ಇಂದ್ರನ ಅನಂತ ಮಹಿಮೆ ಮತ್ತು ವೃತ್ರಾಸುರನ ವಧೆ

ಮಾ ನೋ॑ ಅ॒ಸ್ಮಿನ್ಮ॑ಘವನ್ಪೃ॒ತ್ಸ್ವಂಹ॑ಸಿ ನ॒ಹಿ ತೇ॒ ಅಂತಃ॒ ಶವ॑ಸಃ ಪರೀ॒ಣಶೇ॑ । ಅಕ್ರಂ॑ದಯೋ ನ॒ದ್ಯೋ॒೩॒॑ ರೋರು॑ವ॒ದ್ವನಾ॑ ಕ॒ಥಾ ನ ಕ್ಷೋ॒ಣೀರ್ಭಿ॒ಯಸಾ॒ ಸಮಾ॑ರತ ॥

मा नो॑ अ॒स्मिन्म॑घवन्पृ॒त्स्वंह॑सि न॒हि ते॒ अंतः॒ शव॑सः परी॒णशे॑ । अक्रं॑दयो न॒द्यो॒३॒॑ रोरु॑व॒द्वना॑ क॒था न क्षो॒णीर्भि॒यसा॒ समा॑रत ॥

ಅರ್ಚಾ॑ ಶ॒ಕ್ರಾಯ॑ ಶಾ॒ಕಿನೇ॒ ಶಚೀ॑ವತೇ ಶೃ॒ಣ್ವಂತ॒ಮಿಂದ್ರಂ॑ ಮ॒ಹಯ॑ನ್ನ॒ಭಿ ಷ್ಟು॑ಹಿ । ಯೋ ಧೃ॒ಷ್ಣುನಾ॒ ಶವ॑ಸಾ॒ ರೋದ॑ಸೀ ಉ॒ಭೇ ವೃಷಾ॑ ವೃಷ॒ತ್ವಾ ವೃ॑ಷ॒ಭೋ ನ್ಯೃಂ॒ಜತೇ॑ ॥

अर्चा॑ श॒क्राय॑ शा॒किने॒ शची॑वते शृ॒ण्वंत॒मिंद्रं॑ म॒हय॑न्न॒भि ष्टु॑हि । यो धृ॒ष्णुना॒ शव॑सा॒ रोद॑सी उ॒भे वृषा॑ वृष॒त्वा वृ॑ष॒भो न्यृं॒जते॑ ॥

ಅರ್ಚಾ॑ ದಿ॒ವೇ ಬೃ॑ಹ॒ತೇ ಶೂ॒ಷ್ಯಂ೧॒॑ ವಚಃ॒ ಸ್ವಕ್ಷ॑ತ್ರಂ॒ ಯಸ್ಯ॑ ಧೃಷ॒ತೋ ಧೃ॒ಷನ್ಮನಃ॑ । ಬೃ॒ಹಚ್ಛ್ರ॑ವಾ॒ ಅಸು॑ರೋ ಬ॒ರ್ಹಣಾ॑ ಕೃ॒ತಃ ಪು॒ರೋ ಹರಿ॑ಭ್ಯಾಂ ವೃಷ॒ಭೋ ರಥೋ॒ ಹಿ ಷಃ ॥

अर्चा॑ दि॒वे बृ॑ह॒ते शू॒ष्यं१॒॑ वचः॒ स्वक्ष॑त्रं॒ यस्य॑ धृष॒तो धृ॒षन्मनः॑ । बृ॒हच्छ्र॑वा॒ असु॑रो ब॒र्हणा॑ कृ॒तः पु॒रो हरि॑भ्यां वृष॒भो रथो॒ हि षः ॥

ತ್ವಂ ದಿ॒ವೋ ಬೃ॑ಹ॒ತಃ ಸಾನು॑ ಕೋಪ॒ಯೋಽವ॒ ತ್ಮನಾ॑ ಧೃಷ॒ತಾ ಶಂಬ॑ರಂ ಭಿನತ್ । ಯನ್ಮಾ॒ಯಿನೋ॑ ವ್ರಂ॒ದಿನೋ॑ ಮಂ॒ದಿನಾ॑ ಧೃ॒ಷಚ್ಛಿ॒ತಾಂ ಗಭ॑ಸ್ತಿಮ॒ಶನಿಂ॑ ಪೃತ॒ನ್ಯಸಿ॑ ॥

