ಸೂಕ್ತ 186

ಆ ನ॒ ಇಳಾ॑ಭಿರ್ವಿ॒ದಥೇ॑ ಸುಶ॒ಸ್ತಿ ವಿ॒ಶ್ವಾನ॑ರಃ ಸವಿ॒ತಾ ದೇ॒ವ ಏ॑ತು । ಅಪಿ॒ ಯಥಾ॑ ಯುವಾನೋ॒ ಮತ್ಸ॑ಥಾ ನೋ॒ ವಿಶ್ವಂ॒ ಜಗ॑ದಭಿಪಿ॒ತ್ವೇ ಮ॑ನೀ॒ಷಾ ॥

आ न॒ इळा॑भिर्वि॒दथे॑ सुश॒स्ति वि॒श्वान॑रः सवि॒ता दे॒व ए॑तु । अपि॒ यथा॑ युवानो॒ मत्स॑था नो॒ विश्वं॒ जग॑दभिपि॒त्वे म॑नी॒षा ॥

ಆ ನೋ॒ ವಿಶ್ವ॒ ಆಸ್ಕ್ರಾ॑ ಗಮಂತು ದೇ॒ವಾ ಮಿ॒ತ್ರೋ ಅ॑ರ್ಯ॒ಮಾ ವರು॑ಣಃ ಸ॒ಜೋಷಾಃ॑ । ಭುವ॒ನ್ಯಥಾ॑ ನೋ॒ ವಿಶ್ವೇ॑ ವೃ॒ಧಾಸಃ॒ ಕರ॑ನ್ತ್ಸು॒ಷಾಹಾ॑ ವಿಥು॒ರಂ ನ ಶವಃ॑ ॥

आ नो॒ विश्व॒ आस्क्रा॑ गमंतु दे॒वा मि॒त्रो अ॑र्य॒मा वरु॑णः स॒जोषाः॑ । भुव॒न्यथा॑ नो॒ विश्वे॑ वृ॒धासः॒ कर॑न्त्सु॒षाहा॑ विथु॒रं न शवः॑ ॥

ಪ್ರೇಷ್ಠಂ॑ ವೋ॒ ಅತಿ॑ಥಿಂ ಗೃಣೀಷೇ॒ಽಗ್ನಿಂ ಶ॒ಸ್ತಿಭಿ॑ಸ್ತು॒ರ್ವಣಿಃ॑ ಸ॒ಜೋಷಾಃ॑ । ಅಸ॒ದ್ಯಥಾ॑ ನೋ॒ ವರು॑ಣಃ ಸುಕೀ॒ರ್ತಿರಿಷ॑ಶ್ಚ ಪರ್ಷದರಿಗೂ॒ರ್ತಃ ಸೂ॒ರಿಃ ॥

प्रेष्ठं॑ वो॒ अति॑थिं गृणीषे॒ऽग्निं श॒स्तिभि॑स्तु॒र्वणिः॑ स॒जोषाः॑ । अस॒द्यथा॑ नो॒ वरु॑णः सुकी॒र्तिरिष॑श्च पर्षदरिगू॒र्तः सू॒रिः ॥

ಉಪ॑ ವ॒ ಏಷೇ॒ ನಮ॑ಸಾ ಜಿಗೀ॒ಷೋಷಾಸಾ॒ನಕ್ತಾ॑ ಸು॒ದುಘೇ॑ವ ಧೇ॒ನುಃ । ಸ॒ಮಾ॒ನೇ ಅಹ॑ನ್ವಿ॒ಮಿಮಾ॑ನೋ ಅ॒ರ್ಕಂ ವಿಷು॑ರೂಪೇ॒ ಪಯ॑ಸಿ॒ ಸಸ್ಮಿ॒ನ್ನೂಧ॑ನ್ ॥

उप॑ व॒ एषे॒ नम॑सा जिगी॒षोषासा॒नक्ता॑ सु॒दुघे॑व धे॒नुः । स॒मा॒ने अह॑न्वि॒मिमा॑नो अ॒र्कं विषु॑रूपे॒ पय॑सि॒ सस्मि॒न्नूध॑न् ॥

ಉ॒ತ ನೋಽಹಿ॑ರ್ಬು॒ಧ್ನ್ಯೋ॒೩॒॑ ಮಯ॑ಸ್ಕಃ॒ ಶಿಶುಂ॒ ನ ಪಿ॒ಪ್ಯುಷೀ॑ವ ವೇತಿ॒ ಸಿಂಧುಃ॑ । ಯೇನ॒ ನಪಾ॑ತಮ॒ಪಾಂ ಜು॒ನಾಮ॑ ಮನೋ॒ಜುವೋ॒ ವೃಷ॑ಣೋ॒ ಯಂ ವಹಂ॑ತಿ ॥

उ॒त नोऽहि॑र्बु॒ध्न्यो॒३॒॑ मय॑स्कः॒ शिशुं॒ न पि॒प्युषी॑व वेति॒ सिंधुः॑ । येन॒ नपा॑तम॒पां जु॒नाम॑ मनो॒जुवो॒ वृष॑णो॒ यं वहं॑ति ॥

ಉ॒ತ ನ॑ ಈಂ॒ ತ್ವಷ್ಟಾ ಗಂ॒ತ್ವಚ್ಛಾ॒ ಸ್ಮತ್ಸೂ॒ರಿಭಿ॑ರಭಿಪಿ॒ತ್ವೇ ಸ॒ಜೋಷಾಃ॑ । ಆ ವೃ॑ತ್ರ॒ಹೇಂದ್ರ॑ಶ್ಚರ್ಷಣಿ॒ಪ್ರಾಸ್ತು॒ವಿಷ್ಟ॑ಮೋ ನ॒ರಾಂ ನ॑ ಇ॒ಹ ಗ॑ಮ್ಯಾಃ ॥

