प्रति॑ व ए॒ना नम॑सा॒हमे॑मि सू॒क्तेन॑ भिक्षे सुम॒तिं तु॒राणां॑ । र॒रा॒णता॑ मरुतो वे॒द्याभि॒र्नि हेळो॑ ध॒त्त वि मु॑चध्व॒मश्वा॑न् ॥
práti va enā́ námasāhámemi sūkténa bhikṣe sumatím turā́ṇām ǀ rarāṇátā maruto vedyā́bhirní héḷo dhattá ví mucadhvamáśvān ǁ
ए॒ष वः॒ स्तोमो॑ मरुतो॒ नम॑स्वान्हृ॒दा त॒ष्टो मन॑सा धायि देवाः । उपे॒मा या॑त॒ मन॑सा जुषा॒णा यू॒यं हि ष्ठा नम॑स॒ इद्वृ॒धासः॑ ॥
eṣá vaḥ stómo maruto námasvānhṛdā́ taṣṭó mánasā dhāyi devāḥ ǀ úpemā́ yāta mánasā juṣāṇā́ yūyám hí ṣṭhā́ námasa ídvṛdhā́saḥ ǁ
स्तु॒तासो॑ नो म॒रुतो॑ मृळयंतू॒त स्तु॒तो म॒घवा॒ शंभ॑विष्ठः । ऊ॒र्ध्वा नः॑ संतु को॒म्या वना॒न्यहा॑नि॒ विश्वा॑ मरुतो जिगी॒षा ॥
stutā́so no marúto mṛḷayantūtá stutó maghávā śámbhaviṣṭhaḥ ǀ ūrdhvā́ naḥ santu komyā́ vánānyáhāni víśvā maruto jigīṣā́ ǁ
अ॒स्माद॒हं त॑वि॒षादीष॑माण॒ इंद्रा॑द्भि॒या म॑रुतो॒ रेज॑मानः । यु॒ष्मभ्यं॑ ह॒व्या निशि॑तान्यास॒न्तान्या॒रे च॑कृमा मृ॒ळता॑ नः ॥
asmā́dahám taviṣā́dī́ṣamāṇa índrādbhiyā́ maruto réjamānaḥ ǀ yuṣmábhyam havyā́ níśitānyāsantā́nyāré cakṛmā mṛḷátā naḥ ǁ
येन॒ माना॑सश्चि॒तयं॑त उ॒स्रा व्यु॑ष्टिषु॒ शव॑सा॒ शश्व॑तीनां । स नो॑ म॒रुद्भि॑र्वृषभ॒ श्रवो॑ धा उ॒ग्र उ॒ग्रेभिः॒ स्थवि॑रः सहो॒दाः ॥
yéna mā́nāsaścitáyanta usrā́ vyúṣṭiṣu śávasā śáśvatīnām ǀ sá no marúdbhirvṛṣabha śrávo dhā ugrá ugrébhiḥ stháviraḥ sahodā́ḥ ǁ
त्वं पा॑हींद्र॒ सही॑यसो॒ नॄन्भवा॑ म॒रुद्भि॒रव॑यातहेळाः । सु॒प्र॒के॒तेभिः॑ सास॒हिर्दधा॑नो वि॒द्यामे॒षं वृ॒जनं॑ जी॒रदा॑नुं ॥
tvám pāhīndra sáhīyaso nṝ́nbhávā marúdbhirávayātaheḷāḥ ǀ supraketébhiḥ sāsahírdádhāno vidyā́meṣám vṛjánam jīrádānum ǁ