त्वं दि॒वो बृ॑ह॒तः सानु॑ कोप॒योऽव॒ त्मना॑ धृष॒ता शंब॑रं भिनत् । यन्मा॒यिनो॑ व्रं॒दिनो॑ मं॒दिना॑ धृ॒षच्छि॒तां गभ॑स्तिम॒शनिं॑ पृत॒न्यसि॑ ॥

ನಿ ಯದ್ವೃ॒ಣಕ್ಷಿ॑ ಶ್ವಸ॒ನಸ್ಯ॑ ಮೂ॒ರ್ಧನಿ॒ ಶುಷ್ಣ॑ಸ್ಯ ಚಿದ್ವ್ರಂ॒ದಿನೋ॒ ರೋರು॑ವ॒ದ್ವನಾ॑ । ಪ್ರಾ॒ಚೀನೇ॑ನ॒ ಮನ॑ಸಾ ಬ॒ರ್ಹಣಾ॑ವತಾ॒ ಯದ॒ದ್ಯಾ ಚಿ॑ತ್ಕೃ॒ಣವಃ॒ ಕಸ್ತ್ವಾ॒ ಪರಿ॑ ॥

नि यद्वृ॒णक्षि॑ श्वस॒नस्य॑ मू॒र्धनि॒ शुष्ण॑स्य चिद्व्रं॒दिनो॒ रोरु॑व॒द्वना॑ । प्रा॒चीने॑न॒ मन॑सा ब॒र्हणा॑वता॒ यद॒द्या चि॑त्कृ॒णवः॒ कस्त्वा॒ परि॑ ॥

ಅ॒ಪಾಮ॑ತಿಷ್ಠದ್ಧ॒ರುಣ॑ಹ್ವರಂ॒ ತಮೋ॒ಽಂತರ್ವೃ॒ತ್ರಸ್ಯ॑ ಜ॒ಠರೇ॑ಷು॒ ಪರ್ವ॑ತಃ । ಅ॒ಭೀಮಿಂದ್ರೋ॑ ನ॒ದ್ಯೋ॑ ವ॒ವ್ರಿಣಾ॑ ಹಿ॒ತಾ ವಿಶ್ವಾ॑ ಅನು॒ಷ್ಠಾಃ ಪ್ರ॑ವ॒ಣೇಷು॑ ಜಿಘ್ನತೇ ॥

अ॒पाम॑तिष्ठद्ध॒रुण॑ह्वरं॒ तमो॒ऽंतर्वृ॒त्रस्य॑ ज॒ठरे॑षु॒ पर्व॑तः । अ॒भीमिंद्रो॑ न॒द्यो॑ व॒व्रिणा॑ हि॒ता विश्वा॑ अनु॒ष्ठाः प्र॑व॒णेषु॑ जिघ्नते ॥

ತ್ವಮಾ॑ವಿಥ॒ ನರ್ಯಂ॑ ತು॒ರ್ವಶಂ॒ ಯದುಂ॒ ತ್ವಂ ತು॒ರ್ವೀತಿಂ॑ ವ॒ಯ್ಯಂ॑ ಶತಕ್ರತೋ । ತ್ವಂ ರಥ॒ಮೇತ॑ಶಂ॒ ಕೃತ್ವ್ಯೇ॒ ಧನೇ॒ ತ್ವಂ ಪುರೋ॑ ನವ॒ತಿಂ ದಂ॑ಭಯೋ॒ ನವ॑ ॥

त्वमा॑विथ॒ नर्यं॑ तु॒र्वशं॒ यदुं॒ त्वं तु॒र्वीतिं॑ व॒य्यं॑ शतक्रतो । त्वं रथ॒मेत॑शं॒ कृत्व्ये॒ धने॒ त्वं पुरो॑ नव॒तिं दं॑भयो॒ नव॑ ॥

