ಮರುತ್ತುಗಳ ಪ್ರಚಂಡ ಶಕ್ತಿ ಮತ್ತು ದೈವಿಕ ಆಶೀರ್ವಾದ - ಋಗ್ವೇದ ಮಂಡಲ 1, ಸೂಕ್ತ 64

ವೃಷ್ಣೇ॒ ಶರ್ಧಾ॑ಯ॒ ಸುಮ॑ಖಾಯ ವೇ॒ಧಸೇ॒ ನೋಧಃ॑ ಸುವೃ॒ಕ್ತಿಂ ಪ್ರ ಭ॑ರಾ ಮ॒ರುದ್ಭ್ಯಃ॑ । ಅ॒ಪೋ ನ ಧೀರೋ॒ ಮನ॑ಸಾ ಸು॒ಹಸ್ತ್ಯೋ॒ ಗಿರಃ॒ ಸಮಂ॑ಜೇ ವಿ॒ದಥೇ॑ಷ್ವಾ॒ಭುವಃ॑ ॥

वृष्णे॒ शर्धा॑य॒ सुम॑खाय वे॒धसे॒ नोधः॑ सुवृ॒क्तिं प्र भ॑रा म॒रुद्भ्यः॑ । अ॒पो न धीरो॒ मन॑सा सु॒हस्त्यो॒ गिरः॒ समं॑जे वि॒दथे॑ष्वा॒भुवः॑ ॥

ತೇ ಜ॑ಜ್ಞಿರೇ ದಿ॒ವ ಋ॒ಷ್ವಾಸ॑ ಉ॒ಕ್ಷಣೋ॑ ರು॒ದ್ರಸ್ಯ॒ ಮರ್ಯಾ॒ ಅಸು॑ರಾ ಅರೇ॒ಪಸಃ॑ । ಪಾ॒ವ॒ಕಾಸಃ॒ ಶುಚ॑ಯಃ॒ ಸೂರ್ಯಾ॑ ಇವ॒ ಸತ್ವಾ॑ನೋ॒ ನ ದ್ರ॒ಪ್ಸಿನೋ॑ ಘೋ॒ರವ॑ರ್ಪಸಃ ॥

ते ज॑ज्ञिरे दि॒व ऋ॒ष्वास॑ उ॒क्षणो॑ रु॒द्रस्य॒ मर्या॒ असु॑रा अरे॒पसः॑ । पा॒व॒कासः॒ शुच॑यः॒ सूर्या॑ इव॒ सत्वा॑नो॒ न द्र॒प्सिनो॑ घो॒रव॑र्पसः ॥

ಯುವಾ॑ನೋ ರು॒ದ್ರಾ ಅ॒ಜರಾ॑ ಅಭೋ॒ಗ್ಘನೋ॑ ವವ॒ಕ್ಷುರಧ್ರಿ॑ಗಾವಃ॒ ಪರ್ವ॑ತಾ ಇವ । ದೃ॒ಳ್ಹಾ ಚಿ॒ದ್ವಿಶ್ವಾ॒ ಭುವ॑ನಾನಿ॒ ಪಾರ್ಥಿ॑ವಾ॒ ಪ್ರ ಚ್ಯಾ॑ವಯಂತಿ ದಿ॒ವ್ಯಾನಿ॑ ಮ॒ಜ್ಮನಾ॑ ॥

युवा॑नो रु॒द्रा अ॒जरा॑ अभो॒ग्घनो॑ वव॒क्षुरध्रि॑गावः॒ पर्व॑ता इव । दृ॒ळ्हा चि॒द्विश्वा॒ भुव॑नानि॒ पार्थि॑वा॒ प्र च्या॑वयंति दि॒व्यानि॑ म॒ज्मना॑ ॥

ಚಿ॒ತ್ರೈರಂ॒ಜಿಭಿ॒ರ್ವಪು॑ಷೇ॒ ವ್ಯಂ॑ಜತೇ॒ ವಕ್ಷಃ॑ಸು ರು॒ಕ್ಮಾಁ ಅಧಿ॑ ಯೇತಿರೇ ಶು॒ಭೇ । ಅಂಸೇ॑ಷ್ವೇಷಾಂ॒ ನಿ ಮಿ॑ಮೃಕ್ಷುರ್ಋ॒ಷ್ಟಯಃ॑ ಸಾ॒ಕಂ ಜ॑ಜ್ಞಿರೇ ಸ್ವ॒ಧಯಾ॑ ದಿ॒ವೋ ನರಃ॑ ॥

