ಈ ಸೂಕ್ತಕ್ಕೆ ಅಡ್ಮಿನ್‌ನಲ್ಲಿ ಕನ್ನಡ ಅಧ್ಯಯನ ಮಾರ್ಗದರ್ಶಿ (Study Guide) ಇನ್ನೂ ರಚನೆಯಾಗಿಲ್ಲ. ಅಡ್ಮಿನ್‌ನಲ್ಲಿ Generate Study Guides ಮೂಲಕ ಕನ್ನಡ ಭಾಷೆಯನ್ನು ಆಯ್ಕೆಮಾಡಿ ರಚಿಸಬಹುದು.
ಯ॒ಜ್ಞಾಯ॑ಜ್ಞಾ ವಃ ಸಮ॒ನಾ ತು॑ತು॒ರ್ವಣಿ॒ರ್ಧಿಯಂ॑ಧಿಯಂ ವೋ ದೇವ॒ಯಾ ಉ॑ ದಧಿಧ್ವೇ । ಆ ವೋ॒ಽರ್ವಾಚಃ॑ ಸುವಿ॒ತಾಯ॒ ರೋದ॑ಸ್ಯೋರ್ಮ॒ಹೇ ವ॑ವೃತ್ಯಾ॒ಮವ॑ಸೇ ಸುವೃ॒ಕ್ತಿಭಿಃ॑ ॥
य॒ज्ञाय॑ज्ञा वः सम॒ना तु॑तु॒र्वणि॒र्धियं॑धियं वो देव॒या उ॑ दधिध्वे । आ वो॒ऽर्वाचः॑ सुवि॒ताय॒ रोद॑स्योर्म॒हे व॑वृत्या॒मव॑से सुवृ॒क्तिभिः॑ ॥
ವ॒ವ್ರಾಸೋ॒ ನ ಯೇ ಸ್ವ॒ಜಾಃ ಸ್ವತ॑ವಸ॒ ಇಷಂ॒ ಸ್ವ॑ರಭಿ॒ಜಾಯಂ॑ತ॒ ಧೂತ॑ಯಃ । ಸ॒ಹ॒ಸ್ರಿಯಾ॑ಸೋ ಅ॒ಪಾಂ ನೋರ್ಮಯ॑ ಆ॒ಸಾ ಗಾವೋ॒ ವಂದ್ಯಾ॑ಸೋ॒ ನೋಕ್ಷಣಃ॑ ॥
व॒व्रासो॒ न ये स्व॒जाः स्वत॑वस॒ इषं॒ स्व॑रभि॒जायं॑त॒ धूत॑यः । स॒ह॒स्रिया॑सो अ॒पां नोर्मय॑ आ॒सा गावो॒ वंद्या॑सो॒ नोक्षणः॑ ॥
ಸೋಮಾ॑ಸೋ॒ ನ ಯೇ ಸು॒ತಾಸ್ತೃ॒ಪ್ತಾಂಶ॑ವೋ ಹೃ॒ತ್ಸು ಪೀ॒ತಾಸೋ॑ ದು॒ವಸೋ॒ ನಾಸ॑ತೇ । ಐಷಾ॒ಮಂಸೇ॑ಷು ರಂ॒ಭಿಣೀ॑ವ ರಾರಭೇ॒ ಹಸ್ತೇ॑ಷು ಖಾ॒ದಿಶ್ಚ॑ ಕೃ॒ತಿಶ್ಚ॒ ಸಂ ದ॑ಧೇ ॥
सोमा॑सो॒ न ये सु॒तास्तृ॒प्तांश॑वो हृ॒त्सु पी॒तासो॑ दु॒वसो॒ नास॑ते । ऐषा॒मंसे॑षु रं॒भिणी॑व रारभे॒ हस्ते॑षु खा॒दिश्च॑ कृ॒तिश्च॒ सं द॑धे ॥
ಅವ॒ ಸ್ವಯು॑ಕ್ತಾ ದಿ॒ವ ಆ ವೃಥಾ॑ ಯಯು॒ರಮ॑ರ್ತ್ಯಾಃ॒ ಕಶ॑ಯಾ ಚೋದತ॒ ತ್ಮನಾ॑ । ಅ॒ರೇ॒ಣವ॑ಸ್ತುವಿಜಾ॒ತಾ ಅ॑ಚುಚ್ಯವುರ್ದೃ॒ಳ್ಹಾನಿ॑ ಚಿನ್ಮ॒ರುತೋ॒ ಭ್ರಾಜ॑ದೃಷ್ಟಯಃ ॥
अव॒ स्वयु॑क्ता दि॒व आ वृथा॑ ययु॒रम॑र्त्याः॒ कश॑या चोदत॒ त्मना॑ । अ॒रे॒णव॑स्तुविजा॒ता अ॑चुच्यवुर्दृ॒ळ्हानि॑ चिन्म॒रुतो॒ भ्राज॑दृष्टयः ॥
ಕೋ ವೋ॒ಽಂತರ್ಮ॑ರುತ ಋಷ್ಟಿವಿದ್ಯುತೋ॒ ರೇಜ॑ತಿ॒ ತ್ಮನಾ॒ ಹನ್ವೇ॑ವ ಜಿ॒ಹ್ವಯಾ॑ । ಧ॒ನ್ವ॒ಚ್ಯುತ॑ ಇ॒ಷಾಂ ನ ಯಾಮ॑ನಿ ಪುರು॒ಪ್ರೈಷಾ॑ ಅಹ॒ನ್ಯೋ॒೩॒॑ ನೈತ॑ಶಃ ॥
