ಇಂದ್ರನ ಪ್ರತಾಪ ಮತ್ತು ವಿಶ್ವದ ಸಮೃದ್ಧಿ

ಏ॒ಷ ಪ್ರ ಪೂ॒ರ್ವೀರವ॒ ತಸ್ಯ॑ ಚ॒ಮ್ರಿಷೋಽತ್ಯೋ॒ ನ ಯೋಷಾ॒ಮುದ॑ಯಂಸ್ತ ಭು॒ರ್ವಣಿಃ॑ । ದಕ್ಷಂ॑ ಮ॒ಹೇ ಪಾ॑ಯಯತೇ ಹಿರ॒ಣ್ಯಯಂ॒ ರಥ॑ಮಾ॒ವೃತ್ಯಾ॒ ಹರಿ॑ಯೋಗ॒ಮೃಭ್ವ॑ಸಂ ॥

ए॒ष प्र पू॒र्वीरव॒ तस्य॑ च॒म्रिषोऽत्यो॒ न योषा॒मुद॑यंस्त भु॒र्वणिः॑ । दक्षं॑ म॒हे पा॑ययते हिर॒ण्ययं॒ रथ॑मा॒वृत्या॒ हरि॑योग॒मृभ्व॑सं ॥

ತಂ ಗೂ॒ರ್ತಯೋ॑ ನೇಮ॒ನ್ನಿಷಃ॒ ಪರೀ॑ಣಸಃ ಸಮು॒ದ್ರಂ ನ ಸಂ॒ಚರ॑ಣೇ ಸನಿ॒ಷ್ಯವಃ॑ । ಪತಿಂ॒ ದಕ್ಷ॑ಸ್ಯ ವಿ॒ದಥ॑ಸ್ಯ॒ ನೂ ಸಹೋ॑ ಗಿ॒ರಿಂ ನ ವೇ॒ನಾ ಅಧಿ॑ ರೋಹ॒ ತೇಜ॑ಸಾ ॥

तं गू॒र्तयो॑ नेम॒न्निषः॒ परी॑णसः समु॒द्रं न सं॒चर॑णे सनि॒ष्यवः॑ । पतिं॒ दक्ष॑स्य वि॒दथ॑स्य॒ नू सहो॑ गि॒रिं न वे॒ना अधि॑ रोह॒ तेज॑सा ॥

ಸ ತು॒ರ್ವಣಿ॑ರ್ಮ॒ಹಾಁ ಅ॑ರೇ॒ಣು ಪೌಂಸ್ಯೇ॑ ಗಿ॒ರೇರ್ಭೃ॒ಷ್ಟಿರ್ನ ಭ್ರಾ॑ಜತೇ ತು॒ಜಾ ಶವಃ॑ । ಯೇನ॒ ಶುಷ್ಣಂ॑ ಮಾ॒ಯಿನ॑ಮಾಯ॒ಸೋ ಮದೇ॑ ದು॒ಧ್ರ ಆ॒ಭೂಷು॑ ರಾ॒ಮಯ॒ನ್ನಿ ದಾಮ॑ನಿ ॥

स तु॒र्वणि॑र्म॒हाँ अ॑रे॒णु पौंस्ये॑ गि॒रेर्भृ॒ष्टिर्न भ्रा॑जते तु॒जा शवः॑ । येन॒ शुष्णं॑ मा॒यिन॑माय॒सो मदे॑ दु॒ध्र आ॒भूषु॑ रा॒मय॒न्नि दाम॑नि ॥

ದೇ॒ವೀ ಯದಿ॒ ತವಿ॑ಷೀ॒ ತ್ವಾವೃ॑ಧೋ॒ತಯ॒ ಇಂದ್ರಂ॒ ಸಿಷ॑ಕ್ತ್ಯು॒ಷಸಂ॒ ನ ಸೂರ್ಯಃ॑ । ಯೋ ಧೃ॒ಷ್ಣುನಾ॒ ಶವ॑ಸಾ॒ ಬಾಧ॑ತೇ॒ ತಮ॒ ಇಯ॑ರ್ತಿ ರೇ॒ಣುಂ ಬೃ॒ಹದ॑ರ್ಹರಿ॒ಷ್ವಣಿಃ॑ ॥

दे॒वी यदि॒ तवि॑षी॒ त्वावृ॑धो॒तय॒ इंद्रं॒ सिष॑क्त्यु॒षसं॒ न सूर्यः॑ । यो धृ॒ष्णुना॒ शव॑सा॒ बाध॑ते॒ तम॒ इय॑र्ति रे॒णुं बृ॒हद॑र्हरि॒ष्वणिः॑ ॥

ವಿ ಯತ್ತಿ॒ರೋ ಧ॒ರುಣ॒ಮಚ್ಯು॑ತಂ॒ ರಜೋಽತಿ॑ಷ್ಠಿಪೋ ದಿ॒ವ ಆತಾ॑ಸು ಬ॒ರ್ಹಣಾ॑ । ಸ್ವ॑ರ್ಮೀಳ್ಹೇ॒ ಯನ್ಮದ॑ ಇಂದ್ರ॒ ಹರ್ಷ್ಯಾಹ॑ನ್ವೃ॒ತ್ರಂ ನಿರ॒ಪಾಮೌ॑ಬ್ಜೋ ಅರ್ಣ॒ವಂ ॥

वि यत्ति॒रो ध॒रुण॒मच्यु॑तं॒ रजोऽति॑ष्ठिपो दि॒व आता॑सु ब॒र्हणा॑ । स्व॑र्मीळ्हे॒ यन्मद॑ इंद्र॒ हर्ष्याह॑न्वृ॒त्रं निर॒पामौ॑ब्जो अर्ण॒वं ॥

ತ್ವಂ ದಿ॒ವೋ ಧ॒ರುಣಂ॑ ಧಿಷ॒ ಓಜ॑ಸಾ ಪೃಥಿ॒ವ್ಯಾ ಇಂ॑ದ್ರ॒ ಸದ॑ನೇಷು॒ ಮಾಹಿ॑ನಃ । ತ್ವಂ ಸು॒ತಸ್ಯ॒ ಮದೇ॑ ಅರಿಣಾ ಅ॒ಪೋ ವಿ ವೃ॒ತ್ರಸ್ಯ॑ ಸ॒ಮಯಾ॑ ಪಾ॒ಷ್ಯಾ॑ರುಜಃ ॥

त्वं दि॒वो ध॒रुणं॑ धिष॒ ओज॑सा पृथि॒व्या इं॑द्र॒ सद॑नेषु॒ माहि॑नः । त्वं सु॒तस्य॒ मदे॑ अरिणा अ॒पो वि वृ॒त्रस्य॑ स॒मया॑ पा॒ष्या॑रुजः ॥