Sūkta 45

त्वम॑ग्ने॒ वसूँ॑रि॒ह रु॒द्राँ आ॑दि॒त्याँ उ॒त । यजा॑ स्वध्व॒रं जनं॒ मनु॑जातं घृत॒प्रुषं॑ ॥

tvámagne vásūm̐rihá rudrā́m̐ ādityā́m̐ utá ǀ yájā svadhvarám jánam mánujātam ghṛtaprúṣam ǁ

श्रु॒ष्टी॒वानो॒ हि दा॒शुषे॑ दे॒वा अ॑ग्ने॒ विचे॑तसः । तान्रो॑हिदश्व गिर्वण॒स्त्रय॑स्त्रिंशत॒मा व॑ह ॥

śruṣṭīvā́no hí dāśúṣe devā́ agne vícetasaḥ ǀ tā́nrohidaśva girvaṇastráyastriṃśatamā́ vaha ǁ

प्रि॒य॒मे॒ध॒वद॑त्रि॒वज्जात॑वेदो विरूप॒वत् । अं॒गि॒र॒स्वन्म॑हिव्रत॒ प्रस्क॑ण्वस्य श्रुधी॒ हवं॑ ॥

priyamedhavádatrivájjā́tavedo virūpavát ǀ aṅgirasvánmahivrata práskaṇvasya śrudhī hávam ǁ

महि॑केरव ऊ॒तये॑ प्रि॒यमे॑धा अहूषत । राजं॑तमध्व॒राणा॑म॒ग्निं शु॒क्रेण॑ शो॒चिषा॑ ॥

máhikerava ūtáye priyámedhā ahūṣata ǀ rā́jantamadhvarā́ṇāmagním śukréṇa śocíṣā ǁ

घृता॑हवन संत्ये॒मा उ॒ षु श्रु॑धी॒ गिरः॑ । याभिः॒ कण्व॑स्य सू॒नवो॒ हवं॒तेऽव॑से त्वा ॥

ghṛ́tāhavana santyemā́ u ṣú śrudhī gíraḥ ǀ yā́bhiḥ káṇvasya sūnávo hávanté’vase tvā ǁ

त्वां चि॑त्रश्रवस्तम॒ हवं॑ते वि॒क्षु जं॒तवः॑ । शो॒चिष्के॑शं पुरुप्रि॒याग्ने॑ ह॒व्याय॒ वोळ्ह॑वे ॥

tvā́m citraśravastama hávante vikṣú jantávaḥ ǀ śocíṣkeśam purupriyā́gne havyā́ya vóḷhave ǁ

नि त्वा॒ होता॑रमृ॒त्विजं॑ दधि॒रे व॑सु॒वित्त॑मं । श्रुत्क॑र्णं स॒प्रथ॑स्तमं॒ विप्रा॑ अग्ने॒ दिवि॑ष्टिषु ॥

ní tvā hótāramṛtvíjam dadhiré vasuvíttamam ǀ śrútkarṇam sapráthastamam víprā agne díviṣṭiṣu ǁ

आ त्वा॒ विप्रा॑ अचुच्यवुः सु॒तसो॑मा अ॒भि प्रयः॑ । बृ॒हद्भा बिभ्र॑तो ह॒विरग्ने॒ मर्ता॑य दा॒शुषे॑ ॥

ā́ tvā víprā acucyavuḥ sutásomā abhí práyaḥ ǀ bṛhádbhā́ bíbhrato havírágne mártāya dāśúṣe ǁ

प्रा॒त॒र्याव्णः॑ सहस्कृत सोम॒पेया॑य संत्य । इ॒हाद्य दैव्यं॒ जनं॑ ब॒र्हिरा सा॑दया वसो ॥

prātaryā́vṇaḥ sahaskṛta somapéyāya santya ǀ ihā́dyá dáivyam jánam barhírā́ sādayā vaso ǁ

अ॒र्वांचं॒ दैव्यं॒ जन॒मग्ने॒ यक्ष्व॒ सहू॑तिभिः । अ॒यं सोमः॑ सुदानव॒स्तं पा॑त ति॒रोअ॑ह्न्यं ॥

arvā́ñcam dáivyam jánamágne yákṣva sáhūtibhiḥ ǀ ayám sómaḥ sudānavastám pāta tiróahnyam ǁ