ಸೂಕ್ತ 167

ಸ॒ಹಸ್ರಂ॑ ತ ಇಂದ್ರೋ॒ತಯೋ॑ ನಃ ಸ॒ಹಸ್ರ॒ಮಿಷೋ॑ ಹರಿವೋ ಗೂ॒ರ್ತತ॑ಮಾಃ । ಸ॒ಹಸ್ರಂ॒ ರಾಯೋ॑ ಮಾದ॒ಯಧ್ಯೈ॑ ಸಹ॒ಸ್ರಿಣ॒ ಉಪ॑ ನೋ ಯಂತು॒ ವಾಜಾಃ॑ ॥

स॒हस्रं॑ त इंद्रो॒तयो॑ नः स॒हस्र॒मिषो॑ हरिवो गू॒र्तत॑माः । स॒हस्रं॒ रायो॑ माद॒यध्यै॑ सह॒स्रिण॒ उप॑ नो यंतु॒ वाजाः॑ ॥

ಆ ನೋಽವೋ॑ಭಿರ್ಮ॒ರುತೋ॑ ಯಾಂ॒ತ್ವಚ್ಛಾ॒ ಜ್ಯೇಷ್ಠೇ॑ಭಿರ್ವಾ ಬೃ॒ಹದ್ದಿ॑ವೈಃ ಸುಮಾ॒ಯಾಃ । ಅಧ॒ ಯದೇ॑ಷಾಂ ನಿ॒ಯುತಃ॑ ಪರ॒ಮಾಃ ಸ॑ಮು॒ದ್ರಸ್ಯ॑ ಚಿದ್ಧ॒ನಯಂ॑ತ ಪಾ॒ರೇ ॥

आ नोऽवो॑भिर्म॒रुतो॑ यां॒त्वच्छा॒ ज्येष्ठे॑भिर्वा बृ॒हद्दि॑वैः सुमा॒याः । अध॒ यदे॑षां नि॒युतः॑ पर॒माः स॑मु॒द्रस्य॑ चिद्ध॒नयं॑त पा॒रे ॥

ಮಿ॒ಮ್ಯಕ್ಷ॒ ಯೇಷು॒ ಸುಧಿ॑ತಾ ಘೃ॒ತಾಚೀ॒ ಹಿರ॑ಣ್ಯನಿರ್ಣಿ॒ಗುಪ॑ರಾ॒ ನ ಋ॒ಷ್ಟಿಃ । ಗುಹಾ॒ ಚರಂ॑ತೀ॒ ಮನು॑ಷೋ॒ ನ ಯೋಷಾ॑ ಸ॒ಭಾವ॑ತೀ ವಿದ॒ಥ್ಯೇ॑ವ॒ ಸಂ ವಾಕ್ ॥

मि॒म्यक्ष॒ येषु॒ सुधि॑ता घृ॒ताची॒ हिर॑ण्यनिर्णि॒गुप॑रा॒ न ऋ॒ष्टिः । गुहा॒ चरं॑ती॒ मनु॑षो॒ न योषा॑ स॒भाव॑ती विद॒थ्ये॑व॒ सं वाक् ॥

ಪರಾ॑ ಶು॒ಭ್ರಾ ಅ॒ಯಾಸೋ॑ ಯ॒ವ್ಯಾ ಸಾ॑ಧಾರ॒ಣ್ಯೇವ॑ ಮ॒ರುತೋ॑ ಮಿಮಿಕ್ಷುಃ । ನ ರೋ॑ದ॒ಸೀ ಅಪ॑ ನುದಂತ ಘೋ॒ರಾ ಜು॒ಷಂತ॒ ವೃಧಂ॑ ಸ॒ಖ್ಯಾಯ॑ ದೇ॒ವಾಃ ॥

परा॑ शु॒भ्रा अ॒यासो॑ य॒व्या सा॑धार॒ण्येव॑ म॒रुतो॑ मिमिक्षुः । न रो॑द॒सी अप॑ नुदंत घो॒रा जु॒षंत॒ वृधं॑ स॒ख्याय॑ दे॒वाः ॥

ಜೋಷ॒ದ್ಯದೀ॑ಮಸು॒ರ್ಯಾ॑ ಸ॒ಚಧ್ಯೈ॒ ವಿಷಿ॑ತಸ್ತುಕಾ ರೋದ॒ಸೀ ನೃ॒ಮಣಾಃ॑ । ಆ ಸೂ॒ರ್ಯೇವ॑ ವಿಧ॒ತೋ ರಥಂ॑ ಗಾತ್ತ್ವೇ॒ಷಪ್ರ॑ತೀಕಾ॒ ನಭ॑ಸೋ॒ ನೇತ್ಯಾ ॥

जोष॒द्यदी॑मसु॒र्या॑ स॒चध्यै॒ विषि॑तस्तुका रोद॒सी नृ॒मणाः॑ । आ सू॒र्येव॑ विध॒तो रथं॑ गात्त्वे॒षप्र॑तीका॒ नभ॑सो॒ नेत्या ॥

ಆಸ್ಥಾ॑ಪಯಂತ ಯುವ॒ತಿಂ ಯುವಾ॑ನಃ ಶು॒ಭೇ ನಿಮಿ॑ಶ್ಲಾಂ ವಿ॒ದಥೇ॑ಷು ಪ॒ಜ್ರಾಂ । ಅ॒ರ್ಕೋ ಯದ್ವೋ॑ ಮರುತೋ ಹ॒ವಿಷ್ಮಾ॒ನ್ಗಾಯ॑ದ್ಗಾ॒ಥಂ ಸು॒ತಸೋ॑ಮೋ ದುವ॒ಸ್ಯನ್ ॥

