ಸೂಕ್ತ 152

ಯು॒ವಂ ವಸ್ತ್ರಾ॑ಣಿ ಪೀವ॒ಸಾ ವ॑ಸಾಥೇ ಯು॒ವೋರಚ್ಛಿ॑ದ್ರಾ॒ ಮಂತ॑ವೋ ಹ॒ ಸರ್ಗಾಃ॑ । ಅವಾ॑ತಿರತ॒ಮನೃ॑ತಾನಿ॒ ವಿಶ್ವ॑ ಋ॒ತೇನ॑ ಮಿತ್ರಾವರುಣಾ ಸಚೇಥೇ ॥

यु॒वं वस्त्रा॑णि पीव॒सा व॑साथे यु॒वोरच्छि॑द्रा॒ मंत॑वो ह॒ सर्गाः॑ । अवा॑तिरत॒मनृ॑तानि॒ विश्व॑ ऋ॒तेन॑ मित्रावरुणा सचेथे ॥

ಏ॒ತಚ್ಚ॒ನ ತ್ವೋ॒ ವಿ ಚಿ॑ಕೇತದೇಷಾಂ ಸ॒ತ್ಯೋ ಮಂತ್ರಃ॑ ಕವಿಶ॒ಸ್ತ ಋಘಾ॑ವಾನ್ । ತ್ರಿ॒ರಶ್ರಿಂ॑ ಹಂತಿ॒ ಚತು॑ರಶ್ರಿರು॒ಗ್ರೋ ದೇ॑ವ॒ನಿದೋ॒ ಹ ಪ್ರ॑ಥ॒ಮಾ ಅ॑ಜೂರ್ಯನ್ ॥

ए॒तच्च॒न त्वो॒ वि चि॑केतदेषां स॒त्यो मंत्रः॑ कविश॒स्त ऋघा॑वान् । त्रि॒रश्रिं॑ हंति॒ चतु॑रश्रिरु॒ग्रो दे॑व॒निदो॒ ह प्र॑थ॒मा अ॑जूर्यन् ॥

ಅ॒ಪಾದೇ॑ತಿ ಪ್ರಥ॒ಮಾ ಪ॒ದ್ವತೀ॑ನಾಂ॒ ಕಸ್ತದ್ವಾಂ॑ ಮಿತ್ರಾವರು॒ಣಾ ಚಿ॑ಕೇತ । ಗರ್ಭೋ॑ ಭಾ॒ರಂ ಭ॑ರ॒ತ್ಯಾ ಚಿ॑ದಸ್ಯ ಋ॒ತಂ ಪಿಪ॒ರ್ತ್ಯನೃ॑ತಂ॒ ನಿ ತಾ॑ರೀತ್ ॥

अ॒पादे॑ति प्रथ॒मा प॒द्वती॑नां॒ कस्तद्वां॑ मित्रावरु॒णा चि॑केत । गर्भो॑ भा॒रं भ॑र॒त्या चि॑दस्य ऋ॒तं पिप॒र्त्यनृ॑तं॒ नि ता॑रीत् ॥

ಪ್ರ॒ಯಂತ॒ಮಿತ್ಪರಿ॑ ಜಾ॒ರಂ ಕ॒ನೀನಾಂ॒ ಪಶ್ಯಾ॑ಮಸಿ॒ ನೋಪ॑ನಿ॒ಪದ್ಯ॑ಮಾನಂ । ಅನ॑ವಪೃಗ್ಣಾ॒ ವಿತ॑ತಾ॒ ವಸಾ॑ನಂ ಪ್ರಿ॒ಯಂ ಮಿ॒ತ್ರಸ್ಯ॒ ವರು॑ಣಸ್ಯ॒ ಧಾಮ॑ ॥

प्र॒यंत॒मित्परि॑ जा॒रं क॒नीनां॒ पश्या॑मसि॒ नोप॑नि॒पद्य॑मानं । अन॑वपृग्णा॒ वित॑ता॒ वसा॑नं प्रि॒यं मि॒त्रस्य॒ वरु॑णस्य॒ धाम॑ ॥

ಅ॒ನ॒ಶ್ವೋ ಜಾ॒ತೋ ಅ॑ನಭೀ॒ಶುರರ್ವಾ॒ ಕನಿ॑ಕ್ರದತ್ಪತಯದೂ॒ರ್ಧ್ವಸಾ॑ನುಃ । ಅ॒ಚಿತ್ತಂ॒ ಬ್ರಹ್ಮ॑ ಜುಜುಷು॒ರ್ಯುವಾ॑ನಃ॒ ಪ್ರ ಮಿ॒ತ್ರೇ ಧಾಮ॒ ವರು॑ಣೇ ಗೃ॒ಣಂತಃ॑ ॥

अ॒न॒श्वो जा॒तो अ॑नभी॒शुरर्वा॒ कनि॑क्रदत्पतयदू॒र्ध्वसा॑नुः । अ॒चित्तं॒ ब्रह्म॑ जुजुषु॒र्युवा॑नः॒ प्र मि॒त्रे धाम॒ वरु॑णे गृ॒णंतः॑ ॥

ಆ ಧೇ॒ನವೋ॑ ಮಾಮತೇ॒ಯಮವಂ॑ತೀರ್ಬ್ರಹ್ಮ॒ಪ್ರಿಯಂ॑ ಪೀಪಯ॒ನ್ತ್ಸಸ್ಮಿ॒ನ್ನೂಧ॑ನ್ । ಪಿ॒ತ್ವೋ ಭಿ॑ಕ್ಷೇತ ವ॒ಯುನಾ॑ನಿ ವಿ॒ದ್ವಾನಾ॒ಸಾವಿವಾ॑ಸ॒ನ್ನದಿ॑ತಿಮುರುಷ್ಯೇತ್ ॥

आ धे॒नवो॑ मामते॒यमवं॑तीर्ब्रह्म॒प्रियं॑ पीपय॒न्त्सस्मि॒न्नूध॑न् । पि॒त्वो भि॑क्षेत व॒युना॑नि वि॒द्वाना॒साविवा॑स॒न्नदि॑तिमुरुष्येत् ॥

ಆ ವಾಂ॑ ಮಿತ್ರಾವರುಣಾ ಹ॒ವ್ಯಜು॑ಷ್ಟಿಂ॒ ನಮ॑ಸಾ ದೇವಾ॒ವವ॑ಸಾ ವವೃತ್ಯಾಂ । ಅ॒ಸ್ಮಾಕಂ॒ ಬ್ರಹ್ಮ॒ ಪೃತ॑ನಾಸು ಸಹ್ಯಾ ಅ॒ಸ್ಮಾಕಂ॑ ವೃ॒ಷ್ಟಿರ್ದಿ॒ವ್ಯಾ ಸು॑ಪಾ॒ರಾ ॥

आ वां॑ मित्रावरुणा ह॒व्यजु॑ष्टिं॒ नम॑सा देवा॒वव॑सा ववृत्यां । अ॒स्माकं॒ ब्रह्म॒ पृत॑नासु सह्या अ॒स्माकं॑ वृ॒ष्टिर्दि॒व्या सु॑पा॒रा ॥