Sūkta 43

कद्रु॒द्राय॒ प्रचे॑तसे मी॒ळ्हुष्ट॑माय॒ तव्य॑से । वो॒चेम॒ शंत॑मं हृ॒दे ॥

kádrudrā́ya prácetase mīḷhúṣṭamāya távyase ǀ vocéma śáṃtamam hṛdé ǁ

यथा॑ नो॒ अदि॑तिः॒ कर॒त्पश्वे॒ नृभ्यो॒ यथा॒ गवे॑ । यथा॑ तो॒काय॑ रु॒द्रियं॑ ॥

yáthā no áditiḥ káratpáśve nṛ́bhyo yáthā gáve ǀ yáthā tokā́ya rudríyam ǁ

यथा॑ नो मि॒त्रो वरु॑णो॒ यथा॑ रु॒द्रश्चिके॑तति । यथा॒ विश्वे॑ स॒जोष॑सः ॥

yáthā no mitró váruṇo yáthā rudráścíketati ǀ yáthā víśve sajóṣasaḥ ǁ

गा॒थप॑तिं मे॒धप॑तिं रु॒द्रं जला॑षभेषजं । तच्छं॒योः सु॒म्नमी॑महे ॥

gāthápatim medhápatim rudrám jálāṣabheṣajam ǀ tácchaṃyóḥ sumnámīmahe ǁ

यः शु॒क्र इ॑व॒ सूर्यो॒ हिर॑ण्यमिव॒ रोच॑ते । श्रेष्ठो॑ दे॒वानां॒ वसुः॑ ॥

yáḥ śukrá iva sū́ryo híraṇyamiva rócate ǀ śréṣṭho devā́nām vásuḥ ǁ

शं नः॑ कर॒त्यर्व॑ते सु॒गं मे॒षाय॑ मे॒ष्ये॑ । नृभ्यो॒ नारि॑भ्यो॒ गवे॑ ॥

śám naḥ karatyárvate sugám meṣā́ya meṣyé ǀ nṛ́bhyo nā́ribhyo gáve ǁ

अ॒स्मे सो॑म॒ श्रिय॒मधि॒ नि धे॑हि श॒तस्य॑ नृ॒णां । महि॒ श्रव॑स्तुविनृ॒म्णं ॥

asmé soma śríyamádhi ní dhehi śatásya nṛṇā́m ǀ máhi śrávastuvinṛmṇám ǁ

मा नः॑ सोमपरि॒बाधो॒ मारा॑तयो जुहुरंत । आ न॑ इंदो॒ वाजे॑ भज ॥

mā́ naḥ somaparibā́dho mā́rātayo juhuranta ǀ ā́ na indo vā́je bhaja ǁ

यास्ते॑ प्र॒जा अ॒मृत॑स्य॒ पर॑स्मि॒न्धाम॑न्नृ॒तस्य॑ । मू॒र्धा नाभा॑ सोम वेन आ॒भूषं॑तीः सोम वेदः ॥

yā́ste prajā́ amṛ́tasya párasmindhā́mannṛtásya ǀ mūrdhā́ nā́bhā soma vena ābhū́ṣantīḥ soma vedaḥ ǁ