ಈ ಸೂಕ್ತಕ್ಕೆ ಅಡ್ಮಿನ್‌ನಲ್ಲಿ ಕನ್ನಡ ಅಧ್ಯಯನ ಮಾರ್ಗದರ್ಶಿ (Study Guide) ಇನ್ನೂ ರಚನೆಯಾಗಿಲ್ಲ. ಅಡ್ಮಿನ್‌ನಲ್ಲಿ Generate Study Guides ಮೂಲಕ ಕನ್ನಡ ಭಾಷೆಯನ್ನು ಆಯ್ಕೆಮಾಡಿ ರಚಿಸಬಹುದು.
ಗಾಯ॒ತ್ಸಾಮ॑ ನಭ॒ನ್ಯಂ೧॒॑ ಯಥಾ॒ ವೇರರ್ಚಾ॑ಮ॒ ತದ್ವಾ॑ವೃಧಾ॒ನಂ ಸ್ವ॑ರ್ವತ್ । ಗಾವೋ॑ ಧೇ॒ನವೋ॑ ಬ॒ರ್ಹಿಷ್ಯದ॑ಬ್ಧಾ॒ ಆ ಯತ್ಸ॒ದ್ಮಾನಂ॑ ದಿ॒ವ್ಯಂ ವಿವಾ॑ಸಾನ್ ॥
गाय॒त्साम॑ नभ॒न्यं१॒॑ यथा॒ वेरर्चा॑म॒ तद्वा॑वृधा॒नं स्व॑र्वत् । गावो॑ धे॒नवो॑ ब॒र्हिष्यद॑ब्धा॒ आ यत्स॒द्मानं॑ दि॒व्यं विवा॑सान् ॥
ಅರ್ಚ॒ದ್ವೃಷಾ॒ ವೃಷ॑ಭಿಃ॒ ಸ್ವೇದು॑ಹವ್ಯೈರ್ಮೃ॒ಗೋ ನಾಶ್ನೋ॒ ಅತಿ॒ ಯಜ್ಜು॑ಗು॒ರ್ಯಾತ್ । ಪ್ರ ಮಂ॑ದ॒ಯುರ್ಮ॒ನಾಂ ಗೂ॑ರ್ತ॒ ಹೋತಾ॒ ಭರ॑ತೇ॒ ಮರ್ಯೋ॑ ಮಿಥು॒ನಾ ಯಜ॑ತ್ರಃ ॥
अर्च॒द्वृषा॒ वृष॑भिः॒ स्वेदु॑हव्यैर्मृ॒गो नाश्नो॒ अति॒ यज्जु॑गु॒र्यात् । प्र मं॑द॒युर्म॒नां गू॑र्त॒ होता॒ भर॑ते॒ मर्यो॑ मिथु॒ना यज॑त्रः ॥
ನಕ್ಷ॒ದ್ಧೋತಾ॒ ಪರಿ॒ ಸದ್ಮ॑ ಮಿ॒ತಾ ಯನ್ಭರ॒ದ್ಗರ್ಭ॒ಮಾ ಶ॒ರದಃ॑ ಪೃಥಿ॒ವ್ಯಾಃ । ಕ್ರಂದ॒ದಶ್ವೋ॒ ನಯ॑ಮಾನೋ ರು॒ವದ್ಗೌರಂ॒ತರ್ದೂ॒ತೋ ನ ರೋದ॑ಸೀ ಚರ॒ದ್ವಾಕ್ ॥
नक्ष॒द्धोता॒ परि॒ सद्म॑ मि॒ता यन्भर॒द्गर्भ॒मा श॒रदः॑ पृथि॒व्याः । क्रंद॒दश्वो॒ नय॑मानो रु॒वद्गौरं॒तर्दू॒तो न रोद॑सी चर॒द्वाक् ॥
ತಾ ಕ॒ರ್ಮಾಷ॑ತರಾಸ್ಮೈ॒ ಪ್ರ ಚ್ಯೌ॒ತ್ನಾನಿ॑ ದೇವ॒ಯಂತೋ॑ ಭರಂತೇ । ಜುಜೋ॑ಷ॒ದಿಂದ್ರೋ॑ ದ॒ಸ್ಮವ॑ರ್ಚಾ॒ ನಾಸ॑ತ್ಯೇವ॒ ಸುಗ್ಮ್ಯೋ॑ ರಥೇ॒ಷ್ಠಾಃ ॥
ता क॒र्माष॑तरास्मै॒ प्र च्यौ॒त्नानि॑ देव॒यंतो॑ भरंते । जुजो॑ष॒दिंद्रो॑ द॒स्मव॑र्चा॒ नास॑त्येव॒ सुग्म्यो॑ रथे॒ष्ठाः ॥
