ಅಗ್ನಿಯ ವಿಶ್ವವ್ಯಾಪಿ ದೈವಿಕ ಶಕ್ತಿ ಮತ್ತು ಜ್ಞಾನ

ವ॒ನೇಮ॑ ಪೂ॒ರ್ವೀರ॒ರ್ಯೋ ಮ॑ನೀ॒ಷಾ ಅ॒ಗ್ನಿಃ ಸು॒ಶೋಕೋ॒ ವಿಶ್ವಾ॑ನ್ಯಶ್ಯಾಃ ॥

व॒नेम॑ पू॒र्वीर॒र्यो म॑नी॒षा अ॒ग्निः सु॒शोको॒ विश्वा॑न्यश्याः ॥

ಆ ದೈವ್ಯಾ॑ನಿ ವ್ರ॒ತಾ ಚಿ॑ಕಿ॒ತ್ವಾನಾ ಮಾನು॑ಷಸ್ಯ॒ ಜನ॑ಸ್ಯ॒ ಜನ್ಮ॑ ॥

आ दैव्या॑नि व्र॒ता चि॑कि॒त्वाना मानु॑षस्य॒ जन॑स्य॒ जन्म॑ ॥

ಗರ್ಭೋ॒ ಯೋ ಅ॒ಪಾಂ ಗರ್ಭೋ॒ ವನಾ॑ನಾಂ॒ ಗರ್ಭ॑ಶ್ಚ ಸ್ಥಾ॒ತಾಂ ಗರ್ಭ॑ಶ್ಚ॒ರಥಾಂ॑ ॥

गर्भो॒ यो अ॒पां गर्भो॒ वना॑नां॒ गर्भ॑श्च स्था॒तां गर्भ॑श्च॒रथां॑ ॥

ಅದ್ರೌ॑ ಚಿದಸ್ಮಾ ಅಂ॒ತರ್ದು॑ರೋ॒ಣೇ ವಿ॒ಶಾಂ ನ ವಿಶ್ವೋ॑ ಅ॒ಮೃತಃ॑ ಸ್ವಾ॒ಧೀಃ ॥

अद्रौ॑ चिदस्मा अं॒तर्दु॑रो॒णे वि॒शां न विश्वो॑ अ॒मृतः॑ स्वा॒धीः ॥

ಸ ಹಿ ಕ್ಷ॒ಪಾವಾಁ॑ ಅ॒ಗ್ನೀ ರ॑ಯೀ॒ಣಾಂ ದಾಶ॒ದ್ಯೋ ಅ॑ಸ್ಮಾ॒ ಅರಂ॑ ಸೂ॒ಕ್ತೈಃ ॥

स हि क्ष॒पावाँ॑ अ॒ग्नी र॑यी॒णां दाश॒द्यो अ॑स्मा॒ अरं॑ सू॒क्तैः ॥

ಏ॒ತಾ ಚಿ॑ಕಿತ್ವೋ॒ ಭೂಮಾ॒ ನಿ ಪಾ॑ಹಿ ದೇ॒ವಾನಾಂ॒ ಜನ್ಮ॒ ಮರ್ತಾಂ॑ಶ್ಚ ವಿ॒ದ್ವಾನ್ ॥

ए॒ता चि॑कित्वो॒ भूमा॒ नि पा॑हि दे॒वानां॒ जन्म॒ मर्तां॑श्च वि॒द्वान् ॥

ವರ್ಧಾ॒ನ್ಯಂ ಪೂ॒ರ್ವೀಃ ಕ್ಷ॒ಪೋ ವಿರೂ॑ಪಾಃ ಸ್ಥಾ॒ತುಶ್ಚ॒ ರಥ॑ಮೃ॒ತಪ್ರ॑ವೀತಂ ॥

वर्धा॒न्यं पू॒र्वीः क्ष॒पो विरू॑पाः स्था॒तुश्च॒ रथ॑मृ॒तप्र॑वीतं ॥

ಅರಾ॑ಧಿ॒ ಹೋತಾ॒ ಸ್ವ೧॒॑ರ್ನಿಷ॑ತ್ತಃ ಕೃ॒ಣ್ವನ್ವಿಶ್ವಾ॒ನ್ಯಪಾಂ॑ಸಿ ಸ॒ತ್ಯಾ ॥

अरा॑धि॒ होता॒ स्व१॒॑र्निष॑त्तः कृ॒ण्वन्विश्वा॒न्यपां॑सि स॒त्या ॥

ಗೋಷು॒ ಪ್ರಶ॑ಸ್ತಿಂ॒ ವನೇ॑ಷು ಧಿಷೇ॒ ಭರಂ॑ತ॒ ವಿಶ್ವೇ॑ ಬ॒ಲಿಂ ಸ್ವ॑ರ್ಣಃ ॥

गोषु॒ प्रश॑स्तिं॒ वने॑षु धिषे॒ भरं॑त॒ विश्वे॑ ब॒लिं स्व॑र्णः ॥

ವಿ ತ್ವಾ॒ ನರಃ॑ ಪುರು॒ತ್ರಾ ಸ॑ಪರ್ಯನ್ಪಿ॒ತುರ್ನ ಜಿವ್ರೇ॒ರ್ವಿ ವೇದೋ॑ ಭರಂತ ॥

वि त्वा॒ नरः॑ पुरु॒त्रा स॑पर्यन्पि॒तुर्न जिव्रे॒र्वि वेदो॑ भरंत ॥

ಸಾ॒ಧುರ್ನ ಗೃ॒ಧ್ನುರಸ್ತೇ॑ವ॒ ಶೂರೋ॒ ಯಾತೇ॑ವ ಭೀ॒ಮಸ್ತ್ವೇ॒ಷಃ ಸ॒ಮತ್ಸು॑ ॥

सा॒धुर्न गृ॒ध्नुरस्ते॑व॒ शूरो॒ याते॑व भी॒मस्त्वे॒षः स॒मत्सु॑ ॥