ಅಗ್ನಿ: ದೈವಿಕ ದೂತ ಮತ್ತು ಯಜ್ಞದ ನಾಯಕ

ಅಗ್ನೇ॒ ವಿವ॑ಸ್ವದು॒ಷಸ॑ಶ್ಚಿ॒ತ್ರಂ ರಾಧೋ॑ ಅಮರ್ತ್ಯ । ಆ ದಾ॒ಶುಷೇ॑ ಜಾತವೇದೋ ವಹಾ॒ ತ್ವಮ॒ದ್ಯಾ ದೇ॒ವಾಁ ಉ॑ಷ॒ರ್ಬುಧಃ॑ ॥

अग्ने॒ विव॑स्वदु॒षस॑श्चि॒त्रं राधो॑ अमर्त्य । आ दा॒शुषे॑ जातवेदो वहा॒ त्वम॒द्या दे॒वाँ उ॑ष॒र्बुधः॑ ॥

ಜುಷ್ಟೋ॒ ಹಿ ದೂ॒ತೋ ಅಸಿ॑ ಹವ್ಯ॒ವಾಹ॒ನೋಽಗ್ನೇ॑ ರ॒ಥೀರ॑ಧ್ವ॒ರಾಣಾಂ॑ । ಸ॒ಜೂರ॒ಶ್ವಿಭ್ಯಾ॑ಮು॒ಷಸಾ॑ ಸು॒ವೀರ್ಯ॑ಮ॒ಸ್ಮೇ ಧೇ॑ಹಿ॒ ಶ್ರವೋ॑ ಬೃ॒ಹತ್ ॥

जुष्टो॒ हि दू॒तो असि॑ हव्य॒वाह॒नोऽग्ने॑ र॒थीर॑ध्व॒राणां॑ । स॒जूर॒श्विभ्या॑मु॒षसा॑ सु॒वीर्य॑म॒स्मे धे॑हि॒ श्रवो॑ बृ॒हत् ॥

ಅ॒ದ್ಯಾ ದೂ॒ತಂ ವೃ॑ಣೀಮಹೇ॒ ವಸು॑ಮ॒ಗ್ನಿಂ ಪು॑ರುಪ್ರಿ॒ಯಂ । ಧೂ॒ಮಕೇ॑ತುಂ॒ ಭಾಋ॑ಜೀಕಂ॒ ವ್ಯು॑ಷ್ಟಿಷು ಯ॒ಜ್ಞಾನಾ॑ಮಧ್ವರ॒ಶ್ರಿಯಂ॑ ॥

अ॒द्या दू॒तं वृ॑णीमहे॒ वसु॑म॒ग्निं पु॑रुप्रि॒यं । धू॒मके॑तुं॒ भाऋ॑जीकं॒ व्यु॑ष्टिषु य॒ज्ञाना॑मध्वर॒श्रियं॑ ॥

ಶ್ರೇಷ್ಠಂ॒ ಯವಿ॑ಷ್ಠ॒ಮತಿ॑ಥಿಂ॒ ಸ್ವಾ॑ಹುತಂ॒ ಜುಷ್ಟಂ॒ ಜನಾ॑ಯ ದಾ॒ಶುಷೇ॑ । ದೇ॒ವಾಁ ಅಚ್ಛಾ॒ ಯಾತ॑ವೇ ಜಾ॒ತವೇ॑ದಸಮ॒ಗ್ನಿಮೀ॑ಳೇ॒ ವ್ಯು॑ಷ್ಟಿಷು ॥

श्रेष्ठं॒ यवि॑ष्ठ॒मति॑थिं॒ स्वा॑हुतं॒ जुष्टं॒ जना॑य दा॒शुषे॑ । दे॒वाँ अच्छा॒ यात॑वे जा॒तवे॑दसम॒ग्निमी॑ळे॒ व्यु॑ष्टिषु ॥

ಸ್ತ॒ವಿ॒ಷ್ಯಾಮಿ॒ ತ್ವಾಮ॒ಹಂ ವಿಶ್ವ॑ಸ್ಯಾಮೃತ ಭೋಜನ । ಅಗ್ನೇ॑ ತ್ರಾ॒ತಾರ॑ಮ॒ಮೃತಂ॑ ಮಿಯೇಧ್ಯ॒ ಯಜಿ॑ಷ್ಠಂ ಹವ್ಯವಾಹನ ॥