ತಮು॑ ಷ್ಟು॒ಹೀಂದ್ರಂ॒ ಯೋ ಹ॒ ಸತ್ವಾ॒ ಯಃ ಶೂರೋ॑ ಮ॒ಘವಾ॒ ಯೋ ರ॑ಥೇ॒ಷ್ಠಾಃ । ಪ್ರ॒ತೀ॒ಚಶ್ಚಿ॒ದ್ಯೋಧೀ॑ಯಾ॒ನ್ವೃಷ॑ಣ್ವಾನ್ವವ॒ವ್ರುಷ॑ಶ್ಚಿ॒ತ್ತಮ॑ಸೋ ವಿಹಂ॒ತಾ ॥
तमु॑ ष्टु॒हींद्रं॒ यो ह॒ सत्वा॒ यः शूरो॑ म॒घवा॒ यो र॑थे॒ष्ठाः । प्र॒ती॒चश्चि॒द्योधी॑या॒न्वृष॑ण्वान्वव॒व्रुष॑श्चि॒त्तम॑सो विहं॒ता ॥
ಪ್ರ ಯದಿ॒ತ್ಥಾ ಮ॑ಹಿ॒ನಾ ನೃಭ್ಯೋ॒ ಅಸ್ತ್ಯರಂ॒ ರೋದ॑ಸೀ ಕ॒ಕ್ಷ್ಯೇ॒೩॒॑ ನಾಸ್ಮೈ॑ । ಸಂ ವಿ॑ವ್ಯ॒ ಇಂದ್ರೋ॑ ವೃ॒ಜನಂ॒ ನ ಭೂಮಾ॒ ಭರ್ತಿ॑ ಸ್ವ॒ಧಾವಾಁ॑ ಓಪ॒ಶಮಿ॑ವ॒ ದ್ಯಾಂ ॥
प्र यदि॒त्था म॑हि॒ना नृभ्यो॒ अस्त्यरं॒ रोद॑सी क॒क्ष्ये॒३॒॑ नास्मै॑ । सं वि॑व्य॒ इंद्रो॑ वृ॒जनं॒ न भूमा॒ भर्ति॑ स्व॒धावाँ॑ ओप॒शमि॑व॒ द्यां ॥
ಸ॒ಮತ್ಸು॑ ತ್ವಾ ಶೂರ ಸ॒ತಾಮು॑ರಾ॒ಣಂ ಪ್ರ॑ಪ॒ಥಿಂತ॑ಮಂ ಪರಿತಂಸ॒ಯಧ್ಯೈ॑ । ಸ॒ಜೋಷ॑ಸ॒ ಇಂದ್ರಂ॒ ಮದೇ॑ ಕ್ಷೋ॒ಣೀಃ ಸೂ॒ರಿಂ ಚಿ॒ದ್ಯೇ ಅ॑ನು॒ಮದಂ॑ತಿ॒ ವಾಜೈಃ॑ ॥
स॒मत्सु॑ त्वा शूर स॒तामु॑रा॒णं प्र॑प॒थिंत॑मं परितंस॒यध्यै॑ । स॒जोष॑स॒ इंद्रं॒ मदे॑ क्षो॒णीः सू॒रिं चि॒द्ये अ॑नु॒मदं॑ति॒ वाजैः॑ ॥
ಏ॒ವಾ ಹಿ ತೇ॒ ಶಂ ಸವ॑ನಾ ಸಮು॒ದ್ರ ಆಪೋ॒ ಯತ್ತ॑ ಆ॒ಸು ಮದಂ॑ತಿ ದೇ॒ವೀಃ । ವಿಶ್ವಾ॑ ತೇ॒ ಅನು॒ ಜೋಷ್ಯಾ॑ ಭೂ॒ದ್ಗೌಃ ಸೂ॒ರೀಂಶ್ಚಿ॒ದ್ಯದಿ॑ ಧಿ॒ಷಾ ವೇಷಿ॒ ಜನಾ॑ನ್ ॥
ए॒वा हि ते॒ शं सव॑ना समु॒द्र आपो॒ यत्त॑ आ॒सु मदं॑ति दे॒वीः । विश्वा॑ ते॒ अनु॒ जोष्या॑ भू॒द्गौः सू॒रींश्चि॒द्यदि॑ धि॒षा वेषि॒ जना॑न् ॥
ಅಸಾ॑ಮ॒ ಯಥಾ॑ ಸುಷ॒ಖಾಯ॑ ಏನ ಸ್ವಭಿ॒ಷ್ಟಯೋ॑ ನ॒ರಾಂ ನ ಶಂಸೈಃ॑ । ಅಸ॒ದ್ಯಥಾ॑ ನ॒ ಇಂದ್ರೋ॑ ವಂದನೇ॒ಷ್ಠಾಸ್ತು॒ರೋ ನ ಕರ್ಮ॒ ನಯ॑ಮಾನ ಉ॒ಕ್ಥಾ ॥
