Sūkta 40

उत्ति॑ष्ठ ब्रह्मणस्पते देव॒यंत॑स्त्वेमहे । उप॒ प्र यं॑तु म॒रुतः॑ सु॒दान॑व॒ इंद्र॑ प्रा॒शूर्भ॑वा॒ सचा॑ ॥

úttiṣṭha brahmaṇaspate devayántastvemahe ǀ úpa prá yantu marútaḥ sudā́nava índra prāśū́rbhavā sácā ǁ

त्वामिद्धि स॑हसस्पुत्र॒ मर्त्य॑ उपब्रू॒ते धने॑ हि॒ते । सु॒वीर्यं॑ मरुत॒ आ स्वश्व्यं॒ दधी॑त॒ यो व॑ आच॒के ॥

tvā́míddhí sahasasputra mártya upabrūté dháne hité ǀ suvī́ryam maruta ā́ sváśvyam dádhīta yó va ācaké ǁ

प्रैतु॒ ब्रह्म॑ण॒स्पतिः॒ प्र दे॒व्ये॑तु सू॒नृता॑ । अच्छा॑ वी॒रं नर्यं॑ पं॒क्तिरा॑धसं दे॒वा य॒ज्ञं न॑यंतु नः ॥

práitu bráhmaṇaspátiḥ prá devyétu sūnṛ́tā ǀ ácchā vīrám náryam paṅktírādhasam devā́ yajñám nayantu naḥ ǁ

यो वा॒घते॒ ददा॑ति सू॒नरं॒ वसु॒ स ध॑त्ते॒ अक्षि॑ति॒ श्रवः॑ । तस्मा॒ इळां॑ सु॒वीरा॒मा य॑जामहे सु॒प्रतू॑र्तिमने॒हसं॑ ॥

yó vāgháte dádāti sūnáram vásu sá dhatte ákṣiti śrávaḥ ǀ tásmā íḷām suvī́rāmā́ yajāmahe suprátūrtimanehásam ǁ

प्र नू॒नं ब्रह्म॑ण॒स्पति॒र्मंत्रं॑ वदत्यु॒क्थ्यं॑ । यस्मि॒न्निंद्रो॒ वरु॑णो मि॒त्रो अ॑र्य॒मा दे॒वा ओकां॑सि चक्रि॒रे ॥

prá nūnám bráhmaṇaspátirmántram vadatyukthyám ǀ yásminníndro váruṇo mitró aryamā́ devā́ ókāṃsi cakriré ǁ

तमिद्वो॑चेमा वि॒दथे॑षु शं॒भुवं॒ मंत्रं॑ देवा अने॒हसं॑ । इ॒मां च॒ वाचं॑ प्रति॒हर्य॑था नरो॒ विश्वेद्वा॒मा वो॑ अश्नवत् ॥

támídvocemā vidátheṣu śambhúvam mántram devā anehásam ǀ imā́m ca vā́cam pratiháryathā naro víśvédvāmā́ vo aśnavat ǁ

को दे॑व॒यंत॑मश्नव॒ज्जनं॒ को वृ॒क्तब॑र्हिषं । प्रप्र॑ दा॒श्वान्प॒स्त्या॑भिरस्थितांत॒र्वाव॒त्क्षयं॑ दधे ॥

kó devayántamaśnavajjánam kó vṛktábarhiṣam ǀ prápra dāśvā́npastyā́bhirasthitāntarvā́vatkṣáyam dadhe ǁ

उप॑ क्ष॒त्रं पृं॑ची॒त हंति॒ राज॑भिर्भ॒ये चि॑त्सुक्षि॒तिं द॑धे । नास्य॑ व॒र्ता न त॑रु॒ता म॑हाध॒ने नार्भे॑ अस्ति व॒ज्रिणः॑ ॥

úpa kṣatrám pṛñcītá hánti rā́jabhirbhayé citsukṣitím dadhe ǀ nā́sya vartā́ ná tarutā́ mahādhané nā́rbhe asti vajríṇaḥ ǁ