ಇಂದ್ರನ ಮಹೋನ್ನತ ಶಕ್ತಿ ಮತ್ತು ಉದಾರತೆ - ಋಗ್ವೇದ ಮಂಡಲ ೧, ಸೂಕ್ತ ೫೫

ದಿ॒ವಶ್ಚಿ॑ದಸ್ಯ ವರಿ॒ಮಾ ವಿ ಪ॑ಪ್ರಥ॒ ಇಂದ್ರಂ॒ ನ ಮ॒ಹ್ನಾ ಪೃ॑ಥಿ॒ವೀ ಚ॒ನ ಪ್ರತಿ॑ । ಭೀ॒ಮಸ್ತುವಿ॑ಷ್ಮಾಂಚರ್ಷ॒ಣಿಭ್ಯ॑ ಆತ॒ಪಃ ಶಿಶೀ॑ತೇ॒ ವಜ್ರಂ॒ ತೇಜ॑ಸೇ॒ ನ ವಂಸ॑ಗಃ ॥

दि॒वश्चि॑दस्य वरि॒मा वि प॑प्रथ॒ इंद्रं॒ न म॒ह्ना पृ॑थि॒वी च॒न प्रति॑ । भी॒मस्तुवि॑ष्मांचर्ष॒णिभ्य॑ आत॒पः शिशी॑ते॒ वज्रं॒ तेज॑से॒ न वंस॑गः ॥

ಸೋ ಅ॑ರ್ಣ॒ವೋ ನ ನ॒ದ್ಯಃ॑ ಸಮು॒ದ್ರಿಯಃ॒ ಪ್ರತಿ॑ ಗೃಭ್ಣಾತಿ॒ ವಿಶ್ರಿ॑ತಾ॒ ವರೀ॑ಮಭಿಃ । ಇಂದ್ರಃ॒ ಸೋಮ॑ಸ್ಯ ಪೀ॒ತಯೇ॑ ವೃಷಾಯತೇ ಸ॒ನಾತ್ಸ ಯು॒ಧ್ಮ ಓಜ॑ಸಾ ಪನಸ್ಯತೇ ॥

सो अ॑र्ण॒वो न न॒द्यः॑ समु॒द्रियः॒ प्रति॑ गृभ्णाति॒ विश्रि॑ता॒ वरी॑मभिः । इंद्रः॒ सोम॑स्य पी॒तये॑ वृषायते स॒नात्स यु॒ध्म ओज॑सा पनस्यते ॥

ತ್ವಂ ತಮಿಂ॑ದ್ರ॒ ಪರ್ವ॑ತಂ॒ ನ ಭೋಜ॑ಸೇ ಮ॒ಹೋ ನೃ॒ಮ್ಣಸ್ಯ॒ ಧರ್ಮ॑ಣಾಮಿರಜ್ಯಸಿ । ಪ್ರ ವೀ॒ರ್ಯೇ॑ಣ ದೇ॒ವತಾತಿ॑ ಚೇಕಿತೇ॒ ವಿಶ್ವ॑ಸ್ಮಾ ಉ॒ಗ್ರಃ ಕರ್ಮ॑ಣೇ ಪು॒ರೋಹಿ॑ತಃ ॥

त्वं तमिं॑द्र॒ पर्व॑तं॒ न भोज॑से म॒हो नृ॒म्णस्य॒ धर्म॑णामिरज्यसि । प्र वी॒र्ये॑ण दे॒वताति॑ चेकिते॒ विश्व॑स्मा उ॒ग्रः कर्म॑णे पु॒रोहि॑तः ॥

ಸ ಇದ್ವನೇ॑ ನಮ॒ಸ್ಯುಭಿ॑ರ್ವಚಸ್ಯತೇ॒ ಚಾರು॒ ಜನೇ॑ಷು ಪ್ರಬ್ರುವಾ॒ಣ ಇಂ॑ದ್ರಿ॒ಯಂ । ವೃಷಾ॒ ಛಂದು॑ರ್ಭವತಿ ಹರ್ಯ॒ತೋ ವೃಷಾ॒ ಕ್ಷೇಮೇ॑ಣ॒ ಧೇನಾಂ॑ ಮ॒ಘವಾ॒ ಯದಿನ್ವ॑ತಿ ॥

स इद्वने॑ नम॒स्युभि॑र्वचस्यते॒ चारु॒ जने॑षु प्रब्रुवा॒ण इं॑द्रि॒यं । वृषा॒ छंदु॑र्भवति हर्य॒तो वृषा॒ क्षेमे॑ण॒ धेनां॑ म॒घवा॒ यदिन्व॑ति ॥