असा॑म॒ यथा॑ सुष॒खाय॑ एन स्वभि॒ष्टयो॑ न॒रां न शंसैः॑ । अस॒द्यथा॑ न॒ इंद्रो॑ वंदने॒ष्ठास्तु॒रो न कर्म॒ नय॑मान उ॒क्था ॥
ವಿಷ್ಪ॑ರ್ಧಸೋ ನ॒ರಾಂ ನ ಶಂಸೈ॑ರ॒ಸ್ಮಾಕಾ॑ಸ॒ದಿಂದ್ರೋ॒ ವಜ್ರ॑ಹಸ್ತಃ । ಮಿ॒ತ್ರಾ॒ಯುವೋ॒ ನ ಪೂರ್ಪ॑ತಿಂ॒ ಸುಶಿ॑ಷ್ಟೌ ಮಧ್ಯಾ॒ಯುವ॒ ಉಪ॑ ಶಿಕ್ಷಂತಿ ಯ॒ಜ್ಞೈಃ ॥
विष्प॑र्धसो न॒रां न शंसै॑र॒स्माका॑स॒दिंद्रो॒ वज्र॑हस्तः । मि॒त्रा॒युवो॒ न पूर्प॑तिं॒ सुशि॑ष्टौ मध्या॒युव॒ उप॑ शिक्षंति य॒ज्ञैः ॥
ಯ॒ಜ್ಞೋ ಹಿ ಷ್ಮೇಂದ್ರಂ॒ ಕಶ್ಚಿ॑ದೃಂ॒ಧಞ್ಜು॑ಹುರಾ॒ಣಶ್ಚಿ॒ನ್ಮನ॑ಸಾ ಪರಿ॒ಯನ್ । ತೀ॒ರ್ಥೇ ನಾಚ್ಛಾ॑ ತಾತೃಷಾ॒ಣಮೋಕೋ॑ ದೀ॒ರ್ಘೋ ನ ಸಿ॒ಧ್ರಮಾ ಕೃ॑ಣೋ॒ತ್ಯಧ್ವಾ॑ ॥
य॒ज्ञो हि ष्मेंद्रं॒ कश्चि॑दृं॒धञ्जु॑हुरा॒णश्चि॒न्मन॑सा परि॒यन् । ती॒र्थे नाच्छा॑ तातृषा॒णमोको॑ दी॒र्घो न सि॒ध्रमा कृ॑णो॒त्यध्वा॑ ॥
ಮೋ ಷೂ ಣ॑ ಇಂ॒ದ್ರಾತ್ರ॑ ಪೃ॒ತ್ಸು ದೇ॒ವೈರಸ್ತಿ॒ ಹಿ ಷ್ಮಾ॑ ತೇ ಶುಷ್ಮಿನ್ನವ॒ಯಾಃ । ಮ॒ಹಶ್ಚಿ॒ದ್ಯಸ್ಯ॑ ಮೀ॒ಳ್ಹುಷೋ॑ ಯ॒ವ್ಯಾ ಹ॒ವಿಷ್ಮ॑ತೋ ಮ॒ರುತೋ॒ ವಂದ॑ತೇ॒ ಗೀಃ ॥
मो षू ण॑ इं॒द्रात्र॑ पृ॒त्सु दे॒वैरस्ति॒ हि ष्मा॑ ते शुष्मिन्नव॒याः । म॒हश्चि॒द्यस्य॑ मी॒ळ्हुषो॑ य॒व्या ह॒विष्म॑तो म॒रुतो॒ वंद॑ते॒ गीः ॥
ಏ॒ಷ ಸ್ತೋಮ॑ ಇಂದ್ರ॒ ತುಭ್ಯ॑ಮ॒ಸ್ಮೇ ಏ॒ತೇನ॑ ಗಾ॒ತುಂ ಹ॑ರಿವೋ ವಿದೋ ನಃ । ಆ ನೋ॑ ವವೃತ್ಯಾಃ ಸುವಿ॒ತಾಯ॑ ದೇವ ವಿ॒ದ್ಯಾಮೇ॒ಷಂ ವೃ॒ಜನಂ॑ ಜೀ॒ರದಾ॑ನುಂ ॥
ए॒ष स्तोम॑ इंद्र॒ तुभ्य॑म॒स्मे ए॒तेन॑ गा॒तुं ह॑रिवो विदो नः । आ नो॑ ववृत्याः सुवि॒ताय॑ देव वि॒द्यामे॒षं वृ॒जनं॑ जी॒रदा॑नुं ॥