ಸೂಕ್ತ 155

ಪ್ರ ವಃ॒ ಪಾಂತ॒ಮಂಧ॑ಸೋ ಧಿಯಾಯ॒ತೇ ಮ॒ಹೇ ಶೂರಾ॑ಯ॒ ವಿಷ್ಣ॑ವೇ ಚಾರ್ಚತ । ಯಾ ಸಾನು॑ನಿ॒ ಪರ್ವ॑ತಾನಾ॒ಮದಾ॑ಭ್ಯಾ ಮ॒ಹಸ್ತ॒ಸ್ಥತು॒ರರ್ವ॑ತೇವ ಸಾ॒ಧುನಾ॑ ॥

प्र वः॒ पांत॒मंध॑सो धियाय॒ते म॒हे शूरा॑य॒ विष्ण॑वे चार्चत । या सानु॑नि॒ पर्व॑ताना॒मदा॑भ्या म॒हस्त॒स्थतु॒रर्व॑तेव सा॒धुना॑ ॥

ತ್ವೇ॒ಷಮಿ॒ತ್ಥಾ ಸ॒ಮರ॑ಣಂ॒ ಶಿಮೀ॑ವತೋ॒ರಿಂದ್ರಾ॑ವಿಷ್ಣೂ ಸುತ॒ಪಾ ವಾ॑ಮುರುಷ್ಯತಿ । ಯಾ ಮರ್ತ್ಯಾ॑ಯ ಪ್ರತಿಧೀ॒ಯಮಾ॑ನ॒ಮಿತ್ಕೃ॒ಶಾನೋ॒ರಸ್ತು॑ರಸ॒ನಾಮು॑ರು॒ಷ್ಯಥಃ॑ ॥

त्वे॒षमि॒त्था स॒मर॑णं॒ शिमी॑वतो॒रिंद्रा॑विष्णू सुत॒पा वा॑मुरुष्यति । या मर्त्या॑य प्रतिधी॒यमा॑न॒मित्कृ॒शानो॒रस्तु॑रस॒नामु॑रु॒ष्यथः॑ ॥

ತಾ ಈಂ॑ ವರ್ಧಂತಿ॒ ಮಹ್ಯ॑ಸ್ಯ॒ ಪೌಂಸ್ಯಂ॒ ನಿ ಮಾ॒ತರಾ॑ ನಯತಿ॒ ರೇತ॑ಸೇ ಭು॒ಜೇ । ದಧಾ॑ತಿ ಪು॒ತ್ರೋಽವ॑ರಂ॒ ಪರಂ॑ ಪಿ॒ತುರ್ನಾಮ॑ ತೃ॒ತೀಯ॒ಮಧಿ॑ ರೋಚ॒ನೇ ದಿ॒ವಃ ॥

ता ईं॑ वर्धंति॒ मह्य॑स्य॒ पौंस्यं॒ नि मा॒तरा॑ नयति॒ रेत॑से भु॒जे । दधा॑ति पु॒त्रोऽव॑रं॒ परं॑ पि॒तुर्नाम॑ तृ॒तीय॒मधि॑ रोच॒ने दि॒वः ॥

ತತ್ತ॒ದಿದ॑ಸ್ಯ॒ ಪೌಂಸ್ಯಂ॑ ಗೃಣೀಮಸೀ॒ನಸ್ಯ॑ ತ್ರಾ॒ತುರ॑ವೃ॒ಕಸ್ಯ॑ ಮೀ॒ಳ್ಹುಷಃ॑ । ಯಃ ಪಾರ್ಥಿ॑ವಾನಿ ತ್ರಿ॒ಭಿರಿದ್ವಿಗಾ॑ಮಭಿರು॒ರು ಕ್ರಮಿ॑ಷ್ಟೋರುಗಾ॒ಯಾಯ॑ ಜೀ॒ವಸೇ॑ ॥

तत्त॒दिद॑स्य॒ पौंस्यं॑ गृणीमसी॒नस्य॑ त्रा॒तुर॑वृ॒कस्य॑ मी॒ळ्हुषः॑ । यः पार्थि॑वानि त्रि॒भिरिद्विगा॑मभिरु॒रु क्रमि॑ष्टोरुगा॒याय॑ जी॒वसे॑ ॥

ದ್ವೇ ಇದ॑ಸ್ಯ॒ ಕ್ರಮ॑ಣೇ ಸ್ವ॒ರ್ದೃಶೋ॑ಽಭಿ॒ಖ್ಯಾಯ॒ ಮರ್ತ್ಯೋ॑ ಭುರಣ್ಯತಿ । ತೃ॒ತೀಯ॑ಮಸ್ಯ॒ ನಕಿ॒ರಾ ದ॑ಧರ್ಷತಿ॒ ವಯ॑ಶ್ಚ॒ನ ಪ॒ತಯಂ॑ತಃ ಪತ॒ತ್ರಿಣಃ॑ ॥

द्वे इद॑स्य॒ क्रम॑णे स्व॒र्दृशो॑ऽभि॒ख्याय॒ मर्त्यो॑ भुरण्यति । तृ॒तीय॑मस्य॒ नकि॒रा द॑धर्षति॒ वय॑श्च॒न प॒तयं॑तः पत॒त्रिणः॑ ॥

ಚ॒ತುರ್ಭಿಃ॑ ಸಾ॒ಕಂ ನ॑ವ॒ತಿಂ ಚ॒ ನಾಮ॑ಭಿಶ್ಚ॒ಕ್ರಂ ನ ವೃ॒ತ್ತಂ ವ್ಯತೀಁ॑ರವೀವಿಪತ್ । ಬೃ॒ಹಚ್ಛ॑ರೀರೋ ವಿ॒ಮಿಮಾ॑ನ॒ ಋಕ್ವ॑ಭಿ॒ರ್ಯುವಾಕು॑ಮಾರಃ॒ ಪ್ರತ್ಯೇ॑ತ್ಯಾಹ॒ವಂ ॥

च॒तुर्भिः॑ सा॒कं न॑व॒तिं च॒ नाम॑भिश्च॒क्रं न वृ॒त्तं व्यतीँ॑रवीविपत् । बृ॒हच्छ॑रीरो वि॒मिमा॑न॒ ऋक्व॑भि॒र्युवाकु॑मारः॒ प्रत्ये॑त्याह॒वं ॥