Sūkta 188

समि॑द्धो अ॒द्य रा॑जसि दे॒वो दे॒वैः स॑हस्रजित् । दू॒तो ह॒व्या क॒विर्व॑ह ॥

sámiddho adyá rājasi devó deváiḥ sahasrajit ǀ dūtó havyā́ kavírvaha ǁ

तनू॑नपादृ॒तं य॒ते मध्वा॑ य॒ज्ञः सम॑ज्यते । दध॑त्सह॒स्रिणी॒रिषः॑ ॥

tánūnapādṛtám yaté mádhvā yajñáḥ sámajyate ǀ dádhatsahasríṇīríṣaḥ ǁ

आ॒जुह्वा॑नो न॒ ईड्यो॑ दे॒वाँ आ व॑क्षि य॒ज्ञिया॑न् । अग्ने॑ सहस्र॒सा अ॑सि ॥

ājúhvāno na ī́ḍyo devā́m̐ ā́ vakṣi yajñíyān ǀ ágne sahasrasā́ asi ǁ

प्रा॒चीनं॑ ब॒र्हिरोज॑सा स॒हस्र॑वीरमस्तृणन् । यत्रा॑दित्या वि॒राज॑थ ॥

prācī́nam barhírójasā sahásravīramastṛṇan ǀ yátrādityā virā́jatha ǁ

वि॒राट् स॒म्राड्वि॒भ्वीः प्र॒भ्वीर्ब॒ह्वीश्च॒ भूय॑सीश्च॒ याः । दुरो॑ घृ॒तान्य॑क्षरन् ॥

virā́ṭ samrā́ḍvibhvī́ḥ prabhvī́rbahvī́śca bhū́yasīśca yā́ḥ ǀ dúro ghṛtā́nyakṣaran ǁ

सु॒रु॒क्मे हि सु॒पेश॒साधि॑ श्रि॒या वि॒राज॑तः । उ॒षासा॒वेह सी॑दतां ॥

surukmé hí supéśasā́dhi śriyā́ virā́jataḥ ǀ uṣā́sāvéhá sīdatām ǁ

प्र॒थ॒मा हि सु॒वाच॑सा॒ होता॑रा॒ दैव्या॑ क॒वी । य॒ज्ञं नो॑ यक्षतामि॒मं ॥

prathamā́ hí suvā́casā hótārā dáivyā kavī́ ǀ yajñám no yakṣatāmimám ǁ

भार॒तीळे॒ सर॑स्वति॒ या वः॒ सर्वा॑ उपब्रु॒वे । ता न॑श्चोदयत श्रि॒ये ॥

bhā́ratī́ḷe sárasvati yā́ vaḥ sárvā upabruvé ǀ tā́ naścodayata śriyé ǁ

त्वष्टा॑ रू॒पाणि॒ हि प्र॒भुः प॒शून्विश्वा॑न्त्समान॒जे । तेषां॑ नः स्फा॒तिमा य॑ज ॥

tváṣṭā rūpā́ṇi hí prabhúḥ paśū́nvíśvāntsamānajé ǀ téṣām naḥ sphātímā́ yaja ǁ

उप॒ त्मन्या॑ वनस्पते॒ पाथो॑ दे॒वेभ्यः॑ सृज । अ॒ग्निर्ह॒व्यानि॑ सिष्वदत् ॥

úpa tmányā vanaspate pā́tho devébhyaḥ sṛja ǀ agnírhavyā́ni siṣvadat ǁ

पु॒रो॒गा अ॒ग्निर्दे॒वानां॑ गाय॒त्रेण॒ सम॑ज्यते । स्वाहा॑कृतीषु रोचते ॥

purogā́ agnírdevā́nām gāyatréṇa sámajyate ǀ svā́hākṛtīṣu rocate ǁ