स्त॒वि॒ष्यामि॒ त्वाम॒हं विश्व॑स्यामृत भोजन । अग्ने॑ त्रा॒तार॑म॒मृतं॑ मियेध्य॒ यजि॑ष्ठं हव्यवाहन ॥

ಸು॒ಶಂಸೋ॑ ಬೋಧಿ ಗೃಣ॒ತೇ ಯ॑ವಿಷ್ಠ್ಯ॒ ಮಧು॑ಜಿಹ್ವಃ॒ ಸ್ವಾ॑ಹುತಃ । ಪ್ರಸ್ಕ॑ಣ್ವಸ್ಯ ಪ್ರತಿ॒ರನ್ನಾಯು॑ರ್ಜೀ॒ವಸೇ॑ ನಮ॒ಸ್ಯಾ ದೈವ್ಯಂ॒ ಜನಂ॑ ॥

सु॒शंसो॑ बोधि गृण॒ते य॑विष्ठ्य॒ मधु॑जिह्वः॒ स्वा॑हुतः । प्रस्क॑ण्वस्य प्रति॒रन्नायु॑र्जी॒वसे॑ नम॒स्या दैव्यं॒ जनं॑ ॥

ಹೋತಾ॑ರಂ ವಿ॒ಶ್ವವೇ॑ದಸಂ॒ ಸಂ ಹಿ ತ್ವಾ॒ ವಿಶ॑ ಇಂ॒ಧತೇ॑ । ಸ ಆ ವ॑ಹ ಪುರುಹೂತ॒ ಪ್ರಚೇ॑ತ॒ಸೋಽಗ್ನೇ॑ ದೇ॒ವಾಁ ಇ॒ಹ ದ್ರ॒ವತ್ ॥

होता॑रं वि॒श्ववे॑दसं॒ सं हि त्वा॒ विश॑ इं॒धते॑ । स आ व॑ह पुरुहूत॒ प्रचे॑त॒सोऽग्ने॑ दे॒वाँ इ॒ह द्र॒वत् ॥

ಸ॒ವಿ॒ತಾರ॑ಮು॒ಷಸ॑ಮ॒ಶ್ವಿನಾ॒ ಭಗ॑ಮ॒ಗ್ನಿಂ ವ್ಯು॑ಷ್ಟಿಷು॒ ಕ್ಷಪಃ॑ । ಕಣ್ವಾ॑ಸಸ್ತ್ವಾ ಸು॒ತಸೋ॑ಮಾಸ ಇಂಧತೇ ಹವ್ಯ॒ವಾಹಂ॑ ಸ್ವಧ್ವರ ॥

स॒वि॒तार॑मु॒षस॑म॒श्विना॒ भग॑म॒ग्निं व्यु॑ष्टिषु॒ क्षपः॑ । कण्वा॑सस्त्वा सु॒तसो॑मास इंधते हव्य॒वाहं॑ स्वध्वर ॥

ಪತಿ॒ರ್ಹ್ಯ॑ಧ್ವ॒ರಾಣಾ॒ಮಗ್ನೇ॑ ದೂ॒ತೋ ವಿ॒ಶಾಮಸಿ॑ । ಉ॒ಷ॒ರ್ಬುಧ॒ ಆ ವ॑ಹ॒ ಸೋಮ॑ಪೀತಯೇ ದೇ॒ವಾಁ ಅ॒ದ್ಯ ಸ್ವ॒ರ್ದೃಶಃ॑ ॥

पति॒र्ह्य॑ध्व॒राणा॒मग्ने॑ दू॒तो वि॒शामसि॑ । उ॒ष॒र्बुध॒ आ व॑ह॒ सोम॑पीतये दे॒वाँ अ॒द्य स्व॒र्दृशः॑ ॥

ಅಗ್ನೇ॒ ಪೂರ್ವಾ॒ ಅನೂ॒ಷಸೋ॑ ವಿಭಾವಸೋ ದೀ॒ದೇಥ॑ ವಿ॒ಶ್ವದ॑ರ್ಶತಃ । ಅಸಿ॒ ಗ್ರಾಮೇ॑ಷ್ವವಿ॒ತಾ ಪು॒ರೋಹಿ॒ತೋಽಸಿ॑ ಯ॒ಜ್ಞೇಷು॒ ಮಾನು॑ಷಃ ॥

