ಈ ಸೂಕ್ತಕ್ಕೆ ಅಡ್ಮಿನ್‌ನಲ್ಲಿ ಕನ್ನಡ ಅಧ್ಯಯನ ಮಾರ್ಗದರ್ಶಿ (Study Guide) ಇನ್ನೂ ರಚನೆಯಾಗಿಲ್ಲ. ಅಡ್ಮಿನ್‌ನಲ್ಲಿ Generate Study Guides ಮೂಲಕ ಕನ್ನಡ ಭಾಷೆಯನ್ನು ಆಯ್ಕೆಮಾಡಿ ರಚಿಸಬಹುದು.
ಪ್ರ ಸು ಜ್ಯೇಷ್ಠಂ॑ ನಿಚಿ॒ರಾಭ್ಯಾಂ॑ ಬೃ॒ಹನ್ನಮೋ॑ ಹ॒ವ್ಯಂ ಮ॒ತಿಂ ಭ॑ರತಾ ಮೃಳ॒ಯದ್ಭ್ಯಾಂ॒ ಸ್ವಾದಿ॑ಷ್ಠಂ ಮೃಳ॒ಯದ್ಭ್ಯಾಂ॑ । ತಾ ಸ॒ಮ್ರಾಜಾ॑ ಘೃ॒ತಾಸು॑ತೀ ಯ॒ಜ್ಞೇಯ॑ಜ್ಞ॒ ಉಪ॑ಸ್ತುತಾ । ಅಥೈ॑ನೋಃ ಕ್ಷ॒ತ್ರಂ ನ ಕುತ॑ಶ್ಚ॒ನಾಧೃಷೇ॑ ದೇವ॒ತ್ವಂ ನೂ ಚಿ॑ದಾ॒ಧೃಷೇ॑ ॥
प्र सु ज्येष्ठं॑ निचि॒राभ्यां॑ बृ॒हन्नमो॑ ह॒व्यं म॒तिं भ॑रता मृळ॒यद्भ्यां॒ स्वादि॑ष्ठं मृळ॒यद्भ्यां॑ । ता स॒म्राजा॑ घृ॒तासु॑ती य॒ज्ञेय॑ज्ञ॒ उप॑स्तुता । अथै॑नोः क्ष॒त्रं न कुत॑श्च॒नाधृषे॑ देव॒त्वं नू चि॑दा॒धृषे॑ ॥
ಅದ॑ರ್ಶಿ ಗಾ॒ತುರು॒ರವೇ॒ ವರೀ॑ಯಸೀ॒ ಪಂಥಾ॑ ಋ॒ತಸ್ಯ॒ ಸಮ॑ಯಂಸ್ತ ರ॒ಶ್ಮಿಭಿ॒ಶ್ಚಕ್ಷು॒ರ್ಭಗ॑ಸ್ಯ ರ॒ಶ್ಮಿಭಿಃ॑ । ದ್ಯು॒ಕ್ಷಂ ಮಿ॒ತ್ರಸ್ಯ॒ ಸಾದ॑ನಮರ್ಯ॒ಮ್ಣೋ ವರು॑ಣಸ್ಯ ಚ । ಅಥಾ॑ ದಧಾತೇ ಬೃ॒ಹದು॒ಕ್ಥ್ಯಂ೧॒॑ ವಯ॑ ಉಪ॒ಸ್ತುತ್ಯಂ॑ ಬೃ॒ಹದ್ವಯಃ॑ ॥
अद॑र्शि गा॒तुरु॒रवे॒ वरी॑यसी॒ पंथा॑ ऋ॒तस्य॒ सम॑यंस्त र॒श्मिभि॒श्चक्षु॒र्भग॑स्य र॒श्मिभिः॑ । द्यु॒क्षं मि॒त्रस्य॒ साद॑नमर्य॒म्णो वरु॑णस्य च । अथा॑ दधाते बृ॒हदु॒क्थ्यं१॒॑ वय॑ उप॒स्तुत्यं॑ बृ॒हद्वयः॑ ॥
ಜ್ಯೋತಿ॑ಷ್ಮತೀ॒ಮದಿ॑ತಿಂ ಧಾರ॒ಯತ್ಕ್ಷಿ॑ತಿಂ॒ ಸ್ವ॑ರ್ವತೀ॒ಮಾ ಸ॑ಚೇತೇ ದಿ॒ವೇದಿ॑ವೇ ಜಾಗೃ॒ವಾಂಸಾ॑ ದಿ॒ವೇದಿ॑ವೇ । ಜ್ಯೋತಿ॑ಷ್ಮತ್ಕ್ಷ॒ತ್ರಮಾ॑ಶಾತೇ ಆದಿ॒ತ್ಯಾ ದಾನು॑ನ॒ಸ್ಪತೀ॑ । ಮಿ॒ತ್ರಸ್ತಯೋ॒ರ್ವರು॑ಣೋ ಯಾತ॒ಯಜ್ಜ॑ನೋಽರ್ಯ॒ಮಾ ಯಾ॑ತ॒ಯಜ್ಜ॑ನಃ ॥
ज्योति॑ष्मती॒मदि॑तिं धार॒यत्क्षि॑तिं॒ स्व॑र्वती॒मा स॑चेते दि॒वेदि॑वे जागृ॒वांसा॑ दि॒वेदि॑वे । ज्योति॑ष्मत्क्ष॒त्रमा॑शाते आदि॒त्या दानु॑न॒स्पती॑ । मि॒त्रस्तयो॒र्वरु॑णो यात॒यज्ज॑नोऽर्य॒मा या॑त॒यज्ज॑नः ॥
