ಈ ಸೂಕ್ತಕ್ಕೆ ಅಡ್ಮಿನ್‌ನಲ್ಲಿ ಕನ್ನಡ ಅಧ್ಯಯನ ಮಾರ್ಗದರ್ಶಿ (Study Guide) ಇನ್ನೂ ರಚನೆಯಾಗಿಲ್ಲ. ಅಡ್ಮಿನ್‌ನಲ್ಲಿ Generate Study Guides ಮೂಲಕ ಕನ್ನಡ ಭಾಷೆಯನ್ನು ಆಯ್ಕೆಮಾಡಿ ರಚಿಸಬಹುದು.
ಅಬೋ॑ಧ್ಯ॒ಗ್ನಿರ್ಜ್ಮ ಉದೇ॑ತಿ॒ ಸೂರ್ಯೋ॒ ವ್ಯು೧॒॑ಷಾಶ್ಚಂ॒ದ್ರಾ ಮ॒ಹ್ಯಾ॑ವೋ ಅ॒ರ್ಚಿಷಾ॑ । ಆಯು॑ಕ್ಷಾತಾಮ॒ಶ್ವಿನಾ॒ ಯಾತ॑ವೇ॒ ರಥಂ॒ ಪ್ರಾಸಾ॑ವೀದ್ದೇ॒ವಃ ಸ॑ವಿ॒ತಾ ಜಗ॒ತ್ಪೃಥ॑ಕ್ ॥
अबो॑ध्य॒ग्निर्ज्म उदे॑ति॒ सूर्यो॒ व्यु१॒॑षाश्चं॒द्रा म॒ह्या॑वो अ॒र्चिषा॑ । आयु॑क्षाताम॒श्विना॒ यात॑वे॒ रथं॒ प्रासा॑वीद्दे॒वः स॑वि॒ता जग॒त्पृथ॑क् ॥
ಯದ್ಯುಂ॒ಜಾಥೇ॒ ವೃಷ॑ಣಮಶ್ವಿನಾ॒ ರಥಂ॑ ಘೃ॒ತೇನ॑ ನೋ॒ ಮಧು॑ನಾ ಕ್ಷ॒ತ್ರಮು॑ಕ್ಷತಂ । ಅ॒ಸ್ಮಾಕಂ॒ ಬ್ರಹ್ಮ॒ ಪೃತ॑ನಾಸು ಜಿನ್ವತಂ ವ॒ಯಂ ಧನಾ॒ ಶೂರ॑ಸಾತಾ ಭಜೇಮಹಿ ॥
यद्युं॒जाथे॒ वृष॑णमश्विना॒ रथं॑ घृ॒तेन॑ नो॒ मधु॑ना क्ष॒त्रमु॑क्षतं । अ॒स्माकं॒ ब्रह्म॒ पृत॑नासु जिन्वतं व॒यं धना॒ शूर॑साता भजेमहि ॥
ಅ॒ರ್ವಾಙ್ ತ್ರಿ॑ಚ॒ಕ್ರೋ ಮ॑ಧು॒ವಾಹ॑ನೋ॒ ರಥೋ॑ ಜೀ॒ರಾಶ್ವೋ॑ ಅ॒ಶ್ವಿನೋ॑ರ್ಯಾತು॒ ಸುಷ್ಟು॑ತಃ । ತ್ರಿ॒ವಂ॒ಧು॒ರೋ ಮ॒ಘವಾ॑ ವಿ॒ಶ್ವಸೌ॑ಭಗಃ॒ ಶಂ ನ॒ ಆ ವ॑ಕ್ಷದ್ದ್ವಿ॒ಪದೇ॒ ಚತು॑ಷ್ಪದೇ ॥
अ॒र्वाङ् त्रि॑च॒क्रो म॑धु॒वाह॑नो॒ रथो॑ जी॒राश्वो॑ अ॒श्विनो॑र्यातु॒ सुष्टु॑तः । त्रि॒वं॒धु॒रो म॒घवा॑ वि॒श्वसौ॑भगः॒ शं न॒ आ व॑क्षद्द्वि॒पदे॒ चतु॑ष्पदे ॥
ಆ ನ॒ ಊರ್ಜಂ॑ ವಹತಮಶ್ವಿನಾ ಯು॒ವಂ ಮಧು॑ಮತ್ಯಾ ನಃ॒ ಕಶ॑ಯಾ ಮಿಮಿಕ್ಷತಂ । ಪ್ರಾಯು॒ಸ್ತಾರಿ॑ಷ್ಟಂ॒ ನೀ ರಪಾಂ॑ಸಿ ಮೃಕ್ಷತಂ॒ ಸೇಧ॑ತಂ॒ ದ್ವೇಷೋ॒ ಭವ॑ತಂ ಸಚಾ॒ಭುವಾ॑ ॥
आ न॒ ऊर्जं॑ वहतमश्विना यु॒वं मधु॑मत्या नः॒ कश॑या मिमिक्षतं । प्रायु॒स्तारि॑ष्टं॒ नी रपां॑सि मृक्षतं॒ सेध॑तं॒ द्वेषो॒ भव॑तं सचा॒भुवा॑ ॥
ಯು॒ವಂ ಹ॒ ಗರ್ಭಂ॒ ಜಗ॑ತೀಷು ಧತ್ಥೋ ಯು॒ವಂ ವಿಶ್ವೇ॑ಷು॒ ಭುವ॑ನೇಷ್ವಂ॒ತಃ । ಯು॒ವಮ॒ಗ್ನಿಂ ಚ॑ ವೃಷಣಾವ॒ಪಶ್ಚ॒ ವನ॒ಸ್ಪತೀಁ॑ರಶ್ವಿನಾ॒ವೈರ॑ಯೇಥಾಂ ॥
यु॒वं ह॒ गर्भं॒ जग॑तीषु धत्थो यु॒वं विश्वे॑षु॒ भुव॑नेष्वं॒तः । यु॒वम॒ग्निं च॑ वृषणाव॒पश्च॒ वन॒स्पतीँ॑रश्विना॒वैर॑येथां ॥
ಯು॒ವಂ ಹ॑ ಸ್ಥೋ ಭಿ॒ಷಜಾ॑ ಭೇಷ॒ಜೇಭಿ॒ರಥೋ॑ ಹ ಸ್ಥೋ ರ॒ಥ್ಯಾ॒೩॒॑ ರಾಥ್ಯೇ॑ಭಿಃ । ಅಥೋ॑ ಹ ಕ್ಷ॒ತ್ರಮಧಿ॑ ಧತ್ಥ ಉಗ್ರಾ॒ ಯೋ ವಾಂ॑ ಹ॒ವಿಷ್ಮಾ॒ನ್ಮನ॑ಸಾ ದ॒ದಾಶ॑ ॥
यु॒वं ह॑ स्थो भि॒षजा॑ भेष॒जेभि॒रथो॑ ह स्थो र॒थ्या॒३॒॑ राथ्ये॑भिः । अथो॑ ह क्ष॒त्रमधि॑ धत्थ उग्रा॒ यो वां॑ ह॒विष्मा॒न्मन॑सा द॒दाश॑ ॥