Sūkta 175

मत्स्यपा॑यि ते॒ महः॒ पात्र॑स्येव हरिवो मत्स॒रो मदः॑ । वृषा॑ ते॒ वृष्ण॒ इंदु॑र्वा॒जी स॑हस्र॒सात॑मः ॥

mátsyápāyi te máhaḥ pā́trasyeva harivo matsaró mádaḥ ǀ vṛ́ṣā te vṛ́ṣṇa índurvājī́ sahasrasā́tamaḥ ǁ

आ न॑स्ते गंतु मत्स॒रो वृषा॒ मदो॒ वरे॑ण्यः । स॒हावाँ॑ इंद्र सान॒सिः पृ॑तना॒षाळम॑र्त्यः ॥

ā́ naste gantu matsaró vṛ́ṣā mádo váreṇyaḥ ǀ sahā́vām̐ indra sānasíḥ pṛtanāṣā́ḷámartyaḥ ǁ

त्वं हि शूरः॒ सनि॑ता चो॒दयो॒ मनु॑षो॒ रथं॑ । स॒हावा॒न्दस्यु॑मव्र॒तमोषः॒ पात्रं॒ न शो॒चिषा॑ ॥

tvám hí śū́raḥ sánitā codáyo mánuṣo rátham ǀ sahā́vāndásyumavratámóṣaḥ pā́tram ná śocíṣā ǁ

मु॒षा॒य सूर्यं॑ कवे च॒क्रमीशा॑न॒ ओज॑सा । वह॒ शुष्णा॑य व॒धं कुत्सं॒ वात॒स्याश्वैः॑ ॥

muṣāyá sū́ryam kave cakrámī́śāna ójasā ǀ váha śúṣṇāya vadhám kútsam vā́tasyā́śvaiḥ ǁ

शु॒ष्मिंत॑मो॒ हि ते॒ मदो॑ द्यु॒म्निंत॑म उ॒त क्रतुः॑ । वृ॒त्र॒घ्ना व॑रिवो॒विदा॑ मंसी॒ष्ठा अ॑श्व॒सात॑मः ॥

śuṣmíntamo hí te mádo dyumníntama utá krátuḥ ǀ vṛtraghnā́ varivovídā maṃsīṣṭhā́ aśvasā́tamaḥ ǁ

यथा॒ पूर्वे॑भ्यो जरि॒तृभ्य॑ इंद्र॒ मय॑ इ॒वापो॒ न तृष्य॑ते ब॒भूथ॑ । तामनु॑ त्वा नि॒विदं॑ जोहवीमि वि॒द्यामे॒षं वृ॒जनं॑ जी॒रदा॑नुं ॥

yáthā pū́rvebhyo jaritṛ́bhya indra máya ivā́po ná tṛ́ṣyate babhū́tha ǀ tā́mánu tvā nivídam johavīmi vidyā́meṣám vṛjánam jīrádānum ǁ