अग्ने॒ पूर्वा॒ अनू॒षसो॑ विभावसो दी॒देथ॑ वि॒श्वद॑र्शतः । असि॒ ग्रामे॑ष्ववि॒ता पु॒रोहि॒तोऽसि॑ य॒ज्ञेषु॒ मानु॑षः ॥

ನಿ ತ್ವಾ॑ ಯ॒ಜ್ಞಸ್ಯ॒ ಸಾಧ॑ನ॒ಮಗ್ನೇ॒ ಹೋತಾ॑ರಮೃ॒ತ್ವಿಜಂ॑ । ಮ॒ನು॒ಷ್ವದ್ದೇ॑ವ ಧೀಮಹಿ॒ ಪ್ರಚೇ॑ತಸಂ ಜೀ॒ರಂ ದೂ॒ತಮಮ॑ರ್ತ್ಯಂ ॥

नि त्वा॑ य॒ज्ञस्य॒ साध॑न॒मग्ने॒ होता॑रमृ॒त्विजं॑ । म॒नु॒ष्वद्दे॑व धीमहि॒ प्रचे॑तसं जी॒रं दू॒तमम॑र्त्यं ॥

ಯದ್ದೇ॒ವಾನಾಂ॑ ಮಿತ್ರಮಹಃ ಪು॒ರೋಹಿ॒ತೋಽಂತ॑ರೋ॒ ಯಾಸಿ॑ ದೂ॒ತ್ಯಂ॑ । ಸಿಂಧೋ॑ರಿವ॒ ಪ್ರಸ್ವ॑ನಿತಾಸ ಊ॒ರ್ಮಯೋ॒ಽಗ್ನೇರ್ಭ್ರಾ॑ಜಂತೇ ಅ॒ರ್ಚಯಃ॑ ॥

यद्दे॒वानां॑ मित्रमहः पु॒रोहि॒तोऽंत॑रो॒ यासि॑ दू॒त्यं॑ । सिंधो॑रिव॒ प्रस्व॑नितास ऊ॒र्मयो॒ऽग्नेर्भ्रा॑जंते अ॒र्चयः॑ ॥

ಶ್ರು॒ಧಿ ಶ್ರು॑ತ್ಕರ್ಣ॒ ವಹ್ನಿ॑ಭಿರ್ದೇ॒ವೈರ॑ಗ್ನೇ ಸ॒ಯಾವ॑ಭಿಃ । ಆ ಸೀ॑ದಂತು ಬ॒ರ್ಹಿಷಿ॑ ಮಿ॒ತ್ರೋ ಅ॑ರ್ಯ॒ಮಾ ಪ್ರಾ॑ತ॒ರ್ಯಾವಾ॑ಣೋ ಅಧ್ವ॒ರಂ ॥

श्रु॒धि श्रु॑त्कर्ण॒ वह्नि॑भिर्दे॒वैर॑ग्ने स॒याव॑भिः । आ सी॑दंतु ब॒र्हिषि॑ मि॒त्रो अ॑र्य॒मा प्रा॑त॒र्यावा॑णो अध्व॒रं ॥

ಶೃ॒ಣ್ವಂತು॒ ಸ್ತೋಮಂ॑ ಮ॒ರುತಃ॑ ಸು॒ದಾನ॑ವೋಽಗ್ನಿಜಿ॒ಹ್ವಾ ಋ॑ತಾ॒ವೃಧಃ॑ । ಪಿಬ॑ತು॒ ಸೋಮಂ॒ ವರು॑ಣೋ ಧೃ॒ತವ್ರ॑ತೋ॒ಽಶ್ವಿಭ್ಯಾ॑ಮು॒ಷಸಾ॑ ಸ॒ಜೂಃ ॥

शृ॒ण्वंतु॒ स्तोमं॑ म॒रुतः॑ सु॒दान॑वोऽग्निजि॒ह्वा ऋ॑ता॒वृधः॑ । पिब॑तु॒ सोमं॒ वरु॑णो धृ॒तव्र॑तो॒ऽश्विभ्या॑मु॒षसा॑ स॒जूः ॥