उ॒त न॑ ईं॒ त्वष्टा गं॒त्वच्छा॒ स्मत्सू॒रिभि॑रभिपि॒त्वे स॒जोषाः॑ । आ वृ॑त्र॒हेंद्र॑श्चर्षणि॒प्रास्तु॒विष्ट॑मो न॒रां न॑ इ॒ह ग॑म्याः ॥

ಉ॒ತ ನ॑ ಈಂ ಮ॒ತಯೋಽಶ್ವ॑ಯೋಗಾಃ॒ ಶಿಶುಂ॒ ನ ಗಾವ॒ಸ್ತರು॑ಣಂ ರಿಹಂತಿ । ತಮೀಂ॒ ಗಿರೋ॒ ಜನ॑ಯೋ॒ ನ ಪತ್ನೀಃ॑ ಸುರ॒ಭಿಷ್ಟ॑ಮಂ ನ॒ರಾಂ ನ॑ಸಂತ ॥

उ॒त न॑ ईं म॒तयोऽश्व॑योगाः॒ शिशुं॒ न गाव॒स्तरु॑णं रिहंति । तमीं॒ गिरो॒ जन॑यो॒ न पत्नीः॑ सुर॒भिष्ट॑मं न॒रां न॑संत ॥

ಉ॒ತ ನ॑ ಈಂ ಮ॒ರುತೋ॑ ವೃ॒ದ್ಧಸೇ॑ನಾಃ॒ ಸ್ಮದ್ರೋದ॑ಸೀ॒ ಸಮ॑ನಸಃ ಸದಂತು । ಪೃಷ॑ದಶ್ವಾಸೋ॒ಽವನ॑ಯೋ॒ ನ ರಥಾ॑ ರಿ॒ಶಾದ॑ಸೋ ಮಿತ್ರ॒ಯುಜೋ॒ ನ ದೇ॒ವಾಃ ॥

उ॒त न॑ ईं म॒रुतो॑ वृ॒द्धसे॑नाः॒ स्मद्रोद॑सी॒ सम॑नसः सदंतु । पृष॑दश्वासो॒ऽवन॑यो॒ न रथा॑ रि॒शाद॑सो मित्र॒युजो॒ न दे॒वाः ॥

ಪ್ರ ನು ಯದೇ॑ಷಾಂ ಮಹಿ॒ನಾ ಚಿ॑ಕಿ॒ತ್ರೇ ಪ್ರ ಯುಂ॑ಜತೇ ಪ್ರ॒ಯುಜ॒ಸ್ತೇ ಸು॑ವೃ॒ಕ್ತಿ । ಅಧ॒ ಯದೇ॑ಷಾಂ ಸು॒ದಿನೇ॒ ನ ಶರು॒ರ್ವಿಶ್ವ॒ಮೇರಿ॑ಣಂ ಪ್ರುಷಾ॒ಯಂತ॒ ಸೇನಾಃ॑ ॥

प्र नु यदे॑षां महि॒ना चि॑कि॒त्रे प्र युं॑जते प्र॒युज॒स्ते सु॑वृ॒क्ति । अध॒ यदे॑षां सु॒दिने॒ न शरु॒र्विश्व॒मेरि॑णं प्रुषा॒यंत॒ सेनाः॑ ॥

ಪ್ರೋ ಅ॒ಶ್ವಿನಾ॒ವವ॑ಸೇ ಕೃಣುಧ್ವಂ॒ ಪ್ರ ಪೂ॒ಷಣಂ॒ ಸ್ವತ॑ವಸೋ॒ ಹಿ ಸಂತಿ॑ । ಅ॒ದ್ವೇ॒ಷೋ ವಿಷ್ಣು॒ರ್ವಾತ॑ ಋಭು॒ಕ್ಷಾ ಅಚ್ಛಾ॑ ಸು॒ಮ್ನಾಯ॑ ವವೃತೀಯ ದೇ॒ವಾನ್ ॥

प्रो अ॒श्विना॒वव॑से कृणुध्वं॒ प्र पू॒षणं॒ स्वत॑वसो॒ हि संति॑ । अ॒द्वे॒षो विष्णु॒र्वात॑ ऋभु॒क्षा अच्छा॑ सु॒म्नाय॑ ववृतीय दे॒वान् ॥

ಇ॒ಯಂ ಸಾ ವೋ॑ ಅ॒ಸ್ಮೇ ದೀಧಿ॑ತಿರ್ಯಜತ್ರಾ ಅಪಿ॒ಪ್ರಾಣೀ॑ ಚ॒ ಸದ॑ನೀ ಚ ಭೂಯಾಃ । ನಿ ಯಾ ದೇ॒ವೇಷು॒ ಯತ॑ತೇ ವಸೂ॒ಯುರ್ವಿ॒ದ್ಯಾಮೇ॒ಷಂ ವೃ॒ಜನಂ॑ ಜೀ॒ರದಾ॑ನುಂ ॥

इ॒यं सा वो॑ अ॒स्मे दीधि॑तिर्यजत्रा अपि॒प्राणी॑ च॒ सद॑नी च भूयाः । नि या दे॒वेषु॒ यत॑ते वसू॒युर्वि॒द्यामे॒षं वृ॒जनं॑ जी॒रदा॑नुं ॥