Sūkta 142

समि॑द्धो अग्न॒ आ व॑ह दे॒वाँ अ॒द्य य॒तस्रु॑चे । तंतुं॑ तनुष्व पू॒र्व्यं सु॒तसो॑माय दा॒शुषे॑ ॥

sámiddho agna ā́ vaha devā́m̐ adyá yatásruce ǀ tántum tanuṣva pūrvyám sutásomāya dāśúṣe ǁ

घृ॒तवं॑त॒मुप॑ मासि॒ मधु॑मंतं तनूनपात् । य॒ज्ञं विप्र॑स्य॒ माव॑तः शशमा॒नस्य॑ दा॒शुषः॑ ॥

ghṛtávantamúpa māsi mádhumantam tanūnapāt ǀ yajñám víprasya mā́vataḥ śaśamānásya dāśúṣaḥ ǁ

शुचिः॑ पाव॒को अद्भु॑तो॒ मध्वा॑ य॒ज्ञं मि॑मिक्षति । नरा॒शंस॒स्त्रिरा दि॒वो दे॒वो दे॒वेषु॑ य॒ज्ञियः॑ ॥

śúciḥ pāvakó ádbhuto mádhvā yajñám mimikṣati ǀ nárāśáṃsastrírā́ divó devó devéṣu yajñíyaḥ ǁ

ई॒ळि॒तो अ॑ग्न॒ आ व॒हेंद्रं॑ चि॒त्रमि॒ह प्रि॒यं । इ॒यं हि त्वा॑ म॒तिर्ममाच्छा॑ सुजिह्व व॒च्यते॑ ॥

īḷitó agna ā́ vahéndram citrámihá priyám ǀ iyám hí tvā matírmámā́cchā sujihva vacyáte ǁ

स्तृ॒णा॒नासो॑ य॒तस्रु॑चो ब॒र्हिर्य॒ज्ञे स्व॑ध्व॒रे । वृं॒जे दे॒वव्य॑चस्तम॒मिंद्रा॑य॒ शर्म॑ स॒प्रथः॑ ॥

stṛṇānā́so yatásruco barhíryajñé svadhvaré ǀ vṛñjé devávyacastamamíndrāya śárma sapráthaḥ ǁ

वि श्र॑यंतामृता॒वृधः॑ प्र॒यै दे॒वेभ्यो॑ म॒हीः । पा॒व॒कासः॑ पुरु॒स्पृहो॒ द्वारो॑ दे॒वीर॑स॒श्चतः॑ ॥

ví śrayantāmṛtāvṛ́dhaḥ prayái devébhyo mahī́ḥ ǀ pāvakā́saḥ puruspṛ́ho dvā́ro devī́rasaścátaḥ ǁ

आ भंद॑माने॒ उपा॑के॒ नक्तो॒षासा॑ सु॒पेश॑सा । य॒ह्वी ऋ॒तस्य॑ मा॒तरा॒ सीद॑तां ब॒र्हिरा सु॒मत् ॥

ā́ bhándamāne úpāke náktoṣā́sā supéśasā ǀ yahvī́ ṛtásya mātárā sī́datām barhírā́ sumát ǁ

मं॒द्रजि॑ह्वा जुगु॒र्वणी॒ होता॑रा॒ दैव्या॑ क॒वी । य॒ज्ञं नो॑ यक्षतामि॒मं सि॒ध्रम॒द्य दि॑वि॒स्पृशं॑ ॥

mandrájihvā jugurváṇī hótārā dáivyā kavī́ ǀ yajñám no yakṣatāmimám sidhrámadyá divispṛ́śam ǁ

शुचि॑र्दे॒वेष्वर्पि॑ता॒ होत्रा॑ म॒रुत्सु॒ भार॑ती । इळा॒ सर॑स्वती म॒ही ब॒र्हिः सी॑दंतु य॒ज्ञियाः॑ ॥

śúcirdevéṣvárpitā hótrā marútsu bhā́ratī ǀ íḷā sárasvatī mahī́ barhíḥ sīdantu yajñíyāḥ ǁ

तन्न॑स्तु॒रीप॒मद्भु॑तं पु॒रु वारं॑ पु॒रु त्मना॑ । त्वष्टा॒ पोषा॑य॒ वि ष्य॑तु रा॒ये नाभा॑ नो अस्म॒युः ॥

tánnasturī́pamádbhutam purú vā́ram purú tmánā ǀ tváṣṭā póṣāya ví ṣyatu rāyé nā́bhā no asmayúḥ ǁ

अ॒व॒सृ॒जन्नुप॒ त्मना॑ दे॒वान्य॑क्षि वनस्पते । अ॒ग्निर्ह॒व्या सु॑षूदति दे॒वो दे॒वेषु॒ मेधि॑रः ॥

avasṛjánnúpa tmánā devā́nyakṣi vanaspate ǀ agnírhavyā́ suṣūdati devó devéṣu médhiraḥ ǁ

पू॒ष॒ण्वते॑ म॒रुत्व॑ते वि॒श्वदे॑वाय वा॒यवे॑ । स्वाहा॑ गाय॒त्रवे॑पसे ह॒व्यमिंद्रा॑य कर्तन ॥

pūṣaṇváte marútvate viśvádevāya vāyáve ǀ svā́hā gāyatrávepase havyámíndrāya kartana ǁ

स्वाहा॑कृता॒न्या ग॒ह्युप॑ ह॒व्यानि॑ वी॒तये॑ । इंद्रा ग॑हि श्रु॒धी हवं॒ त्वां ह॑वंते अध्व॒रे ॥

svā́hākṛtānyā́ gahyúpa havyā́ni vītáye ǀ índrā́ gahi śrudhī́ hávam tvā́m havante adhvaré ǁ