आस्था॑पयंत युव॒तिं युवा॑नः शु॒भे निमि॑श्लां वि॒दथे॑षु प॒ज्रां । अ॒र्को यद्वो॑ मरुतो ह॒विष्मा॒न्गाय॑द्गा॒थं सु॒तसो॑मो दुव॒स्यन् ॥

ಪ್ರ ತಂ ವಿ॑ವಕ್ಮಿ॒ ವಕ್ಮ್ಯೋ॒ ಯ ಏ॑ಷಾಂ ಮ॒ರುತಾಂ॑ ಮಹಿ॒ಮಾ ಸ॒ತ್ಯೋ ಅಸ್ತಿ॑ । ಸಚಾ॒ ಯದೀಂ॒ ವೃಷ॑ಮಣಾ ಅಹಂ॒ಯುಃ ಸ್ಥಿ॒ರಾ ಚಿ॒ಜ್ಜನೀ॒ರ್ವಹ॑ತೇ ಸುಭಾ॒ಗಾಃ ॥

प्र तं वि॑वक्मि॒ वक्म्यो॒ य ए॑षां म॒रुतां॑ महि॒मा स॒त्यो अस्ति॑ । सचा॒ यदीं॒ वृष॑मणा अहं॒युः स्थि॒रा चि॒ज्जनी॒र्वह॑ते सुभा॒गाः ॥

ಪಾಂತಿ॑ ಮಿ॒ತ್ರಾವರು॑ಣಾವವ॒ದ್ಯಾಚ್ಚಯ॑ತ ಈಮರ್ಯ॒ಮೋ ಅಪ್ರ॑ಶಸ್ತಾನ್ । ಉ॒ತ ಚ್ಯ॑ವಂತೇ॒ ಅಚ್ಯು॑ತಾ ಧ್ರು॒ವಾಣಿ॑ ವಾವೃ॒ಧ ಈಂ॑ ಮರುತೋ॒ ದಾತಿ॑ವಾರಃ ॥

पांति॑ मि॒त्रावरु॑णावव॒द्याच्चय॑त ईमर्य॒मो अप्र॑शस्तान् । उ॒त च्य॑वंते॒ अच्यु॑ता ध्रु॒वाणि॑ वावृ॒ध ईं॑ मरुतो॒ दाति॑वारः ॥

ನ॒ಹೀ ನು ವೋ॑ ಮರುತೋ॒ ಅಂತ್ಯ॒ಸ್ಮೇ ಆ॒ರಾತ್ತಾ॑ಚ್ಚಿ॒ಚ್ಛವ॑ಸೋ॒ ಅಂತ॑ಮಾ॒ಪುಃ । ತೇ ಧೃ॒ಷ್ಣುನಾ॒ ಶವ॑ಸಾ ಶೂಶು॒ವಾಂಸೋಽರ್ಣೋ॒ ನ ದ್ವೇಷೋ॑ ಧೃಷ॒ತಾ ಪರಿ॑ ಷ್ಠುಃ ॥

न॒ही नु वो॑ मरुतो॒ अंत्य॒स्मे आ॒रात्ता॑च्चि॒च्छव॑सो॒ अंत॑मा॒पुः । ते धृ॒ष्णुना॒ शव॑सा शूशु॒वांसोऽर्णो॒ न द्वेषो॑ धृष॒ता परि॑ ष्ठुः ॥

ವ॒ಯಮ॒ದ್ಯೇಂದ್ರ॑ಸ್ಯ॒ ಪ್ರೇಷ್ಠಾ॑ ವ॒ಯಂ ಶ್ವೋ ವೋ॑ಚೇಮಹಿ ಸಮ॒ರ್ಯೇ । ವ॒ಯಂ ಪು॒ರಾ ಮಹಿ॑ ಚ ನೋ॒ ಅನು॒ ದ್ಯೂನ್ತನ್ನ॑ ಋಭು॒ಕ್ಷಾ ನ॒ರಾಮನು॑ ಷ್ಯಾತ್ ॥

व॒यम॒द्येंद्र॑स्य॒ प्रेष्ठा॑ व॒यं श्वो वो॑चेमहि सम॒र्ये । व॒यं पु॒रा महि॑ च नो॒ अनु॒ द्यून्तन्न॑ ऋभु॒क्षा न॒रामनु॑ ष्यात् ॥

ಏ॒ಷ ವಃ॒ ಸ್ತೋಮೋ॑ ಮರುತ ಇ॒ಯಂ ಗೀರ್ಮಾಂ॑ದಾ॒ರ್ಯಸ್ಯ॑ ಮಾ॒ನ್ಯಸ್ಯ॑ ಕಾ॒ರೋಃ । ಏಷಾ ಯಾ॑ಸೀಷ್ಟ ತ॒ನ್ವೇ॑ ವ॒ಯಾಂ ವಿ॒ದ್ಯಾಮೇ॒ಷಂ ವೃ॒ಜನಂ॑ ಜೀ॒ರದಾ॑ನುಂ ॥

ए॒ष वः॒ स्तोमो॑ मरुत इ॒यं गीर्मां॑दा॒र्यस्य॑ मा॒न्यस्य॑ का॒रोः । एषा या॑सीष्ट त॒न्वे॑ व॒यां वि॒द्यामे॒षं वृ॒जनं॑ जी॒रदा॑नुं ॥