ಅ॒ಯಂ ಮಿ॒ತ್ರಾಯ॒ ವರು॑ಣಾಯ॒ ಶಂತ॑ಮಃ॒ ಸೋಮೋ॑ ಭೂತ್ವವ॒ಪಾನೇ॒ಷ್ವಾಭ॑ಗೋ ದೇ॒ವೋ ದೇ॒ವೇಷ್ವಾಭ॑ಗಃ । ತಂ ದೇ॒ವಾಸೋ॑ ಜುಷೇರತ॒ ವಿಶ್ವೇ॑ ಅ॒ದ್ಯ ಸ॒ಜೋಷ॑ಸಃ । ತಥಾ॑ ರಾಜಾನಾ ಕರಥೋ॒ ಯದೀಮ॑ಹ॒ ಋತಾ॑ವಾನಾ॒ ಯದೀಮ॑ಹೇ ॥
अ॒यं मि॒त्राय॒ वरु॑णाय॒ शंत॑मः॒ सोमो॑ भूत्वव॒पाने॒ष्वाभ॑गो दे॒वो दे॒वेष्वाभ॑गः । तं दे॒वासो॑ जुषेरत॒ विश्वे॑ अ॒द्य स॒जोष॑सः । तथा॑ राजाना करथो॒ यदीम॑ह॒ ऋता॑वाना॒ यदीम॑हे ॥
ಯೋ ಮಿ॒ತ್ರಾಯ॒ ವರು॑ಣಾ॒ಯಾವಿ॑ಧ॒ಜ್ಜನೋ॑ಽನ॒ರ್ವಾಣಂ॒ ತಂ ಪರಿ॑ ಪಾತೋ॒ ಅಂಹ॑ಸೋ ದಾ॒ಶ್ವಾಂಸಂ॒ ಮರ್ತ॒ಮಂಹ॑ಸಃ । ತಮ॑ರ್ಯ॒ಮಾಭಿ ರ॑ಕ್ಷತ್ಯೃಜೂ॒ಯಂತ॒ಮನು॑ ವ್ರ॒ತಂ । ಉ॒ಕ್ಥೈರ್ಯ ಏ॑ನೋಃ ಪರಿ॒ಭೂಷ॑ತಿ ವ್ರ॒ತಂ ಸ್ತೋಮೈ॑ರಾ॒ಭೂಷ॑ತಿ ವ್ರ॒ತಂ ॥
यो मि॒त्राय॒ वरु॑णा॒यावि॑ध॒ज्जनो॑ऽन॒र्वाणं॒ तं परि॑ पातो॒ अंह॑सो दा॒श्वांसं॒ मर्त॒मंह॑सः । तम॑र्य॒माभि र॑क्षत्यृजू॒यंत॒मनु॑ व्र॒तं । उ॒क्थैर्य ए॑नोः परि॒भूष॑ति व्र॒तं स्तोमै॑रा॒भूष॑ति व्र॒तं ॥
ನಮೋ॑ ದಿ॒ವೇ ಬೃ॑ಹ॒ತೇ ರೋದ॑ಸೀಭ್ಯಾಂ ಮಿ॒ತ್ರಾಯ॑ ವೋಚಂ॒ ವರು॑ಣಾಯ ಮೀ॒ಳ್ಹುಷೇ॑ ಸುಮೃಳೀ॒ಕಾಯ॑ ಮೀ॒ಳ್ಹುಷೇ॑ । ಇಂದ್ರ॑ಮ॒ಗ್ನಿಮುಪ॑ ಸ್ತುಹಿ ದ್ಯು॒ಕ್ಷಮ॑ರ್ಯ॒ಮಣಂ॒ ಭಗಂ॑ । ಜ್ಯೋಗ್ಜೀವಂ॑ತಃ ಪ್ರ॒ಜಯಾ॑ ಸಚೇಮಹಿ॒ ಸೋಮ॑ಸ್ಯೋ॒ತೀ ಸ॑ಚೇಮಹಿ ॥
नमो॑ दि॒वे बृ॑ह॒ते रोद॑सीभ्यां मि॒त्राय॑ वोचं॒ वरु॑णाय मी॒ळ्हुषे॑ सुमृळी॒काय॑ मी॒ळ्हुषे॑ । इंद्र॑म॒ग्निमुप॑ स्तुहि द्यु॒क्षम॑र्य॒मणं॒ भगं॑ । ज्योग्जीवं॑तः प्र॒जया॑ सचेमहि॒ सोम॑स्यो॒ती स॑चेमहि ॥
ಊ॒ತೀ ದೇ॒ವಾನಾಂ॑ ವ॒ಯಮಿಂದ್ರ॑ವಂತೋ ಮಂಸೀ॒ಮಹಿ॒ ಸ್ವಯ॑ಶಸೋ ಮ॒ರುದ್ಭಿಃ॑ । ಅ॒ಗ್ನಿರ್ಮಿ॒ತ್ರೋ ವರು॑ಣಃ॒ ಶರ್ಮ॑ ಯಂಸ॒ನ್ತದ॑ಶ್ಯಾಮ ಮ॒ಘವಾ॑ನೋ ವ॒ಯಂ ಚ॑ ॥
ऊ॒ती दे॒वानां॑ व॒यमिंद्र॑वंतो मंसी॒महि॒ स्वय॑शसो म॒रुद्भिः॑ । अ॒ग्निर्मि॒त्रो वरु॑णः॒ शर्म॑ यंस॒न्तद॑श्याम म॒घवा॑नो व॒यं च॑ ॥