को वो॒ऽंतर्म॑रुत ऋष्टिविद्युतो॒ रेज॑ति॒ त्मना॒ हन्वे॑व जि॒ह्वया॑ । ध॒न्व॒च्युत॑ इ॒षां न याम॑नि पुरु॒प्रैषा॑ अह॒न्यो॒३॒॑ नैत॑शः ॥
ಕ್ವ॑ ಸ್ವಿದ॒ಸ್ಯ ರಜ॑ಸೋ ಮ॒ಹಸ್ಪರಂ॒ ಕ್ವಾವ॑ರಂ ಮರುತೋ॒ ಯಸ್ಮಿ॑ನ್ನಾಯ॒ಯ । ಯಚ್ಚ್ಯಾ॒ವಯ॑ಥ ವಿಥು॒ರೇವ॒ ಸಂಹಿ॑ತಂ॒ ವ್ಯದ್ರಿ॑ಣಾ ಪತಥ ತ್ವೇ॒ಷಮ॑ರ್ಣ॒ವಂ ॥
क्व॑ स्विद॒स्य रज॑सो म॒हस्परं॒ क्वाव॑रं मरुतो॒ यस्मि॑न्नाय॒य । यच्च्या॒वय॑थ विथु॒रेव॒ संहि॑तं॒ व्यद्रि॑णा पतथ त्वे॒षम॑र्ण॒वं ॥
ಸಾ॒ತಿರ್ನ ವೋಽಮ॑ವತೀ॒ ಸ್ವ॑ರ್ವತೀ ತ್ವೇ॒ಷಾ ವಿಪಾ॑ಕಾ ಮರುತಃ॒ ಪಿಪಿ॑ಷ್ವತೀ । ಭ॒ದ್ರಾ ವೋ॑ ರಾ॒ತಿಃ ಪೃ॑ಣ॒ತೋ ನ ದಕ್ಷಿ॑ಣಾ ಪೃಥು॒ಜ್ರಯೀ॑ ಅಸು॒ರ್ಯೇ॑ವ॒ ಜಂಜ॑ತೀ ॥
सा॒तिर्न वोऽम॑वती॒ स्व॑र्वती त्वे॒षा विपा॑का मरुतः॒ पिपि॑ष्वती । भ॒द्रा वो॑ रा॒तिः पृ॑ण॒तो न दक्षि॑णा पृथु॒ज्रयी॑ असु॒र्ये॑व॒ जंज॑ती ॥
ಪ್ರತಿ॑ ಷ್ಟೋಭಂತಿ॒ ಸಿಂಧ॑ವಃ ಪ॒ವಿಭ್ಯೋ॒ ಯದ॒ಭ್ರಿಯಾಂ॒ ವಾಚ॑ಮುದೀ॒ರಯಂ॑ತಿ । ಅವ॑ ಸ್ಮಯಂತ ವಿ॒ದ್ಯುತಃ॑ ಪೃಥಿ॒ವ್ಯಾಂ ಯದೀ॑ ಘೃ॒ತಂ ಮ॒ರುತಃ॑ ಪ್ರುಷ್ಣು॒ವಂತಿ॑ ॥
प्रति॑ ष्टोभंति॒ सिंध॑वः प॒विभ्यो॒ यद॒भ्रियां॒ वाच॑मुदी॒रयं॑ति । अव॑ स्मयंत वि॒द्युतः॑ पृथि॒व्यां यदी॑ घृ॒तं म॒रुतः॑ प्रुष्णु॒वंति॑ ॥
ಅಸೂ॑ತ॒ ಪೃಶ್ನಿ॑ರ್ಮಹ॒ತೇ ರಣಾ॑ಯ ತ್ವೇ॒ಷಮ॒ಯಾಸಾಂ॑ ಮ॒ರುತಾ॒ಮನೀ॑ಕಂ । ತೇ ಸ॑ಪ್ಸ॒ರಾಸೋ॑ಽಜನಯಂ॒ತಾಭ್ವ॒ಮಾದಿತ್ಸ್ವ॒ಧಾಮಿ॑ಷಿ॒ರಾಂ ಪರ್ಯ॑ಪಶ್ಯನ್ ॥
असू॑त॒ पृश्नि॑र्मह॒ते रणा॑य त्वे॒षम॒यासां॑ म॒रुता॒मनी॑कं । ते स॑प्स॒रासो॑ऽजनयं॒ताभ्व॒मादित्स्व॒धामि॑षि॒रां पर्य॑पश्यन् ॥
ಏ॒ಷ ವಃ॒ ಸ್ತೋಮೋ॑ ಮರುತ ಇ॒ಯಂ ಗೀರ್ಮಾಂ॑ದಾ॒ರ್ಯಸ್ಯ॑ ಮಾ॒ನ್ಯಸ್ಯ॑ ಕಾ॒ರೋಃ । ಏಷಾ ಯಾ॑ಸೀಷ್ಟ ತ॒ನ್ವೇ॑ ವ॒ಯಾಂ ವಿ॒ದ್ಯಾಮೇ॒ಷಂ ವೃ॒ಜನಂ॑ ಜೀ॒ರದಾ॑ನುಂ ॥
ए॒ष वः॒ स्तोमो॑ मरुत इ॒यं गीर्मां॑दा॒र्यस्य॑ मा॒न्यस्य॑ का॒रोः । एषा या॑सीष्ट त॒न्वे॑ व॒यां वि॒द्यामे॒षं वृ॒जनं॑ जी॒रदा॑नुं ॥