चि॒त्रैरं॒जिभि॒र्वपु॑षे॒ व्यं॑जते॒ वक्षः॑सु रु॒क्माँ अधि॑ येतिरे शु॒भे । अंसे॑ष्वेषां॒ नि मि॑मृक्षुर्ऋ॒ष्टयः॑ सा॒कं ज॑ज्ञिरे स्व॒धया॑ दि॒वो नरः॑ ॥

ಈ॒ಶಾ॒ನ॒ಕೃತೋ॒ ಧುನ॑ಯೋ ರಿ॒ಶಾದ॑ಸೋ॒ ವಾತಾ॑ನ್ವಿ॒ದ್ಯುತ॒ಸ್ತವಿ॑ಷೀಭಿರಕ್ರತ । ದು॒ಹಂತ್ಯೂಧ॑ರ್ದಿ॒ವ್ಯಾನಿ॒ ಧೂತ॑ಯೋ॒ ಭೂಮಿಂ॑ ಪಿನ್ವಂತಿ॒ ಪಯ॑ಸಾ॒ ಪರಿ॑ಜ್ರಯಃ ॥

ई॒शा॒न॒कृतो॒ धुन॑यो रि॒शाद॑सो॒ वाता॑न्वि॒द्युत॒स्तवि॑षीभिरक्रत । दु॒हंत्यूध॑र्दि॒व्यानि॒ धूत॑यो॒ भूमिं॑ पिन्वंति॒ पय॑सा॒ परि॑ज्रयः ॥

ಪಿನ್ವಂ॑ತ್ಯ॒ಪೋ ಮ॒ರುತಃ॑ ಸು॒ದಾನ॑ವಃ॒ ಪಯೋ॑ ಘೃ॒ತವ॑ದ್ವಿ॒ದಥೇ॑ಷ್ವಾ॒ಭುವಃ॑ । ಅತ್ಯಂ॒ ನ ಮಿ॒ಹೇ ವಿ ನ॑ಯಂತಿ ವಾ॒ಜಿನ॒ಮುತ್ಸಂ॑ ದುಹಂತಿ ಸ್ತ॒ನಯಂ॑ತ॒ಮಕ್ಷಿ॑ತಂ ॥

पिन्वं॑त्य॒पो म॒रुतः॑ सु॒दान॑वः॒ पयो॑ घृ॒तव॑द्वि॒दथे॑ष्वा॒भुवः॑ । अत्यं॒ न मि॒हे वि न॑यंति वा॒जिन॒मुत्सं॑ दुहंति स्त॒नयं॑त॒मक्षि॑तं ॥

ಮ॒ಹಿ॒ಷಾಸೋ॑ ಮಾ॒ಯಿನ॑ಶ್ಚಿ॒ತ್ರಭಾ॑ನವೋ ಗಿ॒ರಯೋ॒ ನ ಸ್ವತ॑ವಸೋ ರಘು॒ಷ್ಯದಃ॑ । ಮೃ॒ಗಾ ಇ॑ವ ಹ॒ಸ್ತಿನಃ॑ ಖಾದಥಾ॒ ವನಾ॒ ಯದಾರು॑ಣೀಷು॒ ತವಿ॑ಷೀ॒ರಯು॑ಗ್ಧ್ವಂ ॥

म॒हि॒षासो॑ मा॒यिन॑श्चि॒त्रभा॑नवो गि॒रयो॒ न स्वत॑वसो रघु॒ष्यदः॑ । मृ॒गा इ॑व ह॒स्तिनः॑ खादथा॒ वना॒ यदारु॑णीषु॒ तवि॑षी॒रयु॑ग्ध्वं ॥

