ಸೂಕ್ತ 188

ಸಮಿ॑ದ್ಧೋ ಅ॒ದ್ಯ ರಾ॑ಜಸಿ ದೇ॒ವೋ ದೇ॒ವೈಃ ಸ॑ಹಸ್ರಜಿತ್ । ದೂ॒ತೋ ಹ॒ವ್ಯಾ ಕ॒ವಿರ್ವ॑ಹ ॥

समि॑द्धो अ॒द्य रा॑जसि दे॒वो दे॒वैः स॑हस्रजित् । दू॒तो ह॒व्या क॒विर्व॑ह ॥

ತನೂ॑ನಪಾದೃ॒ತಂ ಯ॒ತೇ ಮಧ್ವಾ॑ ಯ॒ಜ್ಞಃ ಸಮ॑ಜ್ಯತೇ । ದಧ॑ತ್ಸಹ॒ಸ್ರಿಣೀ॒ರಿಷಃ॑ ॥

तनू॑नपादृ॒तं य॒ते मध्वा॑ य॒ज्ञः सम॑ज्यते । दध॑त्सह॒स्रिणी॒रिषः॑ ॥

ಆ॒ಜುಹ್ವಾ॑ನೋ ನ॒ ಈಡ್ಯೋ॑ ದೇ॒ವಾಁ ಆ ವ॑ಕ್ಷಿ ಯ॒ಜ್ಞಿಯಾ॑ನ್ । ಅಗ್ನೇ॑ ಸಹಸ್ರ॒ಸಾ ಅ॑ಸಿ ॥

आ॒जुह्वा॑नो न॒ ईड्यो॑ दे॒वाँ आ व॑क्षि य॒ज्ञिया॑न् । अग्ने॑ सहस्र॒सा अ॑सि ॥

ಪ್ರಾ॒ಚೀನಂ॑ ಬ॒ರ್ಹಿರೋಜ॑ಸಾ ಸ॒ಹಸ್ರ॑ವೀರಮಸ್ತೃಣನ್ । ಯತ್ರಾ॑ದಿತ್ಯಾ ವಿ॒ರಾಜ॑ಥ ॥

प्रा॒चीनं॑ ब॒र्हिरोज॑सा स॒हस्र॑वीरमस्तृणन् । यत्रा॑दित्या वि॒राज॑थ ॥

ವಿ॒ರಾಟ್ ಸ॒ಮ್ರಾಡ್ವಿ॒ಭ್ವೀಃ ಪ್ರ॒ಭ್ವೀರ್ಬ॒ಹ್ವೀಶ್ಚ॒ ಭೂಯ॑ಸೀಶ್ಚ॒ ಯಾಃ । ದುರೋ॑ ಘೃ॒ತಾನ್ಯ॑ಕ್ಷರನ್ ॥

वि॒राट् स॒म्राड्वि॒भ्वीः प्र॒भ्वीर्ब॒ह्वीश्च॒ भूय॑सीश्च॒ याः । दुरो॑ घृ॒तान्य॑क्षरन् ॥

ಸು॒ರು॒ಕ್ಮೇ ಹಿ ಸು॒ಪೇಶ॒ಸಾಧಿ॑ ಶ್ರಿ॒ಯಾ ವಿ॒ರಾಜ॑ತಃ । ಉ॒ಷಾಸಾ॒ವೇಹ ಸೀ॑ದತಾಂ ॥

सु॒रु॒क्मे हि सु॒पेश॒साधि॑ श्रि॒या वि॒राज॑तः । उ॒षासा॒वेह सी॑दतां ॥

ಪ್ರ॒ಥ॒ಮಾ ಹಿ ಸು॒ವಾಚ॑ಸಾ॒ ಹೋತಾ॑ರಾ॒ ದೈವ್ಯಾ॑ ಕ॒ವೀ । ಯ॒ಜ್ಞಂ ನೋ॑ ಯಕ್ಷತಾಮಿ॒ಮಂ ॥

प्र॒थ॒मा हि सु॒वाच॑सा॒ होता॑रा॒ दैव्या॑ क॒वी । य॒ज्ञं नो॑ यक्षतामि॒मं ॥

ಭಾರ॒ತೀಳೇ॒ ಸರ॑ಸ್ವತಿ॒ ಯಾ ವಃ॒ ಸರ್ವಾ॑ ಉಪಬ್ರು॒ವೇ । ತಾ ನ॑ಶ್ಚೋದಯತ ಶ್ರಿ॒ಯೇ ॥

भार॒तीळे॒ सर॑स्वति॒ या वः॒ सर्वा॑ उपब्रु॒वे । ता न॑श्चोदयत श्रि॒ये ॥

ತ್ವಷ್ಟಾ॑ ರೂ॒ಪಾಣಿ॒ ಹಿ ಪ್ರ॒ಭುಃ ಪ॒ಶೂನ್ವಿಶ್ವಾ॑ನ್ತ್ಸಮಾನ॒ಜೇ । ತೇಷಾಂ॑ ನಃ ಸ್ಫಾ॒ತಿಮಾ ಯ॑ಜ ॥

त्वष्टा॑ रू॒पाणि॒ हि प्र॒भुः प॒शून्विश्वा॑न्त्समान॒जे । तेषां॑ नः स्फा॒तिमा य॑ज ॥

ಉಪ॒ ತ್ಮನ್ಯಾ॑ ವನಸ್ಪತೇ॒ ಪಾಥೋ॑ ದೇ॒ವೇಭ್ಯಃ॑ ಸೃಜ । ಅ॒ಗ್ನಿರ್ಹ॒ವ್ಯಾನಿ॑ ಸಿಷ್ವದತ್ ॥

उप॒ त्मन्या॑ वनस्पते॒ पाथो॑ दे॒वेभ्यः॑ सृज । अ॒ग्निर्ह॒व्यानि॑ सिष्वदत् ॥

ಪು॒ರೋ॒ಗಾ ಅ॒ಗ್ನಿರ್ದೇ॒ವಾನಾಂ॑ ಗಾಯ॒ತ್ರೇಣ॒ ಸಮ॑ಜ್ಯತೇ । ಸ್ವಾಹಾ॑ಕೃತೀಷು ರೋಚತೇ ॥

पु॒रो॒गा अ॒ग्निर्दे॒वानां॑ गाय॒त्रेण॒ सम॑ज्यते । स्वाहा॑कृतीषु रोचते ॥