ಸ ಇನ್ಮ॒ಹಾನಿ॑ ಸಮಿ॒ಥಾನಿ॑ ಮ॒ಜ್ಮನಾ॑ ಕೃ॒ಣೋತಿ॑ ಯು॒ಧ್ಮ ಓಜ॑ಸಾ॒ ಜನೇ॑ಭ್ಯಃ । ಅಧಾ॑ ಚ॒ನ ಶ್ರದ್ದ॑ಧತಿ॒ ತ್ವಿಷೀ॑ಮತ॒ ಇಂದ್ರಾ॑ಯ॒ ವಜ್ರಂ॑ ನಿ॒ಘನಿ॑ಘ್ನತೇ ವ॒ಧಂ ॥

स इन्म॒हानि॑ समि॒थानि॑ म॒ज्मना॑ कृ॒णोति॑ यु॒ध्म ओज॑सा॒ जने॑भ्यः । अधा॑ च॒न श्रद्द॑धति॒ त्विषी॑मत॒ इंद्रा॑य॒ वज्रं॑ नि॒घनि॑घ्नते व॒धं ॥

ಸ ಹಿ ಶ್ರ॑ವ॒ಸ್ಯುಃ ಸದ॑ನಾನಿ ಕೃ॒ತ್ರಿಮಾ॑ ಕ್ಷ್ಮ॒ಯಾ ವೃ॑ಧಾ॒ನ ಓಜ॑ಸಾ ವಿನಾ॒ಶಯ॑ನ್ । ಜ್ಯೋತೀಂ॑ಷಿ ಕೃ॒ಣ್ವನ್ನ॑ವೃ॒ಕಾಣಿ॒ ಯಜ್ಯ॒ವೇಽವ॑ ಸು॒ಕ್ರತುಃ॒ ಸರ್ತ॒ವಾ ಅ॒ಪಃ ಸೃ॑ಜತ್ ॥

स हि श्र॑व॒स्युः सद॑नानि कृ॒त्रिमा॑ क्ष्म॒या वृ॑धा॒न ओज॑सा विना॒शय॑न् । ज्योतीं॑षि कृ॒ण्वन्न॑वृ॒काणि॒ यज्य॒वेऽव॑ सु॒क्रतुः॒ सर्त॒वा अ॒पः सृ॑जत् ॥

ದಾ॒ನಾಯ॒ ಮನಃ॑ ಸೋಮಪಾವನ್ನಸ್ತು ತೇ॒ಽರ್ವಾಂಚಾ॒ ಹರೀ॑ ವಂದನಶ್ರು॒ದಾ ಕೃ॑ಧಿ । ಯಮಿ॑ಷ್ಠಾಸಃ॒ ಸಾರ॑ಥಯೋ॒ ಯ ಇಂ॑ದ್ರ ತೇ॒ ನ ತ್ವಾ॒ ಕೇತಾ॒ ಆ ದ॑ಭ್ನುವಂತಿ॒ ಭೂರ್ಣ॑ಯಃ ॥

दा॒नाय॒ मनः॑ सोमपावन्नस्तु ते॒ऽर्वांचा॒ हरी॑ वंदनश्रु॒दा कृ॑धि । यमि॑ष्ठासः॒ सार॑थयो॒ य इं॑द्र ते॒ न त्वा॒ केता॒ आ द॑भ्नुवंति॒ भूर्ण॑यः ॥

ಅಪ್ರ॑ಕ್ಷಿತಂ॒ ವಸು॑ ಬಿಭರ್ಷಿ॒ ಹಸ್ತ॑ಯೋ॒ರಷಾ॑ಳ್ಹಂ॒ ಸಹ॑ಸ್ತ॒ನ್ವಿ॑ ಶ್ರು॒ತೋ ದ॑ಧೇ । ಆವೃ॑ತಾಸೋಽವ॒ತಾಸೋ॒ ನ ಕ॒ರ್ತೃಭಿ॑ಸ್ತ॒ನೂಷು॑ ತೇ॒ ಕ್ರತ॑ವ ಇಂದ್ರ॒ ಭೂರ॑ಯಃ ॥

अप्र॑क्षितं॒ वसु॑ बिभर्षि॒ हस्त॑यो॒रषा॑ळ्हं॒ सह॑स्त॒न्वि॑ श्रु॒तो द॑धे । आवृ॑तासोऽव॒तासो॒ न क॒र्तृभि॑स्त॒नूषु॑ ते॒ क्रत॑व इंद्र॒ भूर॑यः ॥