ । ಅ॒ಗ್ನಿಃ ಶರ್ಧ॑ಮನವ॒ದ್ಯಂ ಯುವಾ॑ನಂ ಸ್ವಾ॒ಧ್ಯಂ॑ ಜನಯತ್ಸೂ॒ದಯ॑ಚ್ಚ ॥

आ यदि॒षे नृ॒पतिं॒ तेज॒ आन॒ट्छुचि॒ रेतो॒ निषि॑क्तं॒ द्यौर॒भीके॑ । अ॒ग्निः शर्ध॑मनव॒द्यं युवा॑नं स्वा॒ध्यं॑ जनयत्सू॒दय॑च्च ॥

ಮನೋ॒ ನ ಯೋಽಧ್ವ॑ನಃ ಸ॒ದ್ಯ ಏತ್ಯೇಕಃ॑ ಸ॒ತ್ರಾ ಸೂರೋ॒ ವಸ್ವ॑ ಈಶೇ । ರಾಜಾ॑ನಾ ಮಿ॒ತ್ರಾವರು॑ಣಾ ಸುಪಾ॒ಣೀ ಗೋಷು॑ ಪ್ರಿ॒ಯಮ॒ಮೃತಂ॒ ರಕ್ಷ॑ಮಾಣಾ ॥

मनो॒ न योऽध्व॑नः स॒द्य एत्येकः॑ स॒त्रा सूरो॒ वस्व॑ ईशे । राजा॑ना मि॒त्रावरु॑णा सुपा॒णी गोषु॑ प्रि॒यम॒मृतं॒ रक्ष॑माणा ॥

ಮಾ ನೋ॑ ಅಗ್ನೇ ಸ॒ಖ್ಯಾ ಪಿತ್ರ್ಯಾ॑ಣಿ॒ ಪ್ರ ಮ॑ರ್ಷಿಷ್ಠಾ ಅ॒ಭಿ ವಿ॒ದುಷ್ಕ॒ವಿಃ ಸನ್ । ನಭೋ॒ ನ ರೂ॒ಪಂ ಜ॑ರಿ॒ಮಾ ಮಿ॑ನಾತಿ ಪು॒ರಾ ತಸ್ಯಾ॑ ಅ॒ಭಿಶ॑ಸ್ತೇ॒ರಧೀ॑ಹಿ ॥

मा नो॑ अग्ने स॒ख्या पित्र्या॑णि॒ प्र म॑र्षिष्ठा अ॒भि वि॒दुष्क॒विः सन् । नभो॒ न रू॒पं ज॑रि॒मा मि॑नाति पु॒रा तस्या॑ अ॒भिश॑स्ते॒रधी॑हि ॥