ಸ ಘಾ॒ ರಾಜಾ॒ ಸತ್ಪ॑ತಿಃ ಶೂಶುವ॒ಜ್ಜನೋ॑ ರಾ॒ತಹ॑ವ್ಯಃ॒ ಪ್ರತಿ॒ ಯಃ ಶಾಸ॒ಮಿನ್ವ॑ತಿ । ಉ॒ಕ್ಥಾ ವಾ॒ ಯೋ ಅ॑ಭಿಗೃ॒ಣಾತಿ॒ ರಾಧ॑ಸಾ॒ ದಾನು॑ರಸ್ಮಾ॒ ಉಪ॑ರಾ ಪಿನ್ವತೇ ದಿ॒ವಃ ॥

स घा॒ राजा॒ सत्प॑तिः शूशुव॒ज्जनो॑ रा॒तह॑व्यः॒ प्रति॒ यः शास॒मिन्व॑ति । उ॒क्था वा॒ यो अ॑भिगृ॒णाति॒ राध॑सा॒ दानु॑रस्मा॒ उप॑रा पिन्वते दि॒वः ॥

ಅಸ॑ಮಂ ಕ್ಷ॒ತ್ರಮಸ॑ಮಾ ಮನೀ॒ಷಾ ಪ್ರ ಸೋ॑ಮ॒ಪಾ ಅಪ॑ಸಾ ಸಂತು॒ ನೇಮೇ॑ । ಯೇ ತ॑ ಇಂದ್ರ ದ॒ದುಷೋ॑ ವ॒ರ್ಧಯಂ॑ತಿ॒ ಮಹಿ॑ ಕ್ಷ॒ತ್ರಂ ಸ್ಥವಿ॑ರಂ॒ ವೃಷ್ಣ್ಯಂ॑ ಚ ॥

अस॑मं क्ष॒त्रमस॑मा मनी॒षा प्र सो॑म॒पा अप॑सा संतु॒ नेमे॑ । ये त॑ इंद्र द॒दुषो॑ व॒र्धयं॑ति॒ महि॑ क्ष॒त्रं स्थवि॑रं॒ वृष्ण्यं॑ च ॥

ತುಭ್ಯೇದೇ॒ತೇ ಬ॑ಹು॒ಲಾ ಅದ್ರಿ॑ದುಗ್ಧಾಶ್ಚಮೂ॒ಷದ॑ಶ್ಚಮ॒ಸಾ ಇಂ॑ದ್ರ॒ಪಾನಾಃ॑ । ವ್ಯ॑ಶ್ನುಹಿ ತ॒ರ್ಪಯಾ॒ ಕಾಮ॑ಮೇಷಾ॒ಮಥಾ॒ ಮನೋ॑ ವಸು॒ದೇಯಾ॑ಯ ಕೃಷ್ವ ॥

तुभ्येदे॒ते ब॑हु॒ला अद्रि॑दुग्धाश्चमू॒षद॑श्चम॒सा इं॑द्र॒पानाः॑ । व्य॑श्नुहि त॒र्पया॒ काम॑मेषा॒मथा॒ मनो॑ वसु॒देया॑य कृष्व ॥

ಸ ಶೇವೃ॑ಧ॒ಮಧಿ॑ ಧಾ ದ್ಯು॒ಮ್ನಮ॒ಸ್ಮೇ ಮಹಿ॑ ಕ್ಷ॒ತ್ರಂ ಜ॑ನಾ॒ಷಾಳಿಂ॑ದ್ರ॒ ತವ್ಯಂ॑ । ರಕ್ಷಾ॑ ಚ ನೋ ಮ॒ಘೋನಃ॑ ಪಾ॒ಹಿ ಸೂ॒ರೀನ್ರಾ॒ಯೇ ಚ॑ ನಃ ಸ್ವಪ॒ತ್ಯಾ ಇ॒ಷೇ ಧಾಃ॑ ॥

स शेवृ॑ध॒मधि॑ धा द्यु॒म्नम॒स्मे महि॑ क्ष॒त्रं ज॑ना॒षाळिं॑द्र॒ तव्यं॑ । रक्षा॑ च नो म॒घोनः॑ पा॒हि सू॒रीन्रा॒ये च॑ नः स्वप॒त्या इ॒षे धाः॑ ॥