ಸಿಂ॒ಹಾ ಇ॑ವ ನಾನದತಿ॒ ಪ್ರಚೇ॑ತಸಃ ಪಿ॒ಶಾ ಇ॑ವ ಸು॒ಪಿಶೋ॑ ವಿ॒ಶ್ವವೇ॑ದಸಃ । ಕ್ಷಪೋ॒ ಜಿನ್ವಂ॑ತಃ॒ ಪೃಷ॑ತೀಭಿರ್ಋ॒ಷ್ಟಿಭಿಃ॒ ಸಮಿತ್ಸ॒ಬಾಧಃ॒ ಶವ॒ಸಾಹಿ॑ಮನ್ಯವಃ ॥

सिं॒हा इ॑व नानदति॒ प्रचे॑तसः पि॒शा इ॑व सु॒पिशो॑ वि॒श्ववे॑दसः । क्षपो॒ जिन्वं॑तः॒ पृष॑तीभिर्ऋ॒ष्टिभिः॒ समित्स॒बाधः॒ शव॒साहि॑मन्यवः ॥

ರೋದ॑ಸೀ॒ ಆ ವ॑ದತಾ ಗಣಶ್ರಿಯೋ॒ ನೃಷಾ॑ಚಃ ಶೂರಾಃ॒ ಶವ॒ಸಾಹಿ॑ಮನ್ಯವಃ । ಆ ವಂ॒ಧುರೇ॑ಷ್ವ॒ಮತಿ॒ರ್ನ ದ॑ರ್ಶ॒ತಾ ವಿ॒ದ್ಯುನ್ನ ತ॑ಸ್ಥೌ ಮರುತೋ॒ ರಥೇ॑ಷು ವಃ ॥

रोद॑सी॒ आ व॑दता गणश्रियो॒ नृषा॑चः शूराः॒ शव॒साहि॑मन्यवः । आ वं॒धुरे॑ष्व॒मति॒र्न द॑र्श॒ता वि॒द्युन्न त॑स्थौ मरुतो॒ रथे॑षु वः ॥

ವಿ॒ಶ್ವವೇ॑ದಸೋ ರ॒ಯಿಭಿಃ॒ ಸಮೋ॑ಕಸಃ॒ ಸಂಮಿ॑ಶ್ಲಾಸ॒ಸ್ತವಿ॑ಷೀಭಿರ್ವಿರ॒ಪ್ಶಿನಃ॑ । ಅಸ್ತಾ॑ರ॒ ಇಷುಂ॑ ದಧಿರೇ॒ ಗಭ॑ಸ್ತ್ಯೋರನಂ॒ತಶು॑ಷ್ಮಾ॒ ವೃಷ॑ಖಾದಯೋ॒ ನರಃ॑ ॥

वि॒श्ववे॑दसो र॒यिभिः॒ समो॑कसः॒ संमि॑श्लास॒स्तवि॑षीभिर्विर॒प्शिनः॑ । अस्ता॑र॒ इषुं॑ दधिरे॒ गभ॑स्त्योरनं॒तशु॑ष्मा॒ वृष॑खादयो॒ नरः॑ ॥

ಹಿ॒ರ॒ಣ್ಯಯೇ॑ಭಿಃ ಪ॒ವಿಭಿಃ॑ ಪಯೋ॒ವೃಧ॒ ಉಜ್ಜಿ॑ಘ್ನಂತ ಆಪ॒ಥ್ಯೋ॒೩॒॑ ನ ಪರ್ವ॑ತಾನ್ । ಮ॒ಖಾ ಅ॒ಯಾಸಃ॑ ಸ್ವ॒ಸೃತೋ॑ ಧ್ರುವ॒ಚ್ಯುತೋ॑ ದುಧ್ರ॒ಕೃತೋ॑ ಮ॒ರುತೋ॒ ಭ್ರಾಜ॑ದೃಷ್ಟಯಃ ॥

हि॒र॒ण्यये॑भिः प॒विभिः॑ पयो॒वृध॒ उज्जि॑घ्नंत आप॒थ्यो॒३॒॑ न पर्व॑तान् । म॒खा अ॒यासः॑ स्व॒सृतो॑ ध्रुव॒च्युतो॑ दुध्र॒कृतो॑ म॒रुतो॒ भ्राज॑दृष्टयः ॥

ಘೃಷುಂ॑ ಪಾವ॒ಕಂ ವ॒ನಿನಂ॒ ವಿಚ॑ರ್ಷಣಿಂ ರು॒ದ್ರಸ್ಯ॑ ಸೂ॒ನುಂ ಹ॒ವಸಾ॑ ಗೃಣೀಮಸಿ । ರ॒ಜ॒ಸ್ತುರಂ॑ ತ॒ವಸಂ॒ ಮಾರು॑ತಂ ಗ॒ಣಮೃ॑ಜೀ॒ಷಿಣಂ॒ ವೃಷ॑ಣಂ ಸಶ್ಚತ ಶ್ರಿ॒ಯೇ ॥

घृषुं॑ पाव॒कं व॒निनं॒ विच॑र्षणिं रु॒द्रस्य॑ सू॒नुं ह॒वसा॑ गृणीमसि । र॒ज॒स्तुरं॑ त॒वसं॒ मारु॑तं ग॒णमृ॑जी॒षिणं॒ वृष॑णं सश्चत श्रि॒ये ॥

ಪ್ರ ನೂ ಸ ಮರ್ತಃ॒ ಶವ॑ಸಾ॒ ಜನಾಁ॒ ಅತಿ॑ ತ॒ಸ್ಥೌ ವ॑ ಊ॒ತೀ ಮ॑ರುತೋ॒ ಯಮಾವ॑ತ । ಅರ್ವ॑ದ್ಭಿ॒ರ್ವಾಜಂ॑ ಭರತೇ॒ ಧನಾ॒ ನೃಭಿ॑ರಾ॒ಪೃಚ್ಛ್ಯಂ॒ ಕ್ರತು॒ಮಾ ಕ್ಷೇ॑ತಿ॒ ಪುಷ್ಯ॑ತಿ ॥

प्र नू स मर्तः॒ शव॑सा॒ जनाँ॒ अति॑ त॒स्थौ व॑ ऊ॒ती म॑रुतो॒ यमाव॑त । अर्व॑द्भि॒र्वाजं॑ भरते॒ धना॒ नृभि॑रा॒पृच्छ्यं॒ क्रतु॒मा क्षे॑ति॒ पुष्य॑ति ॥

ಚ॒ರ್ಕೃತ್ಯಂ॑ ಮರುತಃ ಪೃ॒ತ್ಸು ದು॒ಷ್ಟರಂ॑ ದ್ಯು॒ಮಂತಂ॒ ಶುಷ್ಮಂ॑ ಮ॒ಘವ॑ತ್ಸು ಧತ್ತನ । ಧ॒ನ॒ಸ್ಪೃತ॑ಮು॒ಕ್ಥ್ಯಂ॑ ವಿ॒ಶ್ವಚ॑ರ್ಷಣಿಂ ತೋ॒ಕಂ ಪು॑ಷ್ಯೇಮ॒ ತನ॑ಯಂ ಶ॒ತಂ ಹಿಮಾಃ॑ ॥

च॒र्कृत्यं॑ मरुतः पृ॒त्सु दु॒ष्टरं॑ द्यु॒मंतं॒ शुष्मं॑ म॒घव॑त्सु धत्तन । ध॒न॒स्पृत॑मु॒क्थ्यं॑ वि॒श्वच॑र्षणिं तो॒कं पु॑ष्येम॒ तन॑यं श॒तं हिमाः॑ ॥

ನೂ ಷ್ಠಿ॒ರಂ ಮ॑ರುತೋ ವೀ॒ರವಂ॑ತಮೃತೀ॒ಷಾಹಂ॑ ರ॒ಯಿಮ॒ಸ್ಮಾಸು॑ ಧತ್ತ । ಸ॒ಹ॒ಸ್ರಿಣಂ॑ ಶ॒ತಿನಂ॑ ಶೂಶು॒ವಾಂಸಂ॑ ಪ್ರಾ॒ತರ್ಮ॒ಕ್ಷೂ ಧಿ॒ಯಾವ॑ಸುರ್ಜಗಮ್ಯಾತ್ ॥

नू ष्ठि॒रं म॑रुतो वी॒रवं॑तमृती॒षाहं॑ र॒यिम॒स्मासु॑ धत्त । स॒ह॒स्रिणं॑ श॒तिनं॑ शूशु॒वांसं॑ प्रा॒तर्म॒क्षू धि॒याव॑सुर